Ang Biblia Nagapabag-o sang Kabuhi

NGAA wala na nagsimba sa mga imahen ang sisentahon na nga babayi? Ngaa gin-untatan sang isa ka tawo ang iya pagkapari sa Shinto kag nangin Cristiano nga ministro? Paano gin-atubang sang isa ka babayi nga gin-adoptar sang bata pa ang balatyagon nga daw ginpabay-an sia? Binagbinaga ang ila ginsiling.

“Indi na Ako Ulipon sang mga Imahen.”—ABA DANSOU

NATAWO: 1938

PUNGSOD: BENIN

KABUHI SANG UNA: NAGASIMBA SA MGA IMAHEN

ANG AKON NAGLIGAD: Nagdaku ako sa So-Tchahoué, nga nahamtang sa lutakon nga lugar malapit sa linaw. Ang mga pumuluyo diri nagapangisda kag nagasagod sing mga baka, kanding, karnero, baboy, kag pispis. Wala sing mga karsada, gani nagabaruto lang ang mga tawo. Ang kalabanan nga balay human sa kahoy kag kugon, pero ang iban human sa tisa. Pigado ang mga tawo. Pero indi pareho sa siudad, wala gawa sing krimen diri.

Sang bata pa ako, ginpadala ako ni Tatay sa isa ka kombento upod sa akon magulang, diin gintudluan kami parte sa mga diosdios nga nagahatag sing proteksion. Pagdaku ko, ginsimba ko si Dudua (Oduduwa) nga dios sang mga Yoruba. Ginhimuan ko sia sing balay kag nagahalad ako pirme sang mga ubi, lana sang palma, taklong, manok, pating, kag iban pa nga sapat. Daw maubos pirme ang akon kuarta sa sini nga mga halad.

KON PAANO GINBAG-O SANG BIBLIA ANG AKON KABUHI: Sang nagtuon ako sing Biblia, natun-an ko nga si Jehova ang matuod nga Dios. Natun-an ko man nga indi niya gusto ang paggamit sang mga imahen sa pagsimba. (Exodo 20:4, 5; 1 Corinto 10:14) Narealisar ko kon ano ang dapat ko himuon. Ginpanghaboy ko ang tanan ko nga imahen kag mga pagkabutang nga may labot sa pagsimba sa sini. Gin-untatan ko ang espiritismo, mga ritwal, kag mga kinabatasan sa lubong.

Para sa akon nga sisentahon na, indi mahapos himuon ini nga mga pagbag-o. Ginpamatukan ako kag ginkadlawan sang akon mga abyan, paryente, kag mga kaingod. Pero nangamuyo ako kay Jehova nga hatagan ako sing kusog. Napabakod ako sa ginasiling sang Hulubaton 18:10 (NW): “Ang ngalan ni Jehova isa ka torre nga mabakod. Ang matarong nagadalagan sa sini kag ginaamligan.”

Nakabulig man sa akon ang pagtambong sa mga pagtilipon sang mga Saksi ni Jehova. Nabatyagan ko ang ila pagpalangga, kag nagdayaw gid ako kay ginasunod nila ang mga prinsipio sang Biblia sa moral. Nakumbinsi ako nga ang mga Saksi ni Jehova amo ang matuod nga relihion.

 MGA BENEPISYO: Nangin maayo ang akon kaangtanan sa akon mga kabataan sang ginsunod ko ang mga prinsipio sa Biblia. Nabatyagan ko man nga wala na ako ginabug-atan. Sadto, daku ang akon ginagasto sa mga imahen nga wala man nakabulig sa akon. Subong, nagasimba ako kay Jehova, nga nagahatag sing matuod nga solusyon sa aton mga problema. (Bugna 21:3, 4) Nalipay ako nga indi na ako ulipon sang mga imahen, kundi ni Jehova! Sa iya ko nabatyagan ang matuod nga proteksion.

