Baibolo ichinja moyo

KO MUNKUDZIWA vomwe vidachitikira mayi munango wa magole yoposha 60 kuti asiye kutumikira mafano? Ko ni chani chidachitisa wantsembe munango wa chishinto kuti asiye basa yake ya pakachisi yotumikira azibereki nkukhala Nkhrisitu? Komasoti, ko nchani chidachitisa m’mayi munango yemwe adalerewa na wanthu womwe ni azibereki wake lini kuti asiye kukhala na nkhawa yakuti azibereki omwe adamubala adandomutaya? Lewengani vomwe wanthu mwawa adanena.

“Nidasiya kutumikira mafano.”—ABA DANSOU

GOLE YOBADWA: 1938

DZIKO: BENIN

PAKUYAMBA: NIMBATUMIKIRA MAFANO

KALE YANGU: Nidakulira m’muyi unango m’mbali ya nyanza yochemerewa kuti So-Tchahoué. Wanthu wa m’muyi muyo achapha ntsomba komasoti achaweta ng’ombe, mbuzi, nkhumba, nkhuku, na nkhangaiwa. Kudera mweyi kulibe misewu, ndipo wanthu akada kuchita maulendo achaphatisa basa mabarko. Nyumba zizinji ni zokonzewa na matabwa komasoti udzu. Ni wanthu adikidiki womwe achamanga nyumba zawo na ntcherwa. Wanthu azinji mudera mweyi ni wosauka koma kuchachitikalini vaugananga panango umbava kawirikawiri ninge mwavichakhalira m’mathaundi.

Penenze mwana ababa wangu adanitumiza na nkulu wangu kumalo yomwe wanthu ambatumikirirako milungu ya azibereki komwe tidapfunzira kutumikira milungu mwaya. Panidakula nidayamba kutumikira mulungu wa chiyoraba dzina yake Dudua panango kuti Oduduwa. Nidamangira nyumba mulungu moyu ndipo kazinjikazinji nimbapereka ntsembe za zilazi, mafuta ya kanjedza, nkhono, nkhuku, nkhangaiwa na nyama zosiyanasiyana. Nimbadzonga kobiri kuti nigumane vinthu vimwevi ndipo nthawe zizinji nimbakhala nilibe kobiri.

MOMWE BAIBOLO IDACHINJIRA MOYO WANGU: Panidayamba kupfunzira Baibolo nidazindikira kuti Yahova ndiye Mulungu chaiye. Nidapfunzira pomwe kuti Yahova achazonda kutumikira mafano. (Ekisodo 20:4, 5; 1 Akorinto 10:14) Nidazindikira kuti nichadekana kuchinja ndipomwapa nidataya mafano yose ndipo nidachosa m’nyumba mwangu chilichose chobverana na kutumikira mafano. Komasoti nidasiya kuyenda kukawombeza, kuchita miyambo yachipembedzo komasoti miyambo yosiyanasiyana ya maliro.

Koma kuchita vimwevi sikuti kwenze kosashupa kwa mayi wa m’magole yoposha 60 ninge inepano. Anzangu, azibale wangu na wanthu womwe nimbakhala nawo pafupi alibe kukondwa na vimwevi ndipo ambaninyoza. Koma nidapemphera kwa Yahova kuti anithandize kuti nipitirize kuchita vabwino. Kuingizira mwapa, lemba ya Miyambo 18:10 idanilimbikisa ndawa ichati: ‘Dzina ya Yahova ni ntsanja yolimba. Wolungama achathawira mumo ndipo achatetezeka.’

Chinango soti chomwe chidanithandiza ni kuyenda kumisonkhano ya Mboni za Yahova. Kumuko adaniwonesa chikondi chomwe Akhrisitu chaiwo achadekana kukhala nacho ndipo nidachita chidwi maninge kuwona kuti wanthu mwawa achayesesa kutewedza mpfundo za m’Baibolo za makhalidwe yabwino. Vomwe nidawona kumuko vidanichitisa kukhulupirira kuti chipembedzo cha Mboni za Yahova chichapfunzisa chaivo.

