Biblia okinpatili innemilis

¿TLEKA se siuatl tlen okipiaya kanaj 60 xiuitl opejki kiueyichiua san toTajtsin Dios? ¿Tlen okipaleui se teopixki sintoísta ma mochiua iTlaixpantijka Jehová? ¿Tlen okipaleui se siuatl ma yolpaki maski itatajuan okikajtejkej ijkuak okatka konetl? Ma tikitakan tlen okinpaleui.

“Axkan san toTajtsin Dios nikueyichiua” (ABA DANSOU)

ONINESKI ITECH XIUTIL: 1938

UEYI ALTEPETL: BENÍN

OKSEKI TLAMANTLI: OKIUEYICHIUAYA SEKI TLAMANTLI UAN TEOTSITSINTIN

TLEN ONIKCHIUAYA: Onimoskalti itech se altepetsintli tlen itoka So-Tchahoué, ik ompa kajki se lago uan pantanos. Amo onka carreteras, ik non, ijkuak kanaj yaui kiuika se barco noso canoas. Akinmej ompa chantij michkitskiaj, kinpiaj vacas, tentsomej, ichkamej, pitsomej uan okseki yolkamej. Noijki kinchiuaj kalmej ika kuauitl, sakatl uan ladrillo. Akinmej ompa chantij amo okachi kipiaj tomin pero amo okachi kichiuaj tlen amo kuali ken itech uejueyij altepemej.

Ijkuak onikatka nitakotsin notajtsin otechuikak ne uan nokni kanin otechmachtijkej ken titlaneltokaskej uan tikinueyichiuaskej teotsitsintin uan okseki tlamantli. Satepan opejki nikueyichiua Dudua, se teotsin tlen kiueyichiuaj yorubas uan noijki kixmatij ken Oduduwa. Onikchi se kaltsintli uan ompa nochipa onikueyichiuaya non teotsin uan noijki onikuikaya aceite de palma, ñames, caracoles, kaxtilmej, palomas uan okseki yolkamej. Omonekiaya miak tomin para niktemakas nin tlamantli.

BIBLIA OKIPATLAK NONEMILIS: Ijkuak opejki nimomachtia Biblia, onikitak Jehová ye Dios tlen melauak uan amo kipaktia ma tikinueyichiuakan teotsitsintin (Éxodo 20:4, 5; 1 Corintios 10:14). Onikitak omonekiaya nikpatlas seki tlamantli. Ayakmo onikinueyichiuaya teotsitsintin nion okseki tlamantli. Ayakmo onikintlajtlaniaya tlachixkej uan ayakmo onikchiuaya costumbres tlen okichiuayaj ijkuak ikaj onesiaya noso oixpoliuiaya.

Kanaj 60 xiuitl onikinueyichi teotsitsintin uan okseki tlamantli, ik non, onikmachili oui ayakmo ijkon nikchiuas. Noyolikniuan, nofamiliares uan oksekimej sapanoua okualankej uan onechiluiayaj amo melauak tlen onimomachtijtoka. Onikilui Jehová ma nechyolchikaua para ma nikchiua tlen kuali. ¡Sapanoua onechyolchika tlen kijtoua Proverbios 18:10! Ompa kijtoua: “Itoka Jehová ken se chikauak tepamitl. Akin yolmelauak ompa motlaloua uan kimaluia”.

Noijki onechyolchika nimonechikos iuan iTlaixpantijkauan Jehová, ompa onikitak yejuan sapanoua motlasojtlaj. Noijki onechtlajtlachialti nikitas ken mochijchikauaj kichiuaskej tlen kijtoua Biblia. Ijkon onikmatki iTlaixpantijkauan Jehová kipiaj religión tlen melauak.

TLATEOCHIUALISTLI TLEN YONIKSELI: Principios tlen katej itech Biblia onechpaleuijkej kuali ma nimouika iuan nokoneuan. Noijki ayakmo nikmachilia nikuika itlaj sapanoua etik, achto oniktekitiltiaya miak tomin para itlaj nikinmakas teotsitsintin tlen amo keman onechpaleuijkej. Pero axkan niktekichiuilia Jehová uan ye kema kipojpolos nochi tlen techtlajyouiltia (Apocalipsis 21:3, 4). Ayakmo nikinueyichiua teotsitsintin nion okseki tlamantli, axkan san toTajtsin Dios nikueyichiua. Jehová nechmaluia, kichiua kuali ma nimomachili uan ma niyolpaki.

