Bibliaq yanapayninwan cambianku

Soqta chunka más watanpi kashaspan juj warmi idolokuna adorasqanta saqepurqan, ¿imaraykun chayta ruwarqan? Sintoísta religionmanta sacerdote, ¿imaraykun religionninta saqepurqan? Juj warmitan iskay semana nacesqan qhepallaman tayta-maman juj runaman qopurqanku, chayta yachaspa, ¿imaynatan llakikuyninta atiparqan? Paykuna kikinkun chayta willawasunchis.

“Manañan idolokunapaqñachu kausani” (ABA DANSOU willakun)

1938 WATAPIN NACERQAN

PAYQA BENÍN NACIONMANTAN

ÑAUPAQPIN KARQAN: IDOLOKUNATA ADORAQ

ÑAUPAQPI KAUSASQAY: Noqaqa So-Tchahoué llaqtachapin wiñarqani chay llaqtaqa qochaq ladonpin kashan. Chaypi tiyaq runakunaqa, barcochapi otaq canoapin purinku manan kanchu carreterakuna. Chaymantapas mijunankupaqqa challwatan challwanku, wakata, cabrata, khuchita juj animalkunata ima uywanku. Wasikunatataq ruwanku pajawan ladrillowan ima. Yaqa llapaykun chaypi wajcha kayku ichaqa manan juj llaqtakunapi jinaqa suwakuna kanchu.

Erqellaraq kashaqtiymi papayqa ñañaytawan juj conventoman apawarqanku, chaypin yachachiwarqanku pantasqa dioskuna adorayta. Tiempowanqa Dudua diostan adorarqani chay diosta adoranaypaqmi juj juch’uy capillata jina ruwachirqani chaypin chay diosman imaymana ofrendakunata jaywaq kani. Aceiteta, caracolkunata, wallpata, palomakunata juj animalkunatawan, chaykunata rantispan yaqa llapa qolqeyta tukuq kani.

BIBLIAQ YANAPAYNINWAN CAMBIAPUNI: Bibliata estudiaspan yacharqani ch’ullalla Dios kasqanta, payqa Jehová Diosmi. Jinaspapas payqa manan munanchu pantasqa dioskunata adorananchista chaymi noqaqa chay dioskuna adorayta saqepurqani (Éxodo 20:4, 5). (1 Corintios 10:14). Jinallataq layqa ruwayta, watuyta, juj mana allin ruwaykunatapas.

Ichaqa chaykunata saqepuyqa manan facilchu karqan, soqta chunka wata masmi chay idolokunataqa adorarqani. Jinaspapas vecinoykuna, amigoykuna, familiaykunapas manan munarqankuchu saqepunayta chaymi asipayawaqku burlakuqku ima. Ichaqa Jehová Diosmantan mañakurqani allin kaqta ruwanaypaq. Bibliapin nishan: “Jehová Diospa sutinqa allin perqasqa torre jinan, chaymanmi chanin runaqa phawan pakakunanpaq”, nispa (Proverbios 18:10,TNM). Chayta leesqayqa anchatan kallpachawarqan.

Chaymantapas Jehová Diospa testigonkunaq juñunakuyninkumanmi rirqani chaypin rikurqani paykunaqa sumaqta munanakuspa kausasqankuta. Chaymantapas paykunaqa tukuytan kallpachakunku Bibliapi Diospa kamachikuykunaman jina kausanankupaq. Chaykunata rikuspan sut’ita repararqani Jehová Diospa testigonkuna cheqaq religión kasqankuta.

KUNAN KAUSASQAY: Bibliapi Diospa kamachikuyninkunaqa imaymanapin yanapawarqan, kunanqa sumaqtan wawaykunawan kausani kusisqataqmi kashani. Chaymantapas manañan qolqeyta gastanichu pantasqa dioskunata adoraspay. Kunanqa Jehová Diosllatan adorani payllan tukuy mana allin ruwaykunata chinkachipunqa (Apocalipsis 21:3, 4). Jehová Diostaqa tukuy sonqoywanmi munakuni, ¡paywanqa ancha kusisqan kashani! Jinaspapas manañan pantasqa dioskunaq esclavonchu kani

“Wawa kasqanmantapachan Diosta serviyta munarqan” (SHINJI SATO willakun)

