E Biblia parhudias lengo traio

SOSTAR iek zhuvli kai sas la mai but de 60 borsh meklias le farmichi? Sostar iek rashai sintoista meklias o templo ai kerdilo kristiano? Sar meklias te aliarelpe korkorho iek zhuvli kai dine la te bariaren la? Von si te phenen amenge.

“Chi mai sim phangli kal ikoni” (ABA DANSOU)

KANA ARAKHADILI: 1938

THEM: BENÍN

PA LATE: LUVUDILAS IKONI

SAR SAS MURHO TRAIO: Me arakhadilem ande iek foro tsinorho kai si pasha o pai ando So-Tchahoué. Sar kotse nai droma, le manush zhan po pampuri vai pe iek barka tsigni, train andal mashe, andal gurumnia, le bakriorha, le bale ai aver animaluria. Le khera si andal kash, chik ai univar andal tsigli. Makar ka but manush nai len but love te train, nai but chorimos sar ande iek baro foro.

Kana simas tsinorhi, murho dat tradias amen murha phea ai man ka iek kher kai sikavenas te luvudis kal ikoni, kai si e religion anda amaro foro. La vriamasa astardem te luvudiu ka o del Dudua, o Oduduwa, anda le manush yoruba. Lashardem iek than te kerau sakrifisuria, thavas lenge vuloi vai zetino, puiuria, gulumburia ai aver prame. Javas but love te kerau sa kako.

SAR E BIBLIA PARHUDIAS MURHO TRAIO: Kana astardem te estudiu e Biblia, sikilem ke si numa iek Del chacho, o Jehova, ai ke nai leske drago te luvudis aver dela (Éxodo 20:4, 5; 1 Korintiana 10:14). Fuga dem po gor so trobuvas te kerau. Shudem le ikoni ai sa le prame kai sas man te luvudiu len. Meklem te zhau kal drabarne, te kerau le farmichi kai keren ande murho foro kana varekon merel ai vi te avau kana aver manush kerenas godola prame.

Nas vushoro. Sa murho traio luvudisardem ikoni, mai but de shou var desh borsh. Murhe amiguria, niamuria ai manush kai beshenas pasha mande nas drago lenge godo ai asanas mandar. Manglem katar o Jehova te del man zor te kerau so si vorta. Sode azhutisardias man le suaturia kai si ando Proverbios 18:10! Kotse phenel: “O anau katar o Jehova si iek kher zuralo, o manush o vorta prastel zhi kotse ai arakhel les”.

Vi azhutisardias man te zhau kai chidenpe le marturia le Jehovaske, kai dikhlem murhe iakhentsa o kamlimos chacho le phralengo. Nashtivas te pakiau sa e zor kai thonas pendar te keren so phenel e Biblia pa sar trobunas te train. Aliardem chachimasa ke le marturia le Jehovaske si le chache kristianuria.

SAVO LASHIMOS LEM: O chachimos le Devlesko azhutisardias man te avau mai pashe katar murhe shave. Vi, aliardem sar ankaladem mandar iek baro pharimos. Mai anglal javas but love andel dela kai chi kerenas khanchi pala mande. Akana luvudiu ka o Jehova, kai si te ankalavel sa le bedi la lumiake (Sicharimos [Apokalipsis] 21:3, 4). Chi mai sim phangli kal ikoni, luvudiu ka o Jehova sa murhe ilesa, aliarau ke vo arakhel man ai sim barikani.

“De tsinorhara rodem le Devles” (SHINJI SATO)

KANA ARAKHADILO: 1951

THEM: JAPÓN

PA LESTE: SAS RASHAI SINTOISTA

SAR SAS MURHO TRAIO: Barilem pasha o Fukuoka ando kimpo. Ka murhe dada sas len baro pakiamos, de tsinorhara sikade man te luvudiu dela anda o sintoismo. Ande godia vriama gindivas sar te avau skepime ai sar te azhutiu le manushen kai si len bedi. Serau ke iek data pushle mandar ande escuela che buki kamavas te kerau kana avava baro. Le kolaver tsinorhe phende ke kamenas te aven bare manush sikade. Numa kana me phendem ke kamavas te luvudiu le Devles savorhe asaie mandar.

Kana getosardem e escuela, thodem man te sikiuau sar te sikavau pa religion. Prinzhardem ka iek rashai sintoista ke kana sas les vriama chitolas iek libro kalo. Me gata dikhlemas, ai kana pushlias mandar te avela ke zhanavas so chitolas phendem: “E Biblia”. Ai vo phendias mange: “Kon kamel te avel rashai sintoista trobul te chitol kako libro”.

Fuga gelem te kinau iek Bibia ai thodem la ande iek rig kai savorhe shai dikhenas la. Numa, sas man but prame te kerau ai pala godia nas man vriama te chitou la. Kana getosardem te sikiuau religion astardem te kerau buki sar rashai sintoista ande iek templo. Akana keravas so kamavas de tsinorhara!

