Biblia niaratre töi kwitani

¿MERI biti kä 60 biti bäri ye ñobätä käkwe jondron mikata ngöböre jai ye tuanimetre? ¿Dre käkwe sacerdote sintoísta töi mikani santuario tuenmetre aune ja mike kristiano? ¿Meri iti därebare angwane biani mentokwäre ye dre käkwe niara töi mikani jäme? Ani niaratre tuenmetre kukwe ye mike gare jai.

“Ti ñan niena klabore kukwe ngwarbe kisete” (ABA DANSOU)

DÄREBARE: 1938

JUTA: BENÍN

KUKWE MADA: NÄMÄNE JONDRON MIKE NGÖBÖRE JAI

KUKWE NAMANI BARE TIBÄTÄ: Ti jatani nirien kä So-­Tchahoué yete, känti ñö okwä neketaninkä tä aune kä tibien därebe arato. Ji nänkrä karo ie ñakare aisete nitre tä näin ru mrenbiti nekwäre aune sekwäre. Nitre tä gwa kite, nibi, mutu, cabra, obeja aune kwi ngibiare nünankrä. Nitre tä ju kwetre nuainne krito, mikä aune ruäre ngwane ladrillobiti. Nitre bäsi jökrä bobre, akwa nitre ñan tä nemen ni mada nuainne tare, tä nemen bare juta krite erere.

Ti nämä chi ngwane, ti rün nun juanba ti eteba ben kä känti kukwe nuain nämä ño kirabe ja mäkätekäre chokabe ye driekäre nunye. Kä nikani ruäre ta ti ja mikani ngöbö Dudua ye mike täte, ngöbö ne kädekata arato Oduduwa nitre yorubakwe. Tikwe santuario chi sribeba ie aune ti jataba jondron kukwe ie: Seite palmate, drün, tälen, kwi, ütü aune jondron nire mada. Ti nämä ngwian kitekä krübäte jondron ne erere nuainkäre.

BIBLIA TI TÖI KWITANI: Ti jatani ja tötike Bibliabätä ngwane Jehová ye aibe Ngöbö metre ye namani gare tie, aune jondron nuainta ngöbö ngwarbe mikakäre täte ye niara ñaka tä kain ngäbiti (Éxodo 20:​4, 5; 1 Corintios 10:14). Jötrö ngwarbe tikwe dre nuaindre ye rababa gare tie. Jondron ngöbö ngwarbe mikakäre täte ye tikwe kitakaba jökrä. Arato ti ñan rikaba mada sukia känti. Aune dre nuain nämä kirabe ti känti ni ngwakare kräke ye te ti ñan ja mikaba mada.

Kukwe ye ñan rababa nuäre jire chi ti kräke. Kä 60 biti bäri ngöbö ngwarbe mika nämä täte tikwe. Mada arato ja ketamuko tikwe, ti mräkätre aune nitre nünanka ti bäre ti mikaba yakrä jai. Tikwe kukwe kwin nuainne yekäre tikwe ja di käräba Jehovai. Kukwe tä tikani Proverbios 18: 10 yete, ¡ye ti dimikaba krubäte! Yete nieta: “Jehová kä ye abokän torre dite ye erere. Ni kukwe kwin nuainkä ye tä nen kokwäre aune tä nemen kriemikani”.

Ti rikaba gätä nitre Testiko Jehovakwe yete ye ti dimikaba krubäte, yekänti ja tare erametre tikwe tuaba. Kukwe drieta Bibliabätä ye erere niaratre nämä ja di ngwen mikakäre täte ye ti mikaba ñan krütare. Nitre testiko Jehovakwe tä kukwe metre driere ye namani gare metre tie.

