Baibõl̦ eo Ej Ukot Mour Ko

Ta eo ear kõm̦m̦an bwe juon lel̦l̦ap me 60 jim̦a an iiõ en bõjrak jãn an kabuñ ñan ekjab ko? Etke juon pris in Shinto ear bõjrak jãn an jerbal ilo kabuñ in bwe en erom juon iaan Ri Kõnnaan ro an Jeova? Ta eo ear jipañ juon kõrã me rar aje ke ear dik bwe en jab l̦õmn̦ak bwe ejjel̦o̦k tokjãn im ejjel̦o̦k ej yokwe e? Jen lale bwebwenato kein an armej rein jilu.

“Ejako aõ jerbal ñan ekjab ko.”​​—ABA DANSOU

IIÕ IN L̦OTAK: 1938

AELÕÑ: BENIN

MOUR EO AN M̦OKTA: RI KABUÑ ÑAN EKJAB

MOUR EO AÕ KAR M̦OKTA: Iar dik im rũttol̦o̦k ilo So-Tchahoué, juon bukwõn iturin juon reba. Bwe ren mour, armej ro ilo bukwõn eo rej eo̦ñõd im tããp menin mour ko ãinwõt kau, goat, jiip, piik im bao. Ejjel̦o̦k ial̦ ilo bukwõn eo, kõn men in armej ro rej kõjerbal l̦oon im kõrkõr ñan aer itoitak jãn jikin ñan jikin. M̦oko ilo bukwõn in ekkã aer kõm̦m̦ani jãn al̦al̦ im ujooj ko reaitok. Bõtab, jet iaan mõkein rar kõm̦m̦ani jãn jimeen̦. Armej ro relukkuun jeram̦õl. Mekarta, ejjab l̦ap jorrããn ko rej wal̦o̦k ijin jãn jikin ko rel̦ap.

Ke iar dik wõt, jema ear jilkinl̦o̦k ña im leddik eo jeiõ bwe kõmro en jokwe im katak ilo juon jikuul̦ in kabuñ ñan ekjab. Ke iar rũttol̦o̦k, iar jino aõ kabuñ ñan Dudua (Oduduwa), juon anij an armej ro ijo ij pãd ie. Iar kalõk juon im̦õn anij in aõ im aolep iien ij katok kõn iaam̦, oil, lidid, bao, m̦ul̦e, im menin mour ko jet. Joñan an kar l̦ap aõ jol̦o̦k jããn ñan men kein, jet iien ejjel̦o̦k kein aõ mour.

WÃWEEN AN KAR BAIBÕL̦ EO UKOT MOUR EO AÕ: Ke iar jino aõ katak Baibõl̦, iar katak bwe Jeova ej Anij eo wõt em̦ool. Iar bar katak bwe Jeova edike an armej ro kõjerbal ekjab ko im kabuñ ñan er. (Exodus 20:​4, 5; 1 Korint 10:​14) Iar make kile bwe ij aikuj kõm̦m̦an oktak. Iar jol̦o̦ki aolepen ekjab ko aõ im bar karreoik m̦weo im̦õ im jol̦o̦ki aolep men ko jet me ikõn kõjerbali ñan ekjab ko. Iar jab bar etal im kajjitõk jipañ ippãn ri lolo ro. Im iar bõjrak jãn aõ kobal̦o̦k ilo m̦anit ko an ri bukwõn eo im bareinwõt ilo m̦antin mej ko aer.

Ebwe an kar pen aõ kõm̦m̦an oktak kõnke ilukkuun rũtto kiiõ im eto aõ imminene kõn men kein. Ro jera, ro nukũ, im armej ro jet rar lukkuun jum̦ae im kajjirere kake eõ. Bõtab, iar jar im kajjitõk ippãn Jeova ñan jipañ eõ bwe in kõm̦m̦ane men ko rejim̦we. Bok in Jabõn Kõnnaan 18:10 ear lukkuun kakajoor eõ. Eoon in ej ba: “Etan Jeova juon em̦ utiej im pen; rũ wãnõk ej ko ñan e innãm ejjel̦o̦k an uwõta.”