“Desde nichokotsin oniknekiaya nikixmatis toTajtsin Dios” (SHINJI SATO)

ONINESKI ITECH XIUTIL: 1951

UEYI ALTEPETL: JAPÓN

OKSEKI TLAMANTLI: OKATKA TEOPIXKI SINTOÍSTA

TLEN ONIKCHIUAYA: Onineski itech se altepetl kanin otlanauatiaya Fukuoka. Notatajuan okinueyichiuayaj teotsitsintin sintoístas uan onechmachtijkej noijki ijkon ma nikchiua desde nichokotsin. Onimokuayejyekouaya ken uelis nimomakixtiskia uan ken uelis nikinpaleuiskia akinmej tlajyouiaj. Nikilnamiki se tonal akin otechmachtiaya otechtlajtlani tlen techpaktiskia tikchiuaskej ijkuak timoskaltiskiaj. Akinmej inmiuan onimomachtiaya okijtojkej kinpaktiskia yetoskej ixtlamatkej. Ne onikijto oniknekiaya niktekichiuilis toTajtsin Dios pero san onechuetskilijkej.

Ijkuak otlanki onimomachti secundaria, opejki nimomachtia para niyetos teopixki. Ompa onikixmatki se teopixki sintoísta tlen okitlajtoltiaya se amochtli tliliuik. Ye onechtlajtlani kox onikmatiaya tlen amochtli okitlajtoltijtoka, pero ne yonikmatiaya, ik non, onikilui: “Biblia”. Ye onechilui: “Akin kineki yetos teopixki sintoísta moneki kitlajtoltis nin amochtli”.

San niman onikkouato se Biblia uan oniktlali kanin uelis nikitaskia. Pero amo onimajxiliaya niktlajtoltis porque onimomachtijtoka okseki tlamantli. Satepan otlanki onimomachti para niyetos teopixki sintoísta uan onia itech se santuario. ¡Onikchijtoka tlen oniknekiaya desde nichokotsin!

Pero amo okichiuayaj tlen ne onimokuayejyekouaya. Teopixkej amo okintekipachouaya tlen oksekimej okinpanouaya. Sekimej nion otlaneltokayaj. Akin otlayekanaya onechilui: “Tla tikneki kuali tiyetos amo xikijto tlen tikneltoka san xikintlapoui tlen kineltokaj ixtlamatkej”.

Tlen onechilui sapanoua onechyolkoko uan onechkualani. Amo san niman onikajte santuario pero opejki nikita tlen kichiuaj okseki religiones. Tlen onikajsiaya okachi onechkualaniaya. Onikitaya nochtin san otlakajkayauayaj.

BIBLIA OKIPATLAK NONEMILIS: Itech xiuitl 1988 onikixmatki se budista uan onechyole ma niktlajtolti Biblia. Ijkuakon onikilnamik teopixki sintoísta tlen noijki onechyolejka ma niktlajtolti Biblia. Ik non, opejki niktlajtoltia. Onechpakti, ualeua oniktlajtoltiaya hasta ijkuak otlanesiaya.

Tlen oniktlajtolti onechyole para ma niktlatlaujti toTajtsin Dios ijkon ken kijtoua Mateo 6:9-13. Ijkuak opanouaya ome hora ijkon oksepa onimotlatlaujtiaya, maski onikchijtoka seki tlamantli itech santuario.

Ijkuak okachi oniktlajtoltiaya Biblia okseki tlamantli onimotlajtlaniaya. Itech non xiuitl yonikpiaya nosiua uan onikmatiaya iTlaixpantijkauan Jehová okinmachtiayaj oksekimej ika Biblia, porque seki xiuitl achto yokitlapouiayaj nosiua. Ik non, opejki nimotlapouia iuan se iTlaixpantijka Jehová uan miak tlamantli oniktlajtlani. Onechtlajtlachialti porque nochipa onechnankiliaya ika Biblia. Satepan ye okinmilui oksekimej iTlaixpantijkauan Jehová ma nechmachtikan.