PHINDU YANIDAGUMANA: Kutewedza mpfundo za m’Baibolo kwanithandiza kuti nimbabverane na wana wangu. Komasoti ninkuwona kuti chintolo cholemera chomwe nenze nidachisenza nachitula manje. Pakuyamba nimbadzonga kobiri zangu kuti nipereke ntsembe ku mafano yalibe moyo yomwe yenze yosathandiza olo pang’ono. Koma manjeuno ninkutumikira Yahova, Mulungu yemwe wakonza vakuti adzamalize mabvuto yose. (Chivumbulutso 21:3, 4) Komasoti ndine wokondwa maninge kuti manjeuno ndinelini pomwe kapolo wa mafano koma ninkutumikira Yahova. Kuchita vimwevi kwanichitisa kuti nikhale na tsogolo yabwino.

“Kuyambira nili mwana nimbafuna maninge kumudziwa Mulungu.”—SHINJI SATO

GOLE YOBADWA: 1951

DZIKO: JAPÃO

PAKUYAMBA: NENZE WANTSEMBE WA TCHETCHI YA SHINTO

KALE YANGU: Nidakulira muthaundi ing’ono muchigawo cha Fukuoka Prefecture. Kuyambira nili mwana, anganipfunzisa kuti nimbalemekeze milungu yachipembedzo chachishinto. Nili mulumbwana, nthawe zizinji ningaganizira maninge vomwe ningachite kuti nidzapulumuke komasoti ningafunisisa kuthandiza wanthu wobonera. Ninkukumbukira tili kushikola primária aticha wanthu adatibvunza vomwe tinkufuna kudzachita tikadzakula. Anzangu wose adanena kuti achada kudzaphata basa yapadzulu maninge kukhala mashasha ya sayantsi. Koma inepano nidadawira kuti nichada kudzatumikira Mulungu ndipo anzangu wose adaniseka.

Panidamaliza mapfunziro yaku primária, nidayamba kupfunzira basa yoti nimbadzapfunzise wanthu kukhala atsogoleri wavipembedzo. Panthawe mweyo nidagumana na wantsembe wachishinto yemwe ambayesesa kugumana nthawe nkumbalewenga bukhu inango ya chikuto chipsipa. Ntsiku inango wantsembe moyu adanibvunza kuti: “Ko Sato, bukhu iyi unkuidziwa?” Panidawona chikuto cha bukhu mweyo nidati: “Ninkuidziwa ni Baibolo.” Iye adaniuza kuti: “Aliyese yemwe achada kudzakhala wantsembe wachishinto achadikana kulewenga bukhu mweyi.”

Nthawe mwiyo nidayenda kokagula Baibolo. Nimbaisunga pamalo yabwino ndipo nimbayesesa kuisamalira. Koma nimbagunanalini nthawe yoilewenga ndawa yotangwanika na basa za kushikola. Panidamaliza shikola, nidayamba kuphata basa pakachisi ninge wantsembe wachishinto ndipo nimbawona kuti nakwanirisa maloto yangu.

Koma nthawe pang’ono nidadabwa kuwona kuti vinthu vomwe wantsembe wachishinto ambavichita nimbavidikhiralini. Wantsembe azinji enze alibe chikondi komasoti ambakhudziwalini na mabvuto ya wanthu. Iwo soti ambakhulupiriralini Baibolo. Wantsembe munango yemwe ambatinyang’anira adafika pakuniuza kuti: “Peno uchada kuti vinthu vikufambire bwino, umbayankhule vomwe akatswiri wa nzeru za wanthu achapfunzisa basi. Kuno tichadalini wanthu omwe achayankhula vinthu vauzimu.”

Mawu mwaya yadanikhumudwisa maninge ndipo yadanichitisa kuti niyambe kukayikira chipembedzo chachishinto. Podiya kuti nidapitiriza kuphata basa pamalo mwaya, nidayamba kufagafaga vipfunziso va vipembedzo vinango. Koma nilibe kugumana chipembedzo chomwe chingapfunzisa vinthu vophata moyo. Pa vipembedzo vose vanidafagafaga palibe chidanifika pamoyo. Pamwapo nidayamba kukumbuka kuti palibe chipembedzo chomwe chichapfunzisa chonadi.

MOMWE BAIBOLO IDACHINJIRA MOYO WANGU: Mu 1988, nidagumana na munthu wa chipembedzo chachibuda yemwe adanilimbikisa kuti nimbalewenge Baibolo. Nidakumbukira kuti mwevi ni vomwe wantsembe wachishinto ule adaniwuza magole yanganani kumbuyo, ndipomwapa nidaganiza votewedza malangizo mwaya. Nidayamba kulewenga Baibolo, ningadalini soti kuleka ndipo nthawi zinango ningalewenga usiku wose mpakana machibese.

