Bible No Sesa Nyimpa N’abrabɔ

ƆYƐƐ dɛn na ɔbaa bi a ɔwɔ ne mfe 60 mu gyaa abosonsɔr? Ebɛnadze na ɔkaa Shinto sɔfo bi ma ogyaa edwuma a ɔyɛ wɔ Shinto asɔrdan mu ma ɔbɛyɛɛ Christiannyi ɔsɛmpakafo? Osii dɛn na ɔbaa bi a obi bɛtseew no fii n’awofo nkyɛn wɔ no mbofrase pɛɛ no tumii gyinaa dɛ mbrɛ nna ɔtse nka dɛ obiara apow no no ano? Susu dza dɛm nkorɔfo yi mu biara kãe no ho hwɛ.

“Mennda Ho Nnsom Abosom Bio.”​—ABA DANSOU

AFE A WƆWOO NO: 1938

ƆMAN A OFI MU: BENIN

TSEBEA A NNA ƆWƆ MU: NNA ƆSOM ABOSOM

ME NKAN ABRABƆ: Minyinii wɔ So-Tchahoué, ekuraba bi a ɔda ɔwora mu a ɔbɛn nsutaae bi ho. Hɔn a wɔtsetse ekuraba no ase no mu bi yɛ afarfo, binom so nyɛn mbowa bi tse dɛ anantwi, mpɔnkye, nguan, mpreko nye ntɛkyerɛbowa. Kaar kwan biara nnyi hɔ, ntsi nyimpa a wɔwɔ hɔ no dze hɛmba na wɔdze dzi akɔnaaba. Nyimpa a wɔwɔ hɔ no, dodowara dze ndua nye nkyɛkyɛr na wɔdze si hɔn adan, naaso binom so dze brekese si hɔn adan. Nyimpa a wɔwɔ hɔ no mu fã kɛsenara yɛ ehiafo. Naaso nsɛmbɔndzi nnyi hɔ dɛ nkurow akɛse mu.

Aber a nna meyɛ abofra no, me papa dze emi na mo nuabaa kɔtoo abosomfi, na iyi maa yɛhyɛɛ abosonsɔr ase. Naaso aber a minyinii no, mefaa Yorubafo bosom bi a wɔfrɛ no Dudua (Oduduwa) no dɛ mo bosom. Misii dan maa dɛm bosom yi, na nna metaa dze bayer, ngo, nwaba, nkokɔ, mborɔnoma, nye mbowa afofor bɔ afɔr ma no. Nna ndzɛmba a medze bɔ afɔr yi no bo yɛ dzen, na iyi ntsi nna sika nnka me nsamu.

MBRƐ BIBLE NO SESAA M’ABRABƆ: Aber a mehyɛɛ ase sũaa Bible no, mubohun dɛ Jehovah nye nokwar Nyankopɔn no. Mesanee so hun dɛ Jehovah mmpɛ dɛ yɛbɔsom abosom. (Exodus 20:​4, 5; 1 Corinthfo 10:14) Nna minyim dza ɔsɛ dɛ meyɛ. Ntsi motoow m’ehonyi ahorow no nyina gui, na biribiara annka me fie hɔ a nna ɔfa abosonsɔr ho. Migyaa dɛ mibebisa abosom no hɔ adze, na amandze ahorow a wɔyɛ ma abosom no nye eyiyɛ amandze ahorow no so migyaa yɛ.

Nna ɔnnda famu mma me dɛ mebɛyɛ nsesa, osiandɛ nna meyɛ ɔbaa a mowɔ me mfe 60 mu. M’anyɛnkofo, m’ebusuafo, nye mo mpotamu hɔfo soɛree tsiaa me na wodzii moho fɛw. Naaso mobɔɔ Jehovah mpaa serɛɛ no hɔ ahoɔdzen a medze bɛyɛ dza ɔtsen. Asɛm a ɔwɔ Mbɛbusɛm 18:​10 no hyɛɛ me dzen. Hɔ kã dɛ: ‘Jehovah ne dzin yɛ aban dzendzen: ɔtseneneenyi guan kɔ mu a, ɔyɛ sɔkyee.’

