DAIZEZE BEDʼEABARA AWUARA BABIBɄ

YUWẼRÃ 60 poaga audrebʉra, ¿kʼãrẽa wua yiwidʼi ẽ basi nekʼãrẽ omara? ¿Kʼãrẽa saserdotebara idu amaesi sintoismora mawũã kristiano bʼaita? Yuwẽrã aba yi papaba wikakirueda awuruʼa diadapadeara, ¿kʼãrẽta osi doba senti ẽ baita?

«Wua nekʼãrẽ oma yiwidʼi ẽ basi» (ABA DANSOU)

TOSIDA: 1938

DRɄA: BENÍN

IYI Ʉ̃RɄ JARABɄTA: NEKʼÃRẼ OMA YIWIDʼIBASI

MɄ̃ NEBɄRATA: Mʉ̃ra warisi So-Tchahoué, maʉ̃ra do kʼawabasi. Mamara ota neẽ baera wãbʉ jãbade, mamabemara nekobʉ beda wuabʉde, paka dapʉẽbʉde, kabrarãta, chinarata akʉza ibanarata. Mamabema derabʉ pajaba, bakuru omaba, edaʉde opanabari ladriyoba. Ẽbẽrarã mamabemara nekʼãrẽ mejãcha neẽmina, ẽbẽra kayiruara ẽ, pʉwʉrʉ zromanebʉ kĩrãkʼa.

Mʉ̃ wikabʉeda mʉ̃ yibarirabara mʉ̃ra bʉesi mʉ̃ta mʉ̃ mebẽãʉ̃me monjara deda. Mama nekʼãrẽ oma yiwidʼi jʉ̃drʉsi. Ewari berabari wãne Dudua yiwidʼi jʉ̃drʉsi, Duduara daizeze pʉwʉrʉ Yoruba, mʉ̃a osi altarta Duduaita. Mama badua sakripisiota obasi: aseite palmeradebemata, ñameta, korogota, eterreta, pusirãta akʉza wuabemara nedʉwʉrʉta. Mʉ̃a plata erbadara maʉ̃ne jõbibasi.

SÃWŨÃ AWUARABABISI DAIZEZE BEDʼEABARA MɄ̃ BEBɄRA: Mʉ̃a wãrĩnu kʼawuaside, kʼawuasi Daizeze Jeowatrʉ abapaibʉta. Daizezeʼarãra Jeowatrʉ abapaibʉta. Iyara kãga ẽ nekʼãrẽ oma yiwidʼira (Éxodo 20:4, 5; 1 Corintios 10:14). Maʉ̃ ũdubʉrʉba kʼawuasi kʼãrẽta oibarabasita, mesera balbʉeibarabasi mʉ̃a nekʼãrẽ oma erbʉra. Mawũã wua wã ẽ basi jaibanarainʉ akʉza beidara nekʼãrẽ oẽ basi.

Maʉ̃ iduaribita zare basi 60 poaga audrebasi baera nekʼãrẽ oma yiwidʼibʉta. Adewara mʉ̃ neũdukʼawuarata, mʉ̃ mebẽrãta, mʉ̃ de kʼawapanʉrata mʉ̃ kʼarea ipidapanasi. Mʉ̃a widisi Daizezeʼa mʉ̃aʼa diamarẽã zareata mawũã nebia oita. Proverbios 18:​10​ba mʉ̃aʼa mejãcha diasi so zareata «Daizeze trʉ̃ra de drasoanʉmʉ kĩrãkʼabʉ. Ẽbẽra biaratrʉ iyima wãbʉ akʉza mama kʼareba ũdubʉ».

Adewara ãba yi jʉrebarima wãiba mʉ̃ra mejãcha kʼarebasi mama ũdusi baera ẽbẽrarã yiya kãga ũdubipanʉta. Adewara mʉ̃a ũdusi ãyira mejãcha zarea opanʉta Daizeze Bedʼeaba jarabʉ kĩrãkʼa bʼaita. Maʉ̃ba mʉ̃aʼa kʼawuabisi Jeowa ʉ̃rʉ Kʼawuabipanʉrãra religion arata.