DRE KWIN NAMANINA TIKWE: Kukwe Bibliabätä ja jie ngwankäre ye ti dimikani ja kete kwin ti monsotre ben. Arato, tribe doboko krubäte ye diankaba tibätä ye rababa tuen tie. Kenanbe ti nämä ngwian kitekä krubäte ngöbö ngwarbe ye kräke, ngobö ngwarbe ye ñan kukwe kwin nuainba tikrä. Matare tita sribire Jehová kräke, niara kukwe tare jökrä ye ükaite kärekäre (Revelación [Apocalipsis] 21:​3, 4). Matare ti ñan tä klabore ngöbö ngwarbe ye kisete, ñakare aune tita sribire Jehová kräke ti brukwä tätebiti. Ja ruin krie mikani tie aune kä juto tibätä.

“Ti nämä monsore ngwane ti jataba Ngöbö känene” (SHINJI SATO)

DÄREBARE: 1951

JUTA: JAPÓN

KUKWE MADA: NÄMÄNE SACERDOTERE SINTOÍSTA

KUKWE NAMANI BARE TIBÄTÄ: Kä Fukuoka nemenkä kaibe mentokwäre känti ti ririabare. Ti rüntre nämä kukwebätä aisete ti nämä chi ngwane tikwe Ngöbö sintoísta ye mikadre täte ye drieba kwetre tie. Ye ngwane ti rabadre kwäre aune nitre kisete kukwe nämä ye ti rabadre dimike yebätä ti rababa töbike. Nun rabaira umbre ngwane nun tö sribire meden nuain ye ni dirikä nunye käkwe ngwantariba kwelate nunye, ye törö tie. Monsotre ye käkwe kukwe ruäre kädekateba ñodre tö nämäntre sribidi científico. Akwa ti abokän töi nämä sribidi Ngöbö kräke tikwe nieba ye ngwane nitre jökrä käkwe ti kötaiba.

Ti ja tötikaba ünä kwelate ye bitikäre tikwe ja matriculaba ne kwe ti rabadre dirikä religión yebätä. Yete sacerdote sintoísta iti rababa gare tie, kä nämä nemente ngwarbe ie ngwane nämä ñäke tärä drünebätä. Tärä ye kwata ño ye tikwe mikabara ñärärä aisete nämä ñäke tärä medenbätä ngwantariba kwe tie angwane tikwe “Biblia” nieba ie. Aisete nieba kwe tie: “Ni jökrä tö ja tuai sacerdote sintoísta” ye rabadre ñäke tärä nebätä.

Ye bengwairebe ti janama Biblia kökö kwati jai aune tikwe mikaba ja okwä känti. Akwa, ti nämä ja tötike kukwe madabätä aisete kä ñaka nämä nemente tie ñäkäbarebätä. Kä rikaba ta ngwane ti graduaba aune ti rikaba sribire santuario keteiti te sacerdote sintoísta erere. ¡Ti töi nämä dre nuainbätä ye rababara bare tie!

Akwa kukwe bä nämä ño ti okwäte ñan ye erere ye ngwä ngwane tikwe gaba. Nitre sacerdote kwati ye töi ñaka nämä ni madabätä. Aune ñaka nämäntre tödeke. Ni iti ti jie ngwanka käkwe nieba tie: “Kukwe kwin rabadre bare mä kräke ie mä tö ngwane kukwe töbätä kri ye aibebätä mäkwe blita. Aune mä ñaka tö ngwan blitai jire tödeka yebätä”.

Kukwe ye käkwe ti di gakaba. Kä ye ngwane tikwe ñaka santuario tuanmetreba, akwa ti ja töi mikaba religión mada mike gare jai. Ti nämä kukwe mike gare bäri jai ngwane bärira jire ti rababa di nekä. Religión keteiti ñaka jire kukwe mike gare metre rababa ruin tie.

BIBLIA TI TÖI KWITANI: 1988 ni iti budista rababa gare tie ye käkwe ti töi mikaba ñäke Bibliabätä. Ye ngwane sacerdote sintoísta käkwe kukwe ye erere nieba tie kä ye kwati känenkri ye rükaba törö tie. Aisete tikwe ja töi mikaba ñäkebätä. Ye mataba bälen tibätä. Aune ruäre ngwane ti ñaka nämä kä gain kä nämäne nüke ngwen tibiti ñäkäbätä bätä.