Vomwe ningalewenga vidanichitisa kuyamba kupemphera kwa Mulungu yemwe achafotokozewa m’Baibolo. Nidayamba na pemphero ya Ambuya yomwe ichagumanika pa Mateyu 6:9-13. Ndipo nimbayibwerezera pakapita maola yawiri basi nimbachita mwevi pakuphata basa yangu ya untsembe pakachisi wachishinto.

Nenze na mibvunzo yazinji yokhudza vinthu vomwe ningalewenga m’Baibolo. Panthawe mwiyo n’kuti nalowola ndipo ningadziwa kuti wa Mboni za Yahova achapfunzisa wanthu Baibolo ndawa enze adabwerako kudzacheza na nkazi wangu. Pamwapo nidayamba kufagafaga wa Mboni ndipo nidagumana na mayi yemwe nidamubvunza mibvunzo yazinji nidasalenda panidaona kuti ankuphatisa basa Baibolo kudawira m’bvunzo uliwose. Iye adakonza vakuti wa Mboni ambapfunzire nane Baibolo.

Pa kanthawe kang’ono nidayamba kugumanika pa misonkhano ya Mboni za Yahova. Pakuyamba nimbazindikiralini kuti Wamboni anango womwe nidagumana nawo kumuko enze wakuti nidawachitirako kale voipa kalekale. Koma iwo adanipasa moni mokondwa ndipo ambawonesa kuti anitambira na manja yawiri.

Ku misonkhano nidapfunzira kuti Mulungu achada kuti amuna ambakonde akazi wawo komasoti ambasamalire mabanja yawo. Nikanati kupfunzira vimwevi, nimbamala nthawe itali ninkuphata basa yangu ya untsembe ndipo nimbachezalini bwinobwino na nkazi wangu komasoti wana wathu. Nidazindikira kuti nimbabvesera mwatcheru wanthu akabwera kukachisi kudzaniwuza mabvuto yawo koma nkazi na wana wangu akambaniyankhula nimbawabveseralini.

Kupfunzira Baibolo kudanithandiza kudziwa vizinji va Yahova ndipo vimwevi vidanithandiza kuti nikhale naye paushamwali. Lemba ya Aroma 10: 13 idanifika pamoyo, yomwe ichati: ‘Aliyese yemwe adzachemere pa dzina ya Yahova adzapulumuke.’ Kuyambira nili mwana, nimbafuna maninge kudziwa Mulungu chaiye ndipo pa nthawe mweyi nidawona kuti namugumana.

Nidayamba kuwona kuti ndinelini wodekana kupitiriza kumbaphata basa pakachisi wa chishinto. Koma pakuyamba nimbakhala na nkhawa kuti wanthu anango aganize chani nikaleka chipembedzo chimwechi. Nthawe zose nimbadziwuza kuti nikadzandogumana Mulungu chaiye nidzalekeretu chipembedzo cha chishinto. Ndipomwapa, mu 1989 nidaleka chipembedzo chimwechi nkuyamba kutumikira Yahova.

Koma kuleka chipembedzo changu kwenze koshupa maninge. Wantsembe yemwe ambatinyang’anira adakalipa nane maninge ndipo ambanichichimiza kuti ayi kuti nichoke. Koma nimbakhalapomwe na nkhawa maninge kuti niwafotokozere tani azibereke wangu va nkhani mweyi. Ntsiku yomwe nidayenda kumuyi kwa azibereki wangu kuti nikawauze va nkhani mweyi nenze na nkhawa maninge mwakuti pantima pangu pambawawa ndipo minyendo yangu yambandonjenjemera. Nilimunjira nidaimirira kazinji kose nkumbapemphera kwa Yahova kuti anipase mphanvu.

