Li Santil Hu kixjalebʼ xyuʼam

KʼAʼUT jun li ixq li numenaq 60 chihabʼ re kixkanabʼ xloqʼoninkil ru ebʼ li pechʼbʼil yos? Kʼaru kixbʼaanu jun aj kʼamolbʼe saʼ xʼiklees re xkanabʼankil li xpaabʼal ut t-oq joʼ aj testiiw re li Jehobʼa? Kʼaru kixbʼaanu jun li ixq re xqʼaxbʼal ru xrahil xchʼool xbʼaan naq keʼxsi, re jun chik li junkabʼal? Qilaq kʼaru keʼxye.

«Moko wankin ta chik rubʼel xwankil ebʼ li pechʼbʼil yos» (ABA DANSOU)

KIYOʼLAAK SAʼ LI CHIHABʼ: 1938

TENAMIT: BENÍN

XTZʼAQOBʼ LI NAʼLEBʼ: NAXLOQʼONI RU EBʼ LI PECHʼBʼIL YOS

LI XINKʼUL CHAQ: Xinkʼiik saʼ li kʼalebʼaal So-Tchahoué, li wank chixkʼatq jun li haʼ ut nujenaq chi sulul. Xbʼaan naq maakʼaʼ li bʼe ebʼ li kristiʼaan nekeʼroksi li jukubʼ ut li kayuuk re xik saʼ junaq chik li naʼaj. Re naq wank xtzekemqebʼ nekeʼkaribʼk, nekeʼxkʼiresi li wakax, li chibʼaat, li karneer, li kuy ut ebʼ li tzʼik. Nekeʼxyiibʼ li rochoch rikʼin cheʼ, kʼim ut ladriiy. Usta naabʼalebʼ li kristiʼaan nebʼaʼebʼ moko naabʼal ta li maaʼusilal arin joʼ saʼ li tenamit.

Naq toj kachʼinin chaq linyuwaʼ xinxtaqla rochbʼen linchaqʼ saʼ jun li naʼajej bʼarwiʼ maajun li kristiʼaan ut aran xqatzol xloqʼoninkil ebʼ li pechʼbʼil yos. Naq xinkʼiik xinʼok xloqʼoninkil li yos Dudua, li nawbʼil ajwiʼ ru joʼ Oduduwa saʼ li teep yoruba. Xinyiibʼ jun li altar ut junelik ninmayeja jalan jalanq li tzekemq li terto xtzʼaq ut ninsach chixjunil intumin re xbʼaanunkil li naʼlebʼ aʼin.

CHANRU KIXJAL LINYUʼAM LI SANTIL HU: Naq xinʼok xtzolbʼal li Santil Hu xinkʼe reetal naq jun ajwiʼ li tzʼaqal Yos, aʼan li Jehobʼa ut inkʼaʼ nawulak chiru naq tqaloqʼoni ebʼ li pechʼbʼil yos (Éxodo 20:​4, 5; 1 Corintios 10:14). Xintaw ru kʼaru tinbʼaanu. Joʼkan naq xinkut chi najt chixjunil li naxchap ribʼ rikʼin li pechʼbʼil yos. Inkʼaʼ chik ninxik rikʼin laj qʼe re xnawbʼal chanruhaq linyuʼam ut inkʼaʼ chik nintzʼaqonk saʼ li xnaʼlebʼebʼ li bʼalaqʼil paabʼal.

Xchʼaʼajkoʼk chiwu xkanabʼankil xbʼaan naq xinbʼaanu chiru 60 chihabʼ. Ebʼ li wamiiw, li wech-alal ut ebʼ li wechkabʼal xeʼjosqʼoʼk ut xineʼxseʼe. Xintzʼaama re li Jehobʼa naq tinxtenqʼa xbʼaanunkil li nawulak chiru. Li aatin saʼ Proverbios 18:10, Li Santil Hu, Sociedad Bíblica de Guatemala, SBG, xwaklesi inchʼool naxye: «Li Qaawaʼ aʼan chanchan li kawubʼresinbʼil ochoch: rikʼin Aʼan nekeʼxkol ribʼ li tiikebʼ xchʼool».

Xinxtenqʼa ajwiʼ xik saʼebʼ xchʼutam ebʼ laj Testiiw bʼar xwil naq nekeʼxkʼutbʼesi li tzʼaqal rahok. Ut chanru nekeʼxyal xyuʼaminkil li naxye li Santil Hu. Chixjunil li xwil aran xkʼut chiwu naq ebʼ laj testiiw re li Jehobʼa aʼan li tzʼaqal paabʼal.

