Biblia kinpaleuik kuali ma monejnemiltikaj

¿KENKE se siuatl katli kipia kipano 60 xiuitl ayokmo kinueyichijki teteyomej? ¿Tlake kipaleuik se sacerdote sintoísta ma kikaua tlen kineltokayaya uan ma mochiua se Cristo itokilijka? ¿Tlake kipaleuik ayokmo ma moyolkokojto se siuatl katli kitlauelkajkej kema eliyaya pilkonetsi? Ma tikitakaj tlake kinpaleuik.

“Nama ayokmo nikinueyichiua teteyomej” (ABA DANSOU)

TLAKATKI IPAN: 1938

EUA: BENÍN

SEKINOK TLAMANTLI: KINUEYICHIUAYAYA TETEYOMEJ

TLEN NECHPANOK: Nitlakatki ipan se pilaltepetsi tlen So-­Tchahoué, tlen nechka mokaua kampa momana tlauel miak atl. Amo onka carreteras, yeka maseualmej kitekiuiaj barcos uan canoas kema yauij sejkanok. Maseualmej michtlajtlamaj, kiniskaltiaj uakaxmej, chivojmej, borregojmej, pitsomej uan totomej. Nojkia kichijchiuaj ininchaj ika kuauitl, sakatl uan kemantika ika ladrillos. Maske maseualmej tlauel teikneltsitsij, amo tlauel kichiuaj tlen amo kuali kej ipan se ueyi altepetl.

Kema nojua nieliyaya nisiuapil, notata techtitlanki na uan noikni ipan se convento kampa pejki techmachtiaj ma tikinueyichiuakaj teteyomej. Teipa pejki tlauel nijueyichiua Dudua, nojkia kiampa kiiljuiaj nopa teotsij Oduduwa tlen altepetl yoruba. Nijchiuilik se pilkaltsi uan pejki nijmaka tlakajkaualistli kej aceite de palma, kamojtli, kuachololojmej o caracoles, piyomej, totomej uan sekinok tlapialmej. Nijtekiuiyaya miak tomij kema nijkouayaya ni tlamantli.

BIBLIA NECHPALEUIK KUALI MA NIMONEJNEMILTI: Kema pejki nimomachtia Biblia nikitak itstok san setsi toTeotsij katli melauak tlen itoka Jehová, uan ya amo kineki ma tikinueyichiuakaj sekinok teotsitsij (Éxodo 20:​4, 5; 1 Corintios 10:14). Yeka, nima nikitak monekiyaya nijpatlas se keski tlamantli uan nijtepejki nopa teteyomej uan sekinok tlamantli tlen nojkia nikinueyichiuayaya. Nojkia ayokmo nikintlajtlanik tlamatinij ma nechpaleuikaj, ayokmo nijchijki tlen maseualmej momajtokej kichiuaj uan nojkia ayokmo nijchijki tlen kichiuaj kema se akajya miki.

Nijmatki ouij nijkauas nochi ni tlamantli pampa kipano sesenta xiuitl nikinueyichijtoya nopa teteyomej. Nojkia, nouampoyouaj, nouikaljuaj uan nokalnechkauaj nechkualankaitakej uan nechpinajtijkej. Yeka nikiljuik Jehová ma nechmaka chikaualistli uan kiampa ueliskia nijchiuas tlen kuali. ¡Tlauel nechyolchikajki tlen kiijtoua Proverbios 18:10! Nopaya kiijtoua: “ToTeotsij itoka kejuak se ueyi tepankali. Nopaya yaui katli xitlauak, uan momanauia”.

Tlauel nechpaleuik kema pejki nia kampa mosentiliaj Jehová itlajtoltemakauaj pampa nikitak nelia tlauel moikneliaj. Uan nimosentlachilik pampa nikitak kichiuayayaj kampeka kineltokasej toTeotsij itlanauatiljuaj. Nopaya nikitak Jehová itlajtoltemakauaj elij nopa religión tlen melauak.

¿KENIJKATSA NECHPALEUIJTOK? ToTeotsij itlanauatiljuaj nechpaleuijtok nojua kuali ma nimouika ininuaya nokoneuaj. Uan nojkia nijmatki kejuak nechkixtilijkej se ueyi tlamamali. Achtouia nijtekiuiyaya notomij ika nopa teteyomej tlen amo kema nechpaleuijkej. Nama nijtekipanoua Jehová, katli uelis kitlamiltis nochi tlen techtekipachoua (Apocalipsis 21:​3, 4). Nama ayokmo nikinueyichiua teteyomej, san nijueyichiua Jehová ika nochi noyolo. Uan ya kichijtok ma niyolpaki, kuali ma nijyolmati uan nojkia nechmokuitlauia.

