Bijbel e kenki sma libi

FU SAN EDE wan uma di ben pasa 60 yari kaba, tapu nanga na anbegi fu kruktugado? San meki taki wan Syinto priester gowe libi a wroko fu en na wan tempel fu tron wan Kresten dinari? San wan uma di sma teki leki den eigi pikin di a ben de wan beibi, ben du fu no firi moro leki en trutru papa nanga mama no wani en? Luku san den sma disi abi fu taki.

„Mi no de wan srafu moro fu kruktugado.”​—ABA DANSOU

A GEBORE NA INI 1938

KONDRE: BENIN

A BEN DE WAN SMA DI BEN E ANBEGI KRUKTUGADO

A LIBI FU MI FOSI: Mi gro kon bigi na ini So-Tchahoué, wan dorpu di de na ini wan kontren pe furu tokotoko de, krosibei fu wan liba. Den sma fu a dorpu ben e du fisiwroko, den ben e kweki kaw, krabita, skapu, agu, nanga fowru. A kontren dati no abi pasi èn dati meki sma e waka nanga boto. Den sma gwenti bow den oso nanga udu èn grasi, aladi sonwan e bow nanga ston. Moro furu fu den sma na ini a kontren dati, pôti. Ma toku ogridu no lai so neleki na ini den foto.

Di mi ben de wan pikin, mi papa seni mi nanga mi sisa go na wan fetisj klooster pe wi ben kisi leri na ini a bribi fu a kulturu fu wi. Di mi kon bigi, dan mi teki Dudua (Oduduwa) fu a Yoruba kulturu, leki mi gado. Mi bow wan gado-oso gi a gado disi pe mi ben gwenti tyari ofrandi soleki yamsi, palm-oli, pakro, fowru, doifi èn difrenti tra meti. Nofo tron den ofrandi disi ben kaba ala mi moni fu di den ben diri.

A FASI FA BIJBEL KENKI MI LIBI: Di mi bigin studeri Bijbel, mi kon sabi taki Yehovah na a wan-enkri tru Gado. Mi kon sabi tu taki a no e feni en bun te wi e gebroiki popki na ini na anbegi (Exodus 20:4, 5; 1 Korentesma 10:14). Mi ben frustan san mi ben musu du. Sobun, mi trowe ala den popki fu mi gowe èn mi puru ala sani na ini mi oso di ben abi fu du nanga na anbegi fu kruktugado. Mi no ben go moro na lukuman èn mi no ben teki prati moro na sani di den sma drape gwenti du na ini na anbegi fu den èn na beri.

Leki wan uma di pasa 60 yari, a ben muilek gi mi fu tyari den kenki disi kon. Den mati fu mi, den famiri fu mi nanga den birtisma ben e gens mi, èn den ben spotu mi. Ma mi begi Yehovah fu gi mi a krakti fu du san reti. Den wortu fu Odo 18:10 trowstu mi. A tekst disi e taki: „A nen fu Yehovah na wan tranga toren. Na drape den reti-ati sma e lon go na ini èn den e kisi kibri.”

Wan tra sani di yepi mi, na den gemeente konmakandra fu Yehovah Kotoigi. Drape mi ben ondrofeni Kresten lobi èn a naki mi ati fu si fa den sma disi e pruberi fu libi soleki fa den hei markitiki fu Bijbel e taki. Den sani di mi si gi mi na overtoigi taki Yehovah Kotoigi abi a tru bribi.

 DEN WINI DI MI KISI: Fu di mi fiti Bijbel gronprakseri na ini mi libi, meki mi kon de moro bun nanga den pikin fu mi. Mi e firi tu neleki wan hebi komoto na mi tapu. Mi ben e gwenti fu gi ala mi moni fu anbegi kruktugado di no abi libi èn di no e tyari nowan wini kon gi mi. Now mi e anbegi Yehovah di o tyari wan lusu kon na ala wi problema fu ala ten (Openbaring 21:3, 4). Mi breiti srefisrefi taki mi no de wan srafu moro fu kruktugado, ma na presi fu dati mi e dini Yehovah! Fu di mi e dini en, meki sani e waka bun nanga mi èn mi e kisi kibri.

„Mi ben e suku Gado sensi di mi ben de wan pikin.”​—SHINJI SATO

A GEBORE NA INI 1951

KONDRE: YAPAN

A BEN DE WAN SYINTO PRIESTER

A LIBI FU MI FOSI: Mi gro kon bigi na wan foto na ini a Fukuoka distrikt. Mi papa nanga mi mama ben de fayafaya anbegiman, èn sensi di mi ben pikin den leri mi fu anbegi den Syinto gado. Di mi ben de wan pikin boi, dan nofo tron mi ben e prakseri fa mi ben o kisi frulusu èn mi ben abi na angri fu yepi sma di ben de na ini problema. Mi e memre wan leisi di mi ben de na lagiskoro, dan a skoromeester aksi den pikin na ini mi klas san den ben wani tron te den kon bigi. Den pikin ben taki krin san den ben wani tron, soleki fu tron sabiman. Mi ben taki dati mi ben wani dini Gado. Ala den pikin lafu mi di mi taki a sani dati.

