Il-Bibbja Tbiddel il-Ħajjiet
Il-Bibbja Tbiddel il-Ħajjiet
Għalfejn mara taʼ 60 sena waqfet tqim ix-xbihat? X’ġiegħel qassis Xintù jitlaq xogħlu mill-post taʼ qima u jsir ministru Kristjan? Mara li ġiet adottata mat-twelid, kif setet tkampa maʼ emozzjonijiet taʼ dwejjaq minħabba li ġiet abbandunata? Ikkunsidra dawn in-nies x’kellhom x’jgħidu.
“Jiena M’Għadnix Ilsira tax-Xbihat.”—ABA DANSOU
SENA TAT-TWELID: 1938
POST TAT-TWELID: IL-BENIN
PASSAT: INQIM IX-XBIHAT
IL-PASSAT TIEGĦI: Jiena trabbejt f’So-Tchahoué, villaġġ li jinsab f’żona kollu għadajjar. In-nies taʼ dan il-villaġġ jistadu u jrabbu baqar, mogħoż, nagħaġ, majjali, u għasafar. F’din iż-żona m’hemmx toroq, allura n-nies jużaw dgħajjes u kenuri biex jivvjaġġaw. Ġeneralment jibnu djarhom bl-injam u bil-ħaxix, għalkemm kultant jużaw ukoll il-briks. L-iktar li hemm huma nies foqra. Minkejja dan, m’hemmx kriminalità daqskemm issib fil-bliet.
Meta kont għadni żgħira, missieri bagħat lili u lil oħti ikbar minni f’kunvent fejn jipprattikaw il-maġija. Dak kien il-bidu tagħna għal twemmin tradizzjonali. Meta kbirt bdejt inqim lill-alla Dudua (Oduduwa) li ġie mill-kultura Yoruba. Bnejt dar għal dan l-alla, u regolarment offrejt sagrifiċċji taʼ ħxejjex, żejt tal-palm, bebbux, tiġieġ, ħamiem, u annimali oħrajn. Ħafna drabi kont nonfoq il-flus kollha li kelli fuqhom.
KIF IL-BIBBJA BIDDLITLI ĦAJTI: Meta bdejt nistudja l-Bibbja, tgħallimt li Ġeħova hu l-uniku Alla veru. Tgħallimt ukoll li meta nqimu m’għandniex nużaw xbihat. (Eżodu 20:4, 5; 1 Korintin 10:14) Irrealizzajt x’kelli nagħmel. Irmejt ix-xbihat kollha, u naddaft id-dar minn kull ħaġa li kellha x’taqsam mal-idoli. Waqaft nikkonsulta mal-ispirti u waqaft nieħu sehem f’ritwali lokali u riti taʼ funerali.
Bħala mara taʼ 60 sena ma kienx faċli għalija li nagħmel dawn il-bidliet. Il-ħbieb, il-qraba, u l-ġirien bdew jopponuni u bdew iwaqqgħuni għaċ-ċajt. Għalhekk tlabt lil Ġeħova biex jagħtini l-kuraġġ ħalli nagħmel dak li hu sewwa. Sibt faraġ fil-kliem li nsibu fl-iskrittura taʼ Proverbji 18:10, li jgħid: “Isem Ġeħova hu torri b’saħħtu. Fih jidħol jiġri l-ġust u jingħata l-protezzjoni.”
Xi ħaġa oħra li għenitni kienet li nattendi l-laqgħat tax-Xhieda taʼ Ġeħova. Hemmhekk esperjenzajt imħabba Kristjana u ġejt impressjonata kif dawn in-nies jipprovaw jgħixu skont il-livelli morali għoljin tal-Bibbja. Dak li rajt ikkonvinċieni li x-Xhieda taʼ Ġeħova jipprattikaw il-vera reliġjon.
