Taui te Pipiria i te Oraanga

EAA tetai vaine e 60 tuma ona mataiti i akamutu ei i te akamori itoro? Eaa tei akakeu i tetai orometua Shinto kia akaruke i tana angaanga i ko tetai ngai tapu kia riro mai ei orometua Kerititiano? Akamanako i ta raua i karanga mai.

“Kare au e tuikaa akaou i te au itoro.”​—ABA DANSOU

MATAITI ANAU: 1938

ENUA ANAU: BENIN

ORAANGA: AKAMORI ITORO

TOKU ORAANGA I MUA ANA: Kua utuutuia mai au i roto i te oire ko So-Tchahoué, e ngai varivari i te pae mai i tetai vai roto. Te aronga e noo ana ki reira, e tautai ika ana ratou e te akono puakatoro, puakanio, mamoe, puaka e te au manu rere. Kare e mataara i tera ngai, no reira ka teretere te au tangata na runga i te poti e te vaka. Te maataanga o te au are, kua patuia ki te rakau e te matie, e ko tetai au are e piriki. E aronga putaua te maataanga o te tangata. Noatu rai, kare e maata roa te kino e raveia ana mei te oire maata.

I toku tamarikianga, kua tuku atu toku papa ia maua ko toku tuakana ki tetai ngai e raveia ra te angaanga purepure e te akamorianga, e kua apii maua i ta ratou irinakianga tupuna. Maata mai au, kua akariro au i te Dudua (Oduduwa) o te iti tangata Yoruba ei atua noku. Kua akatu au i tetai are no teia atua e kua akaatinga putuputu i te uʼi, manongi, patito, moa, kukupa e te au manu ke atu. E āka moni teia au atinga e te maataanga o te taime, ka pou taku moni.

KUA TAUI TE PIPIRIA I TOKU ORAANGA: Toku akamata anga i te apii i te Pipiria, kua kite mai au e ko Iehova te Atua mou anake. Apii katoa mai au e mea riri nana te akamori itoro. (Exodo 20:4, 5; 1 Korinetia 10:14) Mārama mai au eaa taku ka rave. Kua titiri e kua takore pouroa au i taku au itoro e te au apinga te ō maira te akamori itoro. Kua akamutu katoa au i te aere ki te au taunga, e kare au e rave akaou i te au peu tupuna mei te āpare.

Kare i te mea māmā iaku kia rave i teia au tauianga no te mea e 60 tuma oku mataiti. Kua patoi e kua akakoko mai toku au oa, kopu tangata e toku tangata tupu iaku. Inara, kua pure au kia Iehova kia oronga mai i te maroiroi kia rave au i te mea tika. Akapumaanaia au e Maseli 18:​10, tei karanga: “Te ingoa o Iehova ra, e punanga ketaketa ïa: te oro nei te aronga tuatua-tika ki reira, e kua ora iora.”

Tetai akaou ravenga tei tauturu iaku, ko te aere ki te au uipaanga a te Au Kite o Iehova. Kua kite meitaki au i te tu aroa Kerititiano i reira, e kua umere katoa no te mea te tauta ra ratou i te akono i te turanga ngateitei o te Pipiria. Toku kite anga i te reira, kua papu tikai iaku e ko te Au Kite o Iehova te aru nei i te akonoanga mou.

KUA PUPINGAIA AU: Na te aru anga i te au kaveinga Pipiria, kua tauturu iaku kia akameitaki atu i toku pirianga ki taku tamariki. I teianei, kua māmā mai taku apainga. I mua ana, ka pou taku moni ki runga i teia au itoro puapinga kore e kare e meitaki i rauka mai ana. I teia tuatau, te akamori nei au ia Iehova, tei oronga mai i te ravenga meitaki rava atu no te rapakau i ta tatou au manamanata. (Apokalupo 21:3, 4) Te mataora nei au e kare au e tuikaa akaou i te au itoro, mari ra te tavini nei au ia Iehova! Kite mai au e koia toku akapuanga e te paruru mou tikai.