Adze kor so a ɔboaa me nye Jehovah Adasefo nhyiamu ahorow a nna mokɔ no. Hɔ na muhun mbrɛ Christianfo hɔn dɔ si tse, na m’enyi gyee osiandɛ dɛm nkorɔfo yi bɔ mbɔdzen dɛ wɔdze Bible mu gyinapɛn a ɔkrɔn no bɔbɔ hɔn bra. Dza mubohunii no maa mebɛgyee dzii dɛ Jehovah Adasefo hɔn som na ɔyɛ nokwar som.

MBRƐ MEENYA DO MFASO: Bible mu ngyinadonsɛm a medze bɔ me bra no aboa me ma menye me mba enya ebusuabɔ pa. Afei so, metse nka dɛ adzesoa duudur bi so efi mo do. Nkan no, osian abosom a nna mosom hɔn no ntsi nna sika nnka me nsamu. Naaso seseiara dze mosom Jehovah a ɔma yenya hɛn haw nyina n’ano edur no. (Nyikyerɛ 21:​3, 4) M’enyi agye papaapa dɛ mennda ho nnsom abosom bio, na mbom mosom Jehovah! Ɔno na ɔama menya guandɔbea nye bambɔ ankasa.

“Mahwehwɛ Nyankopɔn Fitsi Mo Mbofrase.”​—SHINJI SATO

AFE A WƆWOO NO: 1951

ƆMAN A OFI MU: JAPAN

TSEBEA A NNA ƆWƆ MU: SHINTO SƆFO

ME NKAN ABRABƆ: Minyinii wɔ kurow ketseaba bi a ɔwɔ Fukuoka Mantɔw mu. Nna m’awofo mmfa hɔn nyamesom nndzi agor; na wɔtsetsee me mbrɛ ɔbɛyɛ a mibedzi Shinto abosom no nyi fitsi mo mbofrase. Dɛ abanyimbasiaba no, nna metaa dwen mo nkwagye ho, na nna mowɔ ɔpɛ a no mu yɛ dzen dɛ mobɔboa nkorɔfo a hɔnho akyer hɔn no. Mekaa dɛ aber a nna mowɔ mfitsiase skuul no, hɛn kyerɛkyerɛnyi bisaa hɛn dza sɛ yenyin a yɛbɛyɛ ho asɛm. Nna mo skuulfo no dze botae esisi hɔn enyiwa do. Binom kãa dɛ sɛ wonyin a wɔbɛyɛ abɔdzenyansahufo. Naaso emidze mekãa dɛ sɛ minyin a mobɔsom Nyankopɔn. Obiara sereew me.

Aber a muwiee ntoado skuul no, mokɔr asɔfodzi skuul. Ber a mowɔ skuul hɔ no, mihyiaa Shinto sɔfo bi. Nna ɔdze ber a ɔdze gye n’ahom no kenkan buukuu bi a n’ekyir yɛ tuntum. Da kor bi obisaa me dɛ, “Sato, inyim dɛm buukuu yi a?” Nna muhu buukuu n’ekyir ntsi mekãa dɛ, “Ɔyɛ Bible.” Ɔkãa dɛ, “Obiara a ɔpɛ dɛ ɔyɛ Shinto sɔfo no, ɔsɛ dɛ ɔkenkan dɛm buukuu yi.”

Ntsɛmara na mokɔtɔɔ Bible no bi. Medze Bible no hyɛɛ beebi a ohia me papaapa wɔ mo nwomakorabea hɔ, na mohwɛɛ do yie. Naaso mennya ber annkenkan, osiandɛ nna adagyer nnyi skuul hɔ koraa. Aber a muwiee skuul no, mekɛyɛɛ sɔfo wɔ Shinto asɔrdan mu. Iyi nye edwuma a aber a nna meyɛ abofra no nna ɔda m’akoma do dɛ mebɛyɛ.

