IBHAYIBHILI LIYAMTSHINTSHA UMUNTU

KUNGANI omunye umama owayesedlule iminyaka engu-60 wenelisa ukutshiya ukukhonza izithombe? Kuyini okwenza umphristi ongumShinto watshiya umsebenzi wakhe ethempelini waba ngumKhristu? Kuyini okwanceda owesifazana owakhuliswa ngabantu abangayisibo bazali bakhe ukuthi alwisane lokuzizwa elahliwe. Bala indaba zabo uzwe ukuthi bathini.

“Kangisaphileli ukukhonza izithombe.”—ILANDISWA NGU-ABA DANSOU

UMNYAKA WOKUZALWA: 1938

ILIZWE AZALELWA KULO: BENIN

IMBALI: WAYEKHONZA IZITHOMBE

KUDALA KWAMI: Ngakhulela endaweni okuthiwa yi-So-Tchahoué elixhaphozi njalo eseduze ledamu. Izakhamizi zakuleyondawo ziphila ngokuthiya inhlanzi lokufuya inkomo, imbuzi, izimvu, ingulube kanye lenyoni. Indawo le kayilamigwaqo ngakho abantu basebenzisa izikepe nxa belohambo. Izindlu ezinengi zakhiwe ngezigodo lotshani lanxa zikhona ezakhiwe ngezitina. Inengi labantu abahlala lapho liyazidubekela. Lanxa kunjalo ubugebenga abandanga kangako njengasemadolobheni.

Ngathi ngisasengumntwana ubaba wahambisa mina lodadewethu endaweni okukhonzelwa khona izithombe, lapho esafika safundiswa mayelana lemikhuba yokukhonza izithombe. Ngathi sengikhulile ngaqalisa ukukhonza unkulunkulu okuthiwa ngu-Oduduwa ngilandela isiko lamaYoruba. Unkulunkulu lo ngamakhela indlu njalo ngangihlala nginikela kuye izithelo okuthiwa ngama-yam, lamafutha e-palm, leminenke, inkukhu, amajuba lezinye inyamazana. Iminikelo le yayidula okokuthi ngangisithi nginganikela ngisale ngingaselalutho.

INDLELA IBHAYIBHILI ELANGITSHINTSHA NGAYO: Ngathi sengiqalise ukufunda iBhayibhili ngafunda ukuthi uJehova nguye yedwa uNkulunkulu weqiniso. Ngafunda lokuthi uyakuzonda ukukhonza izithombe. (U-Eksodusi 20:4, 5; 1 KwabaseKhorinte 10:14) Ngananzelela ukuthi kwasekumele ngitshintshe. Yikho ngahle ngalahla zonke izithombe engangilazo njalo ngakhipha konke okuphathelane lokukhonza izithombe engangilakho endlini. Ngayekela ukuya ezanuseni njalo ngangingasawenzi amasiko lemikhuba eyenziwa emingcwabeni.

Kwakungalula ukuthi ngenze utshintsho lolu ngoba ngasengileminyaka eyedlula 60. Abangane bami, lezihlobo kanye labomakhelwane bangiphikisa futhi bangihleka. Kodwa ngathandaza kuJehova ngicela ukuthi anginike amandla okuthi ngenze okuqondileyo. Ngaduduzwa ngamazwi akuZaga 18:10 athi, “Ibizo likaJehova liyinqaba eqinileyo; abalungileyo babalekela kulo baphephe.”

Okunye okwangincedayo yikungena imihlangano yaboFakazi bakaJehova. Bafika bangitshengisa uthando lweqiniso njalo ngakhangwa yikubona indlela ababezimisele ngayo ukuphila belandela izimiso zeBhayibhili. Lokhu kwangenza ngabona ukuthi oFakazi bakaJehova bayinkolo yeqiniso.

INDLELA ENGINCEDAKALE NGAYO: Ukusebenzisa izimiso zeBhayibhili kwenze ngazwanana labantwabami. Sengiphila impilo engcono ngoba kangisaqedi imali yami yonke ngithengana lezithombe ezingancedi ngalutho. Khathesi sengikhonza uJehova othembisa ukuqeda inhlupho zethu zonke. (ISambulo 21:3, 4) Kuyangithokozisa ukuthi angisaphileli ukukhonza izithombe kodwa sengiphilela ukukhonza uJehova. Usenginike isivikelo sakhe esiqinileyo.

“Ngangimdinga uNkulunkulu kusukela ngisesengumntwana.”