1951 WATAPIN NACERQAN

PAYQA JAPÓN NACIONMANTAN

ÑAUPAQPIN KARQANI: SINTOÍSTA RELIGIONMANTA SACERDOTE

ÑAUPAQPI KAUSASQAY: Noqaqa Fukuoka llaqtapi kaq campopin wiñarqani, tayta-mamayqa religioso runakunan karqanku. Chaymi wawa kasqaymantapacha sintoísta religionpi dioskunata adoranaypaq yachachiwarqanku. Chaymantapas noqaqa imaymana llakikuykunapi tarikuq runakunatan yanapayta munarqani, jinaspapas salvasqa kaytan munarqani, chaypin sapa kutilla piensaq kani. Juj kutinmi profesorniyku llapa estudiaqkunata tapuwarqanku: “¿Jatun kaspaykichis imatan ruwayta munankichis?”, nispa. Jinan compañeroykunaqa willarqanku imapis llank’ayta munarqanku, ima profesionniyoqsi kayta munarqanku, científico runa kay munasqankuta ima. Noqan ichaqa nirqani: “Diostan serviyta munani”, nispa jinan llapanku asikapurqanku.

Colegioyta tukusqay qhepallamanmi estudiayta qallarirqani sacerdote kanaypaq. Chaypin sintoísta religionmanta sacerdoteta reqsirqani payqa juj librotan samanan horaspi leeq. Juj kutinmi payqa tapuwarqan: “Satu ima librotan leeshani”, nispa. Chay libroqa yana colormi karqan, noqaqa ñan tapanta qhawarqaniña, jinan nirqani: “Bibliatan”, nispa. Chaymi payqa niwarqan: “Sintoísta religionpi sacerdote kayta munaqqa kay librotan leenan”, nispa.

Chayta uyarispan noqaqa usqhaylla Bibliata rantikamurqani, jinan cuartoypiqa alayriman churarqani. Ichaqa imaymanata estudiasqayraykun mana tiempoy karqanchu leenaypaq. Tiempowanqa tukurqanin sacerdote kanaypaq estudiayta jinan juj templopi sacerdote jina servirqani, chaywanqa kusisqan kasharqani.

Pisi tiempollaraq chaypi kashaspaymi repararqani, chay templopi serviq sacerdotekunaqa mana runamasinkutaqa munakusqankuta yaqa llapanku mana ni Diospipas iñisqankuta. Chaypi jujnin kaq sacerdoten niwarqan: “Kaypi allin kayta munanki chayqa, runakunaq yachachisqallanta yachachinki amapuni Diospi iñiymantaqa rimankichu”, nispa.

Noqaqa llakikurqanin chaykunata uyarispa rikuspapas. Sacerdote kasqayta manaña saqerqanichu chaypas juj cheqaq religiontan tariyta munarqani. Chaymi maskhayta qallarirqani ichaqa manan mayqen religionpipas cheqaq kaqtaqa tarirqanichu.

BIBLIAQ YANAPAYNINWAN CAMBIAPUNI: 1988 watapin budista religionmanta runata reqsirqani jinan payqa niwarqan Bibliata leenaypaq. Chaymantapas yuyarirqanin ñaupaqpi juj sacerdote Bibliata leenaypaq niwasqanta. Chay consejokunata uyarispan Biblia leeyta qallarirqani. ¡Bibliata leeyqa may munaymi karqan! Mayninqa illarimunankaman leeq kani.

Bibliata leesqaymi yanapawarqan cheqaq Diosmanta mañakunaypaq, Bibliapin Mateo 6:9-13 textopi willashan Diosmanta imaynata mañakunapaq. Chay jinatan noqaqa sapa iskay hora mañakuq kani, templopiña ruwanaykunata ruwasharqani chaypas mañakusharqanin.

Bibliata leesqayman jinan imaymanamanta astawan yachayta munarqani. Chay tiempopaqqa ñan casarasqaña kasharqani chaymantapas yacharqanin Jehová Diospa testigonkunaqa Bibliamanta yachachisqankuta. Paykunaqa esposaymanmi juj tiempo visitamurqankuña, jujnin kaq testigotan nirqani yachachiwananpaq jinan tukuy imaymanata tapuyta qallarirqani. Payqa llapa tapukusqaymanmi Bibliaq nisqanman jina kutichiwarqan, chayta rikuspan noqaqa admirasqa kasharqani. Chay qhepamanqa juj testigon Bibliamanta astawan yachachiwarqan.

Pisi tiempollamantan Jehová Diospa testigonkunaq juñunakuyninkunaman riyta qallarirqani. Paykunaqa sumaqtan chaskiwarqanku. Chayllaraq rishaspaqa manan repararqanichu, chaypi kaq wakin testigokunataqa mana allintan ñaupaqpi tratarqani, chaywanpas paykunaqa ñapaykuspan sumaqta chaskiwarqanku.