Numa dem po gor ke nas so me gindivas. But rasha nas lenge pala le manush. But anda lende nas len pakiamos. Iek anda le bare manush phendias mange: “Te kamesa te zhal tuke mishto, de duma numa pa le ginduria le manushenge. Chi trobus te des duma pa o pakiamos”.

Sa godo dukhadias man but. Makar chi meklem o templo, astardem te rodau aver religionuria. Numa mai rodavas, mai tristo thavas man. Mialas ke chi iek religion sikavelas o chachimos.

SAR E BIBLIA PARHUDIAS MURHO TRAIO: Ando 1988 prinzhardem ka iek budista kai phendias mange te chitou e Biblia. Atunchi serdem mange ke uni borsh mai palpale iek rashai sintoista phendias mange sa iek fialo. Pala godo, kerdem gadia ai astardem te chitou la. Plachaias man but. Univar chitovas zhi ka o kolaver gies, zhi kai anklelas o kham.

So chitosardem kerdias te rhugiu ka o Del la Bibliako sar sikavel Mate 6:9-13. Chi nakhelas dui chasuria ai phenavas kakala suaturia pale, vi kana keravas buki ando templo.

Serau mange ke kana mai chitovas e Biblia, mai prame pushavas man. Ande godia vriama gata simas ansurime ai zhanavas ke le marturia le Jehovaske sikavenas pa e Biblia, ke mai anglal murhi rhomni diasas lentsa. Arakhlem ka iek zhuvli kai sas Marturo ai pushlem latar but prame. So mai plachaias man sas ke sa so pushavas man dias anglal la Bibliasa. Polme rodias aver Marturia te sikaven man pa e Biblia.

Nakhli tsera vriama ai astardem te zhau kai chidenpe. Kotse sas uni Marturia ke de mai anglal chi demas duma lentsa mishto. Numa, von pashile mande ai dine duma mantsa mishto.

Kai chidenpe le marturia le Jehovaske sikilem ke o De kamel ke le ansurime te kamen ai te presnain la familia. Sar keravas but buki sar rashai chi lavas sama mishto katar murhi rhomni ai murhe shave. Dem po gor ke makar ashunavas mishto le manushen kai zhanas ando templo, chi iek data chi ashundem murha rhomnia.

Sode mai sikiuavas mai pashe katar o Jehova aliaravas man. But verseturia aresle mange ando ilo, sar Romanuria 10:13, kai phenel: “Kon godi kai akharel po anav le Devlesko avela skepime”. De tsinorhara rodem le Devles, ai akana arakhlem les.

Manas mange drago te kerau buki ando templo. Makar davas man godi so sas te gindin le kolaver te avela mekavas o sintoismo, me phendemas ke sas te kerau godo te avela arakhavas ka o Del o chacho ande aver rig. Pala godia, kerdem so zhanavas so sas vorta, meklem o templo ando 1989 ai dem murho traio ka o Jehova.

Nas mange vushoro te mekau. Le bare anda o templo nas lenge drago, chachimasa kamenas te beshau. Numa, so sas mange mai pharo sas te phenau ka murhe dada. Kana zhavas lende khere, aliaravas ke dukhalas man o kolin, ai aliaravas murhe punrhe kovle. Trobusardem te aterdiuvau butivar te rhugiu te mangau katar o Jehova te azhutil man.

Kana areslem lende khere darailem, nas mange vushoro te phenau lenge. Polme ke nakhle but chasuria, ai ke rhugisailem but, shai dem duma murhe dadesa. Phendem leske ke arakhlem ka o Del o chacho ande aver religion, ai te luvudiu les, trobuvas te mekau o sintoismo. Vo chi zhanelas so te phenel mange ai thodiaspe defial tristo. Uni niamuria avile mande te parhuvau so gindivas. Chi kamavas te joliavol khonik, numa chi kamavas te mekau so sas vorta: te luvudiu ka o Jehova. La vriamasa, murhi familia respetisardias man pala so alosardem.

Dem po gor, ke makar meklem o templo; vi trobuvas te parhuvau murhe ginduria. Sa murho traio sar rashai sas andre ande murho ilo. Ai makar kamavas te bistrau les, nas mange vushoro.

So azhutisardias man te zhau angle? Dui prame. E pervo sas te kidau ai te phabarau sa le prame kai sas man katar o sintoismo. Sar libruria, patretsi ai aver prame kuchi. E duito prama sas, te nakhau but vriama le Marturentsa. Azhutisardias man te avau lenge amiguria, ai tsirha po tsirha, meklem o traio kai sas man.