Aõ kar kobal̦o̦k ilo kweilo̦k ko an Ri Kõnnaan ro an Jeova ear bar jipañ eõ. Armej ro ijo rar lukkuun kwal̦o̦k yokwe eo em̦ool. Iar bareinwõt bwilõñ kõnke rar mour ekkar ñan men ko rej katak jãn Baibõl̦ eo. Men kein rar  kõm̦m̦an bwe in make kile bwe kabuñ eo em̦ool ej pãd ippãn Ri Kõnnaan ro an Jeova.

WÃWEEN AÕ KAR BÕK TOKJÃN: Ilo aõ kar jerbale katak ko jãn Baibõl̦ eo, men in ear kakõm̦anm̦anl̦o̦k kõtaan eo aõ ippãn ajri ro nejũ. Ebar pidodol̦o̦k aõ mour bwe ijjab kamaat aõ maroñ im jol̦o̦k el̦ap jããn ñan ekjab ko me ejjel̦o̦k tokjãer im reban jipañ eõ ñan jidik. Kiiõ, ij kabuñ ñan Jeova, eo enaaj jol̦o̦k aolep apañ ko jej iioni. (Revelesõn 21:​3, 4) Ilukkuun m̦õn̦õn̦õ kiiõ bwe ejako aõ jerbal ñan ekjab ko, ak kiiõ ij jerbal im karejar ñan Jeova. E wõt emaroñ jipañ im kõjparok eõ.

“Iar kappukot Anij jãn ke iar dik.”​​—SHINJI SATO

IIÕ IN L̦OTAK: 1951

AELÕÑ: JEPAAN

MOUR EO AN M̦OKTA: PRIS IN JUON KABUÑ AN RI JEPAAN ETAN SHINTO

MOUR EO AÕ KAR M̦OKTA: Iar dik im rũttol̦o̦k ilo juon bukwõn jidikdik ilo Fukuoka. Jinõ im jema rar lukkuun kijejeto ilo kabuñ in Shinto, im rar katakin eõ jãn ke iar dik bwe in kautiej anij ko an kabuñ in. Jãn ke iar dik, aolep iien ij make l̦õmn̦ak ewi wãween imaroñ lo̦mo̦o̦ren mour eo aõ. Iar bareinwõt kõn̦aan jipañ ro me rej aikuj jipañ. Ij keememej ke iar pãd ilo jikuul̦ juon iien, ri kaki eo ear kajjitõk ta eo kõm kõn̦aan kõm̦m̦ane ñe kõm naaj rũttol̦o̦k. Jet iaan ri jikuul̦ ro rar kõn̦aan bõk jerbal ko reutiej. Ak ña, iar kwal̦o̦k bwe ikõn̦aan jerbal ñan Anij. Aolep rar ettõñ im kajjirere kake eõ.

Ãlikin aõ kar high school, iar ilo̦k ñan juon jikuul̦ in kabuñ. Ke iar pãd ilo jikuul̦ in, iar iione juon pris in Shinto me ekkã an riiti juon bok kilmeej ilo iien an kakkije. Juon raan, em̦m̦aan in ear kajjitõk ippa, “Sato, kwõjel̦ã ke bok rot e?” Iar ba ñan e bwe etan bok eo ej Baibõl̦, kõnke iar kile kilin. Ear wõnm̦aanl̦o̦k im ba, “Aolep ro me rekõn̦aan erom juon pris in Shinto rej aikuj riiti bok in.”