Naaso annkyɛr na mubohun dɛ, ɔnnyɛ dza nna mohwɛ kwan dɛ mibenya dɛ Shinto sɔfo no na minyae. Asɔfo no mu dodowara nnda ɔdɔ edzi, na wɔnndwen afofor ho so. Nna hɔn mu pii so nnyi gyedzi. Hɔn a wɔhwɛ hɛn do no mu kor mpo kãa kyerɛɛ me dɛ: “Sɛ epɛ dɛ etsena ha dze a, ɔsɛ dɛ ekã nyansapɛ nkotsee ho asɛm. Ha dze wɔnnkã gyedzi ho asɛm.”

Nsɛm a ɔtse dɛm a ɔkãe no maa enyigye a nna mowɔ wɔ Shintosom mu no tui yewee koraa. Ɔwɔ mu dɛ nna meda ho ara yɛ edwuma wɔ asɔrdan no mu dze naaso mokɔr do yɛɛ nhwehwɛmu faa ɔsom ahorow ho. Naaso, ɔtse dɛ dza nna munnhu biribi papa biara wɔ no mu biara mu. Mpɛn dodow a meyɛɛ ɔsom ahorow no mu nhwehwɛmu no, mpɛn dodow no ara na m’abaw mu bui. Mebɛtsee nka dɛ ɔsom biara nnyɛ nokwar.

MBRƐ BIBLE NO SESAA M’ABRABƆ: Wɔ afe 1988 mu no, mihyiaa Buddhanyi bi, na ɔhyɛɛ me nkuran dɛ menkenkan Bible no. Iyi maa mekaa Shinto sɔfo no a mfe bi a abɛsen kɔ no ɔhyɛɛ me nkuran dɛ menkenkan Bible no. Misii gyinae dɛ mibetsie n’afotu no. Aber a mehyɛɛ ase dɛ merekenkan Bible no, annkyɛr koraa afei dze nna menntse ho gyaa. Ɔtɔfabi a nna mekenkan Bible no anafua mũ no nyina kesi anapa a mubohu dɛ ewia epue wɔ mo ntokura mu.

Dza mekenkanee no maa minyaa ɔpɛ dɛ mobɔbɔ Nyankopɔn a Bible no kã noho asɛm no mpaa. Medze mpaabɔ nhwɛdo a wɔakã ho asɛm wɔ Matthew 6:​9-​13 no hyɛɛ ase. Ndɔnhwer ebien biara nna mobɔ dɛm mpaa yi​—aber mpo a nna mereyɛ mo dwumadzi ahorow wɔ Shinto asɔrdan mu no.

Nna mowɔ nsɛmbisa pii fa dza nna mekenkan no ho. Dɛm aber yi dze nna mawar, na nna minyim dɛ Jehovah Adasefo kyerɛkyerɛ nkorɔfo Bible no, osiandɛ nna wɔabɛsera me yer pɛn wɔ mber bi a abɛsen kɔ no. Mohwehwɛɛ Adasefo no mu kor, nna ɔyɛ ɔbaa, na mibisaa no nsɛm pii. M’enyi gyee aber a ɔdze Bible no yii me nsɛmbisa no mu biara ano no. Afei, ɔyɛɛ nhyehyɛɛ ma Adasefo mbanyimfo no mu bi nye me bosũaa Bible no.

Ɔno ekyir ber tsiabaa bi no, mehyɛɛ ase kɔr Jehovah Adasefo nhyiamu ahorow no bi. Ahyɛse no dze m’adwen annkɔ do, naaso ekyir yi mubohun dɛ Adasefo yi a menye hɔn ehyia mu yi ara na mber bi a abɛsen kɔ no manntsew m’enyim annkyerɛ hɔn no. Dza nna esi nyina ekyir no, wɔgyee me fɛw do, na m’enyi gyee papaapa.