“Bata pa Ako, Ginapangita Ko na ang Dios.”—SHINJI SATO

NATAWO: 1951

PUNGSOD: JAPAN

KABUHI SANG UNA: PARI SANG SHINTO

ANG AKON NAGLIGAD: Nagdaku ako sa isa ka banwa sa Fukuoka Prefecture. Relihioso katama ang akon mga ginikanan. Ginpadaku nila ako nga magsimba sa mga dios sang Shinto. Sang bata pa ako, ginakabalak-an ko pirme ang akon kaluwasan kag gusto ko buligan ang mga tawo. Ginpamangkot kami sadto sang amon maestro sa elementarya kon ano ang amon gusto pagdaku namon. Gusto sang iban ko nga klasmeyt nga mangin scientist. Sang nagsiling ako nga gusto ko mag-alagad sa Dios, ginkadlawan nila ako.

Sang nakatapos ako sa hayskul, nag-eskwela ako sa isa ka eskwelahan nga nagatudlo parte sa relihion. Nakilala ko diri ang isa ka pari sang Shinto nga nagabasa pirme sing itom nga libro sa iya bakante nga oras. Isa ka adlaw ginpamangkot niya ako, “Sato, bal-an mo bala kon ano ini nga libro?” Nakita ko ang cover sang libro, gani nagsabat ako, “Biblia.” Nagsiling sia, “Dapat ini basahon sang mga gusto mangin pari sang Shinto.”

Nagbakal ako dayon sang Biblia. Ginhalungan ko ini kag ginbutang nga kitaon gid sa akon estante. Pero wala ko man ini mabasa kay masako ako sa pag-eskwela. Paggradweyt ko, nangin pari ako sa simbahan sang Shinto. Natuman gid ang handum ko sang bata pa ako.

Pero sang ulihi, nakita ko nga ang nagakatabo lain gid sangsa akon ginapaabot. Ang kalabanan  nga pari wala sing pagpalangga ukon pag-ulikid sa iban. Madamo man ang nadulaan sing pagtuo. Ginsilingan ako sang akon superyor: “Kon gusto mo diri magmadinalag-on, mga pilosopiya lang ang imo itudlo, indi ang parte sa pagtuo.”

Bangod sini, nadulaan ako sing interes sa Shinto. Bisan pa nagapari ako, gin-usisa ko ang iban nga relihion. Pero daw wala ako nanamian sa ila ginatudlo. Sang madamo na ang akon nausisa, nadulaan na gid ako sing interes. Pamatyag ko, wala sang relihion nga nagatudlo sing kamatuoran.

KON PAANO GINBAG-O SANG BIBLIA ANG AKON KABUHI: Sang 1988, nakilala ko ang isa ka Budhista kag ginsilingan niya ako nga basahon ang Biblia. Nadumduman ko ang ginsiling sadto sang pari sang Shinto. Gani ginbasa ko ang Biblia kag nawili gid ako sa sini. Kon kaisa, nagakaagahan ako sa pagbasa sini.

Napahulag ako sang akon nabasahan nga mangamuyo sa Dios nga ginasiling sang Biblia. Ginsunod ko ang modelo nga pangamuyo sa Mateo 6:9-13. Ginasulitsulit ko ini kada duha ka oras, bisan pa samtang ginahimo ko ang akon hilikuton bilang pari.

Madamo ako sing pamangkot sa akon nabasa. Sini nga tion, may asawa na ako, kag nahibaluan ko nga ang mga Saksi ni Jehova nagatudlo sing Biblia kay ginbisitahan nila sadto ang akon asawa. Nakig-istorya ako sa isa ka Saksi kag ginpaarakan sia sing pamangkot. Nagdayaw gid ako kay gingamit niya ang Biblia para masabat ang tanan ko nga pamangkot. Ginpangabay niya ang iban nga Saksi nga tun-an ako sa Biblia.

Sang ulihi, nagtambong ako sa mga pagtilipon sang mga Saksi ni Jehova. Ang pila sa mga nagtambong wala ko sadto gintratar sing maayo. Pero gintamyaw nila ako kag gin-abiabi sing maayo.