Kukwebätä tikwe ñäkäba ye käkwe ti töi mikaba orare Ngöbö kädrieta Bibliakwe yei, Mateo 6:9-13 tä driere ye erere. Ora nämä niken krobukebe ta ngwane ti nämä orasion ye kädekete ti nämä sribire santuario te yete yebiti ta.

Ti jataba ñäke bäri Bibliabätä ngwane bäri ti jataba kukwe ngwentari jai. Kä ye ngwane ti rababara ja mäkäninte aune nitre testiko Jehovakwe tä ni tötike Bibliabätä ye nämäna gare tie ñobätä ñan aune kä ye känenkri niaratre janama ti muko känti. Tikwe blitaba meri Testiko iti ben aune tikwe kukwe ngwantariba kabre krubäte ie. Kukwe keteiti käkwe ti töi mikaba niä, ye abokän ti nämä kukwe ngwentari ie ye jökrä nämä mike gare Bibliabiti tie. Ye bitikäre ni mada testiko känämä kwe ne kwe ti tötikadre kwe Bibliabätä.

Kä rikaba braibe ta ngwane ti jatabara kwen gätäbätä siba Ju Ja Ükarakrö yete. Kenanbe tikwe ñaka gaba, akwa nitre testiko ruäre ben tikwe ñaka ja ngwanba kwin ye nämä yete. Yebiti ta niaratre käkwe köbö mikaba tie kä jutobiti aune ti dimikaba kwetre ne kwe ja rabadre ruin kwin tie.

Ni brare käkwe muko merire taredre aune mräkätre kwe mikadre ütiäte jai ie Ngöbö tö ye rababa gare tie gätä yete. Nüke ye ngwane ti nämä töi kwatibebiti sribi sacerdote ye nuainne aisete ti muko aune monso nibu tikwe ye nämä mikaninkä mentokwäre tikwe. Nitre nämä nüke santuario ye ti nämä kukwe nuin kwin akwa ti muko ye abokän tikwe ñaka kukwe nuabare jire ye tikwe gaba.

Kukwe nämä nemen gare bäri tie ngwane bäri ja nämä nemen ruin Jehová ken tie. Bersikulo keta kabre mataba ti brukwäte ye ngätäite Romanos 10:13 tä yete nieta: Ñobätä ñan aune “ni jökrä käkwe Jehová kädekaite ja di käräkäre ie ye mikai kwäre”. Ti nämä chi ngwane ti jataba Ngöbö känene aune ye ngwane batibe kwanba tie.

Ja ñan rababara ruin kwin tie sribikäre jankunu santuario yete. Tikwe sintoísmo tuainmetre rabai gare ni madai ngwane töbikai ño kwe tibätä ye kenanbe rababa ti ngwen töbike. Akwa käre ti nämä niere: Ngöbö metre kwain kä mada känti tie ngwane tikwe sintoísmo ye tuainmetre aisete dre nie namä ti töikwe tie ye jiebiti ti rikaba aune tikwe kä mikakaba primavera 1989 santuario yete aune tikwe ja diankaba Jehová kräke.

Kukwe ye ñaka rababa nuäre ti kräke. Nitre ji ngwanka ti käne ye käkwe ñäkäba krubäte tie aune ti töi mikaba ja dibiti kwetre ne kwe tikwe ñaka kä mikadrekä. Akwa yebiti ta tikwe kukwe ye mikadre gare ti rün ie ye bäri ñan rababa nuäre ti kräke. Ti rikaba niara gwirete, kukwe ye mikakäre gare ie ngwane ti rababa nikenkä krubäte aune ti keta rababa dime jabätä mäträräte ta ye kwrere rababa ruin tie aune ti ngüre rababa bete drere. Bä kabre tikwe nünankaba ji ngrabare ja di käräkäre orasionte Jehovai.

