Biibili inuit inuunerannik allannguisitsisarpoq

SOOQ 60-it mis­saan­nik ukiulik guutilianik pal­lorfigin­nik­kun­naarpa? Palasi shintosior­toq sooq guutisiorfimmi suliun­naarluni kristumiun­ngorpa oqaluus­sisar­toq? Arnap inun­ngorsimatsiaan­narluni qitor­navis­sian­ngorsimasup sumigin­nar­neqar­tutut misiginini qanoq naam­magalugu ator­paa? Oqalut­tuaat eqqarsaatigik­kit.

“Guutilianut inussiaataajunnaarpunga.” – ABA DANSOU

UKIOQ INUUIA: 1938

INUN­NGORFIA: BENINI

OQALUT­TUAS­SAR­TAA: GUUTILIANIK PALLORFIGINNITTOQ

INUUNINNI PEREERSUT: So-Tchahouémi, nunaqarfimmi masarsuusumi tatsip eqqaaniit­tumi, peroriar­tor­punga. Nunaqarfim­miut aalisar­tuup­put nersus­suar­nillu, savaasanik, puulukinik tim­mis­sanillu paarsisuul­lutik. Nunaqarfimmi eqqaanilu aqqusineqan­ngim­mat umiatsiat umiaris­sallu atorlugit angalasar­pugut. Ilaat qarmasis­siat atorlugit illulior­taraluar­tut amerlanerit qisuit ivik­kallu atorlugit illulior­tar­put. Nunaqarfim­miut amerlanerit piitsuup­put. Illoqarfin­nulli sanil­liul­lugu pinerlut­toqan­ngin­neruvoq.

Ataatama meeraasunga angajoralu aar­nualerinermik ilin­niaq­qul­luta mat­tuf­fim­mut aal­lar­tip­paatigut. Inersimasun­ngorama Yorubat guutiat Dudua (Oduduwa) guutigiler­para. Guuti taanna illuliuup­para yamsimillu, palmeoliemik, siuteq­qunik, kuk­kukuunik, tuinik uumasunillu allanik pil­liivigikulasarlugu. Taama pil­liuteqar­tar­neq akisum­mat aningaasaatikka tamangajaasa ator­tar­pakka.

BIIBILI QANOQ ALLANNGUSSUTIGIGIGA: Biibilimik atuaq­qis­saar­talerama paasivara Jehova Guutituaasoq ilumoor­toq. Aamma paasivara guutiliat atorlugit pal­lorfigin­nin­neq iluarin­ngik­kaa. (Mosesimik 2. 20:4, 5; Korintimiunut 1. 10:14) Qanoq ilior­tariaqar­nera paasigakku guutiliaatikka illun­nilu guutilianik pal­lorfigin­nin­nermut attuumas­sutil­lit tamaasa igip­pakka. Siulit­tuisar­tut isumasius­saarlugillu ileq­qulersuutinut ilisinermilu ileq­qulersuutinut ilaasarun­naar­punga.

60-it sin­nerlugit ukioqalereerluni taama allan­nguineq imaan­naan­ngitsuuvoq. Ikin­ngutima, ilaqut­tama sanilimalu akerlilersorlungalu illaruaatigisar­paan­nga. Jehovali eqqor­tulior­nis­samut nakus­satseq­qul­lunga qin­nuigaara. Ussatit 18:10-mi Jehovap aqqa pil­lugu allas­simasut tup­pal­lersaatigaak­ka: “Naalak­kap aqqa pal­lit­taalisap napasuliaatut ippoq, iluar­toq tas­sunga qimaanasuar­tar­poq isuman­naatsumilu inis­sit­tarluni.”

Jehovap Nalunaajaasuisa ataatsimiit­tar­neran­nut ilaaneq aamma iluaqutigisar­para. Kristumiuup­put asan­nit­tut, aamma Biibilimi ileq­qoris­saar­nermut najoq­qutas­sianik qutsis­sunik maleruaaniar­tar­nerat nuan­naraara. Takusakka pis­sutigalugit Jehovap Nalunaajaasuisa ilumoor­tumik upperisaqar­nerat qulariun­naar­para.