MɄ̃A NEBIATA ŨDUZEBɄRɄ: Daizeze Bedʼearadebemaba mʉ̃ra kʼarebabʉrʉ mʉ̃ wũãwũãrabawara audre bia bʼaita. Atiara mʉ̃a ne zʉgʉa abadata ãĩ bʉebʉrʉ kĩrãkʼabʉrʉ. Nããrãra mʉ̃a gastabasi platara nekʼãrẽ oma yiwidʼita, maʉ̃rabara mʉ̃ kʼareara nekʼãrẽ oẽ basi. Atiara mʉ̃ra Jeowa odebʉ akʉza iyara bedʼea zroma dayirãba erbʉra jõbiyi ewari jõmaʉ̃nẽ (Revelación [Apocalipsis] 21:3, 4). Atiara nekʼãrẽ oma yiwidʼi ẽ, awuarabʉrʉ yiwidʼibʉ Daizeze Jeowa. Mʉ̃ra iyiʉ̃mera aduʼabʉ akʉza sobia.

«Wikayirudeba Daizezeta jʉrʉ jʉ̃drʉsi» (SHINJI SATO)

TOSIDA: 1951

DRɄA: JAPÓN

IYI Ʉ̃RɄ JARABɄTA: SASERDOTE SINTOISTABASI

MɄ̃ NEBɄRATA: Mʉ̃ra pʉwʉrʉ Fukuokade warisi. Mʉ̃ yibarirabara Daizezeta jʉrʉbasi, maʉ̃ kʼarea mʉ̃aʼa jaradiasida religion sintoistata. Maʉ̃ kʼarea krĩchabasi mʉ̃ ẽdrʉita akʉza wuabemara kʼarebaita. Ewari aba dai propesorba widisi kʼãrẽta okĩrãpanʉta dai warichʉbidade. Mʉ̃me ãba estudiabadarabara jarasi ãyira sientipiko bakĩrãbʉta akʉza nekʼãrẽ awuara okĩrãbʉta. Mamina mʉ̃a jaraside mʉ̃ Daizeze ode bakĩrãbʉta jõmaʉ̃ba ipidasida maʉ̃ kʼarea.

Kolegio jõside, estudia jʉ̃drʉsi propesor religionebema bʼaita. Mama mʉ̃a ũdukʼawuasi saserdote aba religion sintoistadebemata. Mʉ̃a ũdubʉrʉza iyi baribʉde librota lebasi, maʉ̃ librora paisosoa chuasi. Mʉ̃a yi akʉmabasi iya kʼãrẽ lebadara, maʉ̃ kʼarea iya mʉ̃aʼa widiside, mʉ̃a panʉsi iya kʼãrẽ ʉ̃rʉ akʉbʉta. Mʉ̃a jarasi: «Daizeze Bedʼea». Aramaʉ̃ta iya mʉ̃aʼa jarasi: «Religion sintoistadebema saserdote bakĩrãbʉbʉrʉ leibara naʉ̃ librota».

Aramaʉ̃ta mʉ̃ara mesera eda wãsi Daizeze Bedʼeara. Mõbe bʉsi mʉ̃a audre ũduseabʉmae. Idibʉrʉ mʉ̃ra templodebema saserdotebasi, osi mʉ̃a kãgabadata.

Ewari berabari wãne mʉ̃a kʼawua wãsi mʉ̃me ãbapanarãra saserdoterabara wuabemara ẽbẽrarã krĩcha ẽ basita. Maʉ̃ranebema ʉ̃kʉrʉbara ĩjãta ũdubida ẽ basi. Maʉ̃ne dai nokʼodebema abaʉba jarasi: «Bʉta bia wãkĩrãbʉbʉrʉ bedʼeara pilosopia ʉ̃rʉ, bedʼearãra bʉa ĩjãbʉ ʉ̃rʉ».

Maʉ̃ba mʉ̃ra mejãcha sopʉasi. Mʉ̃a mʉ̃ templo amae ẽ basimina, jʉrʉ wãsi awurura religionʼrata. Mʉ̃a awuru religion jʉrʉbʉde mʉ̃ra audre sopʉa wãsi. Mʉ̃a ũdusi miõba wãrĩnu jara ẽãta.

SÃWŨÃ AWUARABABISI DAIZEZE BEDʼEABARA MɄ̃ BEBɄRA: 1988de, mʉ̃a ũdukʼawuasi ẽbẽra budistata, maʉ̃ba mʉ̃aʼa jarasi Daizeze Bedʼeata akʉmarẽã, maʉ̃ne mʉ̃a kĩrãbesi saserdote sintoistaba jaradata. Maʉ̃ne mʉ̃a ũrĩsi iyi ũrãgʼata, mõbe akʉ jʉ̃drʉsi. Mejãcha akʉkĩrãbasi baera ũnadrʉbasi Daizeze Bedʼea akʉbʉta.

