Beibele e Fetoša Maphelo

KE KA baka la’ng mosadi yo a lego nywageng ya gagwe ya bo-60 a ile a tlogela go rapela diswantšho? Ke’ng seo se šušumeleditšego moruti wa Boshinto go tlogela mošomo wa gagwe wa lefelong la borapedi le gore a fetoge modiredi wa Mokriste? Mosadi yo a ilego a tšwewa ke batswadi ba bangwe a sa tšwa go belegwa ba yo mo godiša o ile a kgona go lebeletšana bjang le go ikwa a lahlilwe? Ela hloko seo batho ba ba se bolelago.

“Ga ke sa le Lekgoba la Medimo ya Diswantšho.”—ABA DANSOU

NGWAGA WA MATSWALO: 1938

NAGA: BENIN

BOPHELO BJA PELE E EBA MOKRISTE: MORAPEDI WA DISWANTŠHO

BOPHELO BJA KA BJA NAKONG E FETILEGO: Ke goletše So-Tchahoué, motsana wo o lego mohlakeng wa kgauswi le letsha. Badudi ba moo ba rea dihlapi e bile ba ruile dikgomo, dipudi, dinku, dikolobe le dinonyana. Ga go na ditsela lefelong leo, ka go re’alo batho ba tšea maeto ka diketswana le mekoro. Ba tlwaetše go aga nywako ya bona ka dikota le bjang, gaešita le ge ba bangwe ba aga ka ditena. Batho ba bantši ba moo ke badiidi. Lega go le bjalo, bosenyi ga se bja ata go swana le ditoropong.

Ge ke be ke sa le ngwana, tate o ile a nthomela le mogolwake lefelong la baitlami ba basadi, e lego moo re ilego ra rutwa ka bodumedi bjoo bja setšo. Ge ke gola, ke ile ka tšea Dudua (Oduduwa) wa Mayoruba ka mo dira modingwana wa ka. Ke ile ka agela modingwana yo ntlo gomme ka dula ke o direla dihlabelo ka digwere, makhura a mopalema, dikgopa, dikgogo, maeba le diphoofolo tše dingwe tše di fapafapanego. Dihlabelo tše di be di bitša kudu, e bile gantši di be di mpheletša tšhelete ya ka ka moka.

KAMOO BEIBELE E FETOTŠEGO BOPHELO BJA KA: Ge ke be ke thoma go ithuta Beibele, ke ile ka ithuta gore Jehofa ke Modimo a nnoši wa therešo. Ke ile ka ithuta le gore ga a amogele tirišo ya diswantšho borapeding. (Ekisodo 20:4, 5; 1 Bakorinthe 10:14) Ke ile ka lemoga seo ke bego ke swanetše go se dira. Ka gona ke ile ka lahla diswantšho tša ka ka moka gomme ka ntšha dilo ka moka tšeo di sepedišanago le borapedi bja diswantšho ka ntlong ya ka. Ke ile ka kgaotša go ikgokaganya le dinoge gomme ka se sa hlwa ke tšea karolo ditirelong tša lefelong leo le tša dipoloko.

Go be go se bonolo go nna—mosadi yo a lego nywageng ya gagwe ya bo-60—go dira diphetogo tšeo. Bagwera ba ka, ba leloko le baagišani ba ile ba nkganetša le go nkwera. Eupša ke ile ka rapela Jehofa gore a mphe matla a go dira se se nepagetšego. Ke ile ka homotšwa ke mantšu a Diema 18:10, a rego: “Leina la Jehofa ke tora e matla. Moloki o tšhabela go lona gomme a šireletšwa.”

Selo se sengwe seo se nthušitšego ke go ya dibokeng tša Dihlatse tša Jehofa. Moo ke ile ka bontšhwa lerato la Bokriste gomme ka kgahlega ka gobane batho ba ba leka go phela ka ditekanyetšo tše di phagamego tša boitshwaro tša Beibele. Seo ke se bonego se ile sa nkgodiša gore bodumedi bja Dihlatse tša Jehofa ke bja therešo.

