Bíblia ta muda vida di algen

Pamodi ki un mudjer di más di 60 anu bandona adorason di imaji? Kuzê ki poi un saserdóti di relijion xintoísta bandona trabadju ki el tinha na santuáriu, pa el bira un kriston? Modi ki un mudjer ki adotadu kantu el nase, para di xinti bandonadu? Odja kuzê ki kes algen li ta fla.

“N ka ta adora imaji más.” — ABA DANSOU

ANU KI EL NASE: 1938

PAIS KI EL NASE: BENIN

SE VIDA NA PASADU: TA ADORABA IMAJI

MODI KI ERA NHA VIDA ANTIS: N kria na So-Tchahoué, ki é un zóna ki ten txeu agu paradu i plantas ki ta fika pértu di un lagu. Pa sustenta, gentis di la ta piska, ta kria animal sima baka, kabra, ovelha, porku i pasus. Na kel zóna ka ten strada, pa algen bai di un lugar pa kel otu, es ta uza barku i kanoa. Normalmenti, pesoas di la ta faze kaza ku madera i padja, i alguns ta faze ku tijolu. Maioria di algen di la é póbri. Ma simé, la ten ménus krimi di ki na sidadi.

Kantu mi éra mininu, nha pai manda mi ku nha irman pa un Skóla di relijion di fitisaria ku bruxaria. La nu inxinadu sobri kes krénsa ki tinha aver ku tradison di kel relijion. Kantu N bira grandi, N skodje Dudua (Oduduwa) di kultura ioruba pa ser nha deus. N faze un santuáriu pa kel deus li i sénpri N ta ofereseba sakrifisius pa el di nhami, óliu di palma, marisku, animal sima karakol, galinha, ponba i otus tipu di animal. Kes sakrifisiu li era karu i N ta gastaba kuazi tudu nha dinheru na es.

MODI KI BÍBLIA MUDA NHA VIDA: Kantu N kumesa ta studa Bíblia, N prende ma Jeová é úniku Deus verdaderu ki ten. N prende tanbê ma el ka gosta pa nu uza imaji na adorason. (Êxodo 20:4, 5; 1 Coríntios 10:14) N da kónta kuzê ki N tinha ki faze. Nton N fulha tudu imaji ki N tinha i N linpa nha kaza di tudu kuza ki ten aver ku adorason di imaji. N para di pâpia ku spritu pa N sabe futuru, i nunka más N ka partisipa na adorason di mortus i kes otu kuza ki es ta fazeba.

Ka foi fásil pa mi, un mudjer di más di 60 anu, faze kel tipu di mudansa li. Nhas amigu, famílias i vizinhus fika kóntra mi i es kumesa ta faze-m trósa. Má N ora pa Jeová ta pidi-l forsa pa N faze kel ki é dretu. Kes palavra na Provérbios 18:10 konsola-m txeu. El ta fla: ‘Nómi di Jeová é un tori fórti. Justu ta kóre pa déntu di el i el ta resebe proteson.’

Otu kuza ki djuda-m, é sisti runions di Tistimunhas di Jeová. N xinti amor ki kes algen di la mostra-m, i N fika dimiradu pamodi es ta sforsa pa es vive di akordu ku prinsípius di Bíblia. Kuzê ki N odja da-m sertéza ma Tistimunhas di Jeová é relijion verdaderu.

 BENSONS KI N RESEBE: N bira ta da más dretu ku nhas fidju dipôs ki N pasa ta aplika prinsípius di Bíblia. N xinti sima si N tradu un pézu riba di nha kósta. Antis N ta gastaba tudu nha dinheru ku adorason di imaji sen vida, ki ka ta djudaba mi ku nada. Gósi N ta adora Jeová ki é kel ki ta ben traze soluson pa tudu nos prublémas. (Apocalipse 21:3, 4) N sta txeu kontenti pamodi N ka ta adora imaji más. Má N ta adora Jeová. É el ki ta da-m suguransa i proteson di verdadi.