Mʉ̃a mawũã ledaba okĩrã obisi Daizezeʼa yiwidʼita Mateo 6:​9-​13​ba jarabʉ kĩrãkʼa. Ũmadaʉ ũme berabaribʉrʉza iyabaʉ bedʼeata jarabasi, eda Mateo 6:9-13​ba jarabʉ kĩrãkʼa mʉ̃ santuariode trajasidebida.

Mʉ̃a kĩrãbebʉ Daizeze Bedʼea akʉbʉrʉza mʉ̃a mejãcha widita erbasi. Maʉ̃nera mʉ̃ra juwa jidabasi akʉza kʼawuabasi Jeowa ʉ̃rʉ Kʼawuabipanʉrãbara Daizeze Bedʼeara bari jaradiabʉta. Mʉ̃ kimata maʉ̃rabawara Daizeze Bedʼea akʉbaribasi baera. Maʉ̃ne mʉ̃ra Jeowa ʉ̃rʉ Kʼawuabipanʉrã abaʉ̃me bedʼeasi akʉza maʉ̃ʼa mejãcha bedʼeata widisi, iyara jõma Daizeze Bedʼeadeba panʉbasi mʉ̃a bedʼea widibadara. Maʉ̃ tẽã iya jʉrʉsi awuru Jeowa ʉ̃rʉ Kʼawuabipanʉrãba Daizeze Bedʼea mʉ̃aʼa jaradiamarẽã.

Maʉ̃ audre ẽãne mʉ̃ra ãba yi jʉrebarima wã jʉ̃drʉsi. Maʉ̃ne mʉ̃a ũdusi Jeowa ʉ̃rʉ Kʼawuabipanʉrã mʉ̃a naena bia eda ẽ badata. Mawũãsidu ãyara mʉ̃ra bia edasida.

Mama ãba yi jʉrebari deda kʼawuasi Daizezebara kãgabʉta, yumakẽrãbara yi kimara bia edaibarata akʉza wawiata ũdubibarata. Mʉ̃ra saserdote baera nekʼãrẽ mejãcha oibarabasi, maʉ̃ne akʉ ẽ basi mʉ̃ kima sãwũãbʉta akʉza mʉ̃ wũãwũãrata. Maʉ̃ne kʼawuasi mʉ̃a wuabemara ẽbẽrarãbara jarabʉra ũrĩbasita, mamina mʉ̃ kimaba jarabadara jipa ũrĩkabasi.

Mʉ̃a Daizeze Bedʼea kʼawua akʉ wãba, audre Jeowa kʼawa sentibasi ewariza akʉza ʉ̃kʉrʉ testorata mʉ̃ soidu jʉ̃ẽbasi, maʉ̃ranebemata Romanos 10:​13​ba jarabʉta: «Ẽbẽra ‹jõma Jeowa trʉ̃ jarabʉrʉra, bei ẽã ẽdrʉya›». Mʉ̃a warrarainʉba Daizeze Bedʼeara kʼawuakĩrãbasi maʉ̃ta idibʉrʉ kʼawua jʉ̃drʉsi.

Mʉ̃ra mama trajabʉde bia sentiba ẽ basi akʉza krĩcha zroma obasi mʉ̃ra wuabemaraba kʼãrẽ jarai kʼarea, mʉ̃ta ãĩ wãra mamaʉ̃ba. Mʉ̃a naena krĩchabasi sintoista religion idubʉita awuru religione wãrĩnuta ũdura. 1989de idubʉsi mʉ̃ religionʼra, maʉ̃ne mʉ̃ara ĩjãsi wãrĩnu Jeowaba kʼarebaita mʉ̃ra.

Mʉ̃ita maʉ̃ra zarebasi. Nokʼora mamabemarabara jarasida idubʉ ẽ bamarẽã maʉ̃ra. Akʉza ibia jarada ẽ basi mʉ̃ ʉ̃rʉ. Maʉ̃ne mʉ̃itara audre zarebasi mʉ̃ yibarira jaraita. Mʉ̃a kʼawuabasi baera mʉ̃ yibarira jaraita mejãcha krĩcha zroma obasi akʉza maʉ̃ba sopʉabasi, adewara mʉ̃ jĩrʉrasida mejãcha pididia totosi. Mʉ̃ ode wãne Jeowaʼa yiwidʼibasi iya kʼarebamarẽã.

