Reʼ Santo Laj Huuj xjalwik reh i kikʼachariik

¿POR QUÉ renunció a la adoración de fetiches una mujer de más de 60 años? ¿Qué hizo que un sacerdote sintoísta dejara el santuario y se convirtiera en un ministro cristiano? ¿Cómo consiguió vencer sus sentimientos de abandono una mujer dada en adopción al nacer? Dejemos que ellos mismos respondan.

«Maʼ inukoj ta chik nukʼux kuukʼ taqeh tyoox» (ABA DANSOU)

HAABʼ XASJIK WIIʼ: 1938

TINAMIT: BENÍN

REʼ XUBʼAN: SUQ NAQ REH I LOQʼINIK TYOOX

REʼ XNUKʼUL CHO PAN NUKʼACHARIIK: Xinkʼihik pan jenaj kʼisa yeʼaabʼ rubʼihnaal So-­Tchahoué, maʼ najt ta naq wilik ruukʼ jenaj haʼ eh jenaj yeʼaabʼ chʼuwaʼ akʼal. Ruum chi maʼxta naq taqeh nim bʼeeh, reʼ taqeh kʼachareel kiqʼahxik naq jeʼ juntar haʼ pan barco oon pan kanoa. Kikʼachariik naq ruukʼ i tik kar, waakax, cabra, tentzun, ahqʼ eh kixlaan. Inkikorsaj woʼ naq kipaat ruukʼ tzʼilom, ruukʼ xaq kʼiibʼ oon siq eh wilik pech ruukʼ xaan (ladrillo). Atoobʼ ta nebʼaaʼ taqeh, maʼ inkibʼan ta i ileqʼ jeʼ rukabʼ inkibʼan pan nim tinamit.

Noq ko hin naq kʼisiin, reʼ wajaaw xojrutaqʼaaj jeʼ ruchʼihiil i waas pan jenaj yeʼaabʼ ahaʼ wiiʼ xkikʼuhtaaj qeh nimanik fetichismo. Noq xikʼik taqeh qʼiij xnutoqʼaaʼ nuloqʼem wach i Dudua, jenaj chik rubʼihnaal i tyoox Oduduwa reh i yeʼaabʼ yoruba. Xnukorsaj jenaj ruyeʼaabʼ pan nupaat eh xnutoqʼaaʼ nuyeʼem chi mayiij reh: i aceite reh palma, ñame, caracol (tʼootʼ), paloma, kixlaan eh tokoom chik taqeh chikop. Inusach naq chuʼnchel i nutumiin chupaam taqeh i mayiij wilih.

NIKʼWACH I SANTO LAJ HUUJ XUJAL I NUKʼACHARIIK: Noq xnutoqʼaaʼ tijinik chi riij i Santo Laj Huuj, xnutijej chi xa jenaj i manlik Dios, Jehová, eh chi reʼ i reh maʼ rukʼul ta wach i loqʼinik tyoox (Éxodo 20:​4, 5; 1 Corintios 10:14). Jeʼ reʼ noq xnukoj rehtaal i na naq nubʼanam. Xnusach kiwach taqeh tyoox. Xnukanaaʼ woʼ ojik kuukʼ taqeh ajqʼiij, ojik chupaam taqeh i ninqʼiij inkiloqʼej taqeh tyoox eh jeʼ woʼ ruchaʼjaljik taqeh i kamnaq.

Kʼaxik xubʼan chi weh ruum chi sesenta haabʼ naq weh. Reʼ taqeh wamigo, i nufamilia, i nukaʼjaah maʼ xponik ta chi kiwach eh xinkikaqseʼlaj. Xnupahqaaj reh i Jehová chi ne naq iruyeew wansil reh ikʼik chupaam i wilih eh reh rubʼanariik i holohik. ¡Ti xuchʼikaaʼ nukʼux iruqʼor i Proverbios 18:10! Ar iruqʼor chi reʼ rubʼihnaal i Jehová «jeʼ rukabʼ i najt naah tzʼaq, eh ar inooj kikoʼleej kiibʼ i korik wach kikʼux».