Chaymantapas chay juñunakuykunapin kaykunata yachamurqani: Diosqa munanmi casarasqa qosakuna esposankuta familiankutapas munakunankuta respetanankuta ima. Noqaqa sacerdote ruwanaykunapin sinchi afanasqa kasharqani esposaypaqpas wawaykunapaqpas manan tiempoy karqanchu. Temploman jamuq runakunatan astawanqa tukuy tiempoywan uyariq kani, esposayta uyarinaypaqmi ichaqa mana tiempoy kaqchu.

Bibliamanta yachasqayman jinan Jehová Diostaqa astawan munakurqani. Bibliapi yachachikuykunaqa sonqoymanmi chayarqan jujnin kaq yachachikuymi kashan Romanos 10:13 textopi, chaypin nishan: “Jehová Diospa sutinta llapa wajakuqkunaqa salvasqan kanqaku”, nispa. Wawa kasqaymantapachan Diosta maskharqani kunanqa ñan payta tarirqaniña.

Sintoísta templopiqa manañan serviyta munarqaniñachu, jinan saqepuyta munarqani ichaqa nisharqanin: “Chay religionta saqepusaq chayqa reqsisqaykunaqa qhawawanqakuchá”, nispa. Noqaqa munarqanipunin cheqaq Dios tariyta, kunanqa ñan payta tarirurqaniña. Chaymi 1989 watapi sintoísta religionniyta templotapas saqepurqani, chaymantapachan Jehová Diospi confiaspa kausarqani.

Chay ruwayqa manan facilchu karqan; religionniypi reqsisqay sacerdotekunan mana allinta rimayta qallarirqanku, jinaspa obligayta munawarqanku qhepakunaypaq. Chaymantapas aswan sasaqa karqan tayta-mamayman chayta willaymi. Chayta willanaypaq tayta-mamaypa wasinman rishaspaqa sinchi manchasqan kasharqani chakiykunaraqmi khatatawasharqan, chaymi askha kutita carroyta sayachispa Jehová Diosmanta mañakurqani.

Chayaspayqa manan willarqanipachachu, Jehová Diosmantan astawan mañakusharqani. Askha horakuna pasasqan qhepamanñan papayman willarqani. “Juj religionpin cheqaq Diosta tarirqamuni chaypaqmi sintoísta religionta saqepusaq”, nispa. Papayqa llakisqa uyantinmi mana imatapas niwarqanchu, chayta yacharuspan wakin familiaykunapas jamurqanku jinaspa niwarqanku: “Ama chayta ruwaychu”, nispa. Respetowanmi paykunataqa uyarirqani, ichaqa manapunin noqaqa Jehová Dios serviytaqa saqeyta munarqanichu. Tiempowanqa familiaykunaqa respetarqankun Jehová Dios servinaypaq decidikusqayta.

Ichaqa manan chaykunallatachu ruwanay karqan imayna piensasqaytapas cambianaymi karqan sintoísta religionpi imaymana yachamusqayqa umaypi sonqoypin kasharqan. Ichaqa chaykunataqa wikch’upunaymi karqan chaypaqmi kaykunata ruwarqani.

Sintoísta religionniypi imakunatas jap’irqani, imakunatas rantirqani, chaykunatan llapanta juñuruspa ruphachipurqani. Chaykunan karqan: librokuna, cuadrokuna juj valorniyoq cosaskuna. Chaymantapas kallpachakurqanin Diospa llaqtanpi hermanokunawan astawan kanaypaq, chhaynapin paykunapas yanapawarqanku pisi-pisimanta ñaupa kausayniyta qonqapunaypaq.

KUNAN KAUSASQAY: Ñaupaqpiqa manan tiempota t’aqaqchu kani esposaywan wawaykunawan ima kanaypaq, jina paykunaqa wikch’usqa jina sientekurqanku. Kunanqa Bibliapi kamachikuykunaman jinan kallpachakuni familiaywan kanaypaq chaymi kunanqa juj jinalla llapayku kausayku. Esposaypas tiempowanqa Jehová Diosta servinanpaqmi decidikurqan, qhari wawaypas jinallataq warmi wawaypas qosanpiwan.

Wawallaraq kashaspayraqmi Diosta serviyta munarqani runakunatapas yanapaytan munarqani. ¡Kunanqa atinin chay ruwayta! ¡Maytan Jehová Diosta agradecekuni chaykunata ruwanaypaq yanapawasqanmanta!