KʼARU RUSILAL XINTAW: Xbʼaan naq xinʼok xyuʼaminkil saʼ wochoch li naxye li Santil Hu xinnachʼok chixkʼatq ebʼ linkokʼal. Joʼkan ajwiʼ, xwekʼa naq xʼelk jun mamaʼ iiq saʼ inbʼeen. Junxil ninsach chixjunil intumin chirixebʼ li pechʼbʼil yos li maajunwa xineʼxtenqʼa. Anaqwan ninloqʼoni chik ru li Jehobʼa, aʼan chi seebʼ tixsach chixjunil li qachʼaʼajkilal (Apocalipsis 21:​3, 4). Anaqwan moko wankin ta chik rubʼel xwankil ebʼ li pechʼbʼil yos. Ninloqʼoni ru li Jehobʼa chi anchal inchʼool. Rikʼin li Jehobʼa maakʼaʼ ninxiwa, kolbʼilin ut sa saʼ inchʼool.

«Chalen chaq saʼ linkachʼinal xinsikʼ ru li Yos» (SHINJI SATO)

KIYOʼLAAK SAʼ LI CHIHABʼ: 1951

TENAMIT: JAPÓN

XTZʼAQOBʼ LI NAʼLEBʼ: KIWANK JOʼ AJ KʼAMOLBʼE SAʼ LI PAABʼAL SINTOÍSTA

LI XINKʼUL CHAQ: Xinkʼiik saʼ jun li chʼina teep re li tenamit Japón. Chalen saʼ inkachʼinal linnaʼ inyuwaʼ xeʼxkʼut chiwu xloqʼoninkil ebʼ li xyos re li paabʼal sintoísta. Junelik ninkʼoxla chanru tintaw li kolbʼa ibʼ ut chanru tintenqʼa ebʼ li kristiʼaan li wankebʼ xchʼaʼajkilal. Jultik we naq laj kʼutunel kixpatzʼ qe kʼaru naqaj xbʼaanunkil naq tooninqʼanq. Ebʼ li wechtzolom keʼaatinak chirix junjunq li kʼanjel joʼ ebʼ li nekeʼxtzʼil rix jalan jalanq chi naʼlebʼ. Abʼan naq laaʼin xinye naq nawaj kʼanjelak chiru li Yos, keʼxkamsi ribʼ chi inseʼenkil.

Naq xinraqeʼk chi tzolok xinʼok chi kʼanjelak joʼ aj kʼutunel chirix li paabʼal. Aran xinnaw ru jun aj kʼamolbʼe saʼ li paabʼal sintoísta, naq wank xhoonal naxyaabʼasi jun li hu li qʼeq xbʼonol. Laaʼin ak xinkʼe reetal chanru naxkʼabʼaʼi li hu, naq kixpatzʼ ma ninnaw kʼaru yook xyaabʼasinkil xinye re: «Li Santil Hu». Tojaʼ naq kixye we: «Yalaq ani li traj wank joʼ aj kʼamolbʼe saʼ li paabʼal sintoísta tento tixyaabʼasi li hu aʼin».

Saʼ junpaat xkohin xloqʼbʼal jun li Santil Hu ut xinkʼe saʼ jun li naʼaj bʼarwiʼ junelik nawil ru. Abʼan saʼ xkʼabʼaʼ naq laatzʼ wu xtzolbʼal jalan chik li naʼlebʼ inkʼaʼ nintaw linhoonal re xyaabʼasinkil. Xinraqeʼk chi tzolok ut xinʼok joʼ aj kʼamolbʼe saʼ li paabʼal sintoísta saʼ jun li naʼaj re loqʼonink. Anaqwan xintaw li xwaj xbʼaanunkil saʼ linkachʼinal!

Saʼ junpaat xinkʼe reetal naq maawaʼ peʼ joʼ xinkʼoxla chaq. Li xkʼihalil ebʼ laj kʼamolbʼe maakʼaʼ nekeʼraj re li kristiʼaan. Jun rehebʼ laj jolominel kixye we: «Wi taawaj naq us tat-elq, mat-aatinak chirix li paabʼank aatinan chirix jalan chik li naʼlebʼ».

Chixjunil aʼin kixchʼina linchʼool. Usta inkʼaʼ xinkanabʼ li ochoch re loqʼonink xinʼok xtzʼilbʼal rix jalan chik ebʼ li paabʼal. Abʼan naq ninbʼaanu aʼin qʼaxal wiʼ chik nachʼinaak linchʼool chanchan tawiʼ naq maajun li paabʼal naxkʼut li yaal.