Ejjabto iar ilo̦k im wiaiki juon aõ Baibõl̦. Iar likũt Baibõl̦ eo ilo juon jikin em̦m̦an im lukkuun kõjparoke. Bõtab, kõnke iar lukkuun poub ilo jikuul̦, ear ejjel̦o̦k iien aõ riiti. Ke ear m̦õj aõ jikuul̦, iar jino jerbal ãinwõt juon pris in Shinto ilo juon im̦õn kabuñ. Kiiõ etõprak kõn̦aan in aõ jãn ke iar dik.

 Iar jino kile bwe ear bõd aõ l̦õmn̦ak kõn jerbal in pris. Elõñ iaan pris ro edik tõmak ko aer im rejaje l̦õmn̦ak kõn ro jet. Juon iaan ro reutiejl̦o̦k jãn ña ear ba: “El̦aññe kokõn̦aan lo tõprak ilo jerbal in am̦, kwõn kõnnaan kõn men ko jet im jab kõnnaan kõn tõmak eo am̦.”

Naan kein rar kõm̦m̦an bwe in jino pere kabuñ in Shinto. Meñe iar wõnm̦aanl̦o̦k im jerbal ilo im̦õn kabuñ eo, ak iar jino aõ etal ñan kabuñ ko jet. Bõtab, iar jab lo oktak ko ilo kabuñ kein. Aolepeir rar kõm̦m̦an bwe in jino tõmak bwe ejjel̦o̦k kabuñ en̦ em̦ool.

WÃWEEN AN KAR BAIBÕL̦ EO UKOT MOUR EO AÕ: Ilo kar 1988 eo, iar iione juon armej me ej kabuñ ñan Buddha. Armej in ear rõjañ eõ bwe in riiti Baibõl̦ eo. Iar kiiõ bar keememej kõn pris in Shinto eo me ear bar rõjañ ña kõn ejja men in wõt. Iar kiiõ kõn̦aan kõm̦m̦ane men in. Ke iar jino riiti Baibõl̦ eo, ear pen ñan aõ bõjrak. Jet iien ij riit jãn boñ m̦ae raan eo tok juon.

Men ko iar riiti rar lujur eõ bwe in jar ñan Anij eo me Baibõl̦ ej kõnnaan kake. Iar l̦oore jar eo an Irooj ilo bok in Matu 6:​9-​13. Aolep ãlikin ruo awa ij kwal̦o̦k jar in. Jet iien ij kõm̦m̦ane men in meñe ij jerbal ilo im̦õn kabuñ in Shinto eo.

Elukkuun kar lõñ aõ kajjitõk kõn men ko ij riiti jãn Baibõl̦ eo. Ilo tõrein ewõr pãleeõ, im ijel̦ã bwe Ri Kõnnaan ro an Jeova rej katakin armej ro kõn Baibõl̦ eo kõnke em̦õj aer kar lotok kõrã eo ippa. Iar kwal̦o̦k elõñ kajjitõk ko ñan juon iaaer. Iar lukkuun bwilõñ ke kõrã in ear kõjerbale Baibõl̦ eo ñan uwaake aolep kajjitõk ko aõ. Innem, kõrã in ear kõm̦m̦an karõk bwe juon en itok im katak Baibõl̦ ippa.

Ãlikin jidik iien, iar jino aõ kobal̦o̦k ilo kweilo̦k ko an Ri Kõnnaan ro an Jeova. Ilo tõre eo, iar jab jel̦ã bwe jet iaan armej rein ekõn nana aõ kõm̦m̦an ñan er. Jekdo̦o̦n ak armej rein rar kepaak eõ im yokyokwe eõ im karwaineneik eõ.

Ilo kar kweilo̦k kein, iar katak bwe Anij ekõn̦aan bwe em̦m̦aan ro ren kwal̦o̦k yokwe im kautiej ñan kõrã ro pãleer im ajri ro nejier. Kõnke iar lukkuun poub ilo aõ kar jerbal in pris, iar kõjekdo̦o̦n kõrã eo ippa im ajri ro ruo nejũm̦ro. Iar kiiõ kile bwe el̦ap aõ kar iien ippãn armej ro ilo kabuñ in Shinto, bõtab ejjel̦o̦k aõ iien ñan roñjake kõrã eo ippa.