Perabiba jara ẽ basi. Jeowaʼa mejãcha yiwidʼida tẽã, jarasi mʉ̃ zezeʼa. Maʉ̃ne mʉ̃a jara ũrĩbisi mʉ̃ zezeʼa awuru religione wãrĩnuta ũdusita akʉza idubʉita religion sintoistata. Mʉ̃a mawũã jarabʉrʉ kʼarea, mʉ̃ zezera sopʉasi akʉza kʼãrẽ jara ẽ basi iyira. Akʉza mʉ̃ mebẽrãta zesi mʉ̃aʼa jaraita mʉ̃a religion erbʉta idubʉ ẽ bamarẽã. Mʉ̃a ãyira sopʉabiamabasi. Maʉ̃ne akʉza Jeowaba kãgabʉta idubʉamabasi. Ewari berabari wãne mʉ̃ mebẽrãbara kʼãrẽ jara ẽã asi mʉ̃a obʉ ʉ̃rʉ.

Mʉ̃ara maʉ̃ templo awa idubʉibarabasi ẽ; awuarabʉrʉ awuara krĩchaibarabasi akʉza. Mʉ̃ra naweda saserdotebasi baera zarebasi maʉ̃ ʉ̃rʉ krĩcha ẽ baita. Jõma maʉ̃ta kĩrãbebasi.

¿Kʼãrẽba kʼarebasi mʉ̃ra maʉ̃ ʉ̃rʉ krĩcha ẽ baita? Nekʼãrẽ ũme oiba. Nããrãra mʉ̃a sintoistaita nekʼãrẽ erbadata jõma babekʉasi akʉza nekʼãrẽ mejãcha bari edadasida. Yi ũmeta, mebẽrãbawara ewari mejãcha berabariba, maʉ̃ne mebẽrãba mʉ̃ra mejãcha kʼarebasi mʉ̃a nãã kʼãrẽ obadara wiña wiñane amaeita.

MɄ̃A NEBIATA ŨDUZEBɄRɄ: Nããra mʉ̃ara mʉ̃ kimara bia akʉ ẽ basi akʉza mʉ̃ wũãwũãrasida, mamina Daizeze Bedʼeaba mʉ̃ra kʼarebasi mʉ̃ kima akʉza mʉ̃ wũãwũãrabawara audre ãba bʼaita. Tẽã mʉ̃ kimasida Daizeze ode wãsi akʉza mʉ̃ wũãwũãrasida. Atiara daira ãbaʉta Daizezeʼa yiwidʼipanʉ.

Mʉ̃ra warrarainʉba Daizeze ode wãkĩrãbasi, atiara maʉ̃ta obʉ akʉza wuabemarata kʼarebabʉ. Mʉ̃a Jeowaʼa mejãcha biga diakĩrãbʉ iya kʼarebasi baera kʼãwũã iyi ũdukʼawuaita.

«Mʉ̃ra dobabʉta sentibasi» (LYNETTE HOUGHTING)

TOSIDA: 1958

DRɄA: SUDÁFRICA

IYI Ʉ̃RɄ JARABɄTA: DOBA AMAESIDATA KRĨCHABASI

MɄ̃ NEBɄRATA: Mʉ̃ra tosida pʉwʉrʉ zakede, maʉ̃ trʉ̃ra Germiston, mamara ẽbẽrarã kayiruara mejãcha neẽbasi. Mʉ̃ yibariraba kʼawua ẽ basi baera mʉ̃ sãwũã dapʉẽita awurua diasida. Maʉ̃nera mʉ̃ra 14 ewaribasi todapeadata. Mʉ̃a krĩchabasi mʉ̃ dapʉẽnarãra mʉ̃ yibarira arabasita, mamina mʉ̃a kʼawuaside ãyira mʉ̃ yibari ẽ basita dobabʉta sentisi, maʉ̃ba krĩchasi abarikabʉ ẽãta ãyi kĩrãkʼa akʉza ãya mʉ̃ sãwũã sentibʉra kʼawua ẽ baita.

Mʉ̃ 16 poaga babʉrʉdera, wãsi kʼawua ẽ. Mʉ̃ 17 poaga babʉrʉde sigarriyota do jʉ̃drʉsi. Akʉza jari wẽrãra telebisordebʉ kĩrãkʼa chĩã wiña bakĩrãbasi. Adewara mʉ̃ra 19 poaga babʉrʉde, wãsi awuru pʉwʉrʉ Johannesburgoʼeda trabajo kʼarea. Maʉ̃ta audre ẽãne ẽbẽrarã imitia bedʼeabʉbawara, sigarriyo dobʉbawara akʉza semanaza itua dobʉbawarabasi baera mʉ̃abida abarika ojʉ̃drʉsi.