Xirutobʼeej woʼ ojik chupaam taqeh moloj iibʼ keh taqeh testigo reh Jehová. Ar xwilow i korik wach kʼaxooj eh xusach nukʼux rilariik chi inkikoj kikʼux runimjiik taqeh i rukʼuhbʼaal i Dios, reʼ wilik pan Santo Laj Huuj. Reʼ wilih xukʼuhtaaj weh chi reʼ taqeh testigo reh Jehová manlik ajnimaneel taqeh.

CHAJARIIK TAQEH KOOCH XNUKʼUL: Reʼ taqeh naʼojbʼal xnutijej pan Santo Laj Huuj xirutobʼeej rukʼamariik wiibʼ chi korik ruukʼ taqeh nuhalakʼuun. Eh xwikʼraaj chi xa jeʼ xnuqahsaj i wihq. Najtir yohbʼaal naq wach i saach inubʼan chi kiij taqeh i nutyoox eh maʼxta woʼ xkibʼan chi wiij. Yuʼnaak inuloqʼej i Jehová, reʼ reh narusacham wach chuʼnchel taqeh i qakʼaxkilal (Apocalipsis 21:​3, 4). Maʼ inuloqʼej ta chik wach taqeh i tyoox, reʼ laʼ chik i Jehová inuyeew ruloqʼiil ruukʼ chuʼnchel i wanima. Suq nukʼux ruukʼ eh maʼxta chik nuyoʼjik.

«Kʼahchiʼ naq nusikʼim i Dios pan nukʼisinal» (SHINJI SATO)

HAABʼ X-ASJIK WIIʼ: 1951

TINAMIT: JAPÓN

REʼ XUBʼAN: HIN NAQ JENAJ KʼAMAL BʼEEH REH I NIMANIK SHINTO

REʼ XNUKʼUL CHO PAN NUKʼACHARIIK: Xinkʼihik pan jenaj tinamit reh i Japón rubʼihnaal Fukuoka. Reʼ taqeh wajaaw xti manlik ajnimaneel naq taqeh, ruum aj reʼ pan nukʼisinaal xkikʼuhtaaj weh ruloqʼjiik taqeh dios reh i nimanik shinto. Jeʼ reʼ noq inukapaaj naq chi riij i nukoʼlbʼaal eh chi inwaaj naq nutobʼeem taqeh kʼachareel wilik naq kikʼaxkilaal. Inkʼulik pan nukʼux noq jenaj ajkʼuhtaneel xupahqaaj qeh chi qunchelaal i hoj halakʼun chajariik naq inqaaj qabʼanam noq hoj chik nim. Reʼ taqeh wuchʼihil pan tijinbʼal xkiqʼor chi inkaaj naq kamanik eh wilik maʼ inkaaj ta naq kikanaam tijinik reh ponik chi científico. Xa reʼ laʼ, noq reʼ hin xnuqʼor chi inwaaj naq rukamanjiik wach i Dios, chi kunchelaal xinkiseʼlaaj.

Noq xnukohlaaj i bʼasico xnutzʼihbʼaaj wiibʼ pan jenaj tijinbʼal reh ponik chi ajkʼuhtaneel reh nimanik. Ar xnunabʼeej wach jenaj kʼamal bʼeeh reh i nimanik shinto eh noq inhiʼlik junkʼaam oq iril naq wach jenaj huuj qʼeq. Reʼ hin xwil naq chik chajariik huuj kʼahchiʼ rilom wach, jeʼ reʼ noq xupahqaaj weh mi wehtʼal naq chajariik naq chi huuj kʼahchiʼ rilom wach, reʼ hin xnuqʼor reh: «Reʼ Santo Laj Huuj». Jeʼ reʼ noq xuqʼor weh: «Chuʼnchel taqeh inkaaj ponik chi kʼamal bʼeeh reh i nimanik shinto ko ruman chi nakilom wach i huuj wilih».