KIF IBBENEFIKAJT: Li napplika prinċipji tal-Bibbja għenni biex ikolli relazzjoni tajba maʼ wliedi. Ħassejt ukoll toqol jitneħħa minn fuq spallejja. Kont nuża r-riżorsi kollha tiegħi fuq ix-xbihat bla ħajja li ma kienu tal-ebda benefiċċju għalija. Issa nqim lil Ġeħova, li jipprovdi soluzzjoni għal kull problema li jkollna. (Rivelazzjoni 21:3, 4) Kemm jien ferħana li m’għadnix ilsira tax-xbihat. Minflok sirt ilsira taʼ Ġeħova! Fih sibt sigurtà vera u protezzjoni.
“Kont ilni nfittex lil Alla minn tfuliti.”—SHINJI SATO
SENA TAT-TWELID: 1951
POST TAT-TWELID: IL-ĠAPPUN
PASSAT: QASSIS XINTÙ
IL-PASSAT TIEGĦI: Jiena trabbejt f’raħal fil-kampanja ġewwa Fukuoka Prefecture. Il-ġenituri tiegħi kienu reliġjużi ħafna. Huma rabbewni nirrispetta lill-allat Xintù. Mindu kont żgħir spiss kont naħseb kif nistaʼ niġi salvat, u kelli xewqa kbira li ngħin lil oħrajn fil-problemi tagħhom. Niftakar meta kont l-iskola elementari, wieħed mill-għalliema kien staqsa lill-klassi xi xtaqna nsiru meta nikbru. Sħabi tal-klassi kellhom miri differenti minn tiegħi. Xi wħud xtaqu jsiru xjentisti, iżda l-ħolma tiegħi kienet li naqdi lil Alla. Kulħadd kien daħaq bija.
Wara li spiċċajt l-iskola, bdejt nistudja biex insir għalliem tar-reliġjon. Matul it-taħriġ tiegħi, iltqajt maʼ qassis Xintù li kien iqattaʼ l-ħin liberu tiegħu jaqra minn ktieb bil-qoxra sewda. Darba staqsieni, “Sato, taf x’inhu dan il-ktieb?” Jiena għaraft il-qoxra tal-ktieb, għalhekk wiġibtu, “Il-Bibbja.” Hu qalli, “Kull min irid isir qassis Xintù għandu jaqra dan il-ktieb.”
Dak il-ħin stess mort nixtri Bibbja. Poġġejt il-Bibbja fuq xkaffa fejn tidher u ħadt ħsiebha. Imma minħabba l-iskola ma kellix ċans naqraha. Meta spiċċajt l-iskola bdejt naħdem f’post taʼ qima bħala qassis Xintù. Il-ħolma taʼ tfuliti saret realtà.
Però malajr skoprejt illi li nkun qassis Xintù ma kienx dak li stennejt. Ħafna mill-qassisin kienu juru ftit imħabba jew interess lejn oħrajn. Ħafna wkoll kienu neqsin mill-fidi. Wieħed mis-superjuri tiegħi wasal biex jgħidli: “Jekk trid tagħmel suċċess hawnhekk, trid titkellem biss dwar il-filosofija. Huwa projbit li titkellem dwar il-fidi.”
Kumenti bħal dawn ġegħluni nħossni diżappuntat bir-reliġjon Xintù. Għalkemm komplejt bix-xogħol tiegħi fil-post tal-qima, bdejt neżamina reliġjonijiet oħrajn. Minkejja dan, fl-ebda reliġjon minnhom ma sibt xi ħaġa aħjar. Iktar ma eżaminajt reliġjonijiet, iktar ħassejtni skuraġġit. Ħassejt li fl-ebda reliġjon ma kien hemm verità.
KIF IL-BIBBJA BIDDLITLI ĦAJTI: Fl-1988, iltqajt maʼ Buddist li inkuraġġieni naqra l-Bibbja. Ftakart fil-qassis Xintù li snin qabel kien ħeġġiġni biex nagħmel l-istess. Allura ddeċidejt li nismaʼ mill-parir tiegħu. Dak li bdejt naqra mill-Bibbja mill-ewwel beda jinteressani. Xi kultant kont naqra l-lejl kollu u nibqaʼ għaddej sakemm nara x-xemx tielaʼ.