 KAMOO KE ILEGO KA HOLEGA KA GONA: Go diriša melao ya motheo ya Beibele go nthušitše go kaonefatša tswalano ya ka le bana ba ka. E bile ke ikwa ke imologile. Ke be ke fetša tšhelete ya ka ka diswantšho tše sa phelego tšeo di bego di sa nkhole ka selo. Ga bjale ke rapela Jehofa, yoo a rarollelago mathata a rena sa ruri. (Kutollo 21:3, 4) Ke thabela gore ga ke sa le lekgoba la medimo ya diswantšho, eupša go e na le moo ke hlankela Jehofa! Go yena ke hweditše polokego ya kgonthe le tšhireletšego.

“Ke be ke Dutše ke Nyaka Modimo go Tloga Bjaneng.”—SHINJI SATO

NGWAGA WA MATSWALO: 1951

NAGA: JAPANE

BOPHELO BJA PELE E EBA MOKRISTE: MORUTI WA BOSHINTO

BOPHELO BJA KA BJA NAKONG E FETILEGO: Ke goletše torotswaneng ya nagamagaeng kua Seleteng sa Fukuoka. Batswadi ba ka ba be ba rata bodumedi kudu; ba ile ba nkgodiša gore ke hlomphe medimo ya Mashinto go tloga bjaneng. Ge ke be ke sa le mošemanyana, ke be ke dula ke nagana ka phološo ya ka e bile ke ena le kganyogo e matla ya go thuša batho bao ba nago le mathata. Ke gopola ge ke be ke sa le sekolong sa tlasana morutiši a botšiša klase gore na re be re nyaka go ba eng ge re gola. Bao ke tsenago le bona ka klaseng ba be ba ena le dikholofelo tše tiilego, bjalo ka go ba rathutamahlale. Ke ile ka bolela gore toro ya ka e be e le go hlankela Modimo. Barutwana ka moka ba ile ba ntshega.

Ge ke fetša sekolong se se phagamego, ke ile ka ya sekolong sa barutiši ba bodumedi. Nakong ya tlwaetšo yeo, ke ile ka kopana le moruti wa Boshinto yo a bego a fetša nako ya gagwe ya ka thoko a bala puku e nago le letlakala le leso la ka ntle. Letšatšing le lengwe o ile a mpotšiša a re, “Sato, na puku ye o a e tseba?” Ke ile ka lemoga letlakala la ka ntle la puku yeo gomme ka araba ka re, “Ke Beibele.” O ile a re, “Yo mongwe le yo mongwe yo a nyakago go ba moruti wa Boshinto o swanetše go bala puku ye.”

Ke ile ka tšwa le semeetseng gomme ka ya go reka Beibele. Ke ile ka bea Beibele yeo moo e bonagalago kudu rakeng ya ka ya dipuku gomme ka e hlokomela kudu. Eupša ga se ka ka ka ipha nako ya go e bala, ka ge ke be ke dula ke swaregile ka baka la bophelo bja sekolong. Ge ke fetša sekolong seo, ke ile ka thoma go šoma lefelong la borapedi ke le moruti wa Boshinto. Toro ya ka ya bjaneng e be e phethagala.

 Lega go le bjalo, go se go ye kae ke ile ka lemoga gore go ba moruti wa Boshinto go be go se ka mokgwa woo ke bego ke nagana. Baruti ba bantši ba be ba sa rate batho ba bangwe e bile ba se na taba le bona. Ba bantši gape ba be ba hloka tumelo. Yo mongwe wa baruti ba bagolo go nna o ile a fihla bokgoleng bja go mpotša gore: “Ge e ba o nyaka go atlega mo, o swanetše go bolela feela ka ditaba tša filosofi. Go bolela ka tumelo ga go amogelwe.”

Dipolelo tše bjalo di ile tša dira gore Boshinto bo nnole moko. Gaešita le ge ke ile ka tšwela pele ke šoma lefelong la borapedi, ke ile ka thoma go nyakišiša madumedi a mangwe. Lega go le bjalo, ga go le bjo tee bja ona bjoo bo bego bo le kaone. Ge ke be ke hlahloba madumedi a oketšegilego, ke be ke nyama le go feta. Ke be ke bona go se na bodumedi bjo bo nago le therešo.

KAMOO BEIBELE E FETOTŠEGO BOPHELO BJA KA: Ka 1988, ke ile ka kopana le Mobuddha yo a ilego a nkgothaletša gore ke bale Beibele. Ke ile ka gopola moruti wa Boshinto yoo ke ilego ka kopana le yena nywageng e fetilego yo a ilego a nkgothaletša go dira se se swanago. Ke ile ka phetha ka gore ke diriše keletšo yeo. Ge ke thoma go bala Beibele, ke ile ka nwelela go yona kapejana. Ka dinako tše dingwe ke be ke bala bošego ka moka go fihlela ke bona mahlasedi a letšatši lefasetereng.