Di mi klari middelbaar skoro, dan mi go na wan skoro fu tron wan kerki leriman. Di mi ben teki leri na a skoro dati, dan mi miti wan Syinto priester di ben e leisi wan buku nanga wan blaka kafti na ini en fri ten. Wan dei a aksi mi: „Sato, yu sabi san na a buku disi?” Mi si san ben skrifi na tapu a kafti èn mi taigi en: „Na Bijbel.” A taki: „Ibri sma di wani tron wan Syinto priester musu leisi a buku disi.”

Mi go bai wan Bijbel wantewante. Mi poti a Bijbel na wan spesrutu presi na ini mi bukukasi èn mi ben sorgu taki noti no pasa nanga en. Ma mi no ben meki ten fu leisi en fu di mi ben abi furu fu du na skoro. Di mi klari a skoro, dan mi bigin wroko na wan tempel leki wan Syinto priester. A sani di mi ben wani du sensi di mi ben pikin, ben kon tru.

Ma heri esi mi kon si taki a libi fu wan Syinto  priester no ben de san mi ben fruwakti. Moro furu fu den priester no ben sori lobi èn den no ben broko den ede nanga trawan. Furu fu den no ben abi bribi tu. Wan fu den priester di ben de moro hei leki mi ben taigi mi srefi: „Efu yu wani meki en dyaso, dan yu musu taki soso fu filosofia. Yu no mag taki fu bribi.”

Mi ben kon bruya, fu di mi no ben fruwakti fu yere den sortu sani dati na ini a Syinto bribi. Aladi mi ben tan wroko na a tempel, toku mi bigin ondrosuku tra bribi. Ma nowan fu den ben man leri mi moro bun sani. O moro mi ben ondrosuku den difrenti bribi, o moro mi ben lasi-ati. Mi ben denki taki nowan bribi tru.

A FASI FA BIJBEL KENKI MI LIBI: Na ini 1988, mi miti wan sma fu a Buda bribi di gi mi deki-ati fu leisi Bijbel. Mi ben denki a Syinto priester di ben gi mi deki-ati fu du a srefi sani tu furu yari pasa. Na so mi bosroiti fu du san den taki. Di mi bigin leisi Bijbel, dan heri esi mi bigin lobi san mi leisi. Sontron mi ben leisi en heri neti teleki son ben opo èn a bigin skèin kon na ini mi kamra.

Den sani di mi ben leisi ben meki mi wani begi a Gado fu Bijbel. Mi bigin taki a begi di skrifi na ini Mateyus 6:9-13. Mi ben taki a begi disi ibri tu yuru, srefi te mi ben e du mi wroko na ini a Syinto tempel.

Mi ben abi furu aksi fu den sani di mi ben e leisi. Na a ten dati mi ben trow èn mi ben sabi taki Yehovah Kotoigi e leri sma fu Bijbel fu di den ben fisiti mi wefi kaba. Mi go suku wan fu den Kotoigi èn mi poti wan lo aksi gi en. Mi ben fruwondru di a gebroiki Bijbel fu gi piki tapu ibriwan fu den aksi fu mi. A seti sani so taki den Kotoigi ben kan studeri Bijbel nanga mi.

Syatu baka dati, mi bigin go na den konmakandra fu Yehovah Kotoigi. Mi no ben sabi taki na ini a ten di pasa, mi ben handri grofu nanga wan tu fu den Kotoigi di ben de drape. Ma toku den ben taki mi odi na wan switifasi èn den ben gi mi wan switikon.

Na den konmakandra dati, mi leri taki Gado e fruwakti taki wan masra musu sori lobi èn lespeki gi den sma fu en osofamiri. Te na a ten dati, mi ben poti so furu prakseri na a wroko di mi ben abi leki priester, taki mi no ben abi ten gi mi wefi nanga den tu pikin fu wi. Mi kon si taki mi ben arki den sma bun di ben kon na a tempel fu anbegi, ma noiti mi ben arki san mi wefi ben taki.

Di mi studeri go doro, mi leri furu sani fu Yehovah di meki mi kon krosibei na en. A ben naki mi ati trutru di mi leisi tekst soleki Romesma 10:13, di e taki: „Ala sma di e kari a nen fu Yehovah, o kisi frulusu.” Mi ben e suku Gado sensi di mi ben de wan pikin, èn now mi feni en!

Mi bigin firi taki a tempel no ben de gi mi moro. Na a bigin, mi ben broko mi ede nanga san tra