Bible kwete kushintula bantu

BUAKINYI ungi muana mukashi baadi na bipua bikile pa 60 baadi mulekie kulanguila ma nkishi? Nkinyi kibaadi kikuashe ungi mukata a kipuilo kia Shinto bua’shi alekie mudimo waye, na afikie mulungudi a mukandu wi buwa? Mmushindo kinyi ubaadi ungi muana mukashi abaabadi bakushe kui bangi bantu bashi baledi baye mukambile binangu bia kuipusha bu’shi mbamusumbushene? Badika ino miisambo bua kumona abiakula bano bantu.

“Ntshi ki dingi ku bupika bua ma nkishi.”​—ABA DANSOU

MUTANDIKUE MU: 1938

EUMBO DIABO: BÉNIN

BAADI: ALANGUILA MA NKISHI

BINAADI KALA: Nadi mukudile mu So-Tchahoué, mu kibundi kibaadi na mema ebungi pepi n’eshiba. Mudimo wa bantu ba mu kiakia kibundi ngua kuloba mishipa, kumuna ngombe, mbushi, mikooko, ngulube mpa na tonyi. Takui mashinda ebuwa mu kiakia kipindi, nyi buakinyi bantu abafubishaa ma bato na buato bua kuenda ingi mbalo. Abebakaa mashibo na mitshi na nsonyi, na bangi abebakaa na matafuadi. Bantu bebungi mbalanda. Anka, takui buntomboshi bukile bungi bu abikalaa mu bibundi bikata nya.

Panaadi muana mukinga, papa baadi muitutume na tata ande mu mbalo yabalongieshaa bantu bia kubuka na mianda ya ba demo. Panadi mukule, nabangile kulanguila Dudua (Oduduwa) efile a bantu ba ku Yoruba. Nadi muibakiile yawa efile nshibo, na misango ibungi nadi namulambula bintu bilekenelekene bu bipama, muimu wa ngashi, nnonda, nsolo, nkudimba, na ingi nyema ilekenelekene. Bino bintu bibaadi muulo wi bukopo, na bibaadi abimpu makuta oso anadi nao.

MUSHINDO UBAADI BIBLE MUALUULE NSHALELO ANDE: Panambangile kulonga Bible, namuene’shi nka Yehowa nyi muikale Efile Mukulu a binyibinyi. Nadi mulongie dingi’shi takuminaa tulanguile ma nkishi. (Efilu 20:4, 5; 1 Bena-Kodinda 10:14) Nadi mumone kiandia kukita. Biabia, nansumbuile ma nkishi ande oso, na nankatuishe mu nshibo muande kintu kioso kibaadi akipushena na lulanguilo lua ma nkishi. Nandekiele mianda ya kupaka manga, na kutuelakana mu bingi bipikua mpa na bipikua bia maalo.

Bu bitanadi na bipua bikile pa 60, tabibaadi bibofule bua kuleka yaya mianda nya. Ba kuku, bakuetu na bantu ba mu kibundi kietu babaadi bantombokiele, na nkubanga kunsepa. Kadi nadi mutekie Yehowa bua’shi ampe bukome bua kukita mianda ibuwa. Mukanda wa Nkindji 18:10 ubaadi unyingishe ngofu, awamba’shi: “Eshina dya Yehowa nyi épata dilamibwe. Muntu mululame ekusukilaa bwa kupanda.”

Ungi muanda ubaadi unkuashe nkutuela kua mu bisangilo bia ba Temue ba Yehowa. Kuakua, namuene kifulo kia bena Kidishitu, na nadi mukaanye muanda bano bantu abetatshishaa bua kulonda miiya ya mu Bible. Mianda ibammuene ibaadi inkuminyishe’shi ba Temue ba Yehowa be mu kipuilo kia binyibinyi.