Seo ke bego ke se bala se ile sa ntšhušumeletša go nyaka go rapela Modimo wa Beibele. Ke ile ka thoma ka thapelo ya mohlala yeo e lego go Mateo 6:9-13. Ke be ke boeletša thapelo ye diiring tše dingwe le tše dingwe tše pedi—gaešita le ge ke be ke dira tirelo ya ka lefelong la borapedi la Shinto.

Ke be ke ena le dipotšišo tše dintši mabapi le seo ke bego ke se bala. Ka nako ye ke be ke šetše ke nyetše gomme ke tseba gore Dihlatse tša Jehofa di be di ruta batho ka Beibele ka gobane di be di kile tša etela mosadi wa ka. Ke ile ka tsomana le yo mongwe wa Dihlatse gomme ka mmotšiša dipotšišo tše dintši. Ke ile ka kgahlega kudu ge a be a diriša Beibele go araba dipotšišo tša ka ka moka. O ile a rulaganya gore Dihlatse di ithute Beibele le nna.

Kapejana ka morago ga moo, ke ile ka thoma go ya dibokeng tša Dihlatse tša Jehofa. Ka nako yeo ke be ke sa lemoge gore gare ga Dihlatse tšeo di bego di le gona go be go ena le ba bangwe bao ke ilego ka ba swara makgwakgwa nakong e fetilego. Lega go le bjalo, ba ile ba ntumediša ka borutho le go ntira gore ke ikwe ke amogelegile.

Dibokeng tšeo, ke ile ka ithuta gore Modimo o lebeletše gore banna ba nyetšego ba bontšhe ditho tša malapa a bona lerato le tlhompho. Pele ga moo, ke be ke lebišitše tlhokomelo ya ka e kgolo mošomong wa ka bjalo ka moruti moo ke bego ke hlokomologa mosadi wa ka le bana ba rena ba babedi. Ke ile ka lemoga gore ke be ke theetša seo se bego se bolelwa ke batho bao ba bego ba tlile go rapela lefelong la borapedi eupša ke sa ka ka theetša mosadi wa ka.

Ge thuto ya ka e tšwela pele, ke ila ka ithuta dilo tše dintši ka Jehofa tšeo di ilego tša mpatametša go yena. Ke ile ka kgongwa ka mo go kgethegilego ke ditemana tše bjalo ka ya Baroma 10:13, e rego: “Yo mongwe le yo mongwe yo a bitšago leina la Jehofa o tla phološwa.” Ke be ke dutše ke nyaka Modimo go tloga bjaneng, gomme mafelelong ke be ke mo hweditše!

Ke ile ka thoma go ikwa ke sa phuthologa ge ke le lefelong la borapedi. Mathomong, ke be ke ipotšiša gore batho ba be ba tla nagana eng ge nka tlogela bodumedi bja Shinto. Eupša ke be ke dula ke ipotša gore ke tla bo tlogela ge ke be nka hwetša Modimo wa therešo felo tsoko. Ka go re’alo ka seruthwane sa 1989, ke ile ka phetha ka gore ke latele letswalo la ka. Ke ile ka tloga lefelong la borapedi la Shinto gomme ka ipea ka diatleng tša Jehofa.

Go tloga moo lefelong la borapedi go be go se bonolo. Baruti bao ba bego ba mpheta ka bogolo ba ile ba nkomanya e bile ba leka go nkgapeletša gore ke dule. Lega go le bjalo, seo se bego se le thata kudu e be e le go botša batswadi ba ka. Ge ke be ke lebile ntlong ya bona, ke ile ka ikwa ke tlaletšwe  moo sefega sa ka se bego se baba e bile maoto aka a thothomela kudu! Ke ile ka ema gantši tseleng bakeng sa go rapela Jehofa gore a mphe matla.