Ke iar wõnm̦aanl̦o̦k im katak kõn Jeova, iar jino aõ epaake. Elukkuun em̦m̦an ippa naan ko ilo Rom 10:​13 me ej ba, ‘Ro otemjej rej kũr etan Jeova renaaj mour.’ Eto aõ kar kappukot Anij jãn ke iar dik, im kiiõ etõprak kõn̦aan in aõ.

Ear jino nana aõ mour ke iar jerbal wõt ilo im̦õn kabuñ in Shinto. El̦ap aõ kar inepata kõn wãween an armej ro naaj kõm̦m̦an ñan ña ñe inaaj kam̦õj eõ jãn kabuñ in Shinto. Bõtab, em̦õj aõ kar jek ilo bũruõ bwe inaaj etal jãn kabuñ in el̦aññe inaaj lo Anij eo em̦ool ilo bar juon kabuñ. Kõn men in, ilo kar 1989, iar pepe ñan l̦oore kõn̦aan in aõ. Iar kam̦õj eõ jãn im̦õn kabuñ eo iar jerbal ie im kõtl̦o̦k bwe Jeova en tõl mour eo aõ.

Elukkuun kar pen aõ ilo̦k jãn jerbal in aõ. Ri utiej ro aõ rar illu ippa im kajjioñ iuun eõ bwe in pãd wõt. Bõtab, men eo epentata ej ilo aõ kar kõnnaan ippãn jinõ im jema kõn pepe in aõ. Ke iar etetal l̦o̦k ñan m̦weo im̦wier, joñan aõ kar mijak, iar kijel̦o̦k im iten jaje etetal. Iar aikuj bõjrak elõñ alen im jar bwe Jeova en jipañ im kakajoor eõ.

Ke iar tõprakl̦o̦k m̦weo, iar ãliklik im mijak in kõnnaan kõn pepe eo aõ. Elõñ awa in aõ kar  pãd m̦weo ak iar jab ba jabdewõt. Bõtab, ãlikin aõ kar jar ñan Jeova, iar kõmel̦el̦eik jema kõn pepe eo aõ. Iar ba ñan jema bwe em̦õj aõ lo Anij eo em̦ool. Iar ba ñan e bwe ij kam̦õj ña jãn kabuñ in Shinto bwe in maroñ jerbal ñan Anij in em̦ool. Jema ear lukkuun ilbõk im ear bũrom̦õj. Jet iaan ro nukũ rar itok ñan m̦weo bwe ren ukot aõ l̦õmn̦ak. Iar jab kõn̦aan kõmetak baam̦le eo aõ, bõtab iar jel̦ã bwe jerbal ñan Jeova ej men eo ejim̦we im ij aikuj kõm̦m̦ane. Tokãlik, baam̦le eo aõ rar kautieje pepe in aõ.

Meñe iar ilo̦k jãn kabuñ in Shinto, ak wãween l̦õmn̦ak ko aõ rar ãinwõt ñe ij pãd wõt ie. Mour im kõm̦m̦an ko aõ ãinwõt juon pris ear pen aer jako jãn ña. Meñe iar lukkuun kate eõ ak men ko im rar wal̦o̦k ipel̦aakũ rar kakeememej eõ kõn mour eo aõ kar m̦okta.

Ewõr ruo men ko rar jipañ eõ bwe in ukot wãween aõ l̦õmn̦ak. Kein kajuon, iar bõk aolep men ko iloan m̦weo im̦õ me rej ekkejell̦o̦k ñan kabuñ in Shinto. Im iar tile aolep bok kein, pija kein, im bar men ko jet meñe el̦ap on̦aer. Kein karuo, iar kate eõ bwe in kobal̦o̦k wõt ippãn Ri Kõnnaan ro an Jeova. El̦ap aer kar jipañ eõ ilo elõñ wãween ko. Men kein rar jipañ eõ bwe in jab bar l̦õmn̦ak kõn mour eo aõ m̦okta.