ILANDISWA NGUSHINJI SATO

UMNYAKA WOKUZALWA: 1951

ILIZWE AZALELWA KULO: JAPAN

IMBALI: UMPHRISTI ONGUMSHINTO

KUDALA KWAMI: Ngakhulela edolobheni laseFukuoka. Abazali bami babengabantu besonto futhi bangifundisa ukwesaba onkulunkulu bamaShinto. Ngisesengumfanyana nje ngangihlala ngicabanga ngensindiso futhi ngangilesifiso esikhulu sokunceda abantu ababesebunzimeni. Ngikhumbula ngimncane ngisesesikolo umbalisi wasibuza ukuthi sasifuna ukwenzani singakhula. Abantwana engangifunda labo babefisa ukwenza imisebenzi ezwayo, njengokuba ngama-scientist. Mina ngathi isifiso sami ngesokukhonza uNkulunkulu. Bonke abantwana bathi bekuzwa lokho baqhunsa uhleko.

Sengiqedile isikolo ngayafundela ukuba ngumfundisi wesonto. Ngalesosikhathi ngabona umphristi ongumShinto owayehlala ebala ibhuku elilombala omnyama ngaphandle. Ngelinye ilanga wangibuza wathi, “Sato, uyalazi yini ibhuku leli?” Ngasengilinanzelele igwaliba lebhuku lelo, yikho ngathi, “LiBhayibhili.” Wasesithi, “Wonke umuntu ofuna ukuba ngumphristi ongumShinto kumele alibale ibhuku leli.”

Ngahle ngaphuma ngayalithenga iBhayibhili. Ngalidingela indawo yalo ngalibeka kuhle endaweni yokugcina amabhuku. Kodwa angizange ngithole isikhathi sokulibala njengoba ngangihlala ngiphathekile ngemisebenzi yesikolo. Ngathi ngiqeda isikolo ngayasebenza ethempelini ngingumphristi. Lokhu yikho engangikufisa sibili kusukela ngisesengumntwana.

Ngananzelela ukuthi indlela abaphristi abangamaShinto ababesenza ngayo ayisiyo engangiyikhangelele. Abaphristi ababelapho babengabathandi abanye, bengalandaba labo njalo bengelakholo. Omunye owayelesikhundla esiphezu kwesami waze wangitshela ukuthi nxa ngangifuna ukuphumelela kwakungamelanga ngikhulume ngendaba zokholo.

Inkulumo ezinjengalezi zangenza ngadana kakhulu. Lanxa ngangilokhe ngingumphristi ngaqalisa ukudingisisa ngezinye inkolo. Kodwa ayikho eyayisenza lokho engangikukhangelele. Ukudingisisa kwami kwangitshiya ngidanile kakhulu. Ngasengibona angani yayingekho inkolo yeqiniso.

INDLELA IBHAYIBHILI ELANGITSHINTSHA NGAYO: Ngo-1988 ngahlangana lomphristi ongumBuddha owangikhuthaza ukuthi ngibale iBhayibhili. Ngakhumbula umphristi ongumShinto owayeke wangikhuthaza ukuthi ngilibale, yikho ngahle ngaqalisa ukulibala. Ngakuthanda engangikubala futhi ngezinye izikhathi ngangilibala ubusuku bonke kuze kuphume ilanga.

Ukubala iBhayibhili kwangenza ngaba lesifiso sokukhuleka kuNkulunkulu. Ngaqalisa ngomkhuleko otholakala kuMathewu 6:9-13. Ngangiwuphindaphinda umkhuleko lo ngemva kwamahora amabili futhi ngangithandaza lanxa ngangisenza inkonzo yami ethempelini.

Ngangilemibuzo eminengi mayelana lalokho engangikubala. Ngalesosikhathi ngasengitshadile njalo ngangikwazi ukuthi oFakazi bakaJehova bafundisa abantu iBhayibhili ngoba babeke bavakatshela umkami. Ngathola omunye uFakazi kaJehova ngasengimbuza imibuzo eminengi. Ngamangaliswa yindlela ayesebenzisa ngayo iBhayibhili ukuze aphendule yonke imibuzo yami. Ngemva kwalokho wangidingela abanye oFakazi ababezafunda lami iBhayibhili.

Kungakayi ngaphi ngasengiqalisile ukungena imihlangano yaboFakazi bakaJehova. Ngalesosikhathi ngangingananzeleli ukuthi abanye babo ababelapho ngangike ngabaphatha kubi kudala kodwa bona bangamukela kuhle futhi bangenza ngakukholisa ukuba semihlanganweni.