“Kimi Ana Au i te Atua Mei Toku Tamariki Anga.”​—SHINJI SATO

MATAITI ANAU: 1951

ENUA ANAU: TIAPANI

ORAANGA: OROMETUA SHINTO

TOKU ORAANGA I MUA ANA: Kua maata mai au i roto i te oire ko Fukuoka Prefecture. E nga metua akonoanga toku; kua utuutu mai raua iaku mei toku tamariki anga kia akangateitei i te au atua Shinto. Ei mapu tamaiti, e manako putuputu ana au i toku oraanga ma te inangaro maata i te tauturu i te au tangata tei taitaiaia. Maara iaku tetai atianga i te apii tamariki i te ui anga mai te puapii ki te pupu apii e eaa ta matou ka inangaro i te rave me maata ake matou. Papu tikai te inangaro o toku au oa apii, kua inangaro au kia riro ei aronga taineti. Karanga atu au e ko taku e inangaro kia tavini i te Atua. Kua kata aviri mai te katoatoa iaku.

Muri ake i te apii teitei, kua piri atu au ki tetai apii no te au puapii i te pae akonoanga. I te reira tuatau tereni anga, kua aravei au i tetai orometua Shinto tei akapou i tona tuatau va i te tatau i tetai puka kapi kerekere. I tetai rā kua ui mai aia, “Sato, kua kite koe eaa teia puka?” Kua kite ana koe i tona kapi, kua pau atu au, “Te Pipiria.” Karanga mai aia, “Ko tetai ua atu ka inangaro kia riro ei orometua Shinto kia tatau aia i teia puka.”

Kua aere au e kua oko mai i tetai Pipiria naku. Kua tuku au i te Pipiria ki tetai ngai meitaki i runga i taku vairanga puka e kua akono i te reira. Kare ra au i taporoporo taime ana no te tatau i te reira, no te maata oki i te au apii kia tamou. I te akamutu anga au i te apii, kua akamata au i te angaanga i ko i te au ngai tapu ei orometua Shinto. Kua tupu akera taku moemoea mei toku tamariki anga.

Aere ua rai kua kite mai au e ko taku i manako kia riro ei orometua Shinto kare i aite mei taku i tapapa ra. Maata anga o te au orometua kare o ratou inangaro i tetai. Kua ngere katoa te manganui i te akarongo. Kua akakite mai tetai aronga mana kiaku: “Me inangaro koe kia manuia i konei, kia tuatua ua koe i te au manako kite tikai. Kua tureia te tuatua no runga i te akarongo.”

Akatupu akera te reira tuatua i te manako oripu ua kiaku no te akonoanga Shinto. Noatu kua rave atu au i taku angaanga i ko i te au ngai tapu, e kua kimikimi mārama katoa au ki roto i tetai au akonoanga ke. Kare ra tetai o te reira i oronga mai ana i tetai apinga meitaki. Ko te maata atu o te au akonoanga taku e akara ra, kua maata mai toku turanga maromaroa i te reira. Kua manako mai au kare e kitea te tuatua mou i roto i tetai akonoanga.

KUA TAUI TE PIPIRIA I TOKU ORAANGA: I te mataiti 1988, kua aravei au i tetai tangata Buda tei akamaroiroi mai iaku kia tatau i te Pipiria. Kua maara mai iaku i te orometua Shinto i mua ana tei akamaroiroi mai iaku kia rave i te reira. Kua aru au i tana ako anga. Iaku e tatau ra i te Pipiria, kua reka tikai au i te reira. I tetai taime ka tatau au i te po roa e popongi maiata atu me ata mai te ra ki roto i toku maramarama.

Ko taku i tatau kua akakeu iaku kia pure ki te Atua o te Pipiria. Kua akamata au na te aru anga i te pure akaraanga i roto ia Mataio 6:9-13. Kua tuatua taokioki au i teia pure e rua ora—iaku e rave ra i taku angaanga i te ngai tapu Shinto.

E maata taku au uianga no taku e tatau ra. I teia taime kua akaipoipo au, e kua kite ana au e e apii ana te Au Kite o Iehova i te Pipiria no te mea kua aravei mai ana ratou i taku vaine i mua ana. Kua kimi au i tetai o te Au Kite e kua ui i te au uianga kiaia. Umere tikai au e kua taangaanga aia i te Pipiria kia pau taki tai i te reira uianga. Kua akanoonoo aia no te Au Kite kia apii i te Pipiria kiaku.

I muri poto maira, kua aere atu au ki te au uipaanga a te Au Kite o Iehova. Kare au i kite ana i te reira taime, i roto i te Au Kite ko tetai pae tei tuatua akakino ana au ia ratou i mua ana. Noatu rai, kua aravei mai ratou iaku e kua aroa pumaana mai iaku.