“Kema nieliyaya niokichpil nijnekiyaya nikixmatis toTeotsij” (SHINJI SATO)

TLAKATKI IPAN: 1951

EUA: JAPÓN

SEKINOK TLAMANTLI: ELIYAYA SACERDOTE SINTOÍSTA

TLEN NECHPANOK: Nitlakatki ipan se pilaltepetsi tlen Fukuoka. Notatauaj eliyayaj sintoístas, yeka kema nojua nipilsiltsi nieliyaya nechmachtijkej ma nikinueyichiua teotsitsij tlen nopa religión. Nijnekiyaya nimomanauis uan nojkia nijnekiyaya nikinpaleuis katli kiixnamikiyayaj tlaouijkayotl. Nikilnamiki se tonali totlamachtijka techtlatsintokik tlake tijnekiyayaj tijchiuasej kema timoskaltiskiaj. Sekij katli ininuaya nimomachtiyaya kiijtojkej kinekiyayaj elisej científicos uan sekinok tlamantli. Kema na nikijtok nijnekiyaya nijtekipanos toTeotsij, pejkej nechuetskiliaj.

Kema tlanki nimomachtia secundaria, niajki nimomachtito ipan se escuela pampa nijnekiyaya nikinmachtis sekinok kenijkatsa eli religiones. Nopaya nikixmatki se sacerdote sintoísta katli kemantika kipouayaya se amochtli yayauik. Na ya nikitstoya tlake amochtli eliyaya, yeka kema nechtlatsintokik tlaj nijmatiyaya tlake amochtli kipouayaya, nikiljuik: “Eli Biblia”. Teipa nechiljuik: “Katli kineki elis sacerdote sintoísta, moneki kipouas ni amochtli”.

Nimantsi niajki nijkouato se Biblia uan nijtlalik kampa ueliskia nijtlachilis. Maske nijnekiyaya nijpouas Biblia, nimomachtiyaya sekinok tlamantli. Tlanki nimomachtia uan pejki nitlatekipanoua kej sacerdote sintoísta ipan se santuario. ¡Nijchijki tlen nochipa nijnektoya nijchiuas!

Teipa nikitak amo eliyaya tlen na nijtemouayaya pampa miakej sacerdotes amo kintekipachouayaya tlen kinpanoyaya sekinok. Uan sekij amo tlaneltokayayaj. Se katli nechyakanayaya nechiljuik: “Tlaj tijneki tiuejkauas nikaj, san xitlamachti filosofía uan amo kema xitlamachti tlen tlaneltokili”.

Nochi ni tlamantli kichijki ma nimokueso. Maske niauiyaya santuario, pejki nikita tlen tlamachtiyayaj ipan sekinok religiones, uan kema nikitayaya amo tlamachtiyayaj tlen melauak, nojua tlauel nimoyolkokouayaya.

BIBLIA NECHPALEUIK KUALI MA NIMONEJNEMILTI: Ipan 1988 nikixmatki se budista katli nechiljuik ma nijpoua Biblia. Uan nikilnamijki nopa sacerdote sintoísta nojkia kiampa nechiljuijtoya. Yeka pejki nijpoua Biblia. Uan tlauel nechpaktik, kemantika seyoual nijpouayaya.

Tlen nijpojki kichijki ma nimomaijto ika toTeotsij katli melauak, kej kiijtoua Mateo 6:9-13. Ojome horas nikompauiyaya ni tlamaijtoli maske nijchiuayaya se keski tlamantli ipan santuario.

Nikilnamiki kema nijpouayaya Biblia nimotlajtlaniyaya miak tlamantli. Ipan nopa tonali ya nimosiuajtijtoya, uan nijmatiyaya Jehová itlajtoltemakauaj tlamachtiyayaj ika Biblia pampa achtouia kipaxalouayayaj nosiua. Nikamanaltik iuaya se tosiuaikni uan nijtlajtlanilik miak tlamantli uan tlauel nechpaktik pampa nechnankilik ika Biblia. Teipa, ya kiniljuik sekinok toikniuaj ma nechmachtikaj.

Kema panok se keski tonali, pejki nimonechikoua ininuaya Jehová itlajtoltemakauaj. Maske achtouia amo nikinitstoya, nopaya itstoyaj se keskij toikniuaj katli nikinchiuilijtoya tlen amo kuali. Maske kiampa nijchijki, inijuantij nechselijkej ika miak pakilistli uan kichijkej kuali ma nijyolmati.

Kema pejki nia tlanechikoli, nijyekok toTeotsij kineki se tlakatl ma kiikneli isiua uan ma kinpatiita ichampoyouaj. Ipan nopa tonali tlauel nimotekiuijtoya kej sacerdote, yeka amo kuali nikinmokuitlauiyaya nosiua uan omej nokoneuaj. Nikitak maske kuali nikintlakakiliyaya maseualmej katli yauiyayaj ipan santuario, amo kema nijtlakakilijtoya nosiua.