Maʉ̃ne mʉ̃ra ejersisio obasi, gimnasiata, squashta akʉza futbolta jemenebasi. Mʉ̃ra mejãcha trajasi akʉza zarea osi maʉ̃ne bia oita, maʉ̃ kʼarea wuabemaraba krĩchabasi mʉ̃ara mejãcha kʼawuabʉta komputador ʉ̃rʉ. Mʉ̃ra biabasi akʉza kʼãrẽ wae ẽ basi mʉ̃mera. Maʉ̃ba wuabemaraba krĩchapanasi mʉ̃ bebʉdera bia wãta mʉ̃ra, mamina mʉ̃ra wãrĩnu bʼaira sopʉabasi, bia senti ẽ basi akʉza kʼãrẽ waebʉ kĩrãkʼabasi mʉ̃ bebʉde.

SÃWŨÃ AWUARABABISI DAIZEZE BEDʼEABARA MɄ̃ BEBɄRA: Mʉ̃a Daizeze Bedʼea akʉ jʉ̃drʉsidera, mʉ̃a kʼawuasi Daizezera ẽbẽra biata akʉza iya bia akʉbʉta wuabema ẽbẽrarã. Maʉ̃ba iyi Bedʼeara diasita dayirãba kʼawuamarẽã akʉza Daizeze Bedʼeara karta kĩrãkʼabʉ, iya jaradiabʉ dayirãta sãwũã bia wãibarata (Isaías 48:​17, 18). Mʉ̃a kʼawuasi mʉ̃ bebʉra awuara oibarabasita Daizeze Bedʼeaba jaradiamarẽã kãgabasibʉrʉ.

Maʉ̃ oira idubʉibara basi mʉ̃ neũdukʼawuara nãã erbadata. Proverbios 13:​20​ba jarabʉ kĩrãkʼa: «Yi buru biabawara ãbabʉra buru biabayi, mamina yi kʼẽrẽpa bʉ ẽ bawara ãbabʉra bia wã ẽ bayi». Maʉ̃ testoba jarabʉra mʉ̃ara wãrĩnu ojʉ̃drʉsi. Mʉ̃a jʉrʉsi neũdukʼawuara Jeowaʼa kãgabʉta, mawũã iduaribisi mʉ̃a nãã neũdukʼawua erbadara.

Mamina mʉ̃itara mejãcha zareabasi sigarriyo dobʉ iduaribita. Maʉ̃ obʉeda mʉ̃ra mejãcha kakua osi (14 kg). Mawũã kakua obʉba mʉ̃ra kʼãrẽ ẽ kĩrãkʼa sentibasi. Maʉ̃ba 10 poaga berabarisi mʉ̃ jẽda chĩã bʼaita. Mʉ̃a kʼawuabasi maʉ̃ra iduaribibarata, maʉ̃ba Jeowaʼa badua yiwidʼibasi akʉza iya mʉ̃aʼa diasi zareata maʉ̃ iduaribita.

MɄ̃A NEBIATA ŨDUZEBɄRɄ: Atia mʉ̃ra zrogabʉ akʉza mʉ̃a erbʉba sobiabʉ. Atiara mʉ̃ sobia bʼaira jʉrʉ ẽ trabajo biata, platata akʉza wuabemara nãã bia baita. Atiara mʉ̃ara mʉ̃ kimaʉ̃meba sobia jaradiapanʉ wuabemara ẽbẽrarã. Maʉ̃ne mʉ̃ ãba trajabada ẽbẽrarã ũbea wãrĩnuta jaradiabʉrʉ, atiara ãyisida Jeowa ʉ̃rʉ Kʼawuabipanʉrã. Akʉza mʉ̃ yibarira mʉ̃ dapʉẽna ãyi bei nãã wiña bedʼeasi Jeowaba ẽbẽrarã jẽda piradrʉbi ʉ̃rʉ akʉza ẽjũã kĩrãwãreã ʉ̃rʉ.

Mʉ̃ra atiara dobabʉta sentibʉ ẽ, Jeowa ãbabʉta krĩchabʉ baera. Mʉ̃ra atiara sentibʉ Jeowa pʉwʉrʉde edabʉta mama ũdubʉ baera zezeta, papata akʉza mebẽrãta (Marcos 10:​29, 30).

[DIBUJO]

Mʉ̃a wãrĩnu ũdusi Jeowa ʉ̃rʉ Kʼawuabipanʉrãbara kãgata ũdubibʉta

[DIBUJO]

Templo mʉ̃a sintoista obadamae, templo religion sintoistadebemata