QANOQ ILUAQUTIGIGIGA: Biibilimi najoq­qutas­sianik maleruaaneq qitor­nan­nut attaveqarluar­neruler­nis­samut iluaqutigaara. Aamma oqilial­laatigeqaara aningaasaatikka tamaasa guutilianut uumas­suseqan­ngitsunut uan­nullu iluaqutaan­ngitsunut ator­tarun­naarak­kit. Maanna Jehova, ajor­nar­torsiutitsin­nik tamanik aaq­qiil­luin­nar­tus­saq, guutisiorfigaara. (Saq­qum­mersitat 21:3, 4) Guutiliat inus­siaataaf­figiun­naarlugit Jehova inus­siatut kif­far­torfigilerakku nuan­naaqaanga! Piviusumik toq­qis­sisil­lungalu illersor­paanga.

“Meeraallungali Guuti ujalerpara.” – SHINJI SATO

UKIOQ INUUIA: 1951

INUN­NGORFIA: JAPANI

OQALUT­TUAS­SAR­TAA: PALASI SHINTOSIORTOQ

INUUNINNI PEREERSUT: Nunap immik­koor­tuani Fukuokami nunaqarfimmi peroriar­tor­punga. Angajoq­qaama upperisarsior­nermik pingaar­titsisut shintot guutian­nik ataq­qin­nin­nis­samik ilin­niar­tip­paan­nga. Nukap­piaraal­lunga aniguisitaanis­saq eqqarsaatigikulasarlugulu pisariaqar­titsisunik ikiuerusungaar­tar­punga. Eqqaamavara ilin­niar­titsisuma atuaqatik­kalu inersimasun­ngorutta sun­ngorusun­nersugut aperigaatigut. Atuaqatikka aalajangersimasunik, soorlu ilisimatuun­ngor­nis­samik, anguniagaqar­put. Oqarama Guuti kif­far­torfigerusul­lugu kik­kut tamarmik illaatigaan­nga.

Atuarfim­mit soraarum­meerama palasitut ilin­nialer­punga. Ilin­niar­nerma nalaani shintosior­tut palasiat sun­ngif­fim­mini atuak­kamik qer­ner­tumik ungalulim­mik atuar­toq naapip­para. Taamaal­luni aperaanga: “Sato, atuagaq una nalun­ngiliuk?” Atuak­kap ungalua maluginiar­nikuugakku akivara: “Biibili.” Oqar­poq: “Shintosior­tutut palasin­ngor­niat tamarmik atuagaq una atuar­tariaqar­paat.”

Ingerlaan­naq Biibilisiniar­punga. Ilisivimmi saq­qumitip­para paaril­luarlugulu. Ilin­niar­nermilli ulap­puteqaqigama atuan­ngilara. Ilin­niarfimmi naam­mas­sigama guutisiorfimmi shintosior­tut palasiat­tut suliler­punga. Kiisami meeraal­lungali anguniagara anguara.

Sunaaf­fali shintosior­tut palasiat­tut sulineq ilimagisan­nit allaanerul­luin­nar­toq. Palasit amerlanerit allanik asan­nip­pal­laar­natillu isumas­suival­laan­ngil­lat. Aamma amerlasuut upper­tuun­ngil­lat. Allaat pisor­tarisama ilaata oqarfigaanga: “Ingerlal­luarusuk­kuit isumaliutersor­nermut tun­ngasut kisiisa eqqar­tor­tas­savatit. Upperisaq eqqar­tor­tas­san­ngilat.”

Tamanna pakatsis­sutigeqaara. Guutisiorfimmi suliin­naraluarlunga upperisarsioqatigiit allat misis­sor­taler­pakka. Allalli pitsaaneror­pasin­ngil­lat. Misis­suinerujar­tor­til­lunga nikal­loralut­tuin­nar­punga. Misigivunga ilumoor­tunik upperisarsioqatigeeqan­ngitsoq.