“N staba ta buska Deus désdi mininu.” — SHINJI SATO

ANU KI EL NASE: 1951

PAÍS KI EL NASE: JAPON

SE VIDA NA PASADU: SASERDÓTI DI RELIJION XINTOÍSTA

MODI KI ÉRA NHA VIDA ANTIS: N kria na un sidadi di interior di un lugar ki txoma Fukuoka. Nha mai ku nha pai gostaba txeu di kuzas di relijion. Désdi mininu es inxina-m adora kes deus di relijion xintoísta. Kantu mi éra pikinoti sénpri N ta pensaba na nha salvason i N krê djudaba kes algen ki meste. N ta lenbra ma un bês na skóla, profesor pergunta-nu kuzê ki nu krê sérba óras ki nu bira grandi. Nhas koléga di skóla sabia dretu kuzê ki es krê sérba, sima pur izénplu ser sientista. Ami N fla ma nha sonhu éra adoraba Deus. Tudu algen faze-m trósa.

Dipôs ki N tirmina liseu, N bai pa un skóla pa profesoris di relijion. La N konxe un saserdóti xintoísta ki ta leba un livru di kapa prétu na se óras di fólga. Un dia el pergunta-m: “Sato, bu sabe kel-li é ki livru?” Dja N odjaba kapa di kel livru, pur isu N fla-l: “É Bíblia.” El fla-m: “Tudu algen ki krê ser un saserdóti xintoísta debe lé kel livru li.”

N bai faxi ba kunpra un Bíblia. N pô-l na un lugar di nha stanti pa el parse i N kuida dretu di el. Má N ka tinha ténpu di lé-l pamodi N staba txeu okupadu ku kuzas di skóla. Kantu N tirmina di studa, N bira un saserdóti xintoísta i N kumesa ta trabadja na un santuáriu. Di kel manera li, N alkansa kel sonhu ki N tinha désdi mininu.

Má lógu N da kónta ma ser un saserdóti xintoísta é ka éra kel ki N staba ta spéra. Maioria di kes saserdóti ka ta mostraba mutu amor i nen es ka ta preokupaba  ku algen. Txeu di es ka tinha fé. Un di kes saserdóti, ki tinha un puzison más altu ki mi, ti txiga di fla-m: “Si bu krê pa kuzas bai dretu li, midjór bu pâpia sô sobri filozofia. Pâpia di fé li é proibidu.”

Kes tipu di kuza li pô-m ta xinti diziludidu ku relijion xintoísta. Nbóra N kontinua ta trabadja na santuáriu, N kumesa ta piskiza sobri otus relijion. Má N atxa ma tudu es éra kel mê. Kantu más N ta izaminaba kes relijion, más dizanimadu N ta fikaba. Ta parseba ma ninhun relijion ka tinha verdadi.

MODI KI BÍBLIA MUDA NHA VIDA: Na anu 1988, N konxe un budista ki insentiva-m pa N lé Bíblia. N lenbra di kel saserdóti xintoísta ki flaba mi mésmu kuza uns anu antis. N disidi sigi kel konsedju. Kantu N kumesa ta lé Bíblia, N gosta dimás di kuzê ki N staba ta lé. Alvês N ta leba el noti manxe ti ki N odjaba sól ta sai na janéla.

Kel ki N lé pô-m ta krê faze orason pa kel Deus di Bíblia. N kumesa ta faze orason di Pai-Nosso ki sta na Mateus 6:9-13. N ta fazeba kel orason li di dôs en dôs óra, sikrê N staba ta faze kes sirvisu na santuáriu xintoísta.

N tinha txeu pergunta sobri kuzê ki N staba ta lé. Na kel ténpu, dja N staba kazadu i N sabia ma Tistimunhas di Jeová ta inxinaba algen sobri Bíblia pamodi dja es vizitaba nha mudjer antis. N djobe un sinhora ki éra Tistimunha di Jeová i N faze-l pergunta. N fika dimiradu kantu el uza Bíblia pa responde tudu nhas pergunta. El ranja manera pa un Tistimunha di Jeová studa Bíblia ku mi.

Poku ténpu dipôs, N kumesa ta sisti runion di Tistimunhas di Jeová. Na kel ténpu N ka da kónta, má la tinha Tistimunhas di Jeová ki dja N trataba mariadu antis. Má simé, es kunprimenta-m ku amor i es resebe-m dretu.

Na kes runion, N prende ma Deus ta fla ma maridu debe mostra amor i da ónra pa se família. N ta daba más atenson pa nha trabadju di saserdóti di ki pa nha mudjer i nos dôs fidju. N da kónta ma sénpri N ta obiba i N ta daba atenson pa kes algen ki ta binha santuáriu, má nunka N ka para pa N obi i da nha mudjer atenson.