MILOO YANDI MUPETE: Kukookiela mayi a kulonda a mu Bible nkunkuashe bua kulumbula kipuano kiande na bana bande. Na dingi, napusha nka bu’shi bushito bukata bubankatuka ku mapampa. Nadi napudisha bupeta buande ku ma nkishi ash’aakula, na taabaadi ampe kintu sunga nkimune. Kadi lelo uno nkuete kulanguila Yehowa, aye bampa lukulupilo lua’shi akapudisha makienga etu oso. (Kibafumbwilwe 21:3, 4) Ne na muloo wibungi muanda ntshi ki dingi ku bupika bua ma nkishi, anka binobino ne mpika a Yehowa! Kuadi, ne mupete kukaluilua na bulami bua binyibinyi.

“Nambangile kukimba Efile Mukulu kubanga ku bukinga.”​—SHINJI SATO

MUTANDIKUE MU: 1951

EUMBO DIABO: JAPON

BAADI: MUKATA A KIPUILO KIA SHINTO

BINAADI KALA: Nadi mukudile mu kibundi kia Fukuoka. Baledi bande babaadi bafule kulanguila bikile, na kubanga ku bukinga babaadi bandongieshe bia kutshina b’efile ba bena Shinto. Kubanga ku bukinga, nadi nele binangu misango ibungi pabitale kipandilo kiande, na nadi na lukalo lui bukopo lua kukuasha bantu abakiengie. Nantentekiesha panadi ku kalasa ka primere, mulongieshe etu baadi muitupushe dingi efuku’shi enukakitshi p’akulu. Bena kalasa nami babaadi na bipatshila bilekenelekene, bu kuikala bena siyanse. Kadi ami nakuile’shi nankumina kufubila Efile Mukulu. Bantu boso nkunsepa.

Kunyima kuami kupudisha tulasa tua sekondere, natuelele mu kalasa kabalongaa bia kulambukisha mu kipuilo. Panambangile kulonga, nanfumankene na mukata a kipuilo kia Shinto baadi abadika ungi mukanda ubaadi na kipusu kifiita mu nsaa yaye ya kuikisha. Dingi efuku bangipuishe’shi, “Sato, ouku uno mukanda su?” Panamuene kipusu kiao namulunguile’shi “Bible.” Aye nkuamba’shi: “abitungu muntu oso akiebe kufika mukata a kipuilo kia Shinto abale uno mukanda.”

Musango umune nangile, ami kuula Bible. Namutudile pa mbalo ibuwa yantulaa mikanda yande, na ami nkumulama kalolo kakile. Anka, ntshimumubadikie nya, muanda nadi na bibungi bia kukita. Panampuile kalasa, nambangile kufuba bu mukata a kipuilo kia Shinto. Kepatshila kande ka ku bukinga kabakumbene.

Kadi mafuku apela kunyima, namuene’shi kuikala mukata a kipuilo kia Shinto takubaadi biabia biankulupilanga nya. Bakata bebungi tababaadi bafule bantu, na tababaadi abebatala nya. Bebungi tababaadi na lukumino nya. Dingi efuku, ungi mukata ande bandunguile’shi: “Pano su okiebe kuenda kumpala, abitungu okule nka penda mianda ya filozofi. Kuisambila mianda ya lukumino nkupedibue.”

Biabia bishima bibaadi bintakula bua’shi ntshimonanga kipuilo kia Shinto bu binadi nampuandikisha. Sunga biekala’shi nantungunukile na kukita mudimo wande kuakua, nambangile kukimba bua kuuka mianda ya bingi bipuilo. Anka, ntshimupete sunga nkimune ki na mianda ibuwa. Panadi nende na kutalula mianda ya bipuilo bilekenelekene, bibaadi abinyisha kumbofusha. Namuene’shi takui kipuilo sunga nkimune ki na bia binyibinyi.