CHANRU KIXJAL LINYUʼAM LI SANTIL HU: Saʼ li chihabʼ 1988 xinnaw ru jun li naʼokenk saʼ li paabʼal budista li kixye we naq us raj naq twil xsaʼ li Santil Hu. Tojaʼ naq, xnaq saʼ inchʼool laj kʼamolbʼe saʼ li paabʼal sintoísta li kixye we ajwiʼ aʼin junxil. Xinpaabʼ rehebʼ ut xinʼok xyaabʼasinkil, kʼajoʼ xwulak chiwu! Wank sut ninsaqewink chi rilbʼal xsaʼ li Santil Hu.

Aʼin kixbʼaanu naq tinʼoq chi tijok chiru li Yos joʼ naxye Mateo 6:​9-13. Rajlal kabʼkabʼ hoor ninye li tij aʼin. Usta yookin chi kʼanjelak saʼ li naʼajej re loqʼonink, inkʼaʼ ninkanabʼ tijok.

Naabʼal li patzʼom nachalk saʼ inchʼool naq ninyaabʼasi li Santil Hu. Saʼ li hoonal aʼan ak sumsukin chik ut ninnaw naq ebʼ laj testiiw re li Jehobʼa nekeʼkʼehok tzolom chirix li Santil Hu xbʼaan naq ak xeʼrulaʼani li wixaqil. Xinʼaatinak rikʼin jun li ixq aj Testiiw ut naabʼal li patzʼom xinbʼaanu re, xsach inchʼool chi rilbʼal naq kiroksi li Santil Hu re xsumenkil linpatzʼom. Moqon kixye re jun li winq aj Testiiw naq teʼxkʼe intzolbʼal chirix li Santil Hu.

Moqon xinʼok chi wulak saʼebʼ li xchʼutam, saʼ xtiklajik inkʼaʼ xinkʼe reetal naq saʼ xyanqebʼ wankebʼ wiibʼ oxibʼ aj Testiiw li xinhobʼebʼ chaq junxil. Usta joʼkan ebʼ aʼan xeʼaatinak wikʼin ut xineʼxkʼul chi sahebʼ saʼ xchʼool.

Aran xintzol naq li Yos naraj naq ebʼ li bʼeelomej teʼxra ut teʼroxloqʼi li xjunkabʼal. Saʼ xkʼabʼaʼ naq jwal laatzʼ wu saʼ linkʼanjel joʼ aj kʼamolbʼe saʼ li paabʼal inkʼaʼ ninkʼe inchʼool chirix li wixaqil ut ebʼ linkokʼal. Xinkʼe reetal naq usta ninkʼe inchʼool chi rabʼinkilebʼ li kristiʼaan li nekeʼkʼulunk saʼ li ochoch re loqʼonink maajun sut xinkʼe inchʼool chi rabʼinkil li wixaqil.

Xtzolbʼal li Santil Hu xinxtenqʼa chi xraabʼal li Jehobʼa. Naabʼal xraqal li Santil Hu xtochʼ inchʼool joʼ Romanos 10:​13, SBG, li naxye: «Yalaq ani taayaabʼanq re xkʼabʼaʼ li Qaawaʼ, aʼan taakoleʼq». Chalen chaq saʼ linkachʼinal xinsikʼ li Yos ut anaqwan xintaw chik.

Inkʼaʼ chik sa nawekʼa kʼanjelak saʼ li ochoch re loqʼonink. Xʼok inkʼaʼuxl xkʼoxlankil kʼaru teʼxye li junchʼol wi tinkanabʼ li paabʼal sintoísta, abʼan junelik xinye naq tinkanabʼ wi tintaw li yaal saʼ jalan chik naʼaj. Saʼ li chihabʼ 1989 xinbʼaanu li us choʼq we, xinkanabʼ li naʼajej re loqʼonink ut xinʼok chi kʼanjelak chiru li Jehobʼa.

Kichʼaʼajkoʼk chiwu xbʼaanunkil aʼin xbʼaan naq li nekeʼjolomink we kineʼxwechʼ ut kineʼxmin re naq inkʼaʼ tinkanabʼebʼ. Abʼan li qʼaxal xchʼaʼajkoʼk chiwu aʼan xyeebʼal re linnaʼ linyuwaʼ li tinbʼaanu. Naq yookin chi xik saʼebʼ li rochoch ninparpot ut nawekʼa naq xaqliik re li waanm. Saʼ li bʼe naabʼal sut xintijok chiru li Jehobʼa re naq tinxtenqʼa.