Sima N ba ta studa i faze prugrésu, N prende txeu kuza sobri Jeová ki bira nha amizadi ku el más fórti. Alguns versíklu, sima kel ki sta na Romanos 10:13, mexe txeu ku mi. El ta fla: ‘Tudu algen ki invoka nómi di Jeová ta ser salvu’. N staba ta buska Deus désdi mininu i ti ki enfin N konsigi atxa-l!

N kumesa ta xinti kasábi na santuáriu. Na komésu, N fika preokupadu ku kuzê ki pesoas ta pensaba si N largaba relijion xintoísta. Má sénpri N ta flaba nha kabésa ma dia ki N atxaba Deus verdaderu, N ta saíba di la. Nton na 1989, N disidi obi ku nha konsénsia. N larga santuáriu i N poi nha vida na mô di Jeová.

Ka foi fásil larga santuáriu. Kes saserdóti ki tinha puzison más altu ki mi ka fika kontenti i es tenta konvense-m pa N fika. Foi más difísil inda da nha mai ku nha pai kel notísia li. Na kaminhu ta bai pa ses kaza, N fika preokupadu di tal manera ki nha petu kumesa ta duê i nhas pérna fika ta treme. N para txeu bês na kaminhu ta ora pa Jeová da-m forsa.

 Kantu N txiga kaza di nha mai ku nha pai, na komésu N fika ku txeu medu di pâpia di kel asuntu li. Pasa alguns óra pa N konsigi kumesa pâpia. Má ku txeu orason, N konsigi splika nha pai tudu kuza. N fla-l ma dja N atxaba Deus verdaderu i ma N staba ta bandona relijion xintoísta pa N pode sirbi-L. Nha pai fika diziludidu i tristi. Otus algen di nha família ben i es tenta pô-m ta muda di ideia. N ka krê maguaba nha família, má omésmu ténpu N sabia ma sirbi Jeová éra midjór kuza ki N pode fazeba. Ku ténpu, nha família pasa ta ruspeta nha disizon.

Sai di santuáriu éra un kuza má para di pensa na el éra otu kuza. Vida di saserdóti ta fazeba párti di mi. N sforsa txeu pa N skese, má pa tudu lugar undi ki N ta baba, N ta lenbraba di kel vida ki N tinha antis.

Ten dôs kuza ki djuda-m skese kel-li. Primeru, N djobe dretu na nha kaza tudu kuza ki staba ligadu ku kel relijion ki N staba antis. N kema tudu: livrus, fotus i ti alguns kuza karu ki N ta daba valor. Sugundu, N djobe tudu oportunidadi pa N sta djuntu ku Tistimunhas di Jeová. Ses amizadi i apoiu djuda-m txeu. Poku-poku N kumesa ta skese di kel vida ki N tinha antis.

BENSONS KI N RESEBE: N ka ta ligaba nha mudjer ku nhas fidju i kel-la ta poba es xinti es sô. Má kantu N kumesa ta pasa más ténpu ku es, sima Bíblia ta inxina ma maridu debe faze, nu fika más amigu di kunpanheru. Ku ténpu, nha mudjer tanbê kumesa ta sirbi Jeová. Gósi mi ku el, nos fidju, nos fidju-fémia i se maridu sta unidu na adorason verdaderu.

Óras ki N ta pensa na kel sonhu ki N tinha désdi mininu di sirbi Deus i djuda otus algen, N ta da kónta ma N atxa más di ki kel ki N staba ta djobe. N ka ten palavra pa N mostra nha gratidon pa Jeová.

“N sabia ma staba ta falta algun kuza.” — LYNETTE HOUGHTING

ANU KI EL NASE: 1958

PAÍS KI EL NASE: ÁFRIKA DI SUL

SE VIDA NA PASADU: TA XINTIBA BANDONADU

MODI KI ÉRA NHA VIDA ANTIS: N nase na Germiston, un sidadi ki tinha txeu mina ki ka éra nen riku nen póbri i ki tinha poku krimi. Nha mai ku nha pai atxa ma es ka ta pode kuidaba di mi, pur isu es disidi leba-m pa un lugar pa N ser adotadu. Sô ku 14 dia, dipôs ki N nase un kazal ki tinha txeu amor adota-m i pa mi es pasa ta ser nha mai ku nha pai. Má simé, dipôs ki N fika ta sabe di nha stória, N kumesa ta xinti  bandonadu. N fika ta xinti ma mi é ka éra fidju-fémia di nha mai ku nha pai ki adota-m i la na fundu N xintiba sima ki es ka ta ntendeba mi.

