Baibuli Neehindura Emitwarize Y’abantu

Ahabw’enki omukazi w’emyaka nka 60 yaarugire aha kuramya ebishushani? Ni ekyahigire omwebembezi wa Shinto kurekura omurimo gwo akahinduka Omukristaayo? Omukazi owaayoroirwe abatari bazaire be akabaasa kwemera ata okwereeba nk’otsigirweho? Yetegyereze ebi abantu aba barikugamba.

“Tikiri Muhuuku w’Ebishushani.”—ABA DANSOU

OMWAKA OBU NAAZAARWA: 1938

EIHANGA ERI NAAZAARIIRWEMU: BENIN

EBY’ENYIMA: ORIKURAMYA EBISHUSHANI

EBI NAARABIREMU: Nkakurira omu kyaro kya So-Tchahoué, ekiri haihi n’enyanja. Abantu nibajuba eby’enyanja, n’abatungi b’embuzi, ente, empunu, n’ebindi binyonyi. Ekicweka ekyo tikiine nguuto, n’ahabw’ekyo abantu nibakoresa obwato kuza omu myanya endiijo. Baingi nibombeka amaju g’ebiti n’obunyaatsi, n’obu bamwe baraabe baine ag’amatafaari. Abatuuzi b’ekicweka ekyo n’abooro munonga. N’obu kiraabe kiri kityo, tihariyo bahenzi b’ebiragiro nk’ab’omu ndembo.

Obu naabaire ndi muto, nyowe na mukuru wangye tata akatwohereza kutuura omu barikuramya ebishushani, reero naitwe twatandika kubiramya. Ku naakuzire, nkatandika kuramya Dudua (Oduduwa) owa Yoruba nka ruhanga wangye. Nkamwombekyera akafuuha reero naaguma niimuhongyera ebitekyere, buto, ebinyantinda, enkoko, enkombe, n’ezindi nyamaishwa nyingi. Ebitambo ebi bikaba nibigura esente nyingi, haihi birikuhezaho entaatsya yangye yoona.

OKU BAIBULI YAAHINDWIRE EMITWARIZE YANGYE: Ku naatandikire kwega Baibuli nketegyereza ngu Yehova niwe Ruhanga ow’amazima. Kandi nkeega ngu tarikwenda ngu tukorese ebishushani omu kuramya. (Okuruga 20:4, 5; 1 Abakorinso 10:14) Nketegyereza ngu haine eki nyine kukora. N’ahabw’ekyo nkacwekyereza ebishushani byona kandi naiha omu nju yangye ekintu kyona ekiine akakwate n’okuramya ebishushani. Nkarekyera aho kwehanuuza aha barangi n’okwejumba omu migyenzo y’ekikaafiire n’ey’enfu.

Nyowe omukazi w’emyaka nka 60, tikiraanyorobeire kukora empinduka ezo. Banywani bangye, n’abataahi baakampakanisa kandi baanshungisa. Kwonka nkaba nshaba Yehova kumpa amaani g’okukora ekihikire. Ebigambo ebiri omu Enfumu 18:10, bikampuumuriza ebirikugira biti: “Eiziina rya [Yehova] n’omunaara gugumire, ohikiriire ku aguhungiramu, aguma ari buhooro.”

Ekindi ekyampweraire n’okuza omu nteerane z’Abajurizi ba Yehova. Bakooreka ngu baanyiniire rukundo y’Ekikristaayo, kandi nkashemererwa kureeba bantu nibagyendera aha mitindo ya Baibuli ey’emicwe. Ebi naareebire bikampamiza ngu Abajurizi ba Yehova niyo ediini ey’amazima.

OKU NGASIIRWE: Okuta omu nkora emisingye ya Baibuli kimpwereire kwongyera kugira enkoragana nungi n’abaana bangye. Kandi tinkiine mugugu guremeire. Nkaba ninkira kushiishagura ebintu byangye ndikubiha ebishushani ebitaine magara kandi tikirangasire na kakye. Hati nimpereza Yehova, orikuza kumariraho kimwe oburemeezi obu turikurabamu. (Okushuuruurwa 21:3, 4) Ka nikinshemeza munonga kureeba ngu tinkiri muhuuku w’ebishushani, hati ndi omuhuuku wa Yehova! Mbaasize kutunga oburuhuuko n’oburinzi ebyabuzima omuriwe.