Natun-an ko sa sini nga mga pagtilipon nga gusto sang Dios nga higugmaon kag padunggan sang bana ang mga miembro sang iya pamilya. Napabay-an ko sadto ang akon asawa kag duha ka bata kay ang akon lang pagkapari ang akon gin-atender. Isa pa, ginapamatian ko ang ginasiling sang mga nagasimba, pero bisan makaisa wala ko ginpamatian ang akon asawa.

Madamo ako sing natun-an parte kay Jehova, gani nangin suod ako sa iya. Natandog gid ako sa ginasiling sang Roma 10:13: “Ang tagsatagsa nga nagatawag sa ngalan ni Jehova maluwas.” Bata pa ako, ginapangita ko na ang Dios, kag subong, nakita ko na sia!

Daw wala na ako gana nga magpari. Sa umpisa, nabalaka ako sa mahimo isiling sang iban kon maghalin ako sa Shinto. Pero namat-od ako sadto nga maghalin kon makilala ko na ang matuod nga Dios. Gani sang 1989, nagdesisyon ako nga biyaan ang pagkapari kag nagsalig nga buligan ako ni Jehova.

Indi ini mahapos. Gin-akigan ako sang akon mga superyor kag ginpilit ako nga magpabilin. Ang mas mabudlay pa gid amo ang pagsugid sini sa akon mga ginikanan. Sang nagapakadto ako sa ila balay, nakulbaan gid ako kag nagapalangurog ang akon mga tuhod! Pirme ako nagadulog kag nagapangamuyo kay Jehova nga hatagan ako sing kaisog.

Pag-abot ko, wala ako anay nanugid sa akon mga ginikanan. Nagligad pa ang mga inoras.  Sang ulihi, sa bulig sang madamo nga pangamuyo, ginpaathag ko ang tanan kay Tatay. Ginsilingan ko sia nga nakilala ko ang matuod nga Dios kag dapat ako maghalin sa Shinto para maalagad ko Sia. Nakibot gid kag nasubuan si Tatay. Nagkadto sa balay ang iban namon nga paryente kag gintinguhaan nila nga bag-uhon ang akon desisyon. Indi ko gusto nga masakitan ang akon pamilya, pero nahibaluan ko nga dapat ko alagaron si Jehova. Sang ulihi, ginrespeto nila ang akon desisyon.

Dapat ko man bag-uhon ang naandan ko na nga kabuhi bilang pari. Gintinguhaan ko nga kalimtan ini, pero bisan diin ako magkadto, may mga butang nga nagapahanumdom sang akon kabuhi sadto.

Duha ka butang ang nakabulig sa akon nga kalimtan ini. Una, ginpangita ko sa balay ang mga butang nga may labot sa akon relihion sadto—mga libro, larawan, kag iban pa nga malahalon nga mga butang. Dayon ginpanunog ko ini. Ikaduha, gintinguhaan ko nga makig-upod pirme sa mga Saksi. Nakabulig gid sa akon ang ila pagpakig-abyan kag suporta. Gani, amat-amat ko nga nalimtan ang akon kabuhi sadto.

MGA BENEPISYO: Nasubuan gid sadto ang akon asawa kag kabataan kay ginpabay-an ko sila. Pero sang ginhatagan ko sila sing tion, subong sang ginatudlo sang Biblia nga himuon sang mga bana, nangin suod kami. Sang ulihi, nag-alagad man kay Jehova ang akon asawa, ang amon bata nga lalaki, bata nga babayi kag ang iya bana.

Bata pa ako, handum ko na nga alagaron ang Dios kag buligan ang mga tawo. Natuman gid ini kag sobra pa ang natigayon ko. Daku gid ang akon pagpasalamat kay Jehova.

“Nabatyagan Ko nga May Kulang sa Akon Kabuhi.”—LYNETTE HOUGHTING

NATAWO: 1958

PUNGSOD: SOUTH AFRICA

KABUHI SANG UNA: NAGBATYAG NGA GINPABAY-AN

ANG AKON NAGLIGAD: Natawo ako sa Germiston, isa ka mainuswagon nga banwa nga may minahan kag wala gawa sing krimen. Nagbatyag ang akon mga ginikanan nga indi nila ako maatipan, gani ginpaadoptar nila ako. Sang 14 ka adlaw pa lang ako nga natawo, gin-adoptar ako sang mapinalanggaon nga mag-asawa nga amo ang ginkabig ko nga mga ginikanan.  Sang nahibaluan ko nga gin-adoptar lang gali ako, nagbatyag ako nga daw ginpabay-an. Pamatyag ko indi ako mahangpan sang mga nag-adoptar sa akon kay indi man sila ang matuod ko nga mga ginikanan.