MUSHINDO UBAADI BIBLE MUALUULE NSHALELO ANDE: Mu kipua kia 1988, nanfumankene na ungi muntu a mu kipuilo kia Buddha baadi mmunyingishe bua kubadika Bible. Paapa, ami nkutentekiesha mukata a kipuilo kia Shinto baadi mmunyingishe namu bua kukita biabia. Namuene’shi bibuwa kutumikila diadia elango. Panambangile kubadika Bible, musango umune nambangile kumufula. Angi mafuku nadi namubadika bufuku bushima mpa na p’abutooko.

Mianda inadi mubale ibaadi intakule bua’shi nsambile Efile Mukulu a binyibinyi. Nambangile na luteko lua kileshesho lui mu Mateo 6:9-13. Nadi nambuula luno luteko kunyima kua nguba ibidi yoso​—sunga panadi nankitshi midimo yande ku kipuilo.

Nadi na nkonko ibungi pabitale mianda inadi nabadika. Mu aa mafuku nadi mupue kuibakila, na nadi nauku’shi ba Temue ba Yehowa abalongieshaa bantu Bible, muanda babaadi abesamba na mukashi ande kala. Nankimbile umune a kuabadi, na ami nkumuela nkonko ibungi. Nadi mukaanye bikata muanda baadi afubisha Bible bua kualula ku lukonko loso. Yawa muana mukashi batshile mpango ya’shi ba Temue balume bafikie mu kulonga nami Bible.

Kunyima kua mafuku apela, nambangile kutuela mu bisangilo bia ba Temue ba Yehowa. Mu aa mafuku, ntshinadi muukie’shi mankatshi muabo mubaadi bangi banshinadi mukitshine mianda na kalolo. Sunga mbiabia, babaadi bankukiile bibuwa na abo nkunkitshina mianda na kalolo koso.

Mu biabia bisangilo nadi mulongie’shi Efile Mukulu atekie balume bua’shi bafule na kunemeka bena kifuko kiabo. Mpa na aa mafuku, nadi muipane ku mudimo wande wa bu mukata a kipuilo, na dingi, ntshinadi natala mukashi ande na bana bande nya. Nambangile kumona’shi nadi natemesha na kalolo bantu babaadi abafiki ku kipuilo mu kulanguila, anka ntshinadi natemesha mukashi ande nya.

Panadi nende na kulonga, nangukile mianda ibungi itale Yehowa ibaadi inkuashe bua kuisesela pepi naye. Verse baadi munkume kuishimba ngofu mmukanda wa Bena-Loma 10:13, awamba’shi: “Yawa edidi eshina dya Yehowa apanda.” Nambangile kukimba Efile Mukulu kubanga ku bukinga, anka, binobino, namupetele!

Nambangile kumona’shi abitungu ntukie mu kipuilo. Ku mbangilo, nadi nekalakasha bua bibaadi bangi balombene kuakula su natuku mu kipuilo kia Shinto. Anka, nadi nakula’shi nakatuka su napete Efile Mukulu a binyibinyi ingi mbalo. Biabia, mu kipua kia 1989, natshile kitshibilo kia kutemesha kondo kande k’eshimba. Nankatukile mu Shinto, ami nkuipana kui Yehowa.

Kutuuka mu kipuilo takubaadi kubofule nya. Bakata ba kipuilo babaadi bansashile, na abo nkutompa kunkitshisha bua’shi ntshikatukanga. Kadi muanda ubaadi ukile bukopo, nkulungula baledi bande kiakia kitshibilo. Panadi nende kuabadi, bibaadi binkalakashe ngofu kuishimba na mikolo nkungiela bushito. Nangimene misango ibungi muishinda bua kuteka Yehowa bua’shi ampe bukome.