Emihlanganweni leyo ngafunda ukuthi uJehova wayefuna amadoda athande izimuli zawo futhi aziphathe kuhle. Ngasengichitha isikhathi eside ngisenza umsebenzi wami wokuba ngumphristi okokuthi ngangingaselasikhathi lemuli yami. Ngananzelela ukuthi ngangibalalelisisa abantu ababebuya ethempelini kodwa ngangingelasikhathi sokulalela unkosikazi wami.

Ukuqhubeka ngifunda iBhayibhili kwangenza ngafunda izinto ezinengi ngoJehova ezangenza ngasondela kuye. Eyinye ivesi eyangithintayo nguRoma 10:13, ethi: “Wonke umuntu obiza ibizo likaJehova uzasindiswa.” Ngasengize ngamthola uNkulunkulu engangimdinge kusukela ngisesemncane!

Ngangingasakhululekanga ukuya ethempelini kodwa ngangikhathazeke ngokuthi abantu bazathini ngingatshiya isonto yamaShinto. Ngangizimisele ukuthi nxa ngingathola uNkulunkulu weqiniso ngizayitshiya isonto le. Ngo-1989 ngaqunga isibindi ngatshiya umsebenzi wami ethempelini ngasengizimisela ukukhonza uJehova.

Kwakungalula ukutshiya umsebenzi wami ethempelini. Abakhokheli bami bangitshingela befuna ukungibamba ngenkani ukuthi ngingatshiyi umsebenzi. Okwakunzima kakhulu yikutshela abazali bami. Ngangitshaywa luvalo lamadolo exega ngesikhathi ngisendleleni ngisiya endlini yabo. Ngama kanengi endleleni ngikhuleka kuJehova ngicela ukuthi anginike amandla.

Ngathi sengifikile ngekhaya kwaba nzima ukuthi ngibatshele udaba lwami. Kwathi sekudlule amahora amanengi futhi sengithandaze kanengi ngamtshela ubaba yonke indaba. Ngamtshela ukuthi ngasengimtholile uNkulunkulu weqiniso futhi ngasengiyitshiyile isonto yamaShinto ukuze ngimkhonze. Ubaba waphelelwa futhi wadana. Ezinye izihlobo lazo zabuya khonapho zicabanga ukuthi zingangitshintsha ingqondo. Ngangingafuni ukuzwisa abangekhaya ubuhlungu kodwa ngangikwazi ukuthi sekumele ngikhonze uJehova. Ngokuhamba kwesikhathi abangekhaya bacina besihlonipha isinqumo sami sokukhonza uJehova.

Ngawutshiya sibili umsebenzi wami ethempelini kodwa engqondweni wawungaphumanga. Kwakunzima ukuthi ngiwukhohlwe ngoba kwakulezinto ezinengi ezazingikhumbuza kudala kwami ngisesengumphristi.

Kulezinto ezimbili ezanginceda ukuthi ngikhohlwe ngempilo yami yakudala. Okokuqala, ngadinga zonke izinto engangizisebenzisa ngisesengumShinto futhi ngatshisa yonke into okuhlanganisa amabhuku, amapikitsha kanye lezinye izinto ezidulayo engangizisebenzisa. Okwesibili, ngazinika isikhathi esinengi sokuba laboFakazi bakaJehova futhi bangincedisa kakhulu. Kancane kancane nje imicabango yempilo yami yakudala yanyamalala.

INDLELA ENGINCEDAKALE NGAYO: Ngangingelandaba lomkami labantwabami okwakusenza ukuthi babelesizungu. Kodwa ngathi sengisiba lesikhathi ngilabo, ngilandela lokho okutshiwo liBhayibhili saqalisa ukuzwanana. Mina lomkami lendodana yethu kanye lendodakazi yethu lomkayo sesikhonza uJehova simanyene.

Kuyangithokozisa ukuthi khathesi sengikhonza uNkulunkulu futhi senginceda abanye, into engangiyifisa kusukela ngimncane. Ngimbonga ngingaqedi uJehova.

“Ngangilakho konke kodwa ngingathokozi.”