Nhyiamu a ɔtsetse dɛm ase no, mubohun dɛ Nyankopɔn hwɛ kwan dɛ kunnom dɔ hɔn yernom na wodzi hɔn ebusua mufo so nyi. Dɛm aber no nyina osian asɔfodzi a nna medze esi m’enyiwa do ntsi, nna mebu m’enyi egu me yer nye hɛn mba beenu no do. Mubohun dɛ metaa yɛ aso tsie nkorɔfo a wɔba asɔrdan mu hɔ bɔsom no, naaso nna minnyaa ber nntsie me yer n’asɛm da.

Aber a musũaa adze kɔr enyim no, muhun Jehovah ho adze pii na ɔmaa motwee bɛɛn no kɛse. Asɛm a ɔwɔ Romefo 10:​13 no kaa m’akoma papaapa. Hɔ kã dɛ: ‘Obiara a ɔbɔbɔ Jehovah dzin no obenya nkwa.’ Mahwehwɛ Nyankopɔn fitsi mo mbofrase, na afei dze, mehu no!

Afei mebɛtsee nka dɛ asɔrdan mu hɔ mmfata me. Ahyɛse no, dza nna nkorɔfo bɔdwen afa moho aber a mefi Shintosom mu no haaw me. Naaso aber nyina nna mekã kyerɛ moho dɛ, sɛ muhu ɔsom a wɔsom nokwar Nyankopɔn no a mibegyaa asɔfodzi akɔsom no. Ntsi wɔ afe 1989 mu no, misii gyinae dɛ mibetsie me tsibowa. Migyaa edwuma a nna meyɛ wɔ asɔrdan mu hɔ no na medze moho hyɛɛ Jehovah ne nsa.

Mirigyaa asɔfodzi no, nna ɔnnda famu mma me. Asɔr mpanyimfo no kasaa tsiaa me, na wɔbɔɔ mbɔdzen dɛ wɔbɛhyɛ me ma maatsena hɔ. Naaso dza nna ɔyɛ dzen ma me papaapa nye dɛ mebɛkã ho asɛm akyerɛ m’awofo. Menam kwan do rokɔ m’awofo hɔn fie no, moho yeraw me araa ma metsee nka dɛ m’akoko hyehye me na me nan nyina keka bobɔ mu! Migyinaa kwan do mpɛn pii na mobɔɔ Jehovah mpaa hwehwɛɛ ahoɔdzen.

Mudur m’awofo hɔn fie no, nna musuro dɛ mobɔbɔ asɛm no do. Ɔkyɛɛr kakra, naaso osiandɛ mobɔɔ mpaa mpɛn pii ntsi ewiei koraa no mekãa asɛm no kyerɛɛ me papa. Mekãa kyerɛɛ me papa dɛ mehu nokwar Nyankopɔn no, ma ntsi mefi Shintosom mu mbrɛ ɔbɛyɛ a mubotum akɔsom no. Ɔyɛɛ me papa nwanwa na no werɛ howee. M’ebusuafo afofor baa fie na wɔbɔtoow guu m’asomu dɛ mensesa m’adwen. Ɔwɔ mu dɛ nna memmpɛ dɛ mebɛyɛ adze a ɔbɛma m’ebusuafo edzi yaw dze, naaso ber kor no ara nna minyim dɛ Jehovah a mobɔsom no no nye adze a ɔtsen a ɔsɛ dɛ meyɛ. Mber bi ekyir no, m’ebusuafo gyee me gyinaesi no too mu.

Ɔwɔ mu dɛ nna monnkɔ asɔrdan no mu hɔ bio dze, naaso nna ɔsɛ dɛ meyɛ nsesa wɔ mo nsusui mu. Nna meyɛ m’adze nyina dɛ ɔsɔfo ma ntsi nna ɔyɛ dzen ma me dɛ mebɛsesa. Mobɔɔ mbɔdzen dɛ mibeyi m’adwen efi Shintosom do, naaso beebiara a mobɔkɔ no, nna ɔtse dɛ muhu biribi a ɔma mekaa me nkan abrabɔ no.

