E Veisautaka na Bula na iVolatabu

NA CAVA a biuta kina na qaravi matakau e dua na marama e yabaki 60 vakacaca? Na cava a uqeta e dua na bete me biuta na nona veiqaravi ena nodra vale ni sokalou na lotu Shinto me dua na italatala lotu vaKarisito? A rawa vakacava vua e dua na marama a susu tani ni se gone me valuta na nona nanuma ni sega ni taleitaki? Wilika mada na ka eratou tukuna.

“Au sa Sega ni Bobula ina Matakau.”—ABA DANSOU

SUCU: 1938

VANUA: BENIN

KA E KILAI KINA: QARAVI MATAKAU

NOQU BULA E LIU: Au tubucake e So-Tchahoué, e dua na koro soso e toka volekata na drano. Era dau qoli na lewenikoro, era susu bulumakau, me, sipi, vuaka, kei na manumanuvuka. Ni sega na gaunisala, e sala ga ni veitosoyaki na waqa kei na bavelo. Eso era tara vale ena biriki, ia e levu era tara vale ena kau kei na co. E levu era dravudravua, ia e sega ni levu na basulawa me vaka ena siti.

Niu se gone e lai biuti keirau kei tuakaqu o Ta ena dua na koronivuli ni lotu e vakayagataki kina na ivakatakarakara ena sokalou, keirau lai vulica e kea na kena ivakavuvuli. Niu tubucake tiko, au sokaloutaki Dudua (Oduduwa) na nodra kalou na Yoruba. Au tara e dua na vale meu qarava kina na kalou qori, au dau cabora kina na isoro uvi, waiwai niu, sicinivanua, toa, ruve, kei na so tale na manumanu. Ni saulevu na isoro oya, e dau kania vakalevu na noqu ilavo.

VEISAUTAKI AU NA IVOLATABU: Au vulica ena iVolatabu ni o Jiova e Kalou dina duadua ga. Au vulica tale ga ni sega ni vakadonuya na vakayagataki ni matakau ena sokalou. (Lako Yani 20:4, 5; 1 Korinica 10:14) Au sa qai kila na ka meu cakava. Au viritaka laivi na noqu ivakatakarakara kece, au kauta laivi tale ga na veika e dau vakayagataki ena qaravi matakau era tu ena noqu vale. Au muduka noqu dau kere ivakasala vei ira na bete, noqu vakaitavi ena ivalavala vakavanua vaka kina na kena soqo ni veibulu.

E sega ni rawarawa meu cakava na veisau qori niu sa yabaki 60 vakacaca. Era tusaqati au ra qai vakalialiai au na noqu itokani, ira na wekaqu kei ira keimami tiko veivolekati. Ia au kerea na veivakaukauataki i Jiova meu cakava na ka e dodonu. E vakacegui au na Vosa Vakaibalebale 18:10, e kaya: “Na yaca i Jiova sa vale-cecere kaukauwa: Sa dro kina na yalododonu, ka sa bula.”

E vukei au tale ga na noqu dau tiko ena nodra soqoni na iVakadinadina i Jiova. Au raica kina na loloma vaKarisito, au drukataka tale ga nira saga o ira qori mera bulataka na ivakatagedegede ni itovo savasava ena iVolatabu. Na ka au raica e vakadeitaka vei  au ni lotu dina na iVakadinadina i Jiova.

KENA YAGA: Sa vinaka cake na noqu veimaliwai kei ratou na luvequ niu muria na ivakavuvuli ena iVolatabu. E vaka ga e tauluva mai tabaqu e dua na icolacola bibi. Au vakayagataka vakalevu e liu na noqu iyau ena matakau e sega sara ga ni vukei au. Qo au sa sokaloutaki Jiova, ena vakaotia na noda leqa kece. (Vakatakila 21:3, 4) Dua na ka na noqu marau niu sa sega ni bobula ina matakau, ia au sa bobula i Jiova! E vakacegui au o koya, e taqomaki au tale ga.

