Библием гъащІэр ехъуэж

«АфІэкІа тхьэнапэхэм сахуэлажьэкъым» (АБА́ ДАНСУ́).

КЪЫЩАЛЪХУА ГЪЭР: 1938

КЪЫЩАЛЪХУА КЪЭРАЛЫР: БЕНИН

ЯПЭМ: ТХЬЭНАПЭХЭМ ХУЭЛАЖЬЭТ

ЯПЭМ СИІА ГЪАЩІЭР. Сэ гуэлым пэмыжыжьэу, псыпцІэ щІыпІэм щыІэ Со-Чахуви́ къуажэ цІыкІум сыкъыщалъхуащ. Ди къуажэ цІыкІум щыпсэухэр бдзэжьей йощэ, Іэщ, джэдкъаз зэрахуэ. Ди щІыпІэм гъуэгу щыІэкъыми, цІыхухэм и нэхъыбэм кхъуафэжьейхэмрэ каноэхэмрэ къагъэсэбэп. Унэхэр къызыхащІыкІ хабзэр пхъэрэ удзрэщ, ауэ иныкъуэхэм дежи чырбышкІэ ящІ. И нэхъыбэр хуэмыщІауэ псэуми, къалэхэм елъытауэ щІэпхъаджагъэр куэдкъым.

Иджыри ды-сабий дыдэу, си шыпхъумрэ сэрэ ди адэм ди диным дыхуеджэну дигъэкІуащ. Ин сыхъуа нэужь Йору́бэ лъэпкъым щагъэлъапІэ Одудува́ (Одуа́) тхьэм сыхуэлэжьэн щІэздзащ. Сэ абы унэ цІыкІу хуэсщІри, зэпымыууэ къурмэн къыхуэсхьыу щІэздзащ, псалъэм папщІэ ямсыр, пальмэм и дагъэр, нэщІэпкІэхэр, джэджьейхэр, тхьэрыкъуэхэр, нэгъуэщІ псэущхьэ гуэрхэри. А къурмэныпхъэхэм ахъшэу сиІэр текІуадэт.

БИБЛИЕМ СИ ГЪАЩІЭР ЗЭРИХЪУЭЖАР. Библиер зджын щІэздзэри сэ къызгурыІуащ Иеговэ Алыхь закъуэу, Алыхь пэжу зэрыщытыр икІи тхьэнапэхэм щхьэщэ хуэпщІыныр зэримыдэр (Исход 20:4, 5; 1 Коринф 10:14). Сэ къызгурыІуащ сщІэн хуейр. Сэ Іэзэгъуазэм пыщІауэ сиІэу хъуар хыфІэздзащ, Іэзэхэм я деж сыкІуэн икІи лІахэр гъэлъэпІэным пыщІа хабзэхэми хэтын щызгъэтащ.

Сэ си ныбжьыр илъэс 60-м щІигъуати, си дежкІэ тынштэкъым си гъащІэм зэхъуэкІыныгъэ хэслъхьэну. Си ныбжьэгъухэри, си благъэхэри, си гъунэгъухэри къыспэщІэувэт, ауани сащІт. Ауэ сэ Иеговэ селъэІут къэсщІам сытетыну къыздэІэпыкъуну. Притчи 18:10 ит псалъэхэм сагъэгушхуэт: «Алыхьым и цІэр — чэщанэ быдэщ. Пэжыгъэ зигу илъыр абы щІолъадэр зыщигъэпщкІунуи, зыри зэран къыхуэхъужкъым».

Сэ иджыри Иеговэ и Щыхьэтхэм я зэІущІэхэр хуабжьу къыздэІэпыкъуащ. А зэІущІэхэм сэ лъагъуныгъэ пэжыр щызыхэсщІащ. А цІыхухэр Библием ит хабзэхэм тету зэрыпсэур къыщыслъэгъуам, сэ ар сигу хыхьащ. А псом си фІэщ ищІащ Иеговэ и Щыхьэтхэм я диныр пэжу зэрыщытыр.

СИ ГЪАЩІЭР НЭХЪЫФІ ЗЭРЫХЪУАР. Библием ит принципхэр къызэрызгъэсэбэпым и фІыгъэкІэ, си сабийхэмрэ сэрэ ди зэхущытыкІэр нэхъыфІ хъуащ. Япэм сэ мыхьэнэ лъэпкъ зимыІэ тхьэнапэхэм си ахъшэу хъуар тезгъэкІуадэу щытат, ауэ сэ иджы Иеговэ сыхуолажьэ. Абы дыкъегъэгугъэ ди гугъуехьу хъуам кІэ иритыну (Апокалипсис 21:3, 4). Сэ зыкІэ согуфІэри тхьэнапэхэм сахуэмылэжьэжу, Иеговэ сызэрыхуэлажьэм щхьэкІэ! Сэ абы сыт и лъэныкъуэкІи сыкъызэрихъумэр зыхызощІэ.