Naq xinwulak moko saʼ junpaat ta xinye rehebʼ li nawaj xbʼaanunkil. Naabʼal hoor xnumeʼk tojaʼ naq xinye re linyuwaʼ, xinye re naq saʼ jalan chik paabʼal xintaw li tzʼaqal Yos ut naq tinkanabʼ li paabʼal sintoísta. Mem xkanaak ut kʼajoʼ naq kirahoʼk xchʼool. Wiibʼ oxibʼ rehebʼ linkomon xeʼxyal xjalbʼal linnaʼlebʼ. Abʼanan maaʼani nawaj xtochʼbʼal xchʼool nawaj bʼan xbʼaanunkil li us, kʼanjelak chiru li Jehobʼa. Moqon ebʼ linkomon xeʼroxloqʼi wu xbʼaan li xinbʼaanu.

Abʼan moko tzʼaqal ta naq xinkanabʼ li ochoch re loqʼonink aajel bʼan naq tinjal linnaʼlebʼ. Xinkanabʼ li naʼajej re loqʼonink abʼan, xbʼaan naq wank chaq xwankil saʼ linyuʼam usta ninyal inqʼe re naq tsachq saʼ inchʼool chixjunil li nawil naxjultika wiʼ chik we.

Wank wiibʼ li naʼlebʼ li xinxtenqʼa re xqʼaxbʼal ru aʼin. Li xbʼeen aʼan xchʼutubʼankil ut xkʼatbʼal chixjunil li wank saʼ wochoch li naxchap ribʼ rikʼin li paabʼal sintoísta. Xinkʼat ebʼ li tasal hu, ebʼ li jalam u ut li kʼaʼaq re ru li terto xtzʼaq. Li xkabʼ naʼlebʼ li xinxtenqʼa aʼan xyalbʼal xnumsinkil naabʼal li hoonal rikʼinebʼ laj Testiiw aʼin kixbʼaanu naq timil timil tsachq saʼ inchʼool linnajteril naʼlebʼ.

KʼARU RUSILAL XINTAW: Junxil maakʼaʼ nawaj re li wixaqil chi moko ebʼ linkokʼal joʼkan naq xjunes nekeʼrekʼa ribʼebʼ. Abʼan naq xinʼok xkʼebʼal inchʼool chirix linjunkabʼal joʼ naxye li Santil Hu xooʼok chi wank saʼ junajil. Moqon li wixaqil kiʼok chi kʼanjelak chiru li Jehobʼa, anaqwan li wixaqil ut laaʼin, li qayum, li wixqaʼal ut li xbʼeelom naqaloqʼoni ru li Jehobʼa, li tzʼaqal Yos.

Naq ninkʼoxla li xinye chaq saʼ linkachʼinal ninkʼe reetal naq qʼaxal wiʼ chik xinqʼax ru li xinbʼaanu. Maajunwa tinruuq xbʼanyoxinkil re li Jehobʼa chixjunil li kixbʼaanu chiwix.

«Saʼ xchamal linchʼool nawekʼa naq wank kʼaru napaltoʼk we» (LYNETTE HOUGHTING)

KIYOʼLAAK SAʼ LI CHIHABʼ: 1958

TENAMIT: SUDÁFRICA

XTZʼAQOBʼ LI NAʼLEBʼ: KIREKʼA NAQ INKʼAʼ NARAHEʼK

LI XINKʼUL CHAQ: Xinyoʼlaak saʼ li teep Germiston, bʼarwiʼ moko naabʼal ta chaq li maaʼusilal. Linnaʼ linyuwaʼ keʼxkʼoxla naq inkʼaʼ teʼruuq inkʼiresinkil joʼkan naq wank 14 kutan we xineʼxsi rikʼin jalan chik kristiʼaan. Junelik xinkʼoxla naq li keʼkʼiresink we aʼanebʼ tzʼaqal linnaʼ linyuwaʼ, abʼan naq xinnaw naq yal xineʼxxok xwekʼa naq xineʼxtzʼeqtaana linnaʼ linyuwaʼ. Xwekʼa naq moko juntaqʼeeto ta joʼkan naq inkʼaʼ nekeʼxtaw wu.

