Библия чуртасты алыстырча

НОҒА 60 час ас парған ипчі идолларға пазырбин сыххан? Ноға синтоист абыс, святилищедегі нымысчыланысты артыс салып, христианскай искірігҷі пол парған? Аны алып алған сӧбіреде ӧскен ипчі хайди кізее кирек чох кізізім тіп сағынмин сыххан? Пу кізілер постарынаңар ниме чоохтапчатханнарын хығырып алыңар.

«Идолларға паза пазырбинчам» (АБА ДАНСУ).

ТӦРЕЕН ЧЫЛЫ: 1938

ТӦРЕЕН ХАЗНА: БЕНИН

ХАҶАН-ДА: ИДОЛЛАРҒА ПАЗЫРҒАН

МЫНЫҢ АЛНЫНДА. Мин Со-Чахуви тіп кічиҷек аалда тӧреем. Ол аал кӧл хыринда сас чирде турча. Пістің аалдағы кізілер палыхтапчалар, інектер, хойлар, ӧскелер, сосхалар паза хустар тутчалар. Анда чоллар чоғыл, аннаңар кізілер кӧбізін кименең паза каноэнең чӧрчелер. Тураларны кӧбізін ағаснаң паза отнаң, пірееде кірписнең пӱдірчелер. Кізілернің кӧбізі хызылып чуртапчалар, че андағ даа полза, сайбағлар, городтағы чіли, кӧп нимес.

Пабам мині пиҷемнең хада фетишистскай храмзар ызыбысханда, піс кічиҷек полғабыс. Анда пісті традиционнай киртініске ӱгреткеннер. Ӧзіп алғамда, мин йоруба чон пазырчатхан Одудува (Одуа) худайға пазырарға пӧгін алғам. Мин ағаа кічиҷек тура пӱдір салғам паза андар тайыға ямсты, пальма хайағын, улиткаларны, таңах палаларын, тахырахтарны паза пасха даа тіріг нимелерні сыбыра ағылҷаң полғам. Мин ол тайығларға прай даа ахчамны хорат салҷаң полғам.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Библияны ӱгрен сыххамда, Иегова чалғыс сын Худай полчатханын паза Худай идолларға пазырарға чаратпинчатханын піліп алғам (Исход 20:4, 5; 1 Коринфтегілерге 10:14). Ниме идерге мағаа пілдістіг пол парған. Обырастарымны прай сығар тастабысхам, идолларға пазырыснаң палғалыстығ нимелерні прай чох идібіскем, ухаанҷыларзар айланминыбысхам паза кибірлерде араласпиныбысхам.

Мағаа, 60 час ас парған ипчее, андағ алызығлар идерге оой полбаан. Нанҷыларым, туғаннарым, хонҷыхтарым мағаа тоғырланғаннар паза кӱлгеннер. Че мин орта тудынарға Иеговадаң кӱс сурынғам. Притчи 18:10-ғы сӧстер мағаа кӱс пиргеннер: «Иегованың ады — пик сівее. Арығ чӱректіг кізі андар тизіп, арачыланыс алча».

Ідӧк мағаа Иегованың киречілерінің чыылығлары уғаа полысханнар. Анда мин христианнарның сын хынызын кӧргем. Иегованың киречілерінің Библияда пазылған пӧзік нравственнай нормалар хоостыра чуртапчатханнары минің кӧңніме тың кірген. Прай пу нимелерні кӧріп, Иегованың киречілері сын религия полчатханына киртін сыххам.

ЧУРТАЗЫМА ХАЙДАҒ ТУЗА АҒЫЛҒАН. Мин Библияның принциптерінің хоостыра чуртап сыххам, анзы мағаа палаларымнаң ынағ чуртирға полыс пирген. Паза мин уғаа аар чӱктең позып алғам. Мының алнында прай ахчамны тіріг нимес, тузазы чох идолларға хоратчаң полғам. Ам, тізең, мин Иеговаа пазырчам, ол пістің прай сидіктерібісті саңай чох идібізер (Азых чоох 21:3, 4). Ам мин идолларға нымысчыланминчам, Иеговаа нымысчыланчам. Анзына уғаа тың ӧрінчем! Ағаа нымысчыланып, мин алнынзар ізеснең кӧрчем.

«Мин кічігдең сығара Худайны тілеем» (СИНДЗИ САТО).