Ruum aj reʼ, xooj nulohqʼaaj jenaj Santo Laj Huuj eh xnukoj pan estante ahaʼ wiiʼ ne naq inwil wach. Xa reʼ laʼ, qʼeʼ lahtzʼ naq nuwach eh ruum aj reʼ maʼxta naq nujunkʼaam reh rilariik wach. Xponik i qʼiij chi xnubʼan graduar wiibʼ eh xnuchop i kamanik chi kʼamal bʼeeh pan nimanik shinto. ¡Reʼ inwaaj naq nubʼanam xooj eloq wach!

Xa reʼ laʼ xnukoj rehtaal chi reʼ kamanik wilih maʼ jeʼ ta naq rukabʼ xnukapaaj. Kʼisiin maʼ chuʼnchel taqeh kʼamal bʼeeh maʼ inkikapaaj ta naq taqeh kʼachareel. Kʼih maʼxta woʼ naq kikojbʼal. Jenaj reh i kikʼamwik nubʼeeh xuqʼor weh: «Mi inawaaj chi holohik ne tiʼelik xa tiqʼoroq chi riij chajariik inkikapaaj taqeh kʼachareel eh maʼ akapaj qʼorik chi riij i kojbʼaal».

Chuʼnchel i wilih xuyoj nukʼux. Atoobʼ ta maʼ xnukanaaʼ ta i templo xnutoqʼaaʼ nutzʼirim riij taqeh nimanik. Xa reʼ laʼ, noq inusikʼ naq chi riij taqeh nimanik inqajik naq nukʼux. Xa jeʼncho maʼ jenoʼ naq nimanik inkikʼuhtaaj i korik.

NIKʼWACH I SANTO LAJ HUUJ XUJAL I NUKʼACHARIIK: Pan haabʼ 1988 xnunabʼeej wach jenaj budista xuyeew rukowiil nukʼux chi rilariik wach i Santo Laj Huuj. Jeʼ reʼ noq xkʼulik pan nukʼux chi jeʼ woʼ reʼ xuqʼor weh i kʼamal bʼeeh reh i nimanik shinto. Ruum aj reʼ xnukʼam naah xkiqʼor weh. Xti xponik chi nuwach. Wilik pech kinsaqʼik naq chi rilariik wach.

Reʼ xwil xubʼan chi xwaaj nubʼanam nutiij reh i Dios reh i Santo Laj Huuj jeʼ rukabʼ irukʼuhtaaj i Mateo 6:​9-13. Inukaʼpicheej naq i tiij wilih chi kaʼkabʼ hora, jeʼ woʼ noq inubʼan i nukamaj pan templo.

Inkʼulik pan nukʼux chi noq qʼun qʼun inwil naq wach i Santo Laj Huuj inwihʼik naq nupahqanik. Chupaam taqeh qʼiij reʼreʼ hin naq chik kaxaro eh wehtʼal naq chi reʼ taqeh testigo reh Jehová inkiyeew naq tijinik chi riij i Santo Laj Huuj ruum chi najtir kiponik naq ruukʼ i wehkʼeen. Jeʼ reʼ noq xnuqʼoreej jenaj Testigo eh xnubʼan kʼih pahqanik reh. Reʼ xponik chi nuwach reʼ chi chuʼnchel i nupahqanik xuqʼor rubʼehel weh ruukʼ i Santo Laj Huuj. Chi riij i reʼ, reʼ reh xusikʼ jenaj chik Testigo reh chi ne iruyeew nutijinik.

Maʼ najt ta xikʼik xnutoqʼaaʼ ojik pan kimoloj iibʼ. Atoobʼ ta pan peet maʼ xnukoj ta rehtaal chi kixilak naq taqeh wilkeebʼ pan moloj iibʼ, wilik naq taqeh juʼjun chi Testigo xnubʼaj taqeh. Atoobʼ ta jeʼ naq reʼ, reʼ keh xinkʼul kiqʼoreej eh xkibʼan chi hin suq kʼuluj ar.

Chupaam taqeh moloj iibʼ wilih xnutijej chi reʼ Dios iraaj chi reʼ taqeh bʼahilbʼees ne inkiyeew ruloqʼil eh ne inkikʼax i kifamilia. Eh reʼ hin peet naq i nukamaj chi kʼamal bʼeeh inwisaj korik eh maʼ inwil ta naq chik i wehkʼeeh eh i kiibʼ chi nuhalakʼuun. Eh xnukoj rehtaal chi inukoj naq nuxikin chi kibʼirjik taqeh kʼachareel kikʼulik pan templo, xa reʼ laʼ reʼ wehkʼeen maʼ jenoʼ pech naq nubʼiram.