Naq wank 16 chihabʼ we xinʼok chi xik chi ukʼak, chi xajok ut rabʼinkil ebʼ li bʼich rikʼinebʼ li wamiiw. Ut naq wank 17 chihabʼ we ninmayibʼk chik nawaj raj naq bʼaqin joʼ li xjalam u ebʼ li ixq li nekeʼelk saʼ li esil re li may. Naq wank 19 chihabʼ we xkohin Johannesburgo chi kʼanjelak. Moqon xinʼok rochbʼeninkil ebʼ li kristiʼaan li yibʼebʼ ru xnaʼlebʼ, ninye li tzʼaj aj aatin, ninmayibʼk ut ninʼukʼaʼk saʼ xraqik li xamaan.

Saʼ xkʼabʼaʼ naq kaw linjunxaqalil junelik yookin chi bʼatzʼunk. Ninnaw kʼanjelak joʼkan naq chaabʼil nekeʼaatinak chiwix, wank intumin joʼkan naq naabʼal nekeʼxye we naq us yookin chi elk saʼ linyuʼam. Abʼan moko sa ta saʼ inchʼool, nawekʼa naq maakʼaʼ rusilal linyuʼam. Saʼ xchamal linchʼool nawekʼa naq wank kʼaru napaltoʼk we.

CHANRU KIXJAL LINYUʼAM LI SANTIL HU: Naq xinʼok xtzolbʼal li Santil Hu xintzol naq li Jehobʼa narahok ut naq kixkʼe qe li Santil Hu choʼq maatan, chanchan jun li esilhu li naxye qe kʼaru tqabʼaanu saʼ li qayuʼam (Isaías 48:​17, 18). Xinkʼe reetal naq wi nawaj xtawbʼal rusilal li naʼlebʼ li wank saʼ li Santil Hu tento naq tinjal innaʼlebʼ.

Jun li naʼlebʼ li aajel ru tinjal aʼanebʼ li wamiiw joʼ naxye Proverbios 13:​20, SBG: «Li narochbʼeenihebʼ li chaabʼilebʼ xnaʼlebʼ, tixtaw xnaʼlebʼ; abʼan li nawank rikʼinebʼ li jip, taasachq chi junwaakaj». Li naʼlebʼ aʼin xinxtenqʼa re xkanabʼankil ebʼ li najteril amiiw joʼkan naq xinʼok rochbʼeninkilebʼ laj Testiiw.

Abʼan, kʼajoʼ xchʼaʼajkoʼk chiwu xkanabʼankil li mayibʼk. Naq xinyal inqʼe re xkanabʼankil li mayibʼk xintaw jalan chik li chʼaʼajkilal xtaqeʼk 30 liibʼr li waalal, aʼin xbʼaanu naq moko sa ta chik twekʼa wibʼ ut xnumeʼk tana 10 chihabʼ re naq tkubʼeq innimal. Abʼan ninnaw naq tento tinkanabʼ mayibʼk, junelik nintijok chiru li Jehobʼa re naq tinxtenqʼa re xqʼaxbʼal ru li naʼlebʼ aʼin.

KʼARU RUSILAL XINTAW: Anaqwan moko ninyajajnaq ta chik. Sa chik inchʼool ut inkʼaʼ chik ninsikʼ li sahil chʼoolejil saʼ li bʼihomal malaj saʼ linkʼanjel. Rochbʼen linbʼeelom sa qachʼool chi xtenqʼankilebʼ li junchʼol, ak xintenqʼahebʼ oxibʼ li wechkʼanjel chi xnawbʼal ru li Yos. Joʼkan ajwiʼ naq toj maajiʼ nekeʼkamk linnaʼ linyuwaʼ li xeʼkʼiresink we, xinruuk xyeebʼal rehebʼ naq li Yos tixwaklesi wiʼ chik chi yoʼyo ebʼ li kamenaq saʼ jun li chʼinaʼusil naʼajej arin saʼ li Ruuchichʼochʼ.

Inkʼaʼ chik nawekʼa naq tzʼeqtaananbʼilin xbʼaan naq wankin saʼ amiiwil rikʼin li Jehobʼa. Anaqwan wankin saʼ xyanq ebʼ laj Testiiw joʼ jun li nimla junkabʼal bʼarwiʼ xintaw linnaʼ, linyuwaʼ, li was ut ebʼ li wiitzʼin (Marcos 10:​29, 30).

[Jalam u]

Ebʼ laj testiiw re li Jehobʼa nekeʼxkʼutbʼesi li tzʼaqal rahok

[Jalam u]

Li ochoch re loqʼonink re li paabʼal sintoísta