Pananfikile kui baledi bande, ku mbangilo nadi na moo wibungi bua kuibalungula wawa muanda. Nsaa ibungi ibakidile, kadi kunyima kuami kusambila ngofu, nandunguile papa mianda yoso. Namulunguile’shi nampete Efile Mukulu a binyibinyi, n’ashi nantuku mu kipuilo kia Shinto bua’shi nkamufubile. Bibaadi bikalakashe papa ngofu, aye nkuinyongola. Bangi bena kifuko kietu babafile ku nshibo, na abo nkutompa kushintula binangu biande. Ta nkuminanga kuinyongosha bena kifuko kiande nya, anka nangukanga’shi kufubila Yehowa ndio muanda wibuwa wandia kukita. Muenda mafuku, bena kifuko kietu bababangile kunemeka kitshibilo kiande.

Sunga mbinadi mukatukie mu kipuilo kia Shinto, bibaadi abitungu’shi nshintule binangu biande. Nshalelo a bu mukata a kipuilo baadi mupue kumena mishi munda muande. Nadi muitatshishe bua’shi ndube yaya mianda, anka, koso kunadi nende kubaadi bintu bibaadi abintentekiesha nshalelo ande a kala.

Kui mianda ibidi ibaadi inkuashe bua kukatuka ku buabua bupika. Wa kumpala, nankimbile mu nshibo muande kintu kioso kibaadi mu kuipushena na lulanguilo luande lua kala. Nadi muibiele bioso kaalo​—mikanda, ma foto, mpa na bingi bintu bia makuta ebungi. Wa kabidi, nakimbile bua kuikala nankisha nsaa ibungi pamune na ba Temue ba Yehowa. Bu kuku buabo na kunyingisha kuabo bibaadi binkuashe ngofu. Ku kapela kapela, nambangile kuluba yaya mianda yande ya kala.

MILOO YANDI MUPETE: Kumpala tankambanga kutala mukashi ande na bana bande nya, na bino bibaadi abikitshi bua’shi bepushe bupenka. Kadi panambangile kukisha nabo nsaa pamune, anka bikale Bible atekie balume bua kukita, tubafikile mu buumune. Kunyima, mukashi ande babangile kufubila namu Yehowa. Atue boso pamune na muanetu mulume, mpa na muanetu mukashi na mulume aye, tui mu buumune mu lulanguilo lua binyibinyi.

Nsaa yanangushena pabitale lukalo luande lua ku bukinga lua kufubila Efile Mukulu na kukuasha bangi bantu, namono’shi ne mupete bioso biankimbanga, ne mupete kukila mpa na paapa. Ne na lutumbu lukata kui Yehowa.

“Nadi nauku’shi kui kintu kampanda kiandi mukutue.”​—LYNETTE HOUGHTING

MUTANDIKUE MU: 1958

EUMBO DIABO: AFRIQUE DU SUD

BAADI: EPUSHA’SHI BALEDI BAYE MBAMUSUMBUSHENE

BINAADI KALA: Ne mutandikue mu kibundi kia Germiston muababundulaa mabue a muulo, na mushi mianda ya buntomboshi ibungi. Bu bibaadi baledi bande bakutue mushindo wabadia kunkusha, babaadi bantule bua’shi bakankushe kui bangi bantu. Nadi penda na mafuku 14 pababaadi bangate kui ungi mulume na mukashi aye be na kifulo, na nambangile kuibata bu baledi bande. Anka, kunyima kuami kuuka’shi bantu ba bisumanga ndio babaadi bankushe, bibaadi binkalakashe ngofu. Nambangile kumona’shi bano ta mbaledi bande, n’ashi tabakuete kumpushisha nya.

Panadi na bipua 16, nambangile kuenda mu ma bare, mubatudi atushi masha na kutemesha miziki na benami. Panankumbeshe bipua 17, nambangile kutoma nfuanka. Nadi nakumina kuikala na mbidi ipela nka bantu abatomaa nfuanka bababaadi abalesha bua kukita piblisite. Panankumbeshe bipua 19, nambangile kufuba mu kibundi kia Johannesburg, nadi mu kipuano na ba kuku be bubi. Mu mafuku apela, nambangile kuakula buakulakule, kutoma nfuanka ebungi, na kutoma maalua ku mpuilo a lubingo.