ТӦРЕЕН ЧЫЛЫ: 1951

ТӦРЕЕН ХАЗНА: ЯПОНИЯ

ХАҶАН-ДА: СИНТОИСТ АБЫС

МЫНЫҢ АЛНЫНДА. Мин Фукуока префектурада кічиҷек городта ӧскем. Минің іҷе-пабам худайға уғаа тың киртінҷеңнер, мині кічігдең сығара синтоистскай худайларны улуғлирға ӱгреткеннер. Кічігдең ала хайди арачыланып аларға сағынҷаңмын паза чобаға кір парғаннарға полызарға тың хынҷаңмын. Пірсінде пастағы класстарда ӱгренчеткемде, ӱгретчі пістең, ӧс парзар, кем поларға хынчазар тіп сурған. Хада ӱгренчеткен палалар кем поларға хынчатханнарын пілгеннер, кӧзідімге, ученай поларға хынғаннар. Мин, тізең, Худайға нымысчыланарға хынчам теем. Андада мағаа прайлары кӱл сыхханнар.

Школа соонда мин религиознай ӱгредіг аларға пӧгін алғам. Анда ӱгренчеткенде, мин пір синтоист абыснаң танызып алғам. Ол, маң на полза, хайдағ-да хара киндені хығырҷаң. Пірсінде ол миннең сурған: «Сато, пу хайдағ кинде, пілчезің ме?» Мин аның обложказын кӧрген полғам, аннаңар нандырғам: «Библия». Андада ол теен: «Полған на синтоист абыс поларға хынчатхан кізее пу киндені хығырып аларға кирек».

Мин, соона салдырбин, Библия садып алғам. Аны полкада прайзына кӧрінер иде турғыс салғам паза аны уғаа хайраллаам. Че ӱгренчеткен туста аны хығырарға мағаа маң чох полған. Ӱгренерін тоос салып, мин синтоисттер святилищезінде, абыс полып, тоғын сыххам. Іди кічігдең сығара сағынған сағызым тол парған.

Че святилищедегі нымысчыланыс андағ полар тіп сағынмаам. Абыстарның кӧбізі пасхаларынаңар пір дее сағынмаан. Кӧбізінің киртіністері дее чох полған. Улуғ абыстарның пірсі мағаа піди теен: «Маңнаныстығ поларға хынчатсаң, философиядаңар ла чоохта. Киртіністеңер чоохтирға чарабас».

Андағ чоохтар ӱчӱн синтоизмге киртінмин сыххам. Мин святилищеде аннаң андар нымысчыланған ползам даа, пасха религияларнаң таныс сыххам. Че оларның пірдеезі синтоизмнең артых полбаан. Олардаңар нинҷе кӧп піліп одырғам, оларның пірдеезінде сын чох полчатханын анҷох чахсы кӧргем.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. 1988 чылда мағаа пір буддист Библия хығырарға чӧп пирген. Синтоис абыс андағох чӧп пиргенін сағысха кірген, аннаңар Библия хығыр сыххам. Мин аны уғаа хынып хығырғам, пірееде хараа тооза, таң чараанҷа, хығырҷаң полғам.

Библиядаң алған пілістер мині Библияның Худайына пазырарға кӧӧктіргеннер. Пастап мин Матфей 6:9—13-те пазылған «Отче наш» тіп пазырыснаң пазырҷаң полғам. Аны ікі час пазынаң — синтоистскай святилищедегі нымысчыланыс тузында даа — хатап-хатап чоохтанҷаң полғам.

Библияны нинҷе кӧп хығырғам, анҷох кӧп сурығлар сыхханнар. Мының алнында ипчімзер Иегованың киречілері килҷең полғаннар, аннаңар оларның Библия ӱгренерге полысчатханнарын пілгем. Мин оларны тілеп сыххам. Пірсінде, Иегованың киречізі ипчее тоғас парғамда, ағаа уғаа кӧп сурығлар турғысхам. Прай сурығларыма ол Библия хоостыра нандырған. Анзы мағаа хайхастығ полған. Ол мағаа миннең Библия ӱгредиин иртірер кізі таап пирген.

Ӱр ниместең мин Иегованың киречілерінің чыылығларына чӧр сыххам. Андада мин пілбеем: чыылығларда мының алнында мин хомай иткен кізілер полтырлар. Че олар мині чылығ удурлаҷаңнар паза сыбыра мағаа паарсаснаң хайҷаңнар.