WÃWEEN AÕ KAR BÕK TOKJÃN: M̦okta ear lukkuun ejjel̦o̦k aõ iien ippãn kõrã eo pãleeõ im ajri ro nejũ, im men in ear kõm̦m̦an aer makel̦o̦k iaaer. Ak ke iar jino bõk iien im pãd im kõm̦m̦ao ippãer, ãinwõt an Baibõl̦ eo rõjañ l̦õm̦aro pãlele bwe ren kõm̦m̦ane, men in ear kõm̦m̦an bwe kõmin epaake doon. Tokãlik, kõrã eo pãleeõ ear erom ri karejeran Jeova. Im kiiõ, kõmro im l̦addik eo im leddik eo nejũm̦ro ekoba l̦eo pãleen, kõmij aolep kabuñ ñan Jeova Anij.

Ij keememej bwe jãn ke iar dik, iar kõn̦aan jerbal ñan Anij im jipañ armej ro. Kiiõ, em̦õj an tõprak kõn̦aan kein aõ. Ejjab baj men in wõt, ak ebar wõr jeraam̦m̦an ko jet ij iioni. Elukkuun l̦ap aõ kam̦m̦oolol Jeova.

“Ewõr juon men ejako jãn ña.”​​—LYNETTE HOUGHTING

IIÕ IN L̦OTAK: 1958

AELÕÑ: SOUTH AFRICA

MOUR EO AN M̦OKTA: EAR L̦ÕMN̦AK BWE EJJEL̦O̦K TOKJÃN AN MOUR IM EJJEL̦O̦K EJ YOKWE E

MOUR EO AÕ KAR M̦OKTA: Iar l̦otak ilo Germiston, juon bukwõn ilo South Africa. Bukwõn in ejjab kanooj l̦ap nana im kowadoñ ko rej wal̦o̦k ie. Jema im jinõ rar l̦õmn̦ak bwe rejjab maroñ lale eõ, kõn men in rar aje ña. Ruo wiik ãlikin aõ kar l̦otak, ruo ri pãlele rar bõk eõ bwe in nejier. Bõtab, ke iar jel̦ã kõn bwebwenato in, iar l̦õmn̦ak bwe ejjel̦o̦k tokjãn aõ mour im ejjel̦o̦k ej yokwe  eõ. Iar bar jino l̦õmn̦ak bwe ro rar lale eõ ejjab nejier ña im rejjab lukkuun mel̦el̦e kõn ña.

Ke ear 16 aõ iiõ, iar jino etal ñan im̦õn disco ko ak baar ko. Ke ear 17 aõ iiõ, iar jino kõbaatat kõnke iar kõn̦aan bwe in aidik ãinwõt lim̦aro me ewõr pijaer ilo kein karreelel ko kõn kõbaatat jikka. Im ke ear 19 aõ iiõ, iar jino aõ jerbal ilo Johannesburg im jino aetõl ro enana m̦wilier. Kõn wõt men in, el̦ap aõ añũr jikka, elukkuun ettoon kobban loñiõ im ikadekdek.

Meñe iar kõm̦m̦ani men kein renana, bõtab iar ekkeini aõ excercise im iar kobal̦o̦k ippãn kõrã ro jet im iukkure soccer. Im iar jerbal ilo juon kom̦bani in computer. Ear l̦ap aõ kate eõ im poub ilo jerbal in aõ im ro jet rar jel̦ã kõn aõ lukkuun kapeel ilo jerbal in aõ. Ear em̦m̦an on̦ea im elõñ armej rar l̦õmn̦ak elukkuun l̦ap tõprak ij kõm̦m̦ani. Bõtab, ilo m̦ool iar jab m̦õn̦õn̦õ ippa make. Ãinwõt iar eñjake bwe ewõr juon men im ejako jãn ña.