Dak li qrajt immotivani biex nitlob lill-Alla tal-Bibbja. Bdejt bit-talba mudell li nsibu f’Mattew 6:9-13. Bdejt nitlob din it-talba kull sagħtejn—saħansitra waqt li kont qed inwettaq is-servizz tiegħi fil-post taʼ qima bħala qassis Xintù.
Kelli ħafna mistoqsijiet dwar dak li kont qed naqra. Sadanittant iżżewwiġt u kont naf li x-Xhieda taʼ Ġeħova jgħallmu lin-nies minn fuq il-Bibbja minħabba li huma fil-passat kienu żaru lill-marti. Sibt waħda mix-Xhieda u saqsejtha ħafna mistoqsijiet. Bqajt impressjonat kif l-oħt wieġbet kull mistoqsija li kelli mill-Bibbja. Għalhekk hi rranġat biex ix-Xhieda jistudjaw il-Bibbja miegħi.
Ftit wara, bdejt nattendi l-laqgħat tax-Xhieda taʼ Ġeħova. Ma rrealizzajtx mill-ewwel, iżda wara indunajt li fost ix-Xhieda kien hemm uħud li fil-passat kont aġixxejt b’mod maledukat magħhom. Minkejja dan, huma laqgħuni bi mħabba u ġegħluni nħossni komdu.
Waqt dawn il-laqgħat tgħallimt li Alla jistenna li r-raġel juri mħabba u rispett lejn il-membri tal-familja tiegħu. Dak iż-żmien, ħajti kienet iffokata fuq xogħli bħala qassis, tant li kont traskurajt lil marti u liż-żewġ uliedi. Irrealizzajt illi kont nismaʼ b’attenzjoni dak li kellhom x’jgħidu n-nies li kienu jiġu fil-post taʼ qima, però qatt ma kont nismaʼ dak li kellha x’tgħidli marti.
Hekk kif l-istudju tiegħi beda miexi ’l quddiem, dak li bdejt nitgħallem dwar Ġeħova beda jressaqni eqreb lejh. Versi bħal taʼ pereżempju Rumani 10:13 laqtuni ħafna. Dan il-vers jgħid: “Kulmin isejjaħ isem Ġeħova jiġi salvat.” Kont ilni nfittex lil Alla minn tfuliti, u fl-aħħar sibtu!
Ma bqajtx inħossni komdu fil-post taʼ qima. Għall-ewwel bdejt ninkwieta x’kienu se jaħsbu n-nies jekk nitlaq ir-reliġjon Xintù. Imma dejjem kont konvint li nitlaq jekk insib lill-Alla l-veru. Allura fir-rebbiegħa tal-1989 iddeċidejt li nismaʼ mill-kuxjenza tiegħi. Tlaqt il-post taʼ qima u fdajt ħajti f’idejn Ġeħova.
Li nitlaq il-post taʼ qima ma kienx faċli. Is-superjuri tiegħi ċanfruni u pprovaw iġġegħluni nibqaʼ hemm. Però, l-iktar ħaġa diffiċli kienet kif se ngħid lill-ġenituri tiegħi. Fi triqti lejn id-dar tagħhom, ħassejtni tant ansjuż li qabadni wġigħ f’sidri u riġlejja ħassejthom bla saħħa! Waqaft kemm-il darba biex nitlob lil Ġeħova għall-kuraġġ.