“Manan imawanpas kusisqa kayta atirqanichu” (LYNETTE HOUGHTING willakun)

1958 WATAPIN NACERQAN

PAYQA SUDÁFRICA NACIONMANTAN

ÑAUPAQPIN KARQAN: WIKCH’USQA JINA SIENTEKURQAN

ÑAUPAQPI KAUSASQAY: Noqaqa Germiston llaqtapin nacerqani, chaypiqa mana ancha kaqchu suwakunaqa. Tayta-mamayqa iskay semana nacesqay qhepallamanmi juj parejaman uywawanankupaq saqepuwasqaku. Chay parejaqa sumaqtan munakuspa uywawarqanku noqaqa nirqanin: “Paykunachá tayta-mamayqa”, nispa. Ichaqa tiempowanmi yacharqani manan paykunachu cheqaq tayta-mamay kasqankuta, jinan chaywan sinchita llakikurqani wikch’usqa jinan sientekurqani. Nirqanin: “Paykunaqa manan entiendewankumanchu imayna sientekusqayta jinaspapas paykunaqa manan familiaychu nitaq imaypaschu kanku”, nispa.

16 wataypi kashaspan sapa kutin amigoykunawan música uyariq, tusuq ima lloqsiq kayku. 17 wataypi kashaspataq fumayta qallarirqani, cigarrota vendenankupaq yaqa tullullaña lloqsimuq chicakuna jinan kayta munarqani. 19 wataypi kashaspaqa Johannesburgo llaqtamanmi ripurqani llank’anayrayku. Chaypiqa mana allin amigokunawanmi juñunkuyta qallarirqani sapa semana tukuytan paykunawan tomanaykupaq lloqsiq kayku, jinan chaypi fumaq kayku, mana allin simikunata ima rimaq kayku.

Ichaqa imaymana ejerciciotan ruwaq kani bolatapas jayt’aqmi kani. Chaymantapas llank’anaytaqa allintan ruwaq kani qolqetapas allintan ganarqani, chayta rikuspan runakunaqa respetowan qhawariwaqku paykunaqa piensaqkun chaykunawan kusisqa kanaypaq. Ichaqa manan chhaynachu karqan, sonqoypiqa sinchi llakisqan kasharqani chinkasqapas kashayman jina. Tukuy imaymanayoqña karqani chaypas, manan kusisqachu karqani, ch’usaq sonqon kasharqani.

BIBLIA YANAPAYNINWAN CAMBIAPUNI: Bibliata estudiaspan yacharqani Jehová Diosqa ancha munakuqllaña kasqanta. Bibliaqa Diospa qowasqanchis juj sumaq cartan chaypi willawashanchis imaynatas runakuna kausananchis chayta (Isaías 48:17, 18). Bibliapi kamachikuykunaman jina kausanaypaqqa imaymanapin cambianay karqan.

Bibliapi Proverbios 13:20 textopi nishan: “Yachayniyoqkunawan puriqqa yachayniyoqmi kapunqa, mana yuyayniyoqkunawan puriqmi ichaqa waqllipunqa”, nispa (Diospa Simin Qelqa). Chay consejota kasukuspan mana allin amigokunata saqepurqani Diospa llaqtanmanta hermanokunawantaqmi amigontin kapurqani.

Cigarro fumaytan ichaqa mana saqeyta atirqanichu, chayta saqepunaypaq kallpachakusqay tiempopin wirayapurqani chayqa sinchitan llakichiwarqan. Chaymantaqa chunka watakunapiraqmi aswanpas pesoyta bajarqani. Chay viciomantaqa librakuytapunin munarqani chaymi Jehová Diosmanta tukuy sonqomanta mañakuq kani, payllan yanapawarqan kallpata jap’ispa chay viciota saqepunaypaq.

KUNAN KAUSASQAY: Kunanqa aswan allinmi saludniyqa kashan, imachus kaqnillaywantaqmi kausashanipas. Allin llank’anapas askha qolqeyoq kaypas manan cheqaq kusikuytaqa qowanchischu. Kunanqa qosaywan kuskan Bibliamanta jujkunaman yachachiyku, chaykuna ruwasqaykuqa anchatan kusichiwanku. Llank’anaymanta kinsa compañeraykunatapas yanaparqanin Diosmanta yachanankupaq kunanqa Diostan servishanku. Adoptawaqniy tayta-maymanpas manaraq wañupushaqtinkun willarqani kausarinpuymanta jinallataq jamuq tiempopi juj sumaq paraiso kananmantapas.

Jehová Dioswan amigontin kasqaymi yanapawarqan sonqoypi llakikuykunata wijch’unaypaq. Kunanqa Jehová Diospa testigonkunaq familianpin kashani paykunaqa mundontinpin kashanku, chaypi hermanokunaqa tayta-maymay jinan kanku, ñañaykuna jina, turaykuna jina (Marcos 10:29, 30).

[12 paginapi dibujo]

Jehová Diospa testigonkunaqa kallpachakunkun munanakuspa kausanankupaq

[13 paginapi dibujo]

Sintoísta religionmanta templo