BIIBILI QANOQ ALLANNGUSSUTIGIGIGA: 1988-imi buddhistip naapitama Biibilimik atuaq­qul­lunga kajumis­saar­paanga. Eqqaaler­para shintosior­tut palasiat taama kajumis­saarinikuusoq. Siun­nersuutaa maleruar­niarlugu aalajanger­punga. Biibili atuar­talerakku tiguar­tip­punga. Ilaan­nik­kut unnuaq naal­lugu seqer­ngup nuinis­saata tungaanut atuar­tar­punga.

Atuak­kakka Guutimut Biibilimi eqqaaneqar­tumut qinusaler­nis­samut kajumis­sis­sutigaakka. Ataatar­pooq Matiusi 6:9-13 allas­simasoq aal­lar­niutigaara. 2 tiimik­kaarlugit – aamma guutisiorfimmi palasitut suliaqar­ninni – qin­nut uteqat­taar­tar­para.

Atuak­kakka pil­lugit apeq­qutis­sar­pas­suaqar­punga. Jehovap Nalunaajaasuisa nuliara pulaar­tar­nikuum­mas­suk nalun­ngilara Biibili ilin­niar­titsis­sutigisaraat. Nalunaajaasut ilaat orneriarlugu apersorsuataar­para. Biibili atorlugu apeq­qutikka tamaasa akim­magit tupigusup­punga. Nalunaajaasunit Biibilimik atuaq­qis­saaqatigineqar­nis­sara isumagaa.

Tamatuma kingunin­ngua Jehovap Nalunaajaasuisa ataatsimiin­neran­nut ilaasaler­punga. Sunaaffa taak­kua ilaat soq­qusaatsumik pisarsimal­lugit. Taamaak­kaluar­toq ilas­sil­luarlungalu tikil­luaq­qusaasutut misigitip­paan­nga.

Ataatsimiin­nerni taak­kunani paasivara uiusup ilaqut­taminik asan­nin­nis­saa ataq­qin­nin­nis­saalu Guutip piumasarigaa. Palasitut sulinera ulap­putigisangaarakku nuliara qitor­nagullu marluk isumas­sor­pal­laarsiman­ngilakka. Paasiler­para guutisiorfim­miit­tut tusar­naar­tarlugit, nuliarali tusar­naan­ngisaan­narsimal­lugu.

Atuaq­qis­saar­tar­ninni Jehova pil­lugu ilik­kagar­pas­suaqarama qanin­neruler­para. Pingaar­tumik allas­simaf­fiit Romamiut 10:13-itut ittut kil­litsis­sutigaakka, tas­sani allas­simavoq: “Kinaluun­niit Jehovap aqqanik tatigin­nit­toq annaan­neqas­saaq.” Meeraal­lungali Guuti ujaler­para, maan­nalu kiisami nas­saaraara!

Misigisaler­punga guutisiorfim­miit­tus­saananga. Aal­laq­qaam­mut shintosior­tuujun­naaruma allat qanoq isum­mis­sanersut isumakuluutigaara. Aalajanger­nikuuvungali Guuti ilumoor­toq allami nas­saarigukku allamik upperisaqaler­niarlunga. Taamaat­tumik 1989-mi uper­naak­kut aalajanger­punga nalun­ngeqatigin­nis­sutiga malin­niarlugu. Guutisiorfik qimap­para Jehovallu assaanut isumagisas­san­ngor­til­lunga.

Guutisiorfiup qiman­nera artor­nar­poq. Pisor­tarisama appisaluup­paan­nga ingerlaq­qunangalu kimigiiserfigalunga. Angajoq­qaamali oqarfiginis­saat artor­nar­neruvoq. Ornik­kak­kit annilaangangaarama sakis­sak­kut anniar­punga, nis­suk­kalu allaan­ngil­lat nudlit! Aqqutaani nakus­satseq­qul­lunga Jehova qin­nuiginiarlugu uneqat­taar­tar­punga.