Malli wasalt id-dar tal-ġenituri tiegħi, għall-ewwel bdejt nibżaʼ nqajjem is-suġġett. Għaddew sigħat. Fl-aħħar, wara ħafna talb, spjegajt kollox lil missieri. Għedtlu li sibt lill-Alla l-veru u li se nitlaq ir-reliġjon Xintù biex nibda naqdi lilu. Malli semaʼ dan, missieri nħasad u tnikket. Xi qraba ġew id-dar biex jipprovaw ibiddluli fehmti. Ma ridtx inweġġaʼ lill-familja tiegħi, però fl-istess ħin kont naf li l-aħjar deċiżjoni hi li naqdi lil Ġeħova. Maż-żmien irbaħt ir-rispett tal-familja tiegħi.
Il-ħajja tiegħi bħala qassis Xintù kienet saret parti minni. Minkejja li kont waqaft immur fil-post taʼ qima, xorta kien għad kelli bżonn naġġusta l-ħsibijiet tiegħi. Provajt ħafna li ninsa dik il-ħajja, iżda kollox beda jfakkarni fiha.
Żewġ affarijiet għenuni neħles minn dawn il-memorji. L-ewwel ħaġa li għamilt, fittixt sew fid-dar tiegħi biex insib kull ħaġa li kellha x’taqsam mar-reliġjon li kelli. Ħraqt kollox—kotba, stampi, u saħansitra anki affarijiet li jiswew ħafna flus. Imbagħad, bdejt infittex opportunitajiet biex kemm jistaʼ jkun nassoċja max-Xhieda. Il-ħbiberija u l-appoġġ tagħhom kienu taʼ għajnuna kbira għalija. Bil-mod il-mod, il-passat tiegħi bdejt ninsieh.
KIF IBBENEFIKAJT: Kont nittraskura lill-marti u lill-uliedi. Minħabba f’hekk kienu jħossuhom abbandunati. Iżda meta bdejt inqattaʼ l-ħin magħhom, kif tgħallem il-Bibbja li għandhom jagħmlu l-irġiel miżżewġin, sirna eqreb taʼ xulxin. Maż-żmien marti bdiet taqdi lil Ġeħova miegħi, flimkien mat-tifel, it-tifla, u r-raġel tagħha. Issa aħna magħqudin fil-qima vera.
Meta nħares lura lejn il-ħolma taʼ tfuliti, li naqdi lil Alla u ngħin lin-nies, nirrealizza li sibt dak kollu li kont qed infittex—u iktar. M’għandix kliem biex nesprimi l-gratitudni tiegħi lejn Ġeħova.
“Kont naf li hemm xi ħaġa nieqsa.”—LYNETTE HOUGHTING
SENA TAT-TWELID: 1958
POST TAT-TWELID: L-AFRIKA T’ISFEL
PASSAT: EMOZZJONIJIET TAʼ DWEJJAQ MINĦABBA LI ĠEJT ABBANDUNATA
IL-PASSAT TIEGĦI: Jiena twelidt fʼGermiston, belt fejn ma tantx hemm kriminalità. Il-ġenituri tiegħi ħassew li ma setgħux jieħdu ħsiebi, allura fl-età tenera tʼ14-il ġurnata tawni għall-adozzjoni. Ġejt adottata minn koppja li tant ħabbewni li kont inqishom bħala ommi u missieri. Wara li sirt naf il-passat tiegħi, xorta waħda kelli ġlieda mal-emozzjonijiet tiegħi taʼ dwejjaq minħabba li ħassejtni li ġejt abbandunata. Bdejt inħossni li m’iniex parti minn din il-familja, u li l-ġenituri adottivi tiegħi ma setgħux jifhmu kif kont qiegħda nħossni.
Meta kelli madwar 16-il sena, kont immur fil-ħwienet tax-xorb fejn jiena u l-ħbieb tiegħi konna noqogħdu niżfnu u nisimgħu l-mużika live. Taʼ 17 bdejt inpejjep is-sigaretti. Ridt inkun irqiqa bħall-mudelli li kienu jidhru fuq ir-riklami tas-sigaretti. Meta għalaqt 19-il sena, mort naħdem f’Johannesburg fejn malajr bdejt nassoċja maʼ klikka ħażina. Ma domtx ma bdejt nitkellem ħażin, inpejjep ħafna, u fil-tmiem il-ġimgħa kont nixrob ħafna.