“Nkatandika kusherura Ruhanga nkiri muto.”—SHINJI SATO

OMWAKA OBU NAAZAARWA: 1951

EIHANGA ERI NAAZAARIIRWEMU: JAPAN

EBY’ENYIMA: OMWEBEMBEZI W’EDIINI YA SHINTO

EBI NAARABIREMU: Nkakurira omu tauni ya Fukuoka Prefecture. Abazaire bangye bakaba bari abanyadiini munonga, kandi bakanyorora kuruga omu buto kuramya baaruhanga ba Shinto. Obu naabaire nkiri omwojo muto, nkateekateeka aha kujunwa kwangye kandi nkaba niinyendera kimwe kuhwera abantu abaine oburemeezi. Ninyijuka obu naabaire ninshoma omushomesa akatubuuza eki turikwenda kukora twakura. Abeegi abandi bakaba baine amatsiko g’okuba abanyasaayansi. Nyowe nkagira ngu ekirooto kyangye n’eky’okuheereza Ruhanga. Buri omwe akanshekyerera.

Ku naaherize emishomo yangye, nkeeyongyerayo naaza kwega eby’ediini. Omu kutendekwa okwo, nkabona omwebembezi wa Shinto owaabaire naakira kuba naashoma ekitabo kirikwiragura. Izooba rimwe akabuuza ati: “Sato, ekitabo eki nookimanya?” Nkashoma aha mutwe gw’ekitabo ekyo, naamugira nti, “Baibuli.” Yaagarukamu ati: “Buri omwe orikwenda kuba omwebembezi wa Shinto aine kushoma ekitabo eki.”

Ahonaaho nkagyenda naagura Baibuli, reero naagibiika omu mwanya murungi ahu ndikubaasa kuguma ningireeba. Kwonka ntindatugire bwire bw’okugishoma ahabw’okugira bingi by’okukora aha ishomero. Ku naaherize emishomo yangye, nkatandika kuheereza aha ndaaro nk’omwe aha beebembezi ba Shinto. Ekirooto kyangye ky’omu buto kikahikiirira.

Kwonka, nketegyereza ngu eki naabaire ninteekateeka tikwo kyabaire kiri. Abeebembezi ba Shinto baingi bakaba batarikweta aha by’abandi. Kandi baingi bakaba bataine kwikiriza. Nangwa omwe aha bu naabaire ninkora nabo akahika n’aha kugira ati: “Ku oraabe nooyenda kuba omusinguzi aha, oine kugamba aha bwengye bw’ebigunjano. Okugamba aha kwikiriza tikirikwikirizibwa.”

Emigambire nk’egyo ekandeetera kutamwa ediini ya Shinto. N’obu ndaabe naagumiizemu ninkora omu mwanya ogwo, nkatandika kuteeraho kumanya ebirikukwata aha diini ezindi. Kwonka, hakaba hatariyo karungi koona. Okucondooza aha diini ezo kikongyera kumaramu amaani. Okaba nooshusha oti tihariho diini ehikire.

OKU BAIBULI YAAHINDWIRE EMITWARIZE YANGYE: Omu 1988, nkabona ow’ediini ya Buddha yaampiga kushoma Baibuli. Nkaijuka ngu omwebembezi w’ediini ya Shinto emyaka mikye enyima akampiga kukora ekintu nikyo kimwe. Nkacwamu kukuratira obuhabuzi obwo. Ku naatandikire kushoma Baibuli, nkagikunda munonga. Obumwe nkaba ngishoma ekiro kyona kuhika omu kasheeshe.

Ebi naashomire bikampiga kwenda kushaba Ruhanga orikugambwaho omu Baibuli. Nkatandika n’okushaba kwa Yesu okw’eky’okureeberaho okuri omu Matayo 6:9-13. Nkaguma ningarukangarukamu okushaba okwo, nangwa n’obu naabaire nimpereza aha ndaaro ya Shinto.

Nkaba nyine ebibuuzo bingi aha bikwatiraine n’ebi naabaire ninshoma. Omu bwire obwo nkaba naaherize kushwera, kandi nkaba niimanya ngu Abajurizi ba Yehova nibeegyesa abantu Baibuli ahakuba bakaba baataayaayiireho omukazi wangye. N’ahabw’ekyo nkabuuza omwe aharibo ebibuuzo bingi. Kikaanshemeza ku yaakoreise Baibuli kugarukamu buri kibuuzo. Akakora entebeekanisa y’okugira ondiijo owaija kunyegyesa Baibuli.

Bwanyima y’akaire, nkatandika kuza omu nteerane z’Abajurizi ba Yehova. Tindabandize kukimanya, kwonka omu nteerane zaabo hakaba harimu abu naabaire naajumireho. Kwonka nabwo, baakanyakiira gye kandi baandamutsya.

