Bibliam yanapashqa jukläyana kawakuyänampaq

¿IMANIRTAN sesentapitapis mas watayoq warmi santukunata adorëta dejarqan? ¿Imarëkurtan sintoismu religionchö nuna, sacerdöti kanqan templuta dejëkur cristiänu tikrarqan? ¿Imatan juk warmita yanaparqan yuririptinlla papäninkuna qarakuykuyanqampita, mana imapaqpis väleqnö mana sientikunampaq? Pëkuna willakayämunqanta rikärishun.

“Kananqa mananam santukunata adoränatsu” (ABA DANSOU)

YURIKUNQAN WATA: 1938

NACIONNIN: BENIN

MAS REQINAPAQ: SANTUKUNATAM ADORAQ

PUNTA KANQÄ: So-Tchahouë niyanqan caserïuchömi winarqä. Tsëqa seniga kanqan kinrëchömi qochapa amänunchö këkan. Carretëra mana kaptinmi, nunakunaqa barcuwan y canöa niyanqanwan mëtapis ëwayan. Tsëchö nunakunaqa pescarmi trabajayan, y wäkata, cabrata, üshata, kuchita, wallpata y maskunatam wätayan. Wayinkunataqa qerupita y päjapitam rurayan, y höranam ladrïllupita rurayan. Alläpa waktsa karnimpis, manam nunakunaqa ciudächönötsu mana allikunata rurayan.

Wamrallaraq këkaptïmi papänïqa nanätawan o ñañätawan conventuman mandayämarqan, tsëchömi santukunata adorëta yachatsiyämarqan. Tsëpitanam Dudüa santuta adorar qallëkurqan. Tsëqa karqan, yorüba markachö adorayanqan Odudüwa santupa juk kaq jutinmi. Takshalla templuta rurëkurmi, palma aceitita, ñamesta, caracolkunata, wallpakunata, palumakunata y mas animalkunata tsë santupaq rupatsirqä. Tsëkunata rantinäpaqmi cäsi llapan kapamanqanta gastaq kä.

¿IMANÖTAN BIBLIA YANAPAMASHQA JUKLÄYANA KAWAKUNÄPAQ? Bibliata estudiarqa Jehovälla rasumpa Dios kanqantam yachakurqä, y pëqa manam munantsu santukunata adoranantsikta (Exodu 20:4, 5; 1 Corintius 10:14). Imata ruranäpaq kaqta cuentata qokurmi, santukunata y tsëkunata adorar utilizanqäta llapanta ushakätsirqä. Manam brüjukunaman ëwarqänatsu ni marka mayïkunapa costumbrinkunaman ni wanushqakunapaq rurayanqanman mëtikurqänatsu.

Sesentapitapis mas watana santukunata adorashqa kaptïmi, tsëkunata dejëqa fäciltsu karqan. Manam tsëllatsu, amïgükuna, kastäkuna y vecïnükunapis, conträ tikrarmi noqapita burlakuyarqan. Alli kaqta ruranäpaq yanapëkamänampaqmi Jehoväman mañakurqä. ¡Proverbius 18:10 ninqanmi alläpa yanapamarqan! Tsëchömi kënö nin: “Teyta Jehoväpa jutinqa alli rurashqa törrinömi, alli nuna tsëman ëwaptinqa manam imapis imanannatsu”.

Jehoväpa testïgunkuna rurayanqan reunionkunaman ëwanqäpis alläpam yanapamarqan. Tsëchömi cläru rikarqä, rasumpa cristiänukuna imanö kuyanakuyanqanta. Bibliachö ninqannö portakuyänampaq kallpachakuyanqanta rikarmi alläpa espantakurqä. Tsëkunata rikarmi, Jehoväpa testïgunkuna rasumpa kaq religion kayanqanta cuentata qokurqä.

¿IMAKUNACHÖTAN YANAPAMASHQA? Bibliachö ninqanqa wamräkunawan mas alli kawakunäpaqmi yanapamashqa. Manam tsëllatsu, lasaqta apëkarnin tsëta dejareqnömi sientikü. Unëqa mana imachöpis yanapamaq santukunachömi llapan kapamanqanta gastaq kä, peru kananqa Jehovätam sirwï. Pëqa llapan problëmakunatam pasëpa ushakätsimunqa (Apocalipsis 21:3, 4). Kananqa mananam santukunata adoränatsu, sinöqa Jehovätanam llapan shonqüwan adorä. Pëta adorarqa, tranquïlu, següru y kushishqam sientikü.