Sang mga 16 anyos ako, nagakadto ako sa mga bar, diin nagasaot kami sang akon mga abyan kag nagapamati sing banda. Sang 17 anyos ako, nagpanigarilyo ako. Gusto ko magniwang pareho sang mga modelo sang sigarilyo. Sang 19 anyos ako, nagtrabaho ako sa Johannesburg kag madamo ako dayon sing barkada. Sang ulihi, grabe na ako magpanigarilyo, nagahambal sing binastos, kag nagapahubog kon Sabado kag Domingo.

Pero pirme ako naga-aerobics, nagahampang sing soccer kag iban pa nga sports. Ginpauswag ko man ang akon ikasarang sa kompyuter, kag nangin bantog ako sa sini. Gani nagmanggaranon ako, kag para sa madamo nga tawo madinalag-on gid ako. Pero ang matuod, indi ako malipayon. Nabatyagan ko nga may kulang sa akon kabuhi.

KON PAANO GINBAG-O SANG BIBLIA ANG AKON KABUHI: Sang nagtuon ako sa Biblia, natun-an ko nga si Jehova, Dios sang gugma. Ginpakita niya ini paagi sa paghatag sa aton sang iya Pulong, ang Biblia. Daw pareho lang nga nagsulat sia sa aton para giyahan kita. (Isaias 48:17, 18) Para matigayon ko ang mahigugmaon nga paggiya ni Jehova, dapat maghimo ako sing daku nga pagbag-o.

Ang isa sini parte sa akon kaupdanan. Ginpamensar ko sing maayo ang ginsiling sang Hulubaton 13:20: “Maglakat upud sa maalam nga mga tawo kag manginmaalam ka, apang ang kaupdanan sang mga buangbuang magaantus.” Nabuligan ako sini nga prinsipio nga biyaan ang mga abyan ko sadto kag makig-abyan sa mga Saksi ni Jehova.

Nabudlayan gid ako nga untatan ang pagpanigarilyo, kay naadik na ako sa sini. Samtang amat-amat ko ini nga ginauntatan, nagdugang ang akon bug-at sing sobra 13.6 ka kilo! Daw indi ko mabaton nga nagtambok ako, kag mga pulo pa ka tuig antes nagbalik sa normal ang akon lawas. Pero nahibaluan ko nga dapat ko untatan ang pagpanigarilyo. Padayon ako nga nangamuyo kay Jehova, kag ginbuligan niya ako nga mauntat ini.

MGA BENEPISYO: Mas maayo na subong ang akon panglawas. Nangin kontento ako kag wala na nagahandum sang temporaryo nga kalipay nga mahatag sang trabaho, posisyon, kag manggad. Sa baylo, nalipay ako nga isugid sa iban ang mga kamatuoran sa Biblia. Ang tatlo ko anay ka kaupdanan nagaalagad na subong kay Jehova upod sa amon nga mag-asawa. Sang buhi pa ang ginkabig ko nga mga ginikanan, ginsugid ko sa ila ang promisa sang Biblia nga pagkabanhaw sa paraiso nga duta.

Nangin suod ako kay Jehova kag nakabulig ini sa akon nga indi na magbatyag nga ginpabay-an. Ginpabaloran niya ako kay nangin bahin ako sang isa ka daku nga pamilya sang iya mga sumilimba sa bilog nga kalibutan. Nakatigayon ako sang madamo nga iloy, amay, kag mga utod.—Marcos 10:29, 30.

[Retrato sa pahina 12]

Nabatyagan ko sa mga Saksi ni Jehova ang Cristiano nga pagpalangga

[Retrato sa pahina 13]

Ang simbahan sang Shinto nga ginasimbahan ko sang una