“Au Tekivu Vaqara na Kalou Niu se Gone.”​—SHINJI SATO

SUCU: 1951

VANUA: JAPANI

KA E KILAI KINA: BETE NI LOTU SHINTO

NOQU BULA E LIU: Au tubucake ena dua na taoni e Fukuoka, Japani. Erau daulotu na noqu itubutubu, erau tuberi au niu se gone meu doka na nodra kalou na lotu Shinto. Au dau vakasamataka niu se gone na noqu vakabulai, au vinakata tale ga vakalevu meu vukei ira era sotava na leqa. Au nanuma sara na nona tarogi keimami na lewenikalasi o qasenivuli niu se vuli tiko ena paraimari ena ka keimami na cakava ni keimami sa uabula. O ira na vo ni gone era sa vakadeitaka tu na ka era vinakata, me vaka na saenitisi. Ia era dredrevaki au kece niu tukuna au tatadrataka tu meu qarava na Kalou.

Niu sa biu vuli mai na sekeneri, au lai vuli qasenivuli sara ena koronivuli ni lotu. Au sotava ena noqu vuli tiko e kea e dua na bete ni lotu Shinto e dau wilika e dua na ivola waqa loaloa ena gauna e galala kina. A tarogi au ena dua na siga: “Sato, o kila na ivola qo?” Au sa raica rawa na waqa ni ivola au qai tukuna, “na iVolatabu.” E tukuna na bete: “E dodonu mera wilika na ivola qo o ira kece era vinakata mera bete ni lotu Shinto.”

Au lai volia sara e dua na iVolatabu. Au biuta ena noqu vatanivola e cake, au maroroya vinaka tale ga. Niu osooso vakalevu ena ka ni vuli, e sega kina na gauna meu wilika. Ni sa oti na noqu vuli, au tekivu veiqaravi vakabete ena nodra vanua ni sokalou na lotu Shinto. Sa yaco dina na ka au tatadrataka voli niu se gone.

Ia au liaca totolo ni cala na ka au nanuma me baleti ira na bete ni lotu Shinto. E levu na bete  era sega soti ni dauloloma se veikauaitaki. Levu tale ga era sega ni vakabauta. E tukuna mada ga vei au e dua na noqu iliuliu: “Mo rawaka ena vanua qo, veivosakitaka ga na vuku vakatamata. E tabu ni veivosakitaki na vakabauta.”

Na vosa va qori e vakavuna na noqu sega ni marautaka na ka e caka ena lotu Shinto. Niu veiqaravi tiko ena nodra vanua ni sokalou na lotu Shinto, au vakadikeva tale tiko ga na vo ni lotu. Ia e sega ni dua e vaka me vinaka cake ena lotu au sa lewena tiko. Na levu ga ni lotu au vakadikeva, na levu tale ga ni noqu yalolailai. Au sa nanuma ga ni sega ni dua na lotu e dina.

VEISAUTAKI AU NA IVOLATABU: Ena 1988, au sotava e dua na lotu Buda a vakauqeti au meu wilika na iVolatabu. Au vakasamataki koya sara na bete ni lotu Shinto a uqeti au meu cakava qori ena vica na yabaki e liu. Au mani muria na ivakasala qori. Niu tekivu wilika na iVolatabu, au sa via wiliwili tu ga. Ena so na gauna au na wiliwili tiko ena bogi taucoko me yacova ni cila na siga.

E uqeti au sara ga na ka au wilika meu masu vua na Kalou e cavuti ena iVolatabu. Au tekivu ena masu a vakavulica o Jisu e volai ena Maciu 6:9-13. Au cavuta na masu qori ena veiyarua na aua—ena gauna mada ga au veiqaravi tiko kina ena nodra vale ni sokalou na lotu Shinto.

E levu sara na noqu vakatataro ena ka au wilika. Au sa vakawati tiko ena gauna qori, au kila tale ga ni o ira na iVakadinadina i Jiova era dau veivakavulici ena iVolatabu nira sa sikovi watiqu oti. Au vaqara e dua na iVakadinadina i Jiova au qai tarogi koya ena levu sara na taro. Au qoroqoro ni vakayagataka na iVolatabu me sauma kina na taro kece. A veivosakitaka me vakavulici au ena iVolatabu e dua na iVakadinadina.

Sega ni dede, au sa tiko ena nodra soqoni na iVakadinadina i Jiova. Au sega ni kila ena gauna qori nira maliwai ira tiko na iVakadinadina eso au dau beci ira e liu. Ia era kidavaki au ena loloma ra qai kauaitaki au.