I teia au uipaanga, kua apii mai au e te tapapa maira te Atua i te au tane kia aroa e kia akangateitei i to ratou uaorai ngutuare tangata. Tae mai ki te reira atianga, kua akamou au i toku manako ki taku angaanga ei orometua e kare i manako ana i taku vaine e ta maua nga tamariki e rua. Kua taka mai iaku e kua akarongo meitaki i te au tuatua a te au tangata tei aere mai i te akamori i ko i te ngai tapu e kare rava au i akarongo ana i te manako o taku vaine.

Iaku e tere ra ki mua i taku apii, e maata taku i apii mai no runga ia Iehova tei akavaitata iaku kiaia. Kua pakia toku ngakau e teia irava ia Roma 10:13, te karanga ra: “Ko te kapiki i te ingoa o te Atu [ko Iehova] ra, e ora ïa.” No te kimi ana au i te Atua mei toku tamariki anga e i teianei kua kiteaia aia e au!

Kua tupu te manako iiu kiaku i ko i te ngai tapu. Kua manata au i ta tetai pae ka manako me akaruke au i te ngai tapu Shinto. Inara kua akakite ua ana au kiaku uaorai ka akaruke au me kitea e au te Atua mou. No reira i te tuatau tupu anga rau o te mataiti 1989, kua iki au i te aru i toku akava ngakau. Kua akaruke au i te ngai tapu e kua tuku iaku uaorai ki roto i te nga rima o Iehova.

Kare i te mea māmā kia akaruke i te ngai tapu. Kua akakino mai toku aronga mana iaku e kua maro iaku kia noo atu. Inara ko te mea ngata ra ko te akakite anga i te reira ki toku nga metua. Iaku e aere ra ki to raua kainga, kua taitaia maata tikai au e kua mamae toku umauma e te parukaua nei toku nga vaevae! Kua tāpu au e maata te taime i te pure kia Iehova no te maroiroi.

Te tae anga au ki te ngutuare o toku nga metua, i te akamata anga kua mataku au i te tuatua i te reira. Kua pou te ora. I te openga ra ma te pure akatenga kua akamārama au i te tumu ki toku papa. Akakite au kiaia e kua kitea e au te Atua mou e ka akaruke au i te akonoanga Shinto no te tavini Iaia. Kua poitirere toku papa e kua maromaroa. Kua aere mai tetai kopu tangata ki te kainga i te taui i toku manako. Kare au i inangaro kia mamae toku ngutuare tangata, inara i te reira taime, kua kite au ko te tavini anga ia Iehova te mea tau tikai. E aere ua rai, kua akangateitei mai toku ngutuare tangata iaku e taku ikianga.

I te pae kopapa te akaruke anga i te ngai tapu ko tetai mea ïa; kareka ra i te pae manako kua kino tikai. Ko toku oraanga ei orometua te vai ua ra i roto iaku. Kua tauta pakari au i te tangaro i te reira, inara me uri aere au, te vai ra te au akairo no te akamaara mai i toku oraanga o mua ana.

E rua apinga tei tauturu iaku kia akakore i teia au peu. Mea mua, kua kimi meitaki au i roto i toku are i tetai apinga no taku akonoanga o mua ana. E oti kua taʼu i te reira—te au puka, te au tutu, e te au apinga oko maata. Te rua, kua kimi ravenga au kia kapiti atu ki te Au Kite i te au taime ravarai. Riro to ratou pirianga oa e te tauturu ei akamaroiroi maata iaku. Ma te marie kua akamata te peu o toku oraanga o mua i te ngaro mei toku manako.

KUA PUAPINGAIA AU: E akaruke ana au i taku vaine e ta maua tamariki, tei riro ei akamaromaroa iaku. Inara i te akapou anga au te tuatau kia ratou, mei ta te Pipiria e apii ra ki te au tane, kua tupu te pirianga vaitata kia matou. E aere ua rai, kua piri mai taku vaine i te tavini ia Iehova. E pera katoa ta maua tamaiti e ta maua tamaine e tana tane, okotai a matou akamorianga.

Me akamanako au i taku moemoea mei toku tamariki anga no te tavini i te Atua e te tauturu i tetai aronga, kua kite mai au e kua kitea e au taku e kimi ra​—ma te maata atu. Kia akameitaki maataia a Iehova.

[Tutu]

Kua kite meitaki au i te tu aroa Kerititiano i rotopu i te Au Kite o Iehova

[Tutu]

Te ngai tapu Shinto tei akamori ana i mua ana