ILANDISWA NGU-LYNETTE HOUGHTING

UMNYAKA WOKUZALWA: 1958

ILIZWE AZALELWA KULO: SOUTH AFRICA

IMBALI: WAYEZIZWA ELAHLIWE

KUDALA KWAMI: Ngazalelwa eGermiston, idolobho elalibantu ababeziphilisa ngokugebha amatshe aligugu. Abantu bakhona babenganothanga futhi bengadubeki njalo ubugebenga babungandanga endaweni leyo. Abazali bami babebona angani ngeke benelise ukungigcina yikho bangihambisa endaweni lapho engangingathathwa khona nguloba ngubani owayefisa ukungondla. Ngilamalanga angu-14 nje kuphela ngizelwe, ngathathwa ngeyinye indoda lomkayo futhi yibo abacina sebengabazali bami njalo babengithanda kakhulu. Ngathi sengizwile lokhu okwakwenziwe ngabazali bami ngisesemncane, ngaqalisa ukuzizwa ngingathandwa. Ngasengikubona sibili ukuthi laba ayisibo bazali abangizalayo lokuthi babengangizwisisi.

Ngathi sengileminyaka engaba ngu-16 ngaqalisa ukuya emabhawa lapho esasigida khona futhi silalela izingoma zamabhendi. Sengileminyaka engu-17 ngaqalisa ukubhema. Ngangifuna ukuba lomzimba omncane njengabantu engangibabona kuma-adverts okubhema igwayi. Sengileminyaka engu-19 ngayasebenza eGoli lapho engahlangana khona labangane ababesenza izinto ezimbi. Kungakayi ngaphi nje ngasengikhuluma inhlamba, ngibhema okuzwayo futhi ngibubhudla utshwala ngempelaviki.

Lanxa kunjalo ngangisiba lesikhathi sokuqeqetsha umzimba. Ngangijayele ukwenza ama-aerobics, ngidlala ibhora lamantombazana futhi ngidlala leminye imidlalo. Kanti njalo ngangisebenza nzima emsebenzini wami wamakhompiyutha njalo lokho kwenza ngaphumelela. Abantu abanengi babecabanga ukuthi ngihlezi kuhle kodwa ngangingathokozi futhi impilo yayingamnandi.

INDLELA IBHAYIBHILI ELANGITSHINTSHA NGAYO: Ngathi sengiqalisile ukufunda iBhayibhili ngafunda ukuthi uJehova nguNkulunkulu olothando. Ngafunda lokuthi wasinika iLizwi lakhe ukuze atshengise ukuthi uyasithanda. IBhayibhili linjengencwadi esiyibhalelwe nguNkulunkulu ukuze asiqondise empilweni. (U-Isaya 48:17, 18) Ngananzelela ukuthi nxa ngangifuna ukuthi uJehova angiqondise kwakumele ngenze utshintsho empilweni yami.

Olunye utshintsho okwakumele ngilwenze lwalusendabeni yabangane. Ngalalela amazwi atholakala kuZaga 13:20, athi: “Ohamba lezihlakaniphi uyahlakanipha, kodwa othandana leziwula uwela engozini.” Isimiso lesi sanginceda ukuthi ngitshiyane labangane bami bakudala, ngidinge abangane abangoFakazi bakaJehova.

Utshintsho olwaba nzima kakhulu ukuthi ngilwenze ngolokutshiya ukubhema. Ngathi sengilwisane lohlupho lolo kwavuka obunye ubunzima. Ukutshiya ukubhema kwenza ngaba lomzimba omkhulu, ngaqhela ngamakhilogramu angu-13,6. Lokhu kwangenza ngazikhangelela phansi futhi kwathatha iminyaka engaba ngu-10 ukuthi ngehlise umzimba. Lanxa kunjalo ngangikwazi ukuthi kumele ngitshiye ukubhema. Ngakhuleka kanengi kuJehova futhi wangincedisa ngalunqoba uhlupho lolo.

INDLELA ENGINCEDAKALE NGAYO: Khathesi sengilempilakahle futhi sengisuthiseka ngalokho engilakho. Sengatshiyana lokugijimisana lomsebenzi, izikhundla lenotho, izinto ezingenzi umuntu athokoze. Okungithokozisayo yikutshela abanye iqiniso eliseBhayibhilini. Ngenxa yotshintsho engalwenzayo, umkami kanye labanye abathathu engangisebenza labo sebekhonza uJehova. Ngesikhathi abazali bami abangondlayo besaphila ngenelisa ukubatshela ngesithembiso esiseBhayibhilini esokuthi abafileyo bazavuswa baphile emhlabeni olipharadayisi.

Ukusondela kuJehova kungincede ukuthi ngingazizwa ngilahliwe. Ukuba semulini kaJehova esemhlabeni wonke kungenze ngabona ukuthi ngilemuli elothando. Ngilabomama abanengi, labobaba, labafowethu labodadewethu.—UMakho 10:29, 30.

[Picture]

OFakazi bakaJehova balothando lweqiniso

[Picture]

Ithempeli lamaShinto lapho engake ngakhonza khona