Христианскай чыылығларда мин піліп алғам: Худай ирлер сӧбірелеріне хынзыннар паза улуғлазыннар тіп хынча. Мин, тізең, святилищеде нымысчыланып, ипчіме паза палаларыма хайығ пір дее салбаҷаң полғам. Кинетін піліп алғам: святилищезер килген кізілерні мин ситкеп исчең полғам, ипчімні кирексіністеріне, тізең, пір дее кирегім халбаҷаң.

Библияны ӱгреніп, мин кӧп сыннар піліп алғам. Ол сыннар мині Иеговаа чағын иткеннер. Римдегілерге 10:13 минің чӱрееме уғаа тың теңен. Анда пазылча: «Хан Худайның [Иегованың, НТ] адын хығырчатхан ноо даа кізі арачыланып алар». Мин кічігдең сығара Худайны тілеем, ам на таап алдым!

Синтоисттернің святилищезінде мин пасхалан сыххам. Че синтоизмні артыс салзам, пасхалары минеңер ниме сағынарлар тіп хорыххам. Аның алнында позыма сыбыра чоохтанҷаң полғам: «Сын Худайны пасха религияда таап алзам, пу религиядаң парыбызам». Аннаңар 1989 чылда, часхыда, святилищедең парыбызып, чуртазымны Иегованың холына пир салғам.

Парыбызарға оой полбаан. Улуғ абыстар мині хырысханнар паза парбасха кӱстееннер. Че алған пӧгінімнеңер іҷе-пабама чоохтирға иң аар полған. Оларзар парчатхамда, тың сағыссырап, кӧксім дее ағырыбысхан, пас таа полбинчатхам. Чолда кӧп хати, тохтаап, Иеговадаң кӱс сурынғам.

Іҷе-пабама ноға килгенімні чоохтирға нинҷе-де час тідін полбаам. Хатап-хатап пазырған соонда, пабама алған пӧгінімні чоохтап пиргем. «Мин сын Худайны таап алғам, аннаңар синтоизмні артысчам»,— теем. Ол ах-тик пол парған. Ибзер, пасха даа туғаннар киліп, синтоизмні артыспасха мині чӧптееннер. Мин сӧбіремні хомзындырарға хынмаам, че орта пӧгін алғанымны пілгем. Пола-пола туғаннарым алған пӧгінімні улуғлап сыхханнар.

Святилищедегі тоғысты артыс саларға оой полған, че сағызымны алыстырарға оой полбаан. Абыс полып тоғынғаным минде тирең іс артыс салған. Мының алнындағы чуртазымны артыс саларға уғаа кӱстенгем, че мағаа олох чуртас апарчам тіп пілдірген.

Мин холым тӱзірбеем. Иң пурнада, ибімде синтоизмнең палғалыстығ кинделерні, хоостарны паза аарлығ даа реликвияларны прай, таап алып, ӧртебіскем. Паза мин Иегованың киречілерінең кӧп арах тус иртірерге кӱстенгем. Олар мағаа уғаа полыс пиргеннер. Кӧместең иргі чуртазым ундудыл сыххан.

ЧУРТАЗЫМА ХАЙДАҒ ТУЗА АҒЫЛҒАН. Мының алнында ипчіме паза палаларыма кирегім пір дее халбаҷаң, аннаңар оларға оларны тастабысханнар тіп пілдірген. Хаҷан мин, Библияның чӧбінің хоостыра, оларнаң кӧп арах тус иртір сыххамда, піс уғаа чағын пол парғабыс. Соонаң ипчім миннең хада Худайға нымысчылан сыххан. Ам прай сӧбірем Иеговаа нымысчыланча: мин, ипчім, оолғым паза хызым ирінең хада.

Кічігдең сығара Худайға нымысчыланарға паза кізілерге полызарға хынғам. Ам, тізең, ол сағызым тол парды. Иеговаа алғызымны читірерге сӧстер дее читпинче!

«Чуртазымда ниме-де читпинчеткен» (ЛИНЕТТ ХОКТИНГ).

ТӦРЕЕН ЧЫЛЫ: 1958

ТӦРЕЕН ХАЗНА: ЮАР

ХАҶАН-ДА: КІЗЕЕ КИРЕК ЧОХ КІЗІЗІМ ТІП САНААН

МЫНЫҢ АЛНЫНДА. Мин шахтёрлар чуртапчатхан городта, Джермистонда, тӧреем. Андағы кізілер ортымахти чуртапчалар. Іҷе-пабам, мині ӧскір полбастар тіп сағынып, мині пасха кізілерге пирібіскеннер. Мағаа 14 ле кӱн полғанда, мині пір ирепчі постарына пала идініп алғаннар. Олар мағаа хынғаннар, мин оларны іҷе-пабам тіп санаам. Че соонаң, мин прай ниме піліп алғамда, позымны кізее кирек чох кізізім тіп санап сыххам. Мині ӧскірген іҷе-пабама пір дее тӧӧй нимеспін паза олар мині піл полбинчалар тіп пілдір сыххан.