Kema nojua kuali nikixmatiyaya Jehová, nijmatiyaya nojua nijnechkauiyaya. Miak textos asik ipan noyolo, kej Romanos 10:13, TNM, nopaya kiijtoua: “Pampa nochi tlen kinojnotsasej toTeotsij Jehová ika itoka momanauisej”. Kema nieliyaya niokichpil nijnekiyaya nikixmatis toTeotsij uan nama pejki nikixmati.

Ayokmo kuali nijyolmatiyaya nitekitis ipan santuario. Maske nechtekipachouayaya tlen sekinok moiljuiskiaj pampa nijkauaskia sintoísmo, na nochipa nimoiljuijtoya nijkauaskia tlaj nikixmatiskia toTeotsij katli melauak. Yeka ipan 1989 nimosentlalik kuali nijtekipanos Jehová uan ayokmo nitlatekipanok ipan santuario.

Tlauel ouij nijmatki tlen nimosentlalik nijchiuas. Katli nechyakanayayaj nechiljuijkej miak tlamantli uan nechchiualtiyayaj ma nimokaua nopaya. Uan tlauel ouij nijmatki nikiniljuis notatauaj. Kema niauiyaya ininchaj, amo kuali nijyolmatiyaya uan niikxiuiuipikayaya. Nimokejketstiauiyaya uan nikiljuiyaya Jehová ma nechpaleui.

Kema niasito amo nijnekiyaya nikiniljuis. Miakpa nimomaijtok uan kema panok miak horas uelki nikamanaltik iuaya notata. Nikiljuik ipan seyok religión nechmachtijkej ajkia eli toTeotsij katli melauak uan pampa nijnekiyaya nijtekipanos, nijkauaskia sintoísmo. Notata amo tleno nechiljuik uan tlauel motekipachok. Nojkia, se keskij nochampoyouaj yajkej nechitato pampa kinekiyayaj ma nijpatla tlen nijnekiyaya nijchiuas. Maske amo nijnekiyaya nikinyolkokos, ya nimosentlalijtoya nijtekipanos Jehová. Teipa nochampoyouaj kitlepanitakej tlen nimosentlalijtoya nijchiuas.

Amo san monekiyaya nijkauas tlen nijchiuayaya, monekiyaya nijpatlas tlen nimoiljuiyaya. Tlauel ouij nijmatiyaya nikilkauas tlen nijchiuayaya kema nieliyaya sacerdote uan nochi tlen nikitayaya, kichiuayaya ma nikilnamiki.

¿Tlake nechpaleuik ma nikilkaua tlen nijchijtoya? Ome tlamantli. Achtoui nijsentilik uan nijtlatik nochi tlen nijpixtoya tlen sintoísmo. Nijtlatik miak amochtli uan tlamantsitsij tlen pajpatiyo. Uan nojkia tlauel nechpaleuik niitstos ininuaya Jehová itlajtoltemakauaj, inijuantij nechpaleuijkej uan kiampa ayokmo nikilnamijki tlen achtouia nijchiuayaya.

¿KENIJKATSA NECHPALEUIJTOK? Achtouia amo kuali nikinmokuitlauiyaya nosiua uan nokoneuaj, yeka inijuantij kiyolmatiyayaj itstoyaj ininselti. Uan kema pejki nijchiua tlen Biblia kiijtoua, nijchijki kampeka niitstos ininuaya uan nama tlauel tiyolpakij. Teipa nosiua nojkia pejki kitekipanoua Jehová. Nama nosiua, omej nokoneuaj, nomontika uan na tijtekipanouaj toTeotsij katli melauak.

Nikilnamiki kema nieliyaya niokichpil nijnekiyaya nijtekipanos toTeotsij uan nikinpaleuis sekinok, nama nikita kiampa nijchijtok, uan yeka tlauel nijtlaskamatilia Jehová.

“Nijmatiyaya kejuak nechpolouayaya se tlamantli” (LYNETTE HOUGHTING)

TLAKATKI IPAN: 1958

EUA: SUDÁFRICA

SEKINOK TLAMANTLI: NIJYOLMATIYAYA NECHTLAUELKAJTOYAJ

TLEN NECHPANOK: Nitlakatki ipan se pilaltepetsi tlen itoka Germiston kampa tekitiyayaj ipan minas uan maseualmej amo tlauel kichiuayayaj tlen amo kuali. Kema nijpixtoya 14 tonali ika nitlakajtoya, notatauaj kiniljuijkej sekinok maseualmej ma nechmokuitlauikaj pampa moiljuiyayaj amo ueliskiaj nechmokuitlauisej. Maske nochipa nimoiljuijtoya katli nechiskaltijkej eliyayaj noneltatauaj, kema nijmatki amo kiampa eliyaya, pejki nijyolmati nechtlauelkajtoyaj. Kema nijmatki nopa, ayokmo nikinitak kej notatauaj uan pejki nimoiljuia amo kikuamachiliyayaj tlen nechpanoyaya.