“Wamra kanqäpitam Diosta ashirqä” (SHINJI SÄTU)

YURIKUNQAN WATA: 1951

NACIONNIN: JAPON

MAS REQINAPAQ: SINTOISMU RELIGIONCHÖMI SACERDÖTI KARQAN

PUNTA KANQÄ: Prefectüra de Fukuoka niyanqampa caserïunchömi winarqä. Papänïkunaqa religiösu karmi, sintoismu religionchö adorayanqan santukunata adoranäpaq wamra kanqäpita yachatsiyämarqan. Tsë tiempuqa imanö salvakunäpaq kaqman y problëmayoq kaqkunata imanö yanapanäpaq kaqmanmi pensaq kä. Yarpämi wamrallaraq këkaptï, jatunyarkurnin imata rurayänampaq kaqta profesornïkuna tapuyämanqanta. Estudiaq mayïkunaqa ima oficiuta o carrërata estudiayänampaq kaqtam willakuyarqan, y wakinqa cientïficu këta munayanqantam niyarqan. Peru Diosta sirwita munanqäta niptïqa, llapankunam asikuyarqan.

Secundariäta usharirqa, religionta yachatsikoq profesor kanäpaqmi juk escuëlaman matriculäkurqä. Tsëchömi sintoismu religionchö sacerdötita reqirqä, pëqa tiempun kanqan höram yana color libruta leyeq. Noqaqa rikashqanam karqä tsë librupa qaranchö ima ninqanta, tsëmi “¿musyankiku ima libruta leyikanqäta?” nir tapumaptin, “Bibliatam” nir contestarqä. Tsënam pëqa nimarqan, “sintoismu religionchö këta munaqkunaqa kë librutam leyiyanman”.

Tsë höram Bibliata ranteq ëwarqä, y librükunata churanqächömi mas rikakoq sitiuman churarqä. Tsënö kaptimpis, jukkunata estudiar ocupädu kaptïmi leyinäpaq tiempü karqantsu. Tsëpitanam estudianqäta usharir, sintoismu religionchö sacerdöti karqä. ¡Rurëta munanqätam lograshqa karqä!

Peru cuentatam qokurqä tsëkunaqa pensanqänö mana kanqanta. Sacerdötikunaqa cäsi llapanmi nunakunapaq yarpachakuyaqtsu, y atskaqmi Diosmanqa markäkuyaqtsu o yärakuyaqtsu. Juk kutim noqapita mas carguyoq sacerdöti kënö nimarqan: “Ruranqëki alli yarqunanta munarqa, yachaq nunakuna niyanqanllapaq parlë. Diosman markäkïpaqqa o yärakuypaqqa, ama ichikllapis parlëtsu”.

Tsë llapanta rikanqämi alläpa llakitsimarqan. Templuchö sacerdöti këta mana dejarpis, juk religionkunaman ëwarmi qallëkurqä. Peru juk religionkunaman ëwarqa, mëqanchöpis rasumpa kaqta mana yachatsikuyaptinmi masraq llakikurqä.

¿IMANÖTAN BIBLIA YANAPAMASHQA JUKLÄYANA KAWAKUNÄPAQ? 1988 watam budismu religionpita nuna Bibliata leyinäpaq nimarqan. Tsënö nimanqanmi yarpätsimarqan sintoismu religionchö sacerdöti nimanqanta. Tsëmi pëkuna niyämashqa kaptin Bibliata leyinäpaq decidirqä. Leyinqäqa alläpam gustamarqan, y höraqa leyikaptïmi patsapis waräramoq.

Leyinqämi yanapamarqan Mateu 6:9 a 13 ninqannö, Bibliachö willakunqan Diosman mañakunapaq. Templuchö sacerdöti këkarpis, cada dos hörasmi tsë textuchö ninqanta mañakoq kä.

Bibliata leyinqämannömi maskunata tapukoq kä. Tsë tiempuqa casädunam karqä, y warmïta watukashqa kayaptinmi, Jehoväpa testïgunkuna Bibliapita yachatsikuyanqanta musyarqä. Tsëmi Testïgu warmiwan parlarnin imëkata tapurqä, y llapan tapunqäta Bibliawan contestamaptinmi alläpa espantakurqä. Pëmi Testïgukunawan Bibliapita yachakunäpaq yanapamarqan.

Tsëpita ichik tiempullatam Diospita Yachatsikuyänan Wayikunachö reunionkunaman ëwar qallëkuyarqä. Qallananllachö mana cuentata qokuptïpis, unë mana alli tratanqä wakin Testïgukunapis tsëchömi këkäyarqan. Tsënö kaptimpis, pëkunaqa shumaqmi saludayämarqan y kushishqam chaskiyämarqan.

Tsë reunionkunachömi yachakurqä, casädu ollqukuna familiantsikta kuyanantsikta y väleqpaq churar respetanantsikta Dios munanqanta. Tsë tiempuyaqqa sacerdöti cargüta alli cumplita munarmi, warmïta y tsurïkunataqa cäsushqatsu karqä. Cuentatam qokurqä templuman shamoq nunakunata shumaq wiyarnimpis, warmïtaqa juk kutillapis mana wiyashqa kanqäta.