WÃWEEN AN KAR BAIBÕL̦ EO UKOT MOUR EO AÕ: Ke iar jino katak Baibõl̦, ij kab jel̦ã bwe Jeova ej juon Anij in yokwe. Iar bar katak bwe ej kwal̦o̦k an yokwe ikijjeen an kar letok Naan eo an, Baibõl̦ eo. Ej ãinwõt ñe ear make je juon lõta ñan katakin im tõl kõj ilo mour ko ad. (Aiseia 48:​17, 18) Iar jino kile bwe ñan aõ bõk tokjãn jãn naan in tõl ko an Jeova, ij aikuj kõm̦m̦an oktak ko rel̦ap ilo mour eo aõ.

Iar make kile bwe ij aikuj bõjrak jãn aõ aetõl ro enana m̦wilier. Eoon eo me ear lukkuun lujur eõ ej Jabõn Kõnnaan 13:​20 (UBS). Eoon in ej ba, “Kwon kõmmao ibben ro ri jelãlokjen, innem kwonaj meletlet. Ak elañe kwonaj jeraik ro ri bwebwe, innem kwonaj lo jorrãn.” Eoon in ear jipañ eõ bwe in ilo̦k jãn ro m̦õtta im jino kobal̦o̦k ippãn Ri Kõnnaan ro an Jeova.

Men eo ear pentata ej ilo aõ kar jol̦o̦k kõbaatat, kõnke el̦ap aõ kõn añũr jikka. Ke iar kate eõ ñan kõm̦m̦ane men in, ebar wõr juon men ear wal̦o̦k. Aõ jol̦o̦k jikka ekar kõm̦m̦an bwe in kilepl̦o̦k. Men in ear kõm̦m̦an bwe en nana aõ mour im inepata. Im ear bõk enañin 10 iiõ ko bwe in bar aidik ãinwõt m̦okta. Bõtab, meñe ear pen, iar jel̦ã bwe em̦m̦an im ejim̦we jokãlõt eo ñan jol̦o̦k jikka. Iar jar ñan Jeova bwe en jipañ eõ, im ear jipañ eõ bwe in maroñ lo tõprak.

WÃWEEN AÕ KAR BÕK TOKJÃN: Em̦m̦anl̦o̦k kiiõ ãjmour eo aõ im ña ij m̦õn̦õn̦õ ilo mour eo aõ. Ejako aõ kõttõpar men ko an lal̦ in ãinwõt jerbal ko rem̦m̦an, buñbuñ im m̦weiie. Ij lañlõñ ilo aõ kwal̦o̦k naan kõn m̦ool eo ñan armej ro jet. Jãn wõt men in, jilu iaan ri jerbal ro m̦õtta rej karejar ñan Jeova ippemro l̦eo ippa. M̦okta jãn an kar rũtto ro me rar kaajiririk eõ mej, iar maroñ kwal̦o̦k ñan erro kõn kallim̦ur eo an Anij bwe enaaj kõmour ro remej im renaaj mour ilo pedetaij eo ioon lal̦.

Ke iar katak im epaakel̦o̦k Jeova, men in ear jipañ eõ bwe in jab l̦õmn̦ak bwe ejjel̦o̦k tokja im ejjel̦o̦k ej yokwe eõ. Jeova ear kõm̦m̦an bwe in m̦õttan baam̦le eo an el̦ap ipel̦aakin lal̦ in. Im ij watõk rein ãinwõt ro jinõ, jema im ro jeiõ im jatũ.​​—Mark 10:​29, 30, UBS.

[Pija ilo peij 24]

Iar lo yokwe eo em̦ool ippãn Ri Kõnnaan ro an Jeova

[Pija ilo peij 25]

Im̦õn jar eo an Shinto me ikõn jerbal ie m̦okta