Angajoq­qaama illuan­nut iseq­qaarama oqarfiginis­saat tunuarsimaarfigaara. Akun­ner­paaluit qaangium­mata qinoqat­taareerlungalu kiisami ataataga nas­suiaap­para. Oqarfigaara Guuti ilumoor­toq nas­saarisimal­lugu kif­far­torfiginiarak­kulu shintosior­tuujun­naar­niarlunga. Ataataga tupal­lunilu aliasuler­poq. Ilaqut­takka isumaga allan­ngor­tin­niarlugu aggikaap­put. Ilaqut­takka aliasutsin­nian­ngik­kaluarlugit nalun­ngilara Jehovap kif­far­torfiginera eqqor­tuusoq. Pif­fis­sap ingerlanerani ilaqut­tama aalajanger­nera pil­lugu ataq­qiler­paan­nga.

Guutisiorfik qimak­kaluarlugu eqqarsar­taasera allan­ngor­tit­tariaqar­para. Palasitut inuunera pigiliul­luin­narsimavara. Inooriaaserisimasara puior­niarsarigaluarlugu sumul­luun­niit saak­kaangama eqqaasar­para.

Marlutsigut iliuuseqar­punga. Siul­ler­tut, upperisarisimasan­nut tun­ngasut tamaasa – atuak­kat, assit allaallu ator­tut akisuut – illun­niit­tut katersoriarlugit ikual­lap­pakka. Aap­paat­tut, periarfis­saqar­nerit tamaasa Nalunaajaasut ilagisar­pakka. Ikin­ngutaanerat tapersersuinerallu iluaqutigeqaakka. Taamaalil­lunga inooriaaserisimasara qimak­kiar­tuler­para.

QANOQ ILUAQUTIGIGIGA: Nuliara qitor­nagullu sumigin­narsimagak­kit assut kiserlior­tutut misigisar­put. Biibilimili uiusut peq­quneqar­nerat­tut ilagisalerak­kit immitsin­nut qanin­neruler­pugut. Pif­fis­sap ingerlanerani nuliama Jehovamut kif­far­toqatigiler­paanga. Maanna erner­put, panip­put ningaar­pullu ataasioqatigalugit ilumoor­tumik guutisior­pugut.

Meeraal­lunga Guutimut kif­far­torusut­tar­nera allanillu ikiuerusut­tar­nera eqqarsaatigigaangak­kit paasisar­para angorusutakka tamaasa, allaallu sin­nerlugit, angusimal­lugit. Jehovamut qujamasun­nera oqaaser­talersin­naan­ngilara.

“Nalunngilara arlaannik amigaateqarlunga.” – LYNETTE HOUGHTING

UKIOQ INUUIA: 1958

INUN­NGORFIA: SYDAFRIKA

OQALUT­TUAS­SAR­TAA: SUMIGINNARNEQARTUTUT MISIGISOQ

INUUNINNI PEREERSUT: Illoqarfimmi piiaaf­fimmi sulisar­toqarfiusumi pinerlut­toqarfiual­laan­ngitsumilu Germistonimi inun­ngor­punga. Angajoq­qaama pisariaqar­titan­nik tunisin­naasorin­ngin­namin­nga qitor­navis­sian­ngor­tip­paan­nga. Inun­ngor­nin­niit ullut 14-it qaangium­mata aap­pariin­nit asan­nit­tunit, anaanatut ataatatullu isigilik­kan­nit, qitor­navis­siar­taarineqar­punga. Qitor­navis­siaanerali paasigakku sumigin­nak­katut misigivunga. Misigisaler­punga angajoq­qaarsian­nut atananga iluamillu paasineqarsin­naananga.

16-it mis­saan­nik ukioqarlunga ikin­ngutik­kalu imer­niar­tarfinni tusar­naar­titsisunut qitigiar­taler­pugut. 17-inik ukioqarlunga pujor­tar­taler­punga. Cigaret­tinut pilerisaarutini arnatut pin­ner­tutut saluk­kusup­punga. 19-inik ukioqarlunga Johan­nesburgimi sulisalerama ikin­ngutipalaanik ilagisar­tagaqaler­punga. Oqaasipilut­tarlungalu pujor­tar­tuaan­narlungalu weekendini imerujus­suar­taler­punga.