Amo ouejka uan opejki inmiuan nimonechikoua. Satepan noijki onikinmitak ompa okatkaj sekimej akinmej onikinchiuili tlen amo kuali. Pero yejuan kuali onechtlajpalojkej uan kuali onechselijkej.

Itech nechikolmej onimomachti toTajtsin Dios kineki tlakamej ma kintlasojtlakan uan ma kintlakaitakan infamilia. Pero ne amo onikmaluiaya nosiua nion ome nokoneuan, san onechtekipachojtoka ken niyetos niteopixki. Onikajsikamatki onechpaktiaya nikinkakis oksekimej ijkuak oualayaj itech santuario, pero amo keman onikkakiaya nosiua.

Ijkuak okachi onimomachtiaya okachi onimouikaya iuan Jehová. Miakej versículos oajsikej itech noyolo, ken tlen kijtoua Romanos 10:13, TNM: “Nochi akin kijtos itoka Jehová momakixtis”. Desde nichokotsin oniknekiaya nikixmatis toTajtsin Dios uan Biblia onechpaleui ma nikixmati.

Ayakmo kuali onimomachiliaya nitekipanos itech santuario. Onechtekipachouaya tlen kijtoskiaj tla nikkauaskia sintoísmo, pero yonikijtojka nikkauaskia tla nikajsiskia se religión tlen melauak kiueyichiua toTajtsin Dios. Ik non, onikchi tlen onikijtojka uan itech xiuitl 1989 ayakmo oniaya itech santuario uan onikneltokaya ika nochi noyolo Jehová nechpaleuiskia.

Onikitak oui ayakmo ijkon nikchiuas. Akinmej otlayekanayaj onechpinauiayaj uan okinekiayaj ok ma niyeto niteopixki. Pero okachi oui onikitak nikinmiluis notatajuan. Ijkuak oniaya inkalijtik sapanoua onimotekipachouaya uan onimomojtiaya. Miak uelta oniktlatlaujti Jehová ma nechpaleui.

Ijkuak oniajsito amo ueli san niman onikinmilui. Opanok miak horas uan oksepa sapanoua onimotlatlaujti, ijkuakon onikilui notajtsin. Onikinpaleui ma kajsikamatikan onikajsik se religión tlen melauak kiueyichiua toTajtsin Dios uan para nikueyichiuaskia omonekiaya nikkauas sintoísmo. Ye omoyolkoko uan ayakmo itlaj onechilui. Sekimej nofamiliares onechiluijkej amo ijkon ma nikchiua. Amo oniknekiaya ikaj nikyolkokos pero oniknekiaya niktekichiuilis Jehová. Satepan nofamilia okajsikamatki tlen onikpejpenki nikchiuas.

Amo san omonekiaya nikkauas santuario, omonekiaya nikpatlas tlen onimokuayejyekouaya. Ijkuak onikatka niteopixki miak tlamantli onikchi uan maski oniknekiaya nikilkauas, tlen onikitaya oksepa onechilnamiktiaya.

¿Tlen onechpaleui? Ome tlamantli. Achto onikololo uan oniktlati nochi tlen opouiaya itech sintoísmo. Onikintlatij amochmej, cuadros uan okseki tlamantli tlen okatka patio. Noijki onechpaleui niyetos inmiuan tokniuan. Yejuan nouan omouikayaj uan onechyolchikauayaj, ijkon onikilka tlen achto onikchiuaya.

TLATEOCHIUALISTLI TLEN YONIKSELI: Achto amo onikinmaluiaya nokoneuan nion nosiua, ik non, omomachiliayaj inselti. Pero onimomachti Biblia kijtoua moneki ma timopaleuikan, ik non, opejki ijkon nikchiua. Non otechpaleui okachi kuali ma timouikakan. Satepan nosiua opejki kitekichiuilia Jehová. Axkan nochi nofamilia —tejuan, totelpoch, tochpoch uan inamik— tiktekichiuiliaj Jehová.

Ijkuak nikilnamiki desde nichokotsin oniknekiaya nikixmatis toTajtsin Dios uan nikinpaleuis oksekimej, nikajsikamati axkan ijkon nikchijtok. Sapanoua niyolpaki uan amo nikmati ken niktlasojkamatilis Jehová.