Noq kʼih naq inutijej chi riij i Santo Laj Huuj inwikʼraj naq chi maʼ najt ta naq wilkiin ruukʼ i Jehová. Kʼih taqeh texto reh i Santo Laj Huuj xponik pan wanima jeʼ rukabʼ i Romanos 10:​13, ahaʼ wiiʼ iruqʼor: «chuʼnchel reʼ inkiqʼor i rubʼihnaal i Jehová narukoʼljik». Reʼ hin kʼahchiʼ naq nusikʼim i Dios pan nukʼisinal eh atoobʼ xnureq.

Maʼ suq ta naq chik inwikʼraaj wiibʼ chi kamanik pan templo. Pan peet kirukoj naq chi kapebʼinik chajariik naq ne inkikapaaj i juʼjun wilaʼ ne inukanaaʼ naq i nimanik shinto, xa reʼ laʼ juneliik naq inukapaaj chi mi xnureq naq i manlik Dios ne naq inukanaaʼ. Jeʼ reʼ noq, ruukʼ rukapebʼjiik riij chi korik i wilih xinelik je pan templo noq maʼ najt ta chik i siqʼjil reh i haabʼ 1989 eh xnukoj nukʼux ruukʼ i Jehová.

Reʼ xnuchih wilih kʼaxik naq chi weh. Reʼ taqeh kikʼamwik naq nubʼeeh xinkibʼaj eh maʼ inkaaj ta naq kiyeʼem qʼabʼ weh chi elik. Jenaj chik xnukʼaxkileej reʼ ruqʼorariik keh i nutuut wajaaw. Xinbʼehik reje eh ko xinponik pan kipaat inwikʼraaj naq i ruyotʼkiil i wanima eh reʼ taqeh wach nutuuq xa kibʼarbʼotik naq chik. Kʼih pech xinpaʼlojik reh rubʼanariik nutiij ruukʼ i Jehová eh chi ne naq kirutobʼeej.

Noq xinponik pan kipaat taqeh wajaaw maʼxta naq nukowiil ruqʼorariik keh chi xnukanaaʼ chik i templo. Noq ikʼinaq chik taqeh hora, noq nubʼanam chik nutiij xnuqʼor reh i wajaaw. Xnuqʼor reh chi xnureq i manlik Dios pan tokoom nimanik eh chi inwaaj naq nuloqʼem wach xnuqʼor woʼ reh chi ruum i reʼ na naq nukanaam i nimanik shinto. Maʼxta chik xuqʼor xa reʼ laʼ xtiʼbʼik pan rukʼux. Eh xikʼulik woʼ hoq juʼjun taqeh nufamilia reh chi ne naq inujal wach i nunaʼojbʼal. Maʼ inwaaj ta naq nutiʼbʼisam rukʼux jenoʼ keh i nufamilia eh maʼ inwaaj woʼ taq nukanaam rubʼanariik i holohik. Xponik i qʼiij reʼ taqeh nufamilia holohik naq chik kinkil ruum i xnuchih pan nukʼachariik.

Xa maʼ manlik ta naq chi ne inukanaaʼ i templo, na woʼ naq nujalam wach i nukapebʼaal. Reʼ wihʼik chi kʼamal bʼeeh pan templo maʼ inikʼik ta naq pan nukʼux eh atoobʼ ta inwaaj naq nusacham pan nukʼux chuʼnchel naq taqeh inwil irubʼan naq chi ne inkʼulik pan nukʼux.