Mas yachakunqämannömi, Jehoväpa lädunchönö sientikurqä. Bibliachö atska ninqanmi shonqüyaq chärirqan, y jukqa karqan Romänus 10:13 kënö ninqanmi: “Teyta Jehoväpa jutinman confiakoqkunaqa salvashqam kayanqa”. Wamra kanqäpitam Diosta ashirqä, y kananqa tarishqanam karqä.

Templuchö sacerdöti karqä manam allinatsu sientikoq kä. Qallananllachöqa sintoismu religionta dejariptï wakinkuna imata niyänampaq kaqmanmi yarpachakoq kä. Peru rasumpa kaq Diosta juk läduchö tarirqä, religionnïta dejanäpaq kaqtam imëpis nishqa karqä. Tsëmi concienciä nimanqanta rurar, 1989 wata templuchö sacerdöti këta dejarqä, y vïdächö Jehovä yanapamänantam dejarqä.

Tsëta decidinanqa manam fäciltsu karqan. Noqapita mas carguyoq kaqkunam mana alli tratayämarqan, y imëkata nimarmi ëwakunäta munayarqantsu. Peru sacerdöti këta dejanäpaq kaqta papänïkunata ninäpaqmi mas difïcilqa karqan. Papänïkunapa wayinman ëwëkarqa, alläpa mantsakurmi shütëtapis puëdirqätsu, y chankäkunapis karkaryarqanraqmi. Ëwëkarmi yanapëkamänampaq atska kuti Jehoväman mañakurqä.

Papänïkunapa wayinman chëkurqa, manam tsë asuntupaq parlapëta puëdirqätsu. Atska höra pasanqanchöran Jehoväman mañakuykur papänïta willarqä. Allim entienditsirqä juk religionchö rasumpa kaq Diosta tarishqa kanqäta, y pëta sirwinäpaq sintoismu religionpita yarqukunäpaq kaqta. Papänïqa alläpam llakikurqan, y manam ima nimëta musyarqantsu. Pensanqäta cambianäta munarmi, mas familiäkunapis noqawan parlaq shayämurqan. Manam mëqantapis cöleratsita munarqätsu, peru alli kaqta rurëtapis manam dejëta munarqätsu: Jehovätam sirwinä karqan. Tsëpita tiemputaqa, familiäkunapis decidinqäta respetayarqanmi.

Tsënö kaptimpis, manam sacerdöti kanqä templullatatsu dejanä karqan, sinöqa imanö pensanqätapis cambianämi karqan. Sintoismu religionchö sacerdöti kanqäqa, pensanqätam pasëpa cambiashqa karqan. Peru cambianäpaq kallpachakuptïpis, llapan rikanqämi tsëta yarpätsimaq.

¿Imatan yanapamarqan tsëta cambianäpaq? Ishkëta ruranqämi. Puntataqa sintoismu religionchö sacerdöti kanqäpita, wayïchö llapan kapamanqanta juntëkurmi ninawan ushakätsirqä. Librukunata, cuadrukunata y alläpa cuestaq cösaskunatam ushakätsirqä. Testïgukunawan tiemputa pasanqäpis alläpam yanapamarqan. Pëkunawan amïgu kanqä y yanapayämanqanmi, puntata imanö pensanqäta cambianäpaq yanapamarqan.

¿IMAKUNACHÖTAN YANAPAMASHQA? Puntataqa manam warmïta ni tsurïkunata cäsurqätsu, tsëmi pillapis mana kuyanqanta pensar llakikuyaq. Peru Bibliachö consejakunqanta rurar pëkunawan mas tiempu kanqämi, mas alli kawakuyänäpaq yanapayämashqa. Tsëpitanam warmïpis noqanölla Jehoväta sirwinampaq decidirqan. Kananqa ishkäkuna, ollqu tsurï, warmi tsurï y nunanmi, llapäkuna juntu rasumpa kaq Diosta adorayä.

Wamra kanqäman, Diosta sirwita munanqäman y jukkunata yanapëta munanqäman yarparqä, rurëta munanqäpitapis masta logranqätam cuentata qokü. Tsë llapampitaqa manam Jehoväta imanö agradecikuyta puëdïtsu.

“Shonqüchöqa imapis faltamanqantam musyarqä” (LYNETTE HOUGHTING)

YURIKUNQAN WATA: 1958

NACIONNIN: SUDAFRICA

MAS REQINAPAQ: MANA IMAPAQPIS VÄLEQNÖMI SIENTIKOQ

PUNTA KANQÄ: Germiston niyanqan mïna kanqan taksha markachömi yurirqä. Tsëchöqa mana allita ruraq nunakunaqa manam karqanllatsu. Alli cuidamëta mana puëdiyänampaq kaqta pensarmi, papänïkunaqa yurinqäpita catorci junaqllata qarakëkayämarqan. Shumaq kuyëpa wätamaq nunakuna rasumpa papänïkuna kayanqanta pensarmi winarqä. Peru papänïkuna mana kayanqanta musyarqa, llakikurmi mana imapaqpis väleqnö sientikurqä. Familiä mana kayanqanta musyarmi, mana entiendiyämänampaq kaqta pensarqä.