Omu nteerane ezo, nkeega ngu Ruhanga naayenda ngu abashaija bakunde ab’eka zaabo, kandi babahe ekitiinisa. Omu bwire obwo, nkaba ninyebembeza munonga omurimo gwangye ogw’obunyamurwa ekyandeeteire kwehuzya omukazi wangye, n’abaana bangye babiri. Nkatandika kwetegyereza ngu nkaba ninta omutima aha abantu bi abaabaire nibaija aha iramizo barikugamba okukira eby’omukazi wangye.

Ku naagumiizemu n’okwega kwangye, nkamanya bingi ebirikukwata ahari Yehova kyandeetera kumwirira haihi. Okukira munonga nkakunda munonga Ebyahandiikirwe nka Abarooma 10:13, ekirikugira kiti: ‘Ahabw’okuba omuntu weena oritakira eiziina rya [Yehova] naija kujunwa.’ Kuruga omu buto nkaba ntwire ninsherura Ruhanga, kwonka hati nkamubona!

Nkatandika kwereeba nk’oine kugumizamu ninkora aha ndaaro. Omu kubanza, nkaba nyerarikirira eki abandi barikwija kuteekateeka naaruga omu diini ya Shinto. Kwonka butoosha nkaba ninyehamiza ngu ninyija kugyenda naabona Ruhanga ow’amazima. N’ahabw’ekyo omwaka 1989 gurikutandika, nkacwamu kukorera aha muntu wangye w’omunda. Nkarekyera aho kukora aha ndaaro naayeta omu mikono ya Yehova.

Okurekura omurimo ogwo kikaba kitoorobi. Abarikunkiza ebitiinisa baakampana kandi bateeraho kundemesa kugyenda. Kandi kikangumira kugambira abazaire bangye amakuru ago. Obu naabaire ninza kubagambira, nkerarikirira munonga naashaasha ekifuba n’amaguru gaajogonyoka! Nkemerera emirundi mingi omu muhanda kushaba Yehova kumpa amaani.

Ku naahikire ow’abazaire bangye, nkatiina munonga kugamba nabo aha nshonga egyo. Hakahinguraho obwire. Aha muheru, bwanyima y’okushaba munonga, nkagambira tata buri kimwe. Nkamugira ngu mboine Ruhanga ow’amazima kandi ndiyo ninduga omu diini ya Shinto kubaasa kuheereza Ruhanga ogwo. Tata kikamurenga kandi yaaguubwa kubi. Abanyabuzaare abandi bakaija omu ka baateeraho kuhindura ebiteekateeko byangye. Nkaba ntarikwenda kugwisa kubi ab’eka yangye, kwonka nabwo nkaba niimanya ngu okuheereza Yehova nikyo kintu kihikire eki nyine kukora. Bwanyima, ab’eka yangye bakarugaho, baikirizana naanye.

N’obu ndaabe naabaire nyine kurekyera aho kukora aha ndaaro, nabwo nkaba nyine kuhindura emiteekateekyere yangye. Ediini egyo ekaba entaahiire kimwe omu biteekateeko. Nkateeraho kwehuzya enshonga ezo, kwonka hoona ahu naabaire ninza bakaba banyijutsya embeera yangye ey’okubanza.

Ebintu bibi bikampwera kusingura okugyezibwa okwo. Eky’okubanza, nkacwekyereza ekintu kyona ekiine akakwate n’ediini ei naarugiremu. Naayotsya ebitabo byona, ebishushani, n’ebindi bintu by’obuguzi bwingi. Ekya kabiri, nkasherura oburyo gw’okuguma ninkwatanisa n’Abajurizi ba Yehova. Obunywani bwabo n’obushagiki bikampwera munonga. Mporampora, embeera yangye y’okubanza ekanduga omu mutwe.

OKU NGASIIRWE: Okuguma niintsigaho omukazi wangye n’abaana, kikabareetera kugira eihamba. Kwonka ku naatandikire kumara n’abo obwire, nk’oku Baibuli erikwegyesa abashaija kutwaza, nkongyera kugira omukago murungi nabo. Bwanyima, omukazi wangye akanyegaitaho omu kuheereza Yehova. Twembi na mutabani waitu, na muhara waitu otwariiremu na iba, hati turi omu kuramya okw’amazima.

Ku ndikureeba enyima aha kirooto kyangye ky’okuheereza Ruhanga n’okuhwera abandi, nindeeba ngu ntungire buri kimwe eki naabaire ninsherura nangwa n’okukiraho.