Sunga mbiabia, nadi nka na mbidi bukome. Nadi nakitshi kalashishi ka mbidi misango ibungi na kuasha ndundo ya bana bakashi na angi maasha. Dingi, nadi muipane ku mudimo wande ngofu, na ami nkuukibua ngofu bua binangu biande mu kompanyi a ma ordinatere. Nyi buakinyi nadi na bintu bibungi, na bantu babaadi abamba’shi ne mobeshe nshalelo. Anka, tangikalanga na muloo nya​—namonanga nka bu’shi nemushimine n’ashi nshalelo takuete kunsankisha. Munda muande, nadi nauku’shi kui kintu kampanda kiandi mukutue.

MUSHINDO UBAADI BIBLE MUALUULE NSHALELO ANDE: Panambangile kulonga Bible, namuene’shi Yehowa nyi Efile Mukulu a kifulo. Nadi mulongie dingi’shi Yehowa baadi muleshe kiakia kifulo kiaye paye kuitupa Eyi diaye Bible. Bi nka bu’shi baadi muitufundile mukanda bua kuitukunkusha. (Yeeshaya 48:17, 18) Namuene’shi bua’shi Yehowa ankunkushe, abitungu nshintule mianda ibungi mu nshalelo ande.

Umune wa ku yaya mianda ubaadi utale ba kuku bande. Nadi muele binangu ngofu pabitale mukanda wa Nkindji 13:20 awamba’shi: “Su otemba na basha binangu, obe namu okekala nabyo. Anka, su otemba na balotakane, okamono malwa.” Diadia eyi dia kulonda dibaadi dinkuashe bua kuleka ba kuku bande ba kala, ami nkukimba ba kuku bapia munkatshi mua ba Temue ba Yehowa.

Lukalakashi lukata lubaadi lua kuleka kutoma nfuanka, muanda nekalanga ku bupika bua kutoma nfuanka. Panambangile kukambila luno lukalakashi ku kapela kapela, nadi mufumankane na lungi. Kuleka kutoma nfuanka kubaadi kukite bia’shi ntame bikile na mpete 13.6 kg ya panundu! Bibaadi binkalakashe ngofu, na bibaadi bangate bipua bifikie ku 10 bua’shi neyishimishe. Anka, nadi nauku’shi kuleka kutoma nfuanka nyi kubaadi muanda wibuwa wa kukita. Nadi natekie Yehowa nsaa yoso, na baadi mumpe bukome bua kuleka kutoma nfuanka.

MILOO YANDI MUPETE: Binobino ne na mbidi bukome. Ne na muloo​—na tandondaa dingi binangu bia madimi bia’shi kuikala na mudimo, kuikala muntu mukata na kuikala na bupeta bui bungi nyi akupaa muntu muloo. Anka nampetaa muloo nsaa yandungula bangi bantu mianda ya binyibinyi ya mu Bible. Lelo uno, ba kuku bande basatu ba kala bakuete kufubila Yehowa, pamune na mulume ande n’ami nabene. Kumpala kua’shi baledi bande babaadi bankushe bafue, nadi muibalungule pabitale mulayilo wa mu Bible wa lusangukilo mu mpaladiso pa nsenga.

Kuisesela pepi na Yehowa nkunkuashe bua kukambila binangu bia kuipusha bu’shi mbansumbushene. Yehowa mmunkuashe bua kumona’shi ta mbansumbushene nya, kadi ne mu kifuko kia bakuetu bena Kidishitu ki mu nsenga ishima. Munkatshi muabo ne na banshanyi, banyinami, bakuetu balume na bakuetu bakashi bebungi.​—Maako 10:29, 30.

[Foto]

Munkatshi mua ba Temue ba Yehowa, ne mumone kifulo kia bena Kidishitu

[Foto]

Kipuilo kia Shinto kunadi nandanguila kala