Ndzɛmba ebien bi na ɔboaa me ma medzee moho. Odzi kan, motɔɔ mo bo ase hwehwɛɛ biribiara a ɔwɔ me fie hɔ a ɔnye me nkan som no wɔ ebusuabɔ no: mehyeew nwoma ahorow, mfonyin, na ɔsom mu nkaadze a no bo yɛ dzen no mpo. Otsĩa ebien, mobɔɔ mbɔdzen hwehwɛɛ ho kwan a ɔbɛma menye Adasefo no abɔ fɛkuw. Hɔn fɛkuw nye mboa a wɔdze maa me no boaa me pii. Nkakrankakra, m’adwen fii me nkan abrabɔ no do.

MBRƐ MEENYA DO MFASO: Nna metaa gya me yer na me mba hɔ, na iyi maa wɔyɛɛ ankonam. Naaso aber a mehyɛɛ ase nyaa mber maa hɔn dɛ mbrɛ Bible no kyerɛkyerɛ kunnom dɛ wɔnyɛ no, yɛabɛn hɛnho papaapa. Mber bi ekyir no, me yer bɛkaa moho, na ɔnye me rosom Jehovah. Ndɛ, yɛnye hɛn babanyin, hɛn babaa nye no kun abɔ mu rosom wɔ nokwar som mu.

Sɛ mutwa m’enyi hwɛ m’ekyir, na modwen botae a medze sii m’enyi do dɛ mobɔsom Nyankopn no na maaboa afofor no ho a, muhu dɛ me nsa aka dza mohwehwɛe no nyina​—na menya abor do mpo. Munnhu asɛm a mennkã mfa nda Jehovah ase.

“Nna Metse Nka Dɛ Mahwer Biribi.”​—LYNETTE HOUGHTING

AFE A WƆWOO NO: 1958

ƆMAN A OFI MU: SOUTH AFRICA

TSEBEA A NNA ƆWƆ MU: ƆTSEE NKA DƐ WƆAPOW NO

ME NKAN ABRABƆ: Wɔwoo me wɔ Germiston, ɔyɛ kurow a wotu famu egudze wɔ hɔ, naaso kurow no mufo no nnyi sika pii, na nsɛmbɔndzi beberee so nnyi kurow yi mu. Nna m’awofo tse nka dɛ wonnkotum ahwɛ me, ntsi wɔdze me maa obi dɛ ɔntsetse me dɛ ne ba. Nna meyɛ abɔdomaba koraa, nna medzi ndafua 14 aber a awarfo bi a wɔdɔ nyimpa bɛpaa me abayɛ no. Mefaa hɔn dɛ me maame na me papa. Naaso ne nyina ekyir no, aber a mubohun me nkyir no, metsee nka dɛ wɔapow me. Mebɛtsee nka dɛ osiandɛ awarfo yi nnyɛ m’awofo ankasa ntsi, wɔnntse me ase.

Midzii mfe 16 no, mehyɛɛ ase puei kɔr beebi a wɔtɔn nsã, nna hɔ na menye m’anyɛnkofo ketsie ndwom na yedzi asaw. Midzii mfe 17 no, mehyɛɛ ase noom sigyarɛtse. Nna mepɛ dɛ meyɛ atsea donko tse dɛ hɔn a wɔdze hɔn bɔ sigyarɛtsenom ho dawur no. Aber a midzii mfe 19 no, mehyɛɛ ase yɛɛ edwuma wɔ Johannesburg, na enndzi nda biara na mehyɛɛ ase nye nyimpa bɔn bɔɔ fɛkuw. Annkyɛr koraa na mehyɛɛ ase dɛ merekã kasa fĩ, na monoom sigyarɛtse pii so, na sɛ odu dapɛn n’ewiei na sɛ nsã si m’ano a wɔnngye.

Iyi nyina ekyir no nna mowɔ ahoɔdzen so. Nna metaa tsentsen m’apɔw mu, bɔ bɔɔl, na mesan so dzi agor afofor so. Nna memmfa m’edwuma so nndzi agor, na mebɛgyee dzin dɛ obi a onyim kɔmpiwta ho edwuma. Iyi maa minyaa sika, na nyimpa pii bohun dɛ midzi yie wɔ asetsena mu. Naaso, nokwasɛm ankasa nye dɛ nna m’enyi nngye koraa​—metsee nka dɛ me nsa esi famu wɔ abrabɔ mu. M’akoma mu dze, nna metse nka dɛ mahwer biribi.