“Nketegyereza ngu haine ekyabaire nikimburaho.”—LYNETTE HOUGHTING

OMWAKA OBU NAAZAARWA: 1958

EIHANGA ERI NAAZAARIIRWEMU: SOUTH AFRICA

EBY’ENYIMA: OKWEHURIRA NDI NYENKA

EBI NAARABIREMU: Nkazaarirwa Germiston, omu tauni y’ebirombe kwonka erimu baingi abarikuhenda ebiragiro. Ahabw’okugira ngu abazaire bangye batarikubaasa kundeeberera bacwamu kumpayo kwororwa abandi. Bwanyima y’ebiro 14, omushaija n’omukazi bakantwara kunyorora naaba omwana waabo. Kwonka nabwo, bwanyima y’okumanya embeera ei naarabiremu, nkehurira nk’otsigirweho. Nkatandika kureeba ngu aba ti bazaire bangye benyini kandi buzima bakaba batarikunyetegyereza gye.

Ku naahikize emyaka nka 16, nkatandika kuza omu myanya y’okweshemerezamu n’okuzina nyowe na banywani bangye. Aha myaka 17, nkatandika kureetsa etsigara. Nkaba niinyenda kuba mukye nk’abandi abaabaire nibakoresibwa omu birango by’okureetsa. Ku naahikize emyaka 19, nkatandika kukorera Johannesburg, ahu naatandikire kukwatanisa n’ekigombe ky’emicwe mibi. Juba nkatandika kukoresa orurimi rubi, kureetsa n’okunywa munonga amaarwa aha wiikenda.

Kwonka nabwo, nkaguma ngomokire. Nkaba ninkira kwejumba omu kuzaana omupiira gw’abakazi n’emizaano endiijo. Kandi nkaba ninkora munonga aha murimo kubaasa kurangaanwa omu ikorero rya kompyuta. N’ekyarugiremu, nkaba gye omu by’entaatsya kandi abantu bakaba nibandeeba nk’omusinguzi. Kwonka amazima agari ngu, nkaba ntashemereirwe kandi mpabire. Omunda omu mutima, nkaba niimanya ngu haine ekirikuburaho.

OKU BAIBULI YAAHINDWIRE EMITWARIZE YANGYE: Ku naatandikire kwega Baibuli, nketegyereza ngu Yehova ni Ruhanga wa rukundo. Kandi nkeega ngu naatworeka rukundo ye kurabira omu Kigambo kye, Baibuli. Ni nk’ebaruha ei yaatuhandiikiire kushoronzya ebigyere byaitu. (Isaaya 48:17, 18) Nketegyereza ngu naaba niinyenda kugasirwa omu buhabuzi bwa Yehova, haine empinduka ezi nyine kukora.

Nkaba nyine kuhindura banywani bangye. Nkateekateeka munonga aha biri omu Enfumu 13:20, ebirikugira ngu ‘orikugyenda n’abanyabwengye, nawe naahinduka omunyabwengye, kwonka mugyenzi w’abashema naija kukizira.’ Omusingye ogwo gukampiga kurekyera aho kukwatanisa n’emikago mibi ei naabaire nyine reero naatandika kugira emikago misya omu Bajurizi ba Yehova.

Kikaba kitoorobi kucwa omuze gw’okureetsa. Omu kusingura omuze ogwo, nkaba ntunga oburemeezi obundi. Okurekyera aho okureetsa kikandeetera kwongyeraho kiro 13.6! Ekyo kikammaramu amaani, kandi kikantwarira emyaka nka ikumi kutuubya kiro ezo. Kwonka, nkaba niimanya ngu okurekyera aho kureetsa nikyo mpikire kukora. Nkaguma ninshaba Yehova obutaruha, kandi yaampwera naasingura.

OKU NGASIRWE: Hati nyongyeire kugira amagara marungi. Kandi nimpurira nyine okumarwa ahabw’okurekyera aho kusherura omurimo gw’esente nyingi, okuba rurangaanwa n’eby’obugaiga kubaasa kutunga okushemererwa. Kureka, nintunga okushemererwa kurabira omu kubagana n’abandi amazima ga Baibuli. N’ekirugiremu, nyowe na ibanyi na bashatu ahari bagyenzi bangye nituheereza Yehova. Abazaire abaanyoroire batakafiire, nkabaasa kubagambira aha matsiko g’okuzooka n’okutuura omu nsi ehindwirwe paradiso.

Okwirira haihi Yehova kumpwereire kusingura okwehurira nk’otsigirweho. Ampweraire kwereeba nk’otari nyenka arikundeeta omu ka y’ab’eishe-emwe bagyenzi bangye. Eka egi, neetwariramu baamaawe, baatata, beene tata na banyaanyazi.—Mako 10:29, 30.

[Ekishushani]

Ntungire rukundo y’Ekikristaayo omu Bajurizi ba Yehova

[Ekishushani]

Ahu naabaire ninza kuramya Shinto