Ena soqoni qori au vulica kina ni vinakata na Kalou mera lomani ira na lewe ni nodra vuvale na tagane vakawati, mera rokovi ira tale ga. Ena veigauna sa oti, au kauaitaka ga vakalevu na noqu veiqaravi vakabete, au sega ni kauaitaki watiqu kei rau na luvei keirau. Au sa qai kila niu dau vakatudaliga matua ga ena ka era tukuna o ira era lako yani ena vale ni sokalou au veiqaravi tiko kina, ia sega vakadua niu rogoci watiqu.

Ni toso tiko na noqu vuli, e levu sara na ka au vulica me baleti Jiova e vakavolekati au vua. E tarai au dina na tikinivolatabu me vaka na Roma 10:13, e kaya: “Nira na bula o ira kece era masuta na yaca i Jiova.” Au sa qai kunea na Kalou au tekivu vaqara niu se gone!

Au vakila ni sa sega ni dodonu meu tiko ena nodra vale ni sokalou na lotu Shinto. Au a leqataka na ka era na tukuna na so keu biuta na lotu qori. Ia au sa tukuna tu ga niu na biubiu keu kunea na Kalou dina. Au mani vakatulewataka ena vulaitubutubu ni 1989 meu muria na noqu lewaeloma. Au biuta na vale ni sokalou ni lotu Shinto au qai vakararavitaka vei Jiova na noqu bula.

E dredre toka meu biubiu. Era vosataki au na noqu iliuliu ra qai via vakasaurarataki au meu kua ni lako. Ia sa qai dredre sara meu lai tukuna vei rau na noqu itubutubu. Niu lako tiko ina nodrau vale, e mosi na saresarequ qai malumalumu vakalevu na yavaqu ena levu ni noqu lomaleqa! Au cegu vakavica vata meu kerea na veivakaukauataki i Jiova.

 Niu yaco yani ina nodrau vale, au rere ni tukuna vei rau na noqu itubutubu na ka au sa vakatulewataka. Sa sivi toka e vica na aua, au masu oti tale ga vakavica vata au sa qai vakamacalataka na ka kece vei tamaqu. Au tukuna vua niu sa kunea na Kalou dina, au sa na biuta na lotu Shinto me rawa niu qaravi koya. E kurabuitaka qori o tamaqu qai sega ni marautaka. Era lako mai i vale na wekaqu ra qai saga meu veisautaka na lomaqu. Au sega ni via vakararawataki iratou na noqu vuvale, ia ena gauna vata qori au kila ni dodonu meu qaravi Jiova. Toso na gauna, eratou sa doka na noqu vuvale na noqu vakatulewa.

Au sa sega ni lako ina vale ni sokalou ni lotu Shinto; ia se vinakati tiko ga meu veisautaka na noqu rai. Sa vakawakana tu vei au na ivakarau ni bete. Au saga meu guilecava, ia se mani cava au cakava, eso na ka au raica au dau vakasamataka tale kina na noqu bula e liu.

E rua na ka e yaga ena noqu valuta qori. Kena imatai, au vaqara vinaka sara na iyaya era tu ena noqu vale e dau vakayagataki ena noqu lotu e liu. Au vakama kece na ivola, itaba, kei na so tale na iyaya saulevu ni lotu. Kena ikarua, au saga meu veimaliwai wasoma kei ira na iVakadinadina. E vukei au vakalevu na nodra veitokoni kei na noqu veitokani kei ira. Sa qai seavu ga mai vakamalua ena noqu vakasama na noqu itovo makawa.

KENA YAGA: Eratou dau galili na noqu veitinani niu sega ni daukauaitaki ratou e liu. Ia niu vakayagataka noqu gauna meu tiko kina kei iratou me vaka e tukuna na iVolatabu mera cakava na tagane vakawati, keitou sa qai veivolekati vakavuvale. A mai tomani au tale ga o watiqu ena qaravi Jiova. Keitou mai duavata ena sokalou dina kei na luvei keirau tagane, vaka kina o luvei keirau yalewa kei watina.

Niu vakasamataka lesu na noqu tatadra niu se gone meu qarava na Kalou, meu vukei ira tale eso, au kila niu sa kunea na ka kece au a vaqara voli—kei na levu tale na ka. Au sega ni vakamacalataka rawa na levu ni noqu vakavinavinaka vei Jiova.