¿Chajariik xtoobʼinik weh chupaam i kʼaxkilal wilih? Kiʼibʼ xtoobʼinik weh. Peet xnumol wach chuʼnchel i wilik pan nupaat reʼ irukʼam riibʼ ruukʼ i nimanik shinto eh chi riij i reʼ xnukʼat. Xnukʼat taqeh huuj, taqeh cuadro eh jeʼ woʼ taqeh xa chajariik kʼih kitzʼaaq. Reʼ rukabʼ xtoobʼinik weh reʼ chi inwikʼsaj qʼiij kuukʼ taqeh testigo reh Jehová. Reʼ wamigohiil kuukʼ eh reʼ toobʼal xkiyeew weh xubʼan chi qʼun qʼun xsahchik pan nukʼux i nunajtir nimanik.

CHAJARIIK TAQEH KOOCH XNUKʼUL: Najtir maʼ inuyeew ta naq nuqʼiij reh i wehkʼeeh eh taqeh nuhalakʼuun, ruum aj reʼ kutkeel naq inkikʼraaj kiibʼ. Noq xnukoj pan nukʼachariik taqeh naʼojbʼal iruyeew i Santo Laj Huuj, inwikʼsaj naq chik qʼiij kuukʼ eh ruum aj reʼ wilkooj naq chik pan jenaj wach kʼuxliis. Chi riij i reʼ, reʼ wehkʼeen xuchih ruloqʼjiik wach i Jehová eh xooj woʼ chi wiij. Yuʼnaak chuʼnchel i nufamilia, reʼ hin reʼ wehkʼeen, reʼ qakʼuun eh reʼ qixqʼuun ruchʼihiil i rubʼahiil inqaloqʼej i manlik Dios.

Noq inukapaaj chi riij i nukʼsinaal eh chi inwaaj naq nuloqʼem wach i Dios eh kitobʼjiik taqeh kʼachareel, xnukoj rehtaal chi xnureq chik taqeh wilih. Maʼxta chik nuqʼorbʼal reh rutyooxjiik reh i Jehová.

«Inwikʼraaj naq chi ko wilik i aajwaal wach pan nukʼachariik» (LYNETTE HOUGHTING)

HAABʼ X-ASJIK WIIʼ: 1958

TINAMIT: SUDÁFRICA

REʼ XUBʼAN: INWIKʼRAAJ NAQ CHI HIN NAQ QʼEHBʼEEL

REʼ XNUKʼUL CHO PAN NUKʼACHARIIK: Xinasjik pan jenaj kʼisa tinamit reʼ rubʼihnaal Germiston ahaʼ wiiʼ maʼxta naq ajileqʼ. Noq koreʼ naq kajlaj qʼiij wasjiik reʼ taqeh wajaaw xinkisihij ruum chi inkikapaaj naq chi maʼ ne ta inkikuy wiljiik. Xinkʼihik ruukʼ jenaj kaxaro chaqʼlaam eh inukapaaj naq chi reʼ keh i wajaaw. Xa reʼ laʼ noq xnunabʼeej chi maʼ reʼ ta naq taqeh xwikʼraaj chi hin qʼehbʼeel. Inukapaaj chi reʼ keh maʼ ne ta naq inkireq chi riij inwikʼraaj ruum chi maʼ reʼ ta naq nutuut wajaaw taqeh.

Noq wilik weh waqlaj haabʼ wuchʼihiil taqeh wamigo xnutoqʼaaʼ ojik chupaam taqeh yeʼaabʼ ahaʼ wiiʼ inkibʼan i soon eh rubʼirjiik taqeh ajtzʼuuy. Noq wilik weh wuqlaj haaʼ inubʼan naq chik i siikʼ. Inwaaj naq chi xa hin chik bʼaaq laj ixoq jeʼ rukabʼ taqeh modelo kiʼelik pan tele reh rubʼehsjiik siikʼ. Eh noq wilik chik weh bʼelejlaj haabʼ (19), xinooj kamanoom ar Johannesburgo. Maʼ najt ta xikʼik wilkiin naq chik kuukʼ taqeh kʼachareel maʼ holohik ta i kinaʼojbʼal, maʼ holohik ta naq chik kinqʼorik, kinsikʼinik eh kinxohkʼrik naq pan rukuxiik taqeh i xamaano.