“Onikmachiliaya itlaj onechpolouaya” (LYNETTE HOUGHTING)

ONESKI ITECH XIUITL: 1958

UEYI ALTEPETL: SUDÁFRICA

OKSEKI TLAMANTLI: ONIKMACHILIAYA AMIKAJ ONECHTLASOJTLAYA

TLEN ONIKCHIUAYA:Onineski itech se altepetl tlen itoka Germiston, ompa amo okachi okichiuayaj tlen amo kuali. Notatajuan onechtetliokolijkej ijkuak onineski maski san onikpiaya 14 tonal, porque omokuayejyekouayaj amo uelis nechmaluiskiaj. Ijkuak onimoskalti onimokuayejyekouaya akinmej inmiuan onichantiaya okatkaj notatajuan. Pero ijkuak onikmatki yejuan amo notatajuan, onikmachili amikaj onechtlasojtlaya. Onimokuayejyekouaya amo nechajsikamatij uan amo nechtlasojtlaj.

Ijkuak onikpiaya 16 xiuitl oniaya iuan noyolikniuan itech bares para timijtotiskej uan tikkakiskej tlakuikalmej. Ijkuak onikpiaya 17 xiuitl opejki nitlachichina. Oniknekiaya nimotas ken sekimej siuamej tlen tlachichinaj. Ijkuak onikpiaya 19 xiuitl onichantito Johannesburgo para okachi nitekipanos. Satepan opejki nimouika inmiuan akinmej okijtouayaj tlen amo kuali, otitlachichinayaj uan otitlauanayaj.

Pero noijki onikchiuaya okseki tlamantli, oniaya gimnasia aeróbica, squash uan onimauiltiaya fútbol. Opejki sapanoua nitekipanoua kanin kinchiuaj celulares, computadoras, televisión uan okseki tlamantli. Kuali onichantiaya amitlaj onechpolouaya porque onikpiaya miak tomin, miakej okijtouayaj kuali tlen onikchijtoka. Pero tlen melauak amo oniyolpakiaya uan onikmachiliaya itlaj onechpolouaya.

BIBLIA OKIPATLAK NONEMILIS: Ijkuak opejki nimomachtia Biblia onikajsikamatki Jehová se Dios tlen tetlasojtla, ik non, otechmakak iTlajtol. Biblia ken se carta, tlen ompa kijtoua techpaleuia para kuali matimoyekanakan itech tonemilis (Isaías 48:17, 18). Tla oniknekiaya nimoyekanas ika Biblia, omonekiaya nikpatlas nonemilis.

Achto onikinpatlak noyolikniuan, ijkon ken kijtoua Proverbios 13:20: “Akin nemi iuan akin ixtlamatki ye noijki yetos ixtlamatki uan akin mouika iuan akinmej amo yolkualmej kipanos tlen amo kuali”. Onikpatioitak nin tlanauatil uan opejki nimouika inmiuan akinmej kitekichiuiliaj Jehová.

Pero oui onikitak ayakmo nitlachichinas. Ijkuak onimochijchika ayakmo nitlachichinas, onimotomaj kanaj 14 kilos. Nin tlamantli okichi manimoyolkoko porque ouejka kanaj majtlaktli xiuitl niyetos ken achto. Pero omonekiaya nikauas nin tlamantli, ik non, nochipa oniktlatlaujtiaya Jehová uan onikitak ken onechyolchika.

TLATEOCHIUALISTLI TLEN YONIKSELI: Axkan kuali nimomachilia uan niyolpaki ika tlen nikpia. Ayakmo okachi nitekipanoua ken achto para nikpias miak tomin. Ne iuan nonamik tiyolpakij tikinmachtiaj oksekimej tlen kijtoua Biblia, noijki yonikinpaleui eyi noyolikniuan makitekichiuilikan toTajtsin Dios. Achto ixpoliuiskiaj notatajuan onikintlapoui ken Jehová kinyolitis itech se xochitlali akinmej yoixpolikej.

Biblia yonechpaleui manimouika iuan toTajtsin Dios, axkan ayakmo nimomachilia ken achto. Axkan iTlaixpantijkauan Jehová yetoskia ken nofamilia, porque nikinpia notatajuan uan nokniuan (Marcos 10:29, 30)

[Foto]

Onikinmitak iTlaixpantijkauan Jehová melauak motlasojtla

[Foto]

Santuario kanin onikatka niteopixki sintoísta