Panidafika kumuyi kwa azibereki wangu, nenze na mantha maninge kuti niyambe kucheza nawo nkhani mweyi ndipo padapita nthawe nikanati kuifotokoza. Patsogolo pake nidapemphera maninge, ndipo nidawafotokozera ababa vomwe nabwerera. Nidawauza kuti nagumana Mulungu chaiye ndipo ninkufuna kusiya tchetchi ya chishinto kuti niyambe kumutumikira. Ababa wangu alibe kukhulupirira vimwevi ndipo adakalipa maninge. Kudabwera pomwe azibale wathu anango ndipo iwo adayesa kunichichimiza kuti nichinje maganizo yangu. Nimbafunalini kuwakalipisa azibale wangu koma nimbadziwa pomwe kuti nichadekana kutumikira Yahova basi. Nthawe pang’ono patsogolo pake iwo adayamba kunilemekeza ndawa ya vomwe nidasalula.

Podia kuti nenze nidasiya tchetchi ya chishinto, ningadekana soti kuchinja maganizo yangu na momwe ningawonera vinthu. Nenze nidazolowera maninge moyo wa untsembe. Ningayesesa kuti niuyebwe koma chilichose chomwe ningachita chimbandonikumbusa vomwe ningachita penenze wantsembe.

Koma panavinthu viwiri vomwe vichanithandiza kuti niyebwe moyo wangu wa kalekale. Choyamba, nidafagafaga bwinobwino m’nyumba mwangu kuti niwone peno munachinthu chobverana na tchetchi yangu ya kalekale. Nidagumana mabukhu mafoto komasoti vinthu vinango ndipo vose vimwevi nidavishoka podiya kuti venze vodula. Chachiwiri, nidayesesa kugumana nthawe yocheza na Mboni za Yahova ndipo vimwevi vidanithandiza maninge. Pang’ono pang’ono nidayamba kuyebwa va tchetchi yangu ya kalekale.

PHINDU YANAGUMANA: Pakuyamba nimbagumanalini nthawe yocheza na nkazi wangu pabodzi na wana wathu ndipo vimwevi vimbanichitisa kuti nimbakhale wosakondwa. Koma panidayamba kutewedza malangizo ya m’Baibolo yakuti amuna ambagumane nthawe yocheza na akazi wawo pabodzi na wana wawo tidayamba kubverana maninge. Paidapita nthawe nkazi wangumbo naye adayamba kutumikira Yahova. Manjeuno inepano na nkazi wangu, mwana wathu mwamuna komasoti mwana wathu nkazi na mwamuna wake, tose tinkutumikira Mulungu.

Penenze mwana nimbafunisisa kuti nikadzakula nimbadzatumikire Mulungu na kuthandiza wanthu. Manjeuno ninkuwona kuti nakwanirisadi chakulinga changu mwechi ndipo nakwanisapomwe kuchita vinthu vinango vomwe nenze nikanati kuviganizirako. Ninkutembeja maninge Yahova ndawa ya vomwe wanichitira.

“Nimbadziwa kuti panachinthu chinango chomwe chimbasowa pa moyo wangu.”—LYNETTE HOUGHTING

GOLE YOBADWA: 1958

DZIKO: ÁFRICA DO SUL

PAKUYAMBA: NIMBAWONA KUTI AZIBEREKI WANGU ADANITAYA

KALE YANGU: Nidabadwira mu thaundi ya Germiston. Wanthu azinji mu thaundi mweyi sikuti ni wosauka maninge ndipo achaphata basa m’migodi. Komasoti mu thaundi mweyi muchachitikalini maninge vaumbava na vaugananga. Panidabadwa, azibereki wangu adawona kuti angakwaniselini kunilera ndipo mwapa adaganiza kuti akanipereke kwa wanthu womwe achada kunitenga nkumbanilera ninge mwana wawo. Nenze na masondo yawiri basi, banja inango idanitenga. Wanthu mwawa enze na chikondi maninge ndipo nimbawawona kuti ni azibereki wangu chaiwoiwo. Koma panidazindikira kuti wanthu mwawa enzelini azibereki wangu chaiwo nidayamba kudzibvera ntsisi pakuganiza kuti azibereki wangu adanitaya. Azibereki womwe adanilera wale nidaleka kuwawona ninge azibereki wangu chaiwo komasoti nimbawona kuti ankunibvesalini.