Ge ke fihla ntlong ya batswadi ba ka, ke ile ka tšhaba go phula sekaku. Diiri di ile tša feta. Mafelelong, ge ke se na go rapela kudu, ke ile ka hlalosetša tate dilo ka moka. Ke ile ka mmotša gore ke be ke hweditše Modimo wa therešo le gore ke be ke tlogela bodumedi bja Shinto e le gore ke Mo hlankele. Tate o ile a tlabega a ba a nyama. Ba bangwe ba leloko ba ile ba tla gae gomme ba leka go ntira gore ke fetoše monagano wa ka. Ke be ke sa nyake go kweša ba lapa lešo bohloko, eupša ka nako e swanago, ke be ke tseba gore go hlankela Jehofa e be e le selo se se nepagetšego. Ge nako e dutše e eya, lapa lešo le ile la ntlhompha ka baka la phetho ya ka.

Go se sa ya lefelong leo la borapedi e be e se bothata gakaalo; go se sa nagana ka lona e be e le bothata bjo bogolo. Bophelo bja boruti bo be bo tsemile medu ka go nna. Ke ile ka leka ka thata go bo lebala, eupša go be go bonagala go ena le dilo tše dintši tšeo di bego di nkgopotša bophelo bja ka bja nakong e fetilego.

Go na le dilo tše pedi tšeo di ilego tša nthuša go kgaogana le ditutuetšo tše. Sa pele, ke ile ka tsoma ka kelohloko selo se sengwe le se sengwe ka ntlong ya ka seo se bego se tswalana le bodumedi bja nakong e fetilego. Ke moka ke ile ka di tšhuma ka moka—dipuku, diswantšho gotee le dikgopotšo tše di bitšago kudu. Sa bobedi, ke ile ka diriša dibaka tše dintši tšeo di bego di tšwelela go itlwaelanya le Dihlatse. Ke ile ka thušwa kudu ke bogwera bja tšona le thekgo ya tšona. Ke ile ka lebala ditsela tša ka tša nakong e fetilego ganyenyane-ganyenyane.

KAMOO KE ILEGO KA HOLEGA KA GONA: Ke be ke ehlwa ke hlokomologa mosadi wa ka le bana, e lego seo se bego se dira gore ba lewe ke bodutu kudu. Eupša ge ke be ke thoma go fetša nako ke ena le bona, ka ge Beibele e ruta banna ba nyetšego, re ile ra batamelana kudu. Ge nako e dutše e eya, mosadi wa ka o ile a ntlatša go hlankeleng Jehofa. Ga bjale re batee bodumeding bja therešo gotee le morwa wa rena, morwedi le monna wa gagwe.

Ge ke nagana morago ka toro ya ka ya bjaneng ya go hlankela Modimo le go thuša batho ba bangwe, ke lemoga gore ke hweditše sohle seo ke bego ke se nyaka—le tše dingwe. Ga ke tsebe gore nka leboga Jehofa ka re’ng.

“Ke be ke Tseba Gore go na le Seo se Hlaelelago Bophelong bja ka.”—LYNETTE HOUGHTING

NGWAGA WA MATSWALO: 1958

NAGA: AFRIKA BORWA

BOPHELO BJA PELE E EBA MOKRISTE: GO IKWA A LAHLILWE

BOPHELO BJA KA BJA NAKONG E FETILEGO: Ke belegetšwe Germiston, toropong ya moepo ya batho ba magareng yeo e se nago le bosenyi gakaalo. Batswadi ba ka ba ile ba phetha ka gore ba mphe batswadi ba bangwe ka ge ba be ba bona gore ba ka se kgone go ntlhokomela. Ge ke ena le matšatši a 14 feela, ke ile ka tšewa ke banyalani ba lerato bao ke ilego ka ba tšea e le tate le mma ba ilego ba nkgodiša. Lega go le bjalo, ka morago ga go  tseba mo ke tšwago gona, ke ile ka thoma go ikwa ke lahlilwe. Ke ile ka thoma go ikwa ke se sa le ngwana wa batswadi bao ba nkgodišitšego le gore ba be sa nape ba nkwešiša.

Ge ke be ke ena le nywaga e ka bago e 16, ke ile ka thoma go ya dipareng tšeo go tšona go rekišwago metswako ya bjala, moo nna le bagwera ba ka re bego re bina le go theetša diopedi. Ge ke ena le nywaga e 17, ke ile ka thoma go kgoga motšoko. Ke be ke nyaka go ba yo mosesane go swana le bommasebotsana bao ke bego ke ba bona dipapatšong tša motšoko. Ge ke eba le nywaga e 19, ke ile ka thoma go šoma Johannesburg, moo ke ilego ka tlwaelana le batho ba babe kapejana. Go se go ye kae ke ge ke rogana, ke kgoga kudu e bile ke enwa kudu mafelobekeng.