SAVO LASHIMOS LEM: Mai anglal chi lavas sama katar murhi rhomni ai katar murhe shave, ai pala godia aliarenaspe korkorho. Numa kana kerdem so phenel e Biblia te avau mai lentsa, astardiam te avas mai kidine. Mai angle, murhi rhomni alosardias te luvudil ka o Jehova mantsa. Agies, sa e familia — amen dui, amaro shau, amari shei ai lako rhom— luvudis kidine ka o Del o chacho.

Kana dau man gogi kana simas tsinorho, ke kamavas te luvudiu le Devles ai ke kamavas te azhutiu le kolavren, dau po gor ke kerdem godo ai mai but. Nai man vorbi te naisiu le Jehovaske.

“Zhanavas chachimasa ke trobulas man aver prama” (LYNETTE HOUGHTING)

KANA ARAKHADILI: 1958

THEM: SUDÁFRICA

PA LATE: ALIARELAS PE KORKORHO AI KE CHI KAMENAS LA

SAR SAS MURHO TRAIO: Arakhadilem ande iek foro tsinorho kai bushelpe Germiston kai nai les but bedi. Murhe dada gindinas ke nashtinas te arakhen man mishto, pala godia kana sas man desh u shtar giesa dine man ka aver familia. Barilem le gindosa ke e familia kai lias man sas murhe chache dada. Kana zhanglem ke nas gadia, astardem te aliarau ke khonik chi kamelas man. Aliaravas ke simas korkorho, ai gindivas ke chi simas anda e familia, ai ke nashtinas te aliaren man.

Kana sas man 16 borsh astardem te zhau murhe amigonentsa ka le birturia te khelau ai te ashunau muzika. Kana sas man 17 borsh gata piavas tsigeri. Sas patretsi pe suako riga kai sikavenaspe zhuvlia slabo kai penas tsigeri ai me kamavas te avau sar lende. Pala e buki, kana sas man 19 borsh mukisailem ando Johannesburgo. Ai ande tsirha vriama kana getolas o kurko, simas chorhe manushentsa, phenavas lashave, piavas pimos ai tsigeri.

Numa, plachalas man te kerau gimnasia aerobica, squash ai futbol. Thodem sa mandar te avau lashi ande informatica. Pala godia but manush zhanenas pa mande. Traivas mishto ai sas man love, but manush gindinas ke sas man iek traio shukar. Numa o chachimos sas: ke aliaravas man jasardi ai ke chi azhukeravas khanchi pa o traio. Sas man sa, numa chi simas barikani. Zhanavas chachimasa ke trobulas man aver prama.

SAR E BIBLIA PARHUDIAS MURHO TRAIO: Kana astardem te sikiuau pa e Biblia, sikilem ke o Jehova si iek Del kamlimasko ai ke pala godia dias amen pesko Suato. E Biblia si sar iek lil kai vo ramosardias te azhutil amen ando traio (Isaías 48:17, 18). Aliardem ke te kamava te lau man pala late, trobuvas te parhuvau but prame.

E pervo prama kai trobusardem te kerau sas, te parhuvau murhe amiguria. Sar phenel Proverbios 13:20, “kon phirel le jarane manushentsa kerdiola jarano, numa kon phirel godolentsa kai chi gindin so keren si te zhal leske nasul”. Chachimasa lem opre godo, ai polme ke meklem le amiguria kai sas man, astardem te pashuvau karing le marturia le Jehovaske.

Numa, e prama kai phari mange sas, te mekau le tsigeri. Thulilem 14 kiluria (30 libri) ande vriama kai kamavas te mekau len. Sa godo kerdias te na aliarau man mishto, ai nakhle desh borsh te slabuvau. Numa godo chi terdiardias man, zhanavas ke trobuvas te mekau le tsigeri. Rhugivas butivar ka o Jehova, ai vo dias man e zor kai trobulas man te mekau len.

SAVO LASHIMOS LEM: Pervo, aliarau man mai mishto, chi mai sim gadia de nasuali. Ai sim veselime le pramentsa kai si man. Chi mai rodau e veselia ande iek bari buki, te prinzharen man le manush vai ande le love. Murhe rhomesa, sikavas o chachimos la Bibliako, ai godo veselil murho ilo, ai vi azhutisardem te luvudin ka o Jehova trinen zhuvlian kai kerenas buki mantsa. Aver prama si ke, mai anglal te meren le dada kai bariarde man, shai dem duma lentsa pa kana le manush zhuvindina pe Phuv te train ande iek paraiso.

Akana, te aliarau man pasha o Del, chi mai aliarau man korkorho ai ke chi kamen man. Akana aliarau man anda e familia anda sa e lumia katar le marturia le Jehovaske, kai si man dea, dada, phral ai phea (Marko 10:29, 30).

[Patreto]

Ande le marturia le Jehovaske dikhlem o kamlimos chacho katar le kristianuria

[Patreto]

Templo kai luvudivas kana simas sintoista