Ti rababa ti rün känti ngwane ja ñan rükaba törö tie blitakäre kukwe yebätä ben. Ora rikaba kabre ta aune tikwe oraba krubäte ye bitikäre ja rükaba törö tie blitakäre kukwe yebätä ben. Ngöbö metre ye kwanba religión madabätä tie aune sribikäre Ngöbö ye kräke tikwe sintoísmo ye tuainmetre ye tikwe mikaba gare ie. Niara kukwe ñan gitiaba aune rababa ulire. Arato ti mräkätre ruäre ti kenta rükaba ti känti ne kwe tikwe ja töi kwitadre. Ti ñaka töi rababa ni mada mike rubun jakrä akwa arato sribi Jehová kräke ye ti ñaka tö rababa tuainmetre. Kä rikaba ta ye bitikäre tikwe kukwe dianba nuaindre jai ye ti mräkätre jataba mike ütiäte jai.

Ti santuario tuadremetre ye ñan aibe ti nämä ribere jai ñakare aune nämä ja töi kwitadre tie. Ti nämä sribire sacerdotere ye nämä törö kwekebe tie. Ti tö nämä kukwe ye käi kwitaikä jabiti akwa kukwe jökrä nämä ti bäre ye nämä kukwe ye ngwen törö tie.

¿Dre käkwe ti dimikaba kukwe ye ganainne? Kukwe ketebu. Kena ye abokän kukwe jökrä sintoísmo yebätä nämä tikwe gwi ye tikwe ükakröba aune tikwe kukwaba. Tikwe tärä, cuadro aune jondron ruäre ütiäte kri nämä tikwe ye kukwaba. Kukwe ketebukäre ye abokän tikwe kä diankaba krubäte jai rabakäre keteitibe ja mräkätre testiko yebe. Ti nämä ja kete bentre ye bätärekä bätärekä käkwe ti dimikaba kukwe nuain nämä käne tikwe ye käi kwitekä jabiti.

KUKWE KWIN NAMANINA TIKWE: Käne ti muko aune monsotre tikwe ñan nämä ütiäte ti kräke yebätä ja nämä nemen ruin kaibe tie. Akwa tikwe kä diandrekä kräke jai rababa gare Bibliabätä tie ye käkwe nun dimikaba nemen bäri keteitibe. Ye bitikäre, ti muko käkwe ja töi mikaba sribire Jehová kräke ti bengwairebe. Nengwane nun ja mräkäre jökrä ñodre, ti aune ti muko, nun ngobo nun ngängän bätä muko kwetre nun jökrä tä sribire Ngöbö metre kräke.

Ti nämä chi aune ti töi nämä sribibätä Ngöbö kräke bätä ni mada dimikabätä yebätä ti ta töbike ngwane kukwe ye namanina bare biti bäri tie tä tuin tie. Kukwe ñakare tärä abokänbiti ti raba debe bien Jehovai.

“Ti nämä kukwe ribere jai ye nämä gare tie” (LYNETTE HOUGHTING)

DÄREBARE: 1958

JUTA: SUDÁFRICA

KUKWE MADA: JA NÄMÄ NEMEN RUIN KAIBE TIE

KUKWE NAMANI BARE TIBÄTÄ: Juta chi känti sribi nämä mineriabätä yete nitre gokä ñan krubäte kädekata Germiston, ti däreba. Ti ñan rubai kwin ti rüntre ie nütübare kwetre yebätä köbö 14 ti därebare ngwane ti biani kwetre ngübadre nitre madai. Nitre nibu ja mäkäninte nämä ti ngübare jabätä ye ti rün ti nämä nütüre. Akwa niaratre ñan ti rün rababa gare tie ngwane ja jataba ruin kaibe tie. Niaratre ñan ti mräkä aisete ti töi ño ye ñan nüke gare ietre nämä nemen ruin tie.

Kä nämä 16 tibiti ngwane ti jataba niken kä dö ña ye käi känti musika täkä nämä ye kukwe nuakäre ja ketamuko tikwe ben. Kä nämä 17 tibiti ngwane ti rababara sö duin. Meritre krä bobre nämä mikani anuncio cigarrillokwebätä ye kwrere ti tö nämä ja tuai. Aune kä rababa 19 tibiti ngwane, tikwe ja kwitaba Johannesburgo sribibätä. Kä rikaba braibe ta ngwane ti rababara nitre ñan töi kwin yebe ñäke kämekäme sö duin aune dö ñain käre bämän krüte yebätä.