16-ҷа час полғанда, мин барларзар чӧр сыххам, анда нанҷыларымнаң хада кӧглер истіп, плесет салҷаң полғабыс. 17 частаң сығара тамкы тарт сыххам. Мин тамкы рекламазындағы модельлер осхас ніскеҷек сындырлығ поларға хынғам. 19 частығда, мин Йоханнесбургта тоғыс таап алғам, олох туста мин хомай кізілернең палғалыс сыххам. Ӱр ниместең хырызын сыххам, тамкы кӧп тарт сыххам паза тынанҷаң кӱннерде араға ізініп ал турғам.

Че мин спортнаң айғазарын тастабаам: аэробиканаң айғасхам, сквош паза ипчілернің футболын ойнаам. Ідӧк мин аймах-пасха компьютернай компанияларда кӧп тоғынғам: карьера идіп аларға хынғам. Мин ахча чахсы тоғынып алҷаң полғам, прайлары мині маңнаныстығ кізі тіп санааннар. Сынында мин уғаа часказы чох кізі полғам: тик ле чуртапчам тіп пілдірген. Мин пілгем: минің чуртазымда ниме-де читпинче.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Библия ӱгрен сыххамда, Иегова хыныс Худайы полчатханын піліп алғам. Ағаа хоза, ол хынызын, позының Сӧзін, Библияны, пиріп, кӧзіткенін піліп алғам. Иегова полған на кізее, аның чуртазына кирек устағ пиріп, пічік пас пиргенге тӧӧй пілдірген (Исаия 48:17, 18). Ол хыныстығ устағлар мағаа туза ползыннар тіп, чуртазымда кӧп ниме алыстырарға кирек полчатханын піліп алғам.

Кӧзідімге, пасха нанҷылар таап аларға кирек полған. Притчи 13:20-гі сӧстердеңер кӧп сағынғам. Анда пазылча: «Хыйғаларнаң чӧрчеткен кізі хыйға полар, алығларнаң чӧрчеткен кізі, тізең, чобаға кір парар». Пу принцип хоостыра, мин иргі нанҷыларымны артыс салып, Иегованың киречілерінің аразында наа нанҷылар тілеп сыххам.

Тамкы тартарын тастирға иң сидік полған. Тамкы тастабысхамда, наа сидікке урун парғам: мин 13-че килограммға чоон пол парғам! Симір пардым тіп, позымзар кӧр тее полбинчатхам. Ол артых килограммнарнаң 10-ҷа чыл харбасхам. Че тамкы тартарын тастабысханым орта полғанын пілгем. Мин Иеговаа сыбыра пазырҷаң полғам, ол, тізең, мағаа пу сидіктерні прай тобырып аларға полыс пирген.

ЧУРТАЗЫМА ХАЙДАҒ ТУЗА АҒЫЛҒАН. Ам минің хазиим мының алнындағызының хыринда чахсы арах. Чуртазым ӧрініс ағылча: карьера, пӧзік орын, ис-пай соонҷа чӱгӱрбинчем. Олар часкаа ағылбинчалар. Піс ирімнең хада Библиядағы сыннарнаң пасхаларынаң ӱлезерге хынчабыс. Миннең хада тоғынған ӱс ипчі чахсы хабарға ӱндескен, ам, тізең, олар Иеговаа нымысчыланчалар. Ағаа хоза, мині ӧскірген іҷе-пабама, олар ӱреп парғанҷа, Библия пирчеткен ізеністеңер чоохтирға маңнанғам.

Ам мин, Худайнаң чағын палғалыс сылтаанда, позымны пірдеезіне кирек чох кізізім тіп санабинчам. Иегова мағаа аның нымысчыларының прай чир ӱстӱндегі сӧбірезінің чардығы полчатханымны пілінерге полыс пирген. Оларның аразында мин уғаа кӧп іҷелер, пабалар, харындастар паза пиҷелер таап алғам (Марк 10:29, 30).

[Хоос]

Иегованың киречілерінің аразында мин сын христианскай хыныс кӧргем

[Хоос]

Синтоистскай святилище: мының алнында мин мында нымысчыланғам