MBRƐ BIBLE NO SESAA M’ABRABƆ: Aber a mehyɛɛ ase sũaa Bible no, mubohun dɛ Jehovah yɛ Nyankopɔn a ɔwɔ ɔdɔ. Adzesua kor yi ara so maa mubohun dɛ ɔnam n’Asɛm Bible no a ɔdze ama hɛn no do ada no edzi dɛ ɔdɔ hɛn. Bible no tse dɛ krataa bi a ɔakyerɛw abrɛ hɛn a ɔdze rekyerɛ hɛn kwan. (Isaiah 48:​17, 18) Mubohun sɛ mubotum enya Jehovah n’akwankyerɛ a ɔdɔ wɔ mu no do mfaso a, gyedɛ meyɛ nsesa kɛse wɔ m’abrabɔ mu.

Nna nsesa kɛse kor a ɔsɛ dɛ meyɛ nye me fɛkuwbɔ. Asɛm a ɔwɔ Mbɛbusɛm 13:​20 no kaa m’akoma ara yie. Hɔ kã dɛ: “Enye enyansafo nnantsew, na ibohu nyansa: na nkwasea adamfo dze, no ho bɛhyehye no.” Dɛm ngyinadosɛm yi kenyaan me ma menye m’anyɛnkofo adadaw no twaa anyɛnkofa mu, na mefaa anyɛnkofo afofor wɔ Jehovah Adasefo mu.

Sigyarɛtsenom dze nna ɔyɛ me haw kɛse. Nna ɔyɛ dzen ma me dɛ mibegyaa nom; osiandɛ nna menntse ho gyaa, nna no nom no aka mo hɔ. Aber a miridzi dɛm haw yi do konyim nkakrankakra no, nsɛndzendzen fofor so yii ne tsir. Mirigyaa sigyarɛtsenom no, mehyɛɛ ase dɛ mereyɛ kɛse. Mo mu dur mbrɛ osi tse no, kilogram 13.6 bɛkaa ho! Nna m’enyi nngye ho koraa. Ɔgyee bɛyɛ mfe 10 ansaana me kɛse no reyɛ dɛ mbrɛ mepɛ ankasa. Naaso nna minyim yie dɛ ɔyɛ papa dɛ mibegyaa sigyarɛtsenom. Mokɔr do bɔɔ Jehovah mpaa, na ɔmaa me ahoɔdzen ma midzii do konyim.

MBRƐ MEENYA DO MFASO: Seseiara dze mowɔ apɔwmudzen papa. Mo bo so adwe me. Ndaadaasɛm a wɔkã dɛ sɛ obi nya edwuma papa bi yɛ, ɔgye dzin na onya sika a obenya enyigye no, minndzi ekyir bio. Mbom no, Bible mu nokwasɛm a menye afofor kyɛ no ama menya enyigye mapa. Iyi ntsi menye mo kun nye m’anyɛnkofo adadaw no mu baasa rosom Jehovah. Mekãa Bible mu bɔhyɛ a ɔnye dɛ wobenyan ewufo aba paradise asetsena mu wɔ asaase do no ho asɛm kyerɛɛ m’awofo a wɔpaa me abayɛ no ansaana woruwuwu.

Jehovah a matwe abɛn no no ama medzi nka a metse dɛ wɔapow me no do. Ɔama matse nka dɛ meka wiadze nyina enuayɛkuw a no mufo nyina yɛ agyedzifo no ho. Menya nanom, egyanom, enuanom mbarimba nye mbaa pii.​—Mark 10:​29, 30.

[Mfonyin]

Menya Christianfo dɔ do mfaso wɔ Jehovah Adasefo mu

[Mfonyin]

Shinto asɔrdan a nna mosom wɔ mu no