“Au Vakila ni Yali Tiko e Dua na Ka.”—LYNETTE HOUGHTING

SUCU: 1958

VANUA: SAUCA AFERIKA

KA E KILAI KINA: NANUMA NIU SEGA NI TALEITAKI

NOQU BULA E LIU: Au sucu e Germiston, na taoni ni keli vatu talei e rawaka vinaka toka, e sega soti kina na basulawa. Ni rau kila na noqu itubutubu ni sega ni rawa ni rau qaravi au, rau mani vakatulewataka meu lai susu tani. Ni se qai rua ga na macawa noqu sucu, erau lai susugi au e dua na veiwatini au sa okati rau me noqu itubutubu. Au sa kila tiko na veika me baleti au,  ia dua na ka noqu saga meu valuta na noqu nanuma niu sega ni taleitaki. Au nanuma niu sega ni luvedrau na noqu itubutubu vakacabecabe, erau sega tale ga ni kila na ka au vinakata.

Niu voleka ni yabaki 16 au dau lako kei ira na noqu itokani ina vanua ni gunu, keimami lai danisi qai vakarorogo qiriqiri. Au tekivu vakatavako niu yabaki 17. Au vinakata meu tolo maresa me vakataki ira na dau vakaraitaki ena itukutuku ni veivoli ni tavako. Niu yabaki 19, au lai cakacaka e Johannesburg, e totolo sara noqu vakailala ca, vosavosa ca, utubokotaka na tavako, qai gunu vakasivia ena muanimacawa.

Ia au dau vakaukauayago ena aerobics, qito soka kei na so tale. Au gumatuataka na noqu cakacaka au qai kilai niu kenadau ena tabana ni kompiuta. Au rawaka vinaka vakailavo, era nanuma tale ga e levu niu rawati au. Ia au rarawa vakalevu, veilecayaki, au sega ni marautaka na noqu bula. Au vakila ni yali tiko e dua na ka.

VEISAUTAKI AU NA IVOLATABU: Au mai kila ena noqu vulica na iVolatabu ni Kalou dauloloma o Jiova. Au vulica tale ga ni vakaraitaka na loloma qori ni vakarautaka na nona Vosa, na iVolatabu. E vaka sara ga e vola vei keda e dua na ivola me dusimaka na noda bula. (Aisea 48:17, 18) Me yaga vei au na veidusimaki loloma i Jiova, au kila ni dodonu meu cakava eso na veisau lelevu ena noqu bula.

Dua na ka meu veisautaka na noqu ilala. E uqeti au na ka e tukuna na Vosa Vakaibalebale 13:20, e kaya: “Ena vuku mai ko koya sa malele vata kei ira na vuku: Ia ko koya era veitokani vata kei na lialia ena rusa.” E uqeti au na ivakavuvuli qori meu biuti ira na noqu itokani makawa, meu qara na itokani vou vei ira na iVakadinadina i Jiova.

E dredre duadua meu biuta na vakatavako niu sa bobula kina. Niu valuta tiko vakamalua qori, e basika e dua tale na leqa. Na noqu biuta na vakatavako e tubu kina na kequ bibi ena sivia na 13.6 na kilokaramu! Qori e vakavuna tale meu beci au, qai taura e rauta ni tini na yabaki meu lailai tale. Ia au kila ni dodonu meu biuta na vakatavako. Au biuta rawa ga qori niu dau kerea na veivakaukauataki i Jiova.

KENA YAGA: Au sa bulabula vinaka sara ena gauna qo. Au lomavakacegu tale ga—au sa sega ni qara na marau e nanumi ni rawati ena cakacaka, itutu, kei na iyau. Ia au marautaka na noqu tukuna yani na ka dina ena iVolatabu. Ena gauna qo, eratou sa tomani keirau tiko vakaveiwatini ena qaravi Jiova e tolu na noqu itokani vakacakacaka e liu. Ni bera ni rau dui mate na noqu itubutubu vakacabecabe, a rawa meu tukuna vei rau na yalayala ena iVolatabu me baleta na veivakaturi ena vuravura parataisi.

Na noqu veiwekani voleka kei Jiova e vukei au meu valuta na noqu nanuma niu sega ni taleitaki. E vakanuideitaki au ni vakayarayarataki au ina vuvale era lewena na noqu itokani ena vakabauta e vuravura raraba. Era maliwai ira qori e levu era tinaqu, tamaqu, taciqu, kei na ganequ.—Marika 10:29, 30.

[iYaloyalo ena tabana e 12]

Au raica vei ira na iVakadinadina i Jiova na loloma vaKarisito

[iYaloyalo ena tabana e 13]

Nodra vale ni sokalou na lotu Shinto au dau sokalou kina e liu