Timersor­tuaan­nar­pungali. Akulikitsumik aerobicer­tarlungalu, squasher­tarlungalu isik­kamik arsar­tar­punga. Qarasaasialerinermilu tusaamaneqarlualerusuk­kama tamaviaarlunga sulisar­punga. Pigis­saalerlungalu ingerlal­luar­tutut isigineqaler­punga. Assulli pil­luan­ngitsutut, nikal­lungasutut pakatsisutullu misigivunga. Qamuuna nalun­ngilara arlaan­nik amigaateqarlunga.

BIIBILI QANOQ ALLANNGUSSUTIGIGIGA: Biibili atuaq­qis­saar­talerakku paasivara Jehova Guutiusoq asan­nit­toq. Aamma paasivara oqaatsiminik, Biibilimik, tun­nius­sinermigut asan­nit­tuliorsimasoq. Siulersor­niarluta tamatta immik­kut allaf­figaatigut. (Esaja 48:17, 18) Paasivara Jehovap asan­nil­luni siulersuinera iluaqutigis­sagukku inuuninni allan­nguerujus­suar­tariaqarlunga.

Ilaatigut allanik ilagisar­tagaqaler­tariaqar­punga. Ussatit 13:20-mi allas­simasut uku uum­mam­miuliup­pak­ka: “Ilisimasunik peqateqar­toq ilisimas­suseqalersar­poq, sianiitsunilli ikin­nguteqar­toq ajor­tumeer­tus­saasar­poq.” Najoq­qutas­siaq taanna iluaqutigalugu ikin­ngutigisimasakka qimal­lugit Jehovamik Nalunaajaasunik ikin­ngutitaar­punga.

Pujor­tar­tar­neq pin­ngitsoorsin­naan­ngin­nakku pujor­tar­tarun­naar­nis­sara saper­nar­teqaara. Tamanna qaangerakku allamik unam­miniagaqaler­punga. Pujor­tar­tarun­naarama 14 kiilut mis­saan­nik oqimaal­livunga! Tamanna pis­sutigalugu naleqan­ngitsutut misigiler­punga, ukiullu qulingajaat sanigor­niarsarivunga. Nalun­ngilarali pujor­tar­tarun­naar­nera eqqor­tulior­nerusoq. Jehovap qin­nuigiuaranni nakus­satsip­paanga.

QANOQ ILUAQUTIGIGIGA: Maanna peq­qin­neruvunga. Aamma sulif­fimmi, inuiaqatigiinni pigisatigullu ingerlal­luar­neq allan­ngupal­las­sin­naasar­toq anguniagariun­naarakku nalerisimaaler­punga. Allat Biibilimi ilumoor­tut pil­lugit oqalut­tuutis­sal­lugit nuan­narisar­para. Tamatuma kingunerisaanik suleqatikukka pingasut uigalu ilagaluta Jehovamut kif­far­tor­put. Angajoq­qaarsiakka suli toqun­ngitsut toqusut nunarsuarmi paratiisiusumi makititaanis­saan­nik Biibilimi neriorsuut pil­lugu oqalut­tuup­pakka.

Jehovamut qanil­lineq sumigin­nak­katut misiginerup qaanger­nis­saanut iluaqutigaara. Nunani tamalaani anersaak­kut qatan­ngutigiin­nut ilan­ngutitik­kaminga ilaqutariin­nut atasutut misigilersip­paanga. Taak­kunani anaanakka, ataatakka qatan­ngutik­kalu amerlaqaat. – Mak­korsi 10:29, 30.

[Assiliartaq]

Jehovap Nalunaajaasui kristumiuup­put asan­nit­tut

[Assiliartaq]

Shintosior­tut guutisiorfiat kif­far­torfigisimasara