Lega go le bjalo, ke be ke tloga ke ena le matšato. Ke be ke dula ke dira boithobollo bja di-aerobic le go bapala papadi ya squash le kgwele ya maoto ya basadi. Ke be ke bile ke šoma ka thata, ke itirela leina intasetering ya dikhomphutha. Ka baka leo, ke ile ka ema gabotse ditšheleteng gomme batho ba bantši ba ntebelela ke atlegile. Lega go le bjalo, ge e le gabotse ke be ke se ka thaba—ke ikwa ke lahlegile e bile ke nyamile. Ke be ke ikwa go ena le se se hlaelelago bophelong bja ka.

KAMOO BEIBELE E FETOTŠEGO BOPHELO BJA KA: Ge ke be ke thoma go ithuta Beibele, ke ile ka ithuta gore Jehofa ke Modimo yo lerato. Ke ile ka ba ka ithuta gore o bontšhitše lerato leo ka go re fa Lentšu la gagwe, Beibele. Go bjalo ka ge eka o re ngwaletše lengwalo leo le hlahlago dikgato tša rena. (Jesaya 48:17, 18) Ke lemogile gore ge e ba ke be ke nyaka go holwa ke tlhahlo e lerato ya Jehofa, ke be ke swanetše go dira diphetogo tše dikgolo bophelong bja ka.

Phetogo e nngwe yeo ke bego ke swanetše go e dira e be e le ya bagwera. Ke ile ka tutuetšwa ke mantšu a Diema 13:20, a rego: “Yo a sepelago le ba bohlale o tla hlalefa, eupša yo a gweranago le ditlaela o tla tshereana.” Molao woo wa motheo o ile wa ntutueletša go tlogela bagwera ba ka ba nakong e fetilego le gore ke nyake bagwera ba bafsa gare ga Dihlatse tša Jehofa.

Tlhohlo ya ka e kgolo e be e le go kgaotša go kgoga; temalelo ya ka e be e le matla. Ge ke dutše ke fenya tlhohlo ye ganyenyane-ganyenyane, ke ile ka lebeletšana le tlhohlo e nngwe. Go kgaotša go kgoga go ile gwa oketša boima bja ka bja mmele ka dikhilograma tša ka godimo ga tše 13! Seo se ile sa fetoša tsela yeo ke bego ke itebelela ka yona, le gona go fokotša boima bjoo go ntšere nywaga e nyakilego go ba e lesome. Lega go le bjalo, ke be ke tseba gore go kgaotša go kgoga go be go nepagetše. Ke ile ka tšwela pele ke rapela Jehofa gomme a mpha matla a go atlega.

KAMOO KE ILEGO KA HOLEGA KA GONA: Ga bjale ke phetše gabotse. E bile ke kgotsofetše—ga ke sa kitimiša lethabo le sa kgonthišetšwago leo le ka hwetšwago mošomong wa boiphedišo, go beng le maemo gotee le lehumong. Go e na le moo, ke thabišwa ke go botša ba bangwe ditherešo tša Beibele. Ka baka leo, ba bararo bao ke bego ke šoma le bona ga bjale ba hlankela Jehofa gotee le nna le monna wa ka. Pele ga ge batswadi ba ka bao ba nkgodišitšego ba ka hwa, ke ile ka kgona go ba botša ka kholofetšo ya Beibele ya go tsošetšwa lefaseng la paradeise.

Go batamela kgauswi le Jehofa go nthušitše go lebeletšana le go ikwa ke lahlilwe. O dirile gore ke ikwe ke amogelega ka go ntira karolo ya lapa la lefase ka bophara la badumedigotee. Gare ga bona, ke na le bomma le botate ba bantši gotee le dikgaetšedi le bana bešo.—Mareka 10:29, 30.

[Seswantšho go letlakala 12]

Gare ga Dihlatse tša Jehofa, ke ile ka bontšhwa lerato la Bokriste

[Seswantšho go letlakala 13]

Lefelo la borapedi la Shinto le nkilego ka rapela go lona