Dieciseis watayoq këkarmi, tushuyänäpaq y müsicata tocayanqanta wiyayänäpaq, washkuta rantikuyanqan sitiukunaman amïgükunawan ëwar qallëkurqä. Diecisiëti watayoq këkarqä cigärrutapis fumaqnam kä, y cigärruta rantikoqkuna ruratsiyanqan cartelkunachö uyulla shipashkunanö këtam munaq kä. Diecinuëvi watata cumplirirnam trabäjurëkur Johannesburgu markata ëwakurqä. Tsëpita ichik tiempullatam, mana alli amïgukunawan juntakur, cada semäna ushë mana allikunata parlar, cigärruta fumar y upyar këkarqä.

Tsënö kaptimpis, ejerciciutam seguïdu ruraq kä. Gimnasia aeröbica niyanqantam ruraq kä, y warmikuna pukllayanqan futbolta y maskunatam pukllaq kä. Estudianqä carrërachö alli kanäpaq kallpachakurmi, computadörapaq imëkata rurëchö reqishqa tikrarqä. Alli kawakuptï y qellëta mana faltapakuptïmi, wakinqa jukkuna munayanqanta lograshqa kanqäta niyaq. Tsënö kaptimpis, manam kushishqatsu karqä. Manam ima rurëta musyarqätsu, y imëkata lograshqa karpis manam kushishqatsu sientikurqä. Shonqüchöqa imapis faltamanqantam musyarqä.

¿IMANÖTAN BIBLIA YANAPAMASHQA JUKLÄYANA KAWAKUNÄPAQ? Bibliata estudiar qallarqa, Jehovä kuyakoq Dios karnin Palabran Bibliata qaramanqantsiktam yachakurqä. Bibliaqa noqantsikpaq qellqatsimunqan cartanömi, y imanö kawanapaq kaqta musyanapaqmi yanapamantsik (Isaïas 48:17, 18). Tsëchö nimanqanta provechëta munarqa, cambianäpaq kaqtam cuentata qokurqä.

Puntataqa unë amïgükunata dejarmi alli amïgukunatana ashina karqan. Proverbius 13:20 ninqannömi, “yachaq nunakunawan pureq kaqqa yachaqmi tikranqa, peru juiciunnaq nunakunawan juntakaqqa mana allichömi ushanqa”. Tsëchö ninqanta väleqpaq churarmi unë amïgükunata dejarqä, y Jehoväpa testïgunkunachömi amïgukunata ashirqä.

Peru tsëpitapis masqa, cigärru fumëta dejëmi noqapaqqa fäciltsu karqan. Tsë viciuta dejanäpaq kallpachakurmi, catorci kïlus mas pesar qallëkurqä. Tsëqa alläpam llakitsimarqan, y cäsi chunka watachöran tsë catorci kïlusta bajarqä. Tsënö kaptimpis, tsë viciuta dejanäpaq kaqtam musyarqä. Jehovämanmi imëpis mañakoq kä, y pë yanapamaptinmi tsë viciuta dejarqä.

¿IMAKUNACHÖTAN YANAPAMASHQA? Kananqa mas alli saloryoqmi kä y kapamanqanwanmi conformakü. Alli trabäjuyoq karnin, reqishqa karnin y imëkayoq karnin kushishqa kanapaq kaqta nunakuna niyaptimpis, mana tsënö kanqanta musyarmi, tsëkunata logranäpaq kallpachakünatsu. Kananqa nunäwan juntu jukkunata Bibliapita yachatsirmi alläpa kushikuyä, y kimaq trabajaq mayïkunatam yanaparqö rasumpa kaq Diosta sirwiyänampaq. Wamrantanö wätamaq papänïkunatapis manaraq wanuyaptinmi, shumaq patsachö kawayänampaq wanushqakunata kawaritsimunampaq Dios änikunqampita parlaparqä.

Dioswan amïgu karmi, mana imapaqpis väleqnönatsu sientikü. Kananqa entëru patsachö këkaq Jehoväpa testïgunkunachömi, mamänïkuna, papänïkuna, turïkuna y nanäkuna o ñañäkuna kapaman (Marcus 10:29, 30).

[Fötu]

Jehoväpa testïgunkunachömi rasumpa cristiänukuna imanö kuyanakuyanqanta rikarqä

[Fötu]

Sintoismu religionchö sacerdöti kanqä templu