Minkejja dan, kont attiva fiżikament. Regolarment kont nagħmel l-aerobics, nilgħab l-isquash u anki dħalt fit-tim tal-futbol tan-nisa. Ukoll kont naħdem iebes fil-karriera tiegħi. Sirt magħrufa fl-industrija tal-kompjuter. B’hekk kont komda finanzjarjament u n-nies kienu jikkunsidrawni bħala mara taʼ suċċess. Però xorta waħda ħassejtni mdejqa ħafna, mitlufa, u diżappuntata b’ħajti. Fil-fond taʼ qalbi ħassejt li kien hemm xi ħaġa nieqsa.
KIF IL-BIBBJA BIDDLITLI ĦAJTI: Meta bdejt nistudja l-Bibbja, tgħallimt li Ġeħova huwa Alla taʼ mħabba. Tgħallimt ukoll li hu wriena din l-imħabba billi tana l-Kelma tiegħu, il-Bibbja. Din hi bħal ittra personali biex jiggwida l-passi tagħna. (Isaija 48:17, 18) Irrealizzajt li jekk irrid nibbenefika mill-gwida kollha mħabba taʼ Ġeħova, kelli bżonn nagħmel bidliet kbar fil-ħajja tiegħi.
Waħda mill-bidliet kienet l-għażla tal-ħbieb tiegħi. Ħadt bis-serjetà l-kliem li nsibu fi Proverbji 13:20, li jgħid: “Min qed jimxi maʼ l-għorrief se jsir għaref, imma min qed jagħmilha maʼ l-istupidi se jaħbatlu ħażin.” Dan il-prinċipju qanqalni biex nitlaq il-ħbieb li kelli u nagħmel ħbieb ġodda fost ix-Xhieda taʼ Ġeħova.
L-akbar sfida li kelli kienet biex nieqaf inpejjep. Dan ma kienx faċli. Hekk kif irnexxieli negħleb dan l-ostaklu, kelli nħabbat wiċċi maʼ sfida oħra. Minħabba li qtajt is-sigaretti, żdidt iktar minn 13-il kilo fil-piż! Dan kien taʼ diżappunt kbir għalija, u domt madwar 10 snin biex inneħħi l-piż li kont żidt. Però kont naf li dak li kelli nagħmel kien li naqtaʼ s-sigaretti. Kontinwament kont nitlob lil Ġeħova, u hu tani s-saħħa biex nirnexxi.
KIF IBBENEFIKAJT: Issa nħossni iktar b’saħħti u kuntenta. Ma komplejtx nipprova nsib il-ferħ fil-karriera sekulari tiegħi u fl-affarijiet materjali. Minflok sibt il-ferħ f’li naqsam il-veritajiet tal-Bibbja maʼ oħrajn. B’ferħ tlieta mill-kollegi li kelli qabel qegħdin issa jaqdu lil Ġeħova miegħi u mar-raġel tiegħi. Qabel mietu l-ġenituri adottivi tiegħi, irnexxieli ngħidilhom dwar il-wegħda li nsibu fil-Bibbja taʼ rxoxt f’ġenna tal-art.
Li nersaq qrib taʼ Ġeħova għenni nkampa mal-emozzjonijiet taʼ dwejjaq minħabba li ġejt abbandunata. Hu għenni nħossni parti mill-familja globali t’aħwa fit-twemmin. Fosthom sibt ommijiet, missirijiet, u aħwa.—Marku 10:29, 30.
[Stampa]
Esperjenzajt imħabba Kristjana fost ix-Xhieda taʼ Ġeħova
[Stampa]
Il-post taʼ qima fejn kont naqdi bħala qassis Xintù