Akwa ti nämä ejercicio nuainne krubäte. Ti nämä ja kite gimnasia aeróbica, squash aune fútbol yebätä. Arato tikwe ja töi mikaba kwatibe carrera tikwe informática ye jiebiti ye köböire kukwe keta kabre kwin rababa tikwe. Ti nämä nüne kwin aune ngwian nämä ere tikwe aisete nitre kwati kräke ti nämä kukwe kwin bämike. Akwa metrere kukwe ñan ye erere nämä nemen bare tibätä: Ja nämä nemen ruin ngwarbe tie aune tita drekäre nüne ye ñaka nämä gare tie. Kä ñaka nämä juto tibätä. Aune, ti nämä kukwe keteiti ribere jai nämä gare kwin tie.

BIBLIA TI TÖI KWITANI: Ti jataba ja tötike Bibliabätä ngwane, Jehová ye Ngöbö ni tarekä yebätä kukwe kwe ye mikaninte kwe regalore ni kräke rababa gare tie. Biblia ye abokän tärä keteiti tikani kwe ni jie ngwankäre ye kwrere (Isaías 48:17, 18). Kukwe ye käkwe ti jie ngwandre ie ti tö rabadre ngwane ti rabadre kukwe keta kabre kwite ye rükaba gare tie

Kö mikakäre, tikwe ja ketamuko ye kwitaba madabe. Proverbios 13:20 tä niere erere, “nire tä näin nitre töbätä ben ye rabai töbätä akwa nire tä ja kete nitre ñaka töbätä ben ye kräke kukwe tare tä”. Mäträta nete ne tikwe ja di ngwanba töi kwatibebiti mike täte aune tikwe ja ketamuko käme ye tuanmetreba biti ti jataba ja kete ja mräkätre testiko Jehovakwe yebe.

Akwa, sö dua tuadremetre ye ñaka rababa nuäre ti kräke. Ti nämä ja di ngwen sö dua tuanmetrekäre yebätä ti rababa köte 14 kilos (30 libras). Ye köböite ja rababa ruin käme tie aune kä rikaba 10 año ta ye bitikäre ti köte ye jataba nekäta tibätä. Kukwe yebiti ta, ti rabadre sö dua ye ganainne ye nämä gare kwin tie. Ti nämä orare käre Jehovai aune niarakwe ja di bianba tie ye nuainkäre.

KUKWE KWIN NAMANI TIKWE: Kukwe jökräbiti ta, nengwane tita räre aune ja ruin kwin tie. Ne madakäre, jondron ta tikwe ye käi juto tibätä. Sribi tädre nikwe ngwian tädre nikwe aune jondron tädre ere krubäte nikwe tä kä mike juto nibätä jiebiti ti nämä näin ye jiebiti ti ñan niena näin. Ti muko ben, nengwane tita kä jutobiti kukwe metre bibliabätä ye driere nitre madai aune tikwe sribi muko tikwe nimä merire dimikanina ne kwe rabadre Ngöbö metre ye mike täte siba. Ne madakäre, ti rüntre käkwe ti ngübabare jabätä yebe tikwe blitaba kukwe kwin krubäte käbämikata kä tibien nebätä aune nitre gaikräta kä bänuäre te kä tibien nebätä yebätä tikwe blitaba bentre.

Tita ja kete kwin Ngöböbe ye köböire ja ñaka niena ruin kaibe tie, nengwane tita ti mräkätre testiko Jehovakwe kä jökrä biti tibien ye ngätäite. Yete ti meye ti rün ti ngwain ti eteba tärä (Marcos 10:29, 30).

[Üai]

Nitre testiko Jehovakwe ye ngätäite ja tareta ño ye rababa gare tie

[Üai]

Santuario te tikwe sintoísmo mikaba täte