Penenze na magole 16 nidayamba kumbayenda kumalo yomwera mowa na azinzangu komwe timbakavina na kunyang’anira wanthu ankuimba. Gole ya patsogole pake nidayamba kupepa na cholinga chakuti nichepeseko thupi mpakana nilingane na wanthu wobvekera womwe ambawonesa akambatsatsa fodya. Patsogolo pake nidayamba kuphata basa mu thaundi ya Johannesburg ku Africa do Sul ndipo nidayamba kucheza na wanthu wa makhalidwe yoipa. Pamwapo ndishi ninamagole 19. Ndipo nthawe idikidiki patsogolo pake nidayambiratu kutukwana, kupepa, komasoti kumwa mowa mwauchidakwa.

Podiya venze teno, nimbawona kuti nenze munthu wathanzi, nimbakonda kuchita masenzeka yolimbisa thupi, bola ya minyendo yotchaiwa na azimayi komasoti masenzeka yanango. Ningalimbikira soti maninge pa basa yangu ya ma komputador ndipo nidabvekera maninge ndawa ya basa mweyi. Vimwevi vidachitisa kuti nimbagumane kobiri zizinji ndipo wanthu ambawona kuti vinthu vinkunifambira bwino. Koma kulewa chaivo venze vakuti nenze munthu wosakondwa ndipo nimbawona kuti chinthu chinango chinkusowa pa moyo wangu.

MOMWE BAIBOLO IDACHINJIRA MOYO WANGU: Panidayamba kupfunzira Baibolo, nidazindikira kuti Yahova ni Mulungu wachikondi. Nidapfunzira soti kuti adaniwonesa chikondi chimwichi pakutipasa mawu yake Baibolo. Baibolo ili ninge kalata ya malangizo yomwe iye watinembera na chakulinga chakuti ambatitsogolere pa moyo wathu. (Yesaya 48:17, 18) Ndipo mwapa nidazindikira kuti peno nichada kuti Yahova ambanitsogolere, ningadekana kusiya makhalidwe yose yoipa.

Chinthu chomwe nimbafunikira kuchinja, ni wanthu womwe ningacheza nawo. Mawu ya pa Miyambo 13:20 yadanikhudza maninge. Yomwe yachati: ‘Munthu wofamba na wanthu wanzeru adzakhale wa nzeru, koma wochita vinthu na wanthu wopusa adzagumane mabvuto.’ Mpfundo mweyi idanichitisa kuti nileke kucheza na wanthu womwe ningacheza nawo pakuyamba, nkuyamba kucheza na wanthu wa Mboni za Yahova.

Koma bvuto ikulu yenze kuleka kupepa, ndawa khalidwe mweyi nenze nidaizolowera maninge. Koma nidayesesa mpakana nidakwanisadi koma nidagumana soti na bvuto inango. Bvuto yake yenze yakuti panidaleka kupepa nidanenepa maninge. Vimwevi vinganichitisa manyazi maninge ndipo vidanitengera magole 10 kuti nichepe thupi kufika pomwe ningafuna. Koma ningawona kuti ningadekana kuleka kupepa fodya basi. Nidapemphera kwa Yahova kazinji kose kuti anithandize.

PHINDU YOMWE NAGUMANA: Manje uno ninathanzi yabwino kuposha kalekale. Komasoti ndine wokondwa ndawa nishupikalini soti kuchita vinthu vizinji kuti nigumane Chimwemwe chomwe wanthu achaganiza kuti chichagumanika ukakhala pa basa yabwino, udindo komasoti chuma. Ndawa yowuza anango chowonadi chogumanika m’Baibolo ninkukhala wokondwa. Vimwevi vachitisa kuti wanthu atatu womwe ningaphata nawo basa komasoti mwamuna wangu ayambe kutumikira Yahova. Komasoti azibereki wangu womwe adanirera wale adzamukisiwe nkukhala mparadaiso padziko yapasi

Kukhala pa ushamwali na Yahova kwanithandiza kuti nileke kukhala na nkhawa yakuti abereki wangu chaiwo adanitaya. Yahova wanithandiza kuwona kuti nili mu banja ikulu ya padziko yose ya Wanthu womwe achamutumikira. Mu gulu ya wanthu mwawa nagumanamo amayi, ababa, komasoti abale na alongo.—Maliko 10:29, 30.

[Mafoto]

Wamboni za Yahova anzangu aniwonesa chikondi chomwe Akhrisitu chaiwo achadekana kukhala nacho.

[Mafoto]

Kachisi Wachishinto komwe ningapemphera.