Kema nijpixtoya 16 xiuitl, nouampoyouaj uan na tiauiyayaj kampa motlailtiaj maseualmej, timijtotiyayaj uan tijtlakakiliyayaj uikatl. Kema nijpixtoya 17 xiuitl ya nitlachichinayaya, uan nojkia nijnekiyaya ninesis kej nopa kelentikej siuamej katli nesiyayaj ipan cigarros. Uan kema nikaxitik 19 xiuitl nimochantito Johannesburgo pampa nopaya nitekitiskia. Teipa pejki nimouika ininuaya maseualmej katli kiijtouayayaj amo kuali tlajtoli, uan sejse chikueyi titlachichinayayaj uan titlaiyayaj.

Nijchiuayaya miak ejercicio, kej gimnasia aeróbica, squash uan fútbol. Nojkia nimosentlalijtoya kuali nijchiuas nopa tekitl tlen nimomachtijtoya uan teipa pejkej nechixmatij kej se akajya katli kuali tekiti ipan computación. Kuali niitstoya uan amo tleno nechpolouayaya, yeka sekinok kiijtouayayaj nijpixtoya nochi tlen nijnekiyaya. Maske kiampa kiijtouayayaj, na amo niyolpakiyaya uan nijmatiyaya kejuak nechpolouayaya se tlamantli.

BIBLIA NECHPALEUIK KUALI MA NIMONEJNEMILTI: Kema pejki nechmachtiaj ika Biblia, nijyekok toTeotsij Jehová tlauel techiknelia uan yeka techmakatok iTlajtol. Biblia eli kej se amatlajkuiloli tlen ya kiijkuilok uan kiampa uelis techyakanas (Isaías 48:17, 18). Nijkuamachilik tlaj nijnekiyaya ma nechyakana toTeotsij, monekiyaya nijchiuas kampeka nijpatlas nonemilis.

Achtoui monejki ayokmo nimouikas ininuaya katli nimouampojchijtoya. Proverbios 13:20 kiijtoua: “Se tlakatl tlen nemi ininuaya tlen tlalnamikij mochiuas tlalnamiki. Pero aki nemi ininuaya uiuimej, kipantis ajkeya kinpojpostekis iomiyouaj”. Ni texto tlauel nechpaleuik, yeka nikintlauelkajki katli achtouia eliyayaj nouampoyouaj uan pejki nimouika ininuaya Jehová itlajtoltemakauaj.

Tlauel ouij nijmatki ayokmo nitlachichinas, uan kema nijchiuayaya kampeka ayokmo kiampa nijchiuas, nimotomajki se 14 kilos. Ni kichijki ayokmo ma nimoikneli, uan niuejkajki nechka matlaktli xiuitl sampa nietias kej achtouia. Maske kiampa nechpanoyaya, nimosentlalijtoya ayokmo kema nitlachichinas. Nochipa nimomaijtouayaya uan nikiljuiyaya Jehová ma nechmaka chikaualistli, uan kena nechpaleuik pampa ayokmo nitlachichinki.

¿KENIJKATSA NECHPALEUIJTOK? Nama ayokmo nimokokoua uan niyolpaki ika tlen nijpia. Ayokmo nimoiljuia tlauel niyolpakis tlaj nijpias se kuali tekitl, tlaj sekinok kuali nechitasej uan tlaj nitlatominpias. Noueue uan na tlauel tiyolpakij pampa tikinmachtiaj sekinok tlen Biblia tlamachtia uan nikinpaleuijtok eyij katli achtouia ininuaya nitekitiyaya ma kitekipanokaj toTeotsij. Uan kema nojua itstoyaj katli nechiskaltijkej, uelki nikinkamanaljuik kenijkatsa teipa Tlaltipaktli elis se xochimili uan moyolkuisej katli miktokej.

Nama kuali nimouampojchijtok iuaya toTeotsij uan nopa nechpaleuijtok ayokmo ma nijyolmati nechtlauelkajtokej. Jehová itlajtoltemakauaj elij kej nochampoyouaj pampa nikinpia miakej nonanauaj, notatauaj uan noikniuaj (Marcos 10:29, 30).

[Tlaixkopinkayotl]

Jehová itlajtoltemakauaj kinextiaj tlauel moikneliaj

[Tlaixkopinkayotl]

Santuario sintoísta kampa nitlaueyichiuayaya