Kantu N tinha uns 16 anu, N kumesa ta bai bar, undi mi ku nhas amigu ta badjaba i nu ta obiba algen ta kanta. Ku 17 anu, N kumesa ta fuma sigaru. N kria ser magra móda kes modelu ki N ta odjaba na publisidadi na kaxa di sigaru. Kantu N faze 19 anu, N kumesa ta trabadja na sidadi di Johannesburg, i lógu N kumesa ta kolega ku algen mariadu, uza maus palavra i N kumesa ta fuma i ta bebe txeu na fin di simana.

Má simé N ta staba ku bon dispozison, N ta fazeba izersísiu, N ta djugaba bóla i N ta fazeba otus tipu di disportu. N trabadja txeu pa N pode ser konxedu pamodi mi éra bon na kuzas di konputador. I pamodi kel-li N ka tinha prubléma ku dinheru i pesoas ta atxaba ma N tinha un vida dretu. Má simé N ka éra filís, N staba diziludidu sen obijetivu na vida. La na fundu, N sabia ma staba ta falta algun kuza.

MODI KI BÍBLIA MUDA NHA VIDA: Kantu N kumesa ta studa Bíblia, N prende ma Jeová é un Deus di amor. Tanbê N prende ma el mostra kel amor li kantu ki el da-nu se Palavra, ki é Bíblia. É sima si el skrebe un karta pa kada un di nos pa el mostra-nu pa ki kaminhu ki nu debe anda. (Isaías 48:17, 18) N da kónta ma si N kria tra pruvetu di kel orientason ki Jeová ta da ku amor, N tinha ki faze grandis mudansa na nha vida.

Un mudansa ki N mesteba faze éra na amizadis ki N tinha. Kes palavras ki sta na Provérbios 13:20, mexe ku mi. El ta fla: ‘Ken ki ta anda ku algen ki ten sabedoria, ta ganha sabedoria, má ken ki ta sta djuntu ku algen ki ka ten juís, ta ten prublémas.’ Kel prinsípiu li djuda-m larga kes amizadi ki N tinha i djuda-m ranja novus amigu ki é kes ki ta sirbi Jeová.

Nha difikuldadi más grandi éra para di fuma, éra un vísiu fórti. Poku-poku N konsigi vense kel difikuldadi li, má N pasa pa otu dizafiu. N subi 13 kilu pamodi N para di fuma! Kel-la pô-m ta xinti txeu dizanimadu i leba uns 10 anu pa N konsigi dixi di pézu. Má simé, N sabia ma para di fuma éra kel ki N debe fazeba. Sénpri N ta oraba pa Jeová i el da-m forsa pa N konsigi.

BENSONS KI N RESEBE: Gósi nha saúdi sta midjór. Tanbê N sta kontenti pamodi gósi N ka sta kóre tras di un bon trabadju, puzison na sosiadadi i rikéza, ki é sô iluzon. Má gósi kuza ki ta da-m alegria é pâpia ku otus algen sobri kes verdadi di Bíblia. Pamodi kel-li três algen ki nos éra koléga di skóla gósi sta ta sirbi Jeová djuntu ku mi i ku nha maridu. Antis di nha mai ku nha pai ki adota-m móre, N konsigi pâpia ku es sobri kel promésa ki sta na Bíblia ma ta ben ten un resureison na Paraízu li na Téra.

Gósi N ka sta xinti bandonadu más, pamodi N konxe Jeová i el sta ta djuda-m lida ku kel-li. El djuda-m xinti ma N ta faze párti di un família di irmons na mundu interu. Na es família, N atxa monti mai, pai, irmons i irmans. — Marcos 10:29, 30.

[Fotu na pájina 12]

N xinti amor ki Tistimunhas di Jeová mostra-m

[Fotu na pájina 13]

Kel santuáriu xintoísta undi ki N ta adoraba imaji