Eh inubʼan woʼ naq i ejercicio jeʼ rukabʼ i gimnasia aeróbica, squash eh fútbol. Xnuyeew nukʼux chi tijinik pan tijinbʼal eh ruum aj reʼ xnabʼjik nuwach chi hin manlik ajkorsaneel ehtalil pan computadora. Suq naq i nukʼachariik eh wilik naq nutumiin eh inkiqʼor naq chi xinelik korik pan nukʼachariik. Xa reʼ laʼ maʼ jeʼ ta naq reʼ. Inwikʼraaj naq chi hin qʼehbʼeel eh maʼ suq ta naq nukʼux pan nukʼachariik.

NIKʼWACH I SANTO LAJ HUUJ XUJAL I NUKʼACHARIIK: Noq xnutoqʼaaʼ tijinik chi riij i Santo Laj Huuj xnunabʼeej chi reʼ Jehová jenaj Dios ajkʼaxool eh ruu,m i reʼ xuyeew qeh i ruqʼorbʼal. Reʼ Santo Laj Huuj jeʼ rukabʼ jenaj carta xutzʼihbʼaj qeh i Dios reh chi ne qojrubʼehsaj pan qakʼachariik (Isaías 48:​17, 18). Xnureq chi riij, chi mi inwaaj naq chi ne kirubʼehsaj pan nukʼachariik wilik naq taqeh i nanujalam.

Peet xnujal wach taqeh wamigo. Reʼ Proverbios 13:​20 iruqʼor: «Awach i xutahqeej taqe i holohik kinaʼojbʼal, naa ruwihiik runaʼojbʼal. Eh awach xutahqeej taqe i maʼ kinimanik taj, naa ruqʼebʼem riibʼ». Xnuchop chi weh i naʼojbʼal wilih eh noq nukanaam chik taqeh najtir wamigo xnutoqʼaaʼ nusikʼim wamigo chi kixilak taqeh testigo reh Jehová.

Xa reʼ laʼ kʼaxik naq chi weh rukanabʼjiik i sikʼinik. Noq kʼahchiʼ naq nukojom nukʼux rukanabʼjiik taqeh wilih xinqʼinaʼbʼik treinta libra. Reʼ wilih xuqahsaj nukʼux eh chuwach i lajeebʼ haabʼ xqajik i wahliil. Atoobʼ ta jeʼ reʼ, ko ruman naq chi nanukanaam i hin naq okrinaq reh. Xa elik naq inubʼan nutiij ruukʼ i Jehová eh reʼ reh xuyeew wansil reʼ rukanabʼjiik i maʼ holohik ta.

CHAJARIIK TAQEH KOOCH XNUKʼUL: Inwikʼraaj chi reʼ i nukʼachariik suq chik. Jeʼ woʼ, suq nukʼux ruukʼ i wilik weh, maʼ inooj ta chik nukʼux chi riij jenoʼ kamanik kʼih tzʼaaq ni xa ta chi riij i bʼehomal. Ruchʼihiil i nubʼahiil suq nukʼux chi rukʼuhtjiik i korik chi riij i Santo Laj Huuj keh i tokoom, nutobʼeem ixibʼ keh taqeh najtir wuchʼihiil chi kamanik runabʼjik wach i Jehová eh rukamanjiik wach. Eh jeʼ woʼ, noq ko kʼachalkeebʼ taqeh wajaaw reʼ xikʼihsanik weh xnuqʼor keh chi riij i uksanik naruwihʼiik ayuʼ wach akʼal noq xa holohik chik.

Intyoox reh i wamigohiil ruukʼ i Dios, maʼ inwikʼraaj ta chik chi hin qʼehbʼeel. Yuʼnaak hin chik jenaj reh i kifamilia chi jun suut i akʼal taqeh testigo reh Jehová, ahaʼ inureq taqeh nutuut, wajaaw, nuchaaqʼ eh was (Marcos 10:​29, 30).

[Ehtalil]

Chi kixilak taqeh testigo reh Jehová xwil i kʼaxooj inkikʼuhtaaj taqeh ajnimaneel

[Ehtalil]

Templo ahaʼ wiiʼ kinkamanik naq chi kʼamal bʼeeh pan nimanik shinto