IBhayibhili Itjhugulula Amaphilo

KUBAYINI umfazi oseemnyakeni yama-60 atjhentjha ekukhulekeleni iinthombe? Khuyini eyabangela umpristi wobuShinto bona atjhiye umsebenzakhe etempelini abe sikhonzi esimKrestu? Umfazi owakhuliswa babelethi ekungasibo bakhe wakghona njani ukuqalana namazizo wokulahlwa? Cabangela lokho abantwaba abakutjhoko.

“Angisakhulekeli Iinthombe.”—U-ABA DANSOU

UMNYAKA ABELETHWA NGAWO: 1938

INARHA ABELETHELWA KIYO: BENIN

UMLANDO: UMKHULEKELI WEENTHOMBE

UKUPHILA KWAMI KWANGAPHAMBILI: Ngakhulela eSo-Tchahoué, indawo enomdzwela ehlanu kwelitsha. Abantu bendawo leyo bathiya iimfesi, bafuya iinkomo, iimbuzi, izimvu, iimfarigi neenyoni. Indawo leyo ayinazo iindlela, ngalokho, abantu basebenzisa iinkepe ezikulu nezincani bona bakhambe. Ngokuvamileko bakha izindlu zabo ngeengodo nangotjani, nanyana abanye bakha ngeentina. Abantu abanengi lapho bayatlhaga. Nanyana kunjalo, ubulelesi abukandi njengemadorobheni.

Nengisesemncani, ubaba wathumela mina nodadwethu endaweni yemilingo, lapho safundiswa khona iinkolelo zamasiko. Nengikhulako, ngamukela uDudua (Oduduwa) wesiko lesiYoruba njengozimami. Ngamakhela indlu begodu qobe bengimenzela iimhlatjelo ngamagosi [okusabhutata], amaqabunga womnqumo, iinkune [snails], iinkukhu, amazuba nezinye iinlwana ezihlukahlukeneko. Iimhlatjelo le beyidura, kanengi beyingitjhiya nginganalitho.

INDLELA IBHAYIBHILI EYATJHUGULULA NGAYO UKUPHILA KWAMI: Nengithoma ukufunda iBhayibhili, ngafunda bona uJehova ukuphela kwakaZimu wamambala. Godu ngafunda bona akakwamukeli ukukhulekela iinthombe. (Eksodosi 20:4, 5; 1 KwebeKorinte 10:14) Ngatjheja bona yini okufanele ngiyenze. Ngalokho ngalahla zoke iinthombe zami zekolo begodu ngahlanza indlwami ngakhipha koke okuphathelene nokukhulekela iinthombe. Ngalisa ukuzihlanganisa nabantu abathukulako, begodu angisahlanganyeli emasikweni wemingcwabo yendawo.

Bekungasilula kimi—umfazi oneemnyaka ema-60—ukwenza amatjhuguluko la. Abangani bami, iinhlobo nabomakhelwana bangiphikisa bebahlekisa ngami. Kodwana ngathandazela amandla kuJehova bona ngenze okulungileko. Ngaduduzwa mamezwi weZiyema 18:10, athi: “Ibizo lakaJehova limbhotjhongo oqinileko. Olungileko ugijimela kiwo afumane isivikelo.”

Okhunye okwangisizako bekukuhlanganyela iimhlangano yaboFakazi BakaJehova. Lapho ngabona ithando lobuKrestu, begodu ngarareka ngombana abantwaba balinga ukuphila ngeemthetho yeBhayibhili yokuziphatha ephakemeko. Engakubona kwangiqinisekisa bona aboFakazi BakaJehova basekolweni yeqiniso.

 INDLELA ENGAZUZA NGAYO: Ukusebenzisa iinkambisolawulo zeBhayibhili kungisize ngathuthukisa ubuhlobo bami nabantwabami. Godu ngizwa ngasuthi kunomthwalo osuswe emahlombami. Bengiqeda imalami eenthombeni ezingaphiliko ezingazange zingisize ngalitho. Kwanje ngikhulekela uJehova, onikela isirarululo esingapheliko kiyo yoke iimrarwethu. (ISambulo 21:3, 4) Ngithabe khulu bona angisakhonzi iinthombe, kodwana kunalokho, ngikhonza uJehova! Kuye ngifumene ukulondeka kwamambala nesivikelo.

“Bengifuna UZimu Kusukela Ngisesemncani.”—USHINJI SATO

UMNYAKA ABELETHWA NGAWO: 1951

INARHA ABELETHELWA KIYO: JAPAN

UMLANDO: UMPRISTI WOBUSHINTO

UKUPHILA KWAMI KWANGAPHAMBILI: Ngakhulela edorobheni leFukuoka Prefecture. Ababelethi bami bebakholiwe; kusukela ebuntwaneni bangikhulisa bona ngikhonze abozimu bekolo yobuShinto. Njengomsana omncani, ngacabanga kanengi ngokusindiswa kwami begodu ngaba nesifiso esinamandla sokusiza abantu abaneemraro. Ngikhumbula ngisesikolweni samabanga aphasi utitjhere nekasibuza bona sifuna ukwenzani nesesibakhulu. Abantwana egade ngifunda nabo bebanamabhudango amakhulu, njengokuba bososayensi. Mina ngathi ibhudango lami kukhonza uZimu. Boke bangihleka.

Ngemva kokuqeda isikolo, ngaya esikolweni sobufundisi. Phakathi kokubandulokho, ngahlangana nompristi wobuShinto obekasebenzisa isikhathi sakhe sokuzigedla afunda incwadi enekhavara enzima. Langelinye wangibuza, “Sato, uyayazi incwadi le?” Ngabona ikhavarayo, bese ngaphendula, “YiBhayibhili.” Wathi, “Woke umuntu ofuna ukuba mpristi wobuShinto kufuze afunde incwadi le.”

Ngakhamba khonokho ngayokuthenga iBhayibhili. Ngabeka iBhayibhilli endaweni eqakatheke khulu endaweni engibeka kiyo iincwadi begodu ngayitlhogomela. Kodwana akhenge ngenze isikhathi sokuyifunda ngombana ipilo yesikolweni beyingenza ngihlale ngitinazela. Nengiqeda isikolo, ngathoma ukusebenza etempelini njengompristi wobuShinto. Ibhudango lami lebuntwaneni lazaliseka.

Nokho, msinyana ngafumana bona ukuba mfundisi wobuShinto bekungasiyo into ebengifuna  ukuba ngiyo. Abapristi abanengi abanathando kangako namtjhana ukutshwenyeka ngabanye. Godu abanengi bebanganakholo. Omunye weenkhulu zami wathi kimi: “Newufuna ukuphumelela la, kufuze ukhulume ngefilosofi. Akukavunyelwa ukukhuluma ngekolo.”

Ikulumo enjalo yangenza ngaphuka umoya ngesondo lobuShinto. Nanyana ngaragela phambili nomsebenzami esondweni, ngathoma ukuhlola ezinye iinkolo. Nokho, ayikho eyanginikela okungcono. Njengombana ngiragela phambili ngihlola iinkolo ezinengi, ngadana khulu. Ngabona bona alikho iqiniso kunanyana ngiyiphi ikolo.

INDLELA IBHAYIBHILI EYATJHUGULULA NGAYO UKUPHILA KWAMI: Ngo-1988, ngahlangana nomBhuda owangikhuthaza ukufunda iBhayibhili. Ngacabanga ngompristi wobuShinto eemnyakeni eyadlulako owangikhuthaza bona ngenze okufanako. Ngakhetha ukusebenzisa isilulekwesi. Njengombana ngithoma ukufunda iBhayibhili, msinyana ngathoma ukuyithanda. Ngezinye iinkhathi bengiyifunda ubusuku boke bekuphume ilanga.

Engakufundako kwangitjhukumisela bona ngifune ukuthandaza kuZimu weBhayibhili. Ngathoma ngomthandazo osibonelo otlolwe kuMatewu 6:9-13. Bengibuyelela umthandazo lo qobe ngemva kwama-awara amabili—ngitjho nalokha nengenza ikonzwami etempelini lobuShinto.

Bengineembuzo eemnengi ngalokho ebengikufunda. Ngesikhatheso, bengitjhadile, begodu bengazi bona aboFakazi BakaJehova bafundisa abantu ngeBhayibhili ngombana bavakatjhela umkami esikhathini esadlulako. Ngafuna omunye waboFakazi bese ngamhloma ngeembuzo. Ngarareka nasebenzisa iBhayibhili nekaphendula ngamunye wayo. Wahlela bona kube noFakazi ozokufunda nami iBhayibhili.

Msinyana ngemva kwalokho, ngathoma ukuya emihlanganweni yaboFakazi BakaJehova. Ngesikhatheso bengingatjheji, kodwana hlangana naboFakazi ebebakhona, bekunabanye engakhe ngaba hlaza kibo esikhathini esidlulileko. Nanyana kunjalo, bangilotjhisa ngethando begodu bangenza ngazizwa ngisekhaya.

Emihlanganweni leyo, ngafunda bona uZimu ulindele bona amadoda abe nethando ebafazini bawo begodu ahloniphe namalunga weemndenayo. Bekube sikhatheso, bengibambeke khulu emsebenzinami njengompristi kangangobana bengingamtjheji umkami nabantwabami ababili. Ngathoma ukutjheja bona bengilalelisisa lokho obekutjhiwa babantu ebebazokukhuleka esondweni, kodwana akhenge khengilalele lokho okutjhiwo mkami.

Njengombana ngiragela phambili nokufunda iBhayibhili, ngafunda okunengi ngoJehova owangidosela hlanu kwakhe. Ngathintwa khulu mavesi anjengamaRoma 10:13, NW, ethi: “Woke umuntu obiza ibizo lakaJehova uzokuphuluswa.” Bengisolo ngifuna uZimu kusukela ebuntwaneni, ekugcineni, ngimtholile!

Ngathoma ukuzizwa ngilahlekile nengisetempelini. Kokuthoma, ngatshwenyeka ngalokho abanye abazokucabanga nengilisa isondo lobuShinto. Kodwana bengisolo ngizitjela bona ngizolilisa nengifumana uZimu weqiniso kenye indawo. Ngalokho, etwasahlobo ka-1989, ngakhetha ukulandela isazelo sami. Ngatjhiya ukukhonza etempelini ngazibeka ezandleni zakaJehova.

Ukulisa esondweni lobuShinto bekungasilula. Abangiphetheko balwa nami bebalinga ukungikatelela bona ngingalisi. Nokho, into eyaba budisi khulu kimi kutjela ababelethi bami. Endleleni nengiya emzinabo, ngazizwa ngiphelelwa mamandla kangangobana isifuba sami saba  buhlungu nemilenzami yaba s’baga! Ngajama kanengi endleleni ngibawa amandla kuJehova.

Nengifika kwethu, ekuthomeni ngasaba khulu ukuthula indaba le. Kwadlula ama-awara. Ekugcineni, ngemva kokuthandaza khulu, ngamhlathululela koke ubaba. Ngamtjela bona ngifumene uZimu weqiniso nokobana ngiyaphuma ekolweni yobuShinto bona Ngimkhonze. Ubaba wathukwa bewadana. Ezinye iinhlobo zeza ekhaya zalinga ukutjhentjha umcabangwami. Bengingafuni ukuzwisa iinhlobo zami ubuhlungu, kodwana ngesikhathi esifanako, bengazi bona ukukhonza uJehova yinto elungileko. Ngokukhamba kwesikhathi umndenami wangihlonipha ngesiqunto sami.

Namtjhana bengilisile ukuya etempelini, bekusafanele ngilungise umkhumbulwami. Ukuphila kobupristi besele kunzinzile kimi. Ngalinga khulu ukulibala ngakho, kodwana nanyana kuphi lapho ebengiya khona, bekunezinto ebezingikhumbuza ukuphila kwami kwangaphambili.

Zimbili izinto ezangisiza bona ngiphume emikghweni le. Kokuthoma, ngafunisisa zoke izinto emzinami egade zihlobene nekolwami endala. Ngemva kwalokho, ngatjhisa koke—iincwadi, iinthombe ngitjho nezinto ezibizako ezisikhumbuzo. Kwesibili, ngafuna woke amathuba engingawafumana bona ngihlanganyele naboFakazi. Ubungani nokusekela kwabo kwangisiza khulu. Kancanikancani, iindlela zami zokuthoma zasuka emkhumbulweni.

INDLELA ENGAZUZA NGAYO: Bengingamtjheji umkami nabantwabami, obekubenza bazizwe banesizungu. Kodwana nengithoma ukuba nesikhathi nabo, njengombana iBhayibhili ifundisa amadoda bona enze njalo, satjhidelana. Ngokukhamba kwesikhathi umkami wahlanganyela nami ekukhonzeni uJehova. Ndawonye nendodanethu nendodakazethu nendodakwayo, simunye ekukhulekeleni kweqiniso.

Nengicabanga emva ebhudangweni lebuntwaneni lokukhonza uZimu nokusiza abanye abantu, ngiyabona bona ngithole yoke into egade ngiyifuna—nangaphezulu. Anginamezwi aneleko wokuthokoza uJehova.

“Bengazi Bona Kunokuthileko Okutjhodako Ekuphileni Kwami.”—ULYNETTE HOUGHTING

UMNYAKA ABELETHWA NGAWO: 1958

INARHA ABELETHELWA KIYO: SOUTH AFRICA

UMLANDO: WAZIZWA ALAHLIWE

UKUPHILA KWAMI KWANGAPHAMBILI: Ngabelethelwa eGermiston, edorobheni lemayini elinganabo ubulelesi kangako. Bacabanga bona angeze bakghone ukungitlhogomela, ababelethi bami baqunta bona ngikhuliswe ngabanye abantu. Lapho nginamalanga ali-14 ngibelethiwe, ngathathwa sibili esinethando engasithatha njengobaba nomma. Nanyana kunjalo, ngemva kokwazi ngemvelaphi yami, ngatshwenywa  mazizo wokulahlwa. Ngathoma ukucabanga bona akusibabelethi bami laba nokobana bebangangizwisisi kuhle.

Nengineemnyaka eli-16, ngathoma ukukhamba amabhara, lapho mina nabangani bami besijida silalela nombhino odlalwa bunqopha. Nengineemnyaka eli-17, ngathoma ukubhema isegerede. Gade ngifuna ukuba nomzimba omncani ngifane nabonobuhle engibabona emikhangisweni yegwayi. Nengineemnyaka eli-19, ngathoma ukusebenza eJwanisbhege, lapho msinyana ngazihlanganisa nabantu abambi. Msinyana ngathoma ukukhuluma ilimi elifeyila, ngibhema khulu, begodu ngisela khulu ngeempelaveke.

Nanyana kunjalo, bengiphilile ngokomzimba. Bengizithabulula ngidlala nebholo yabantazana yeenyawo neminye iimdlalo. Gade ngisebenza ekampanini yamakhomphyutha begodu ngifuna ukuzenzela idumo. Ngikho bengijame kuhle ngokweemali, begodu abantu abanengi bebangithatha njengomuntu ophumelelako. Nokho, bengingakathabi nakancani—ngizizwa ngilahlekile begodu ngidanile ngokuphila kwami. Ngaphakathi, bengazi bona kunokuthileko okutjhodako ekuphileni kwami.

INDLELA IBHAYIBHILI EYATJHUGULULA NGAYO UKUPHILA KWAMI: Nengithoma ukufunda iBhayibhili, ngafunda bona uJehova nguZimu onethando. Godu ngafunda bona usitjengise ithando ngokusinikela iLizwi lakhe, iBhayibhili. Kunjengokungathi usitlolele incwadi yomuntu mathupha enqophisa amagadangwethu. (Isaya 48:17, 18) Ngabona bona nengabe ngifuna ukuzuza esinqophisweni sakaJehova sethando, kufuze ngenze amatjhuguluko amakhulu ekuphileni kwami.

Elinye itjhuguluko ebekufuze ngilenze ngelabantu egade ngizihlanganisa nabo. Ngacabanga khulu ngamezwi weZiyema 13:20 athi: “Okhamba nabahlakaniphileko uzokuhlakanipha, kodwana osebenzelana neendlhayela kuzomkhambela kumbi.” Ikambisolawulo leyo yangenza ngatjhiya abangani bami bakade begodu ngenza abangani abatjha hlangana naboFakazi BakaJehova.

Umrarwami omkhulu bekukulisa igwayi; egade ngilirhuluphele khulu. Njengombana kancanikancani ngawuhlula umukghwa lo, ngaqalana nobunye ubudisi. Ukulisa ukubhema kwangibangela bona kungezeleleke amakhilogremu angaphezu kwali-13.6 emzimbenami! Lokho kwangenza ngazinyaza, begodu kwangithatha iimnyaka epheze ibe litjhumi ukwehla emzimbeni. Nanyana kunjalo, bengazi bona ukulisa ukubhema yintwehle. Ngathandaza kuJehova qobe, wanginikela amandla wokuphumelela.

INDLELA ENGAZUZA NGAYO: Okwanje ngithabela ipilo engcono. Godu nganelisekile—angisagijimisi ukufumana ithabo ebengicabanga bona ngizolithola ngomsebenzi wokuziphilisa, isikhundla nomnotho. Kunalokho, ngifumana ithabo ngokuhlanganyela iqiniso leBhayibhili nabanye. Ngalokho, abantu abathathu egade ngisebenza nabo kwanje bakhonza uJehova nami nendodakwami. Ngaphambi kobana ababelethi bami bokutholwa bahlongakale, ngakghona ukubatjela ngesithembiso seBhayibhili sokuvukela eparadeyisini ephasini.

Ukutjhidela kuJehova kwangisiza bona ngiqalane namazizo wokulahlwa. Wangenza ngazizwa ngamukelekile ngokungiletha emndenini wephasi loke labakhulekeli esinabo. Hlangana nabo, nginabomma abanengi, abobaba, abanakwethu nabodadwethu.—Markosi 10:29, 30.

[Isithombe ekhasini 28]

Hlangana naboFakazi BakaJehova, ngifumene ithando lobuKrestu

[Isithombe ekhasini 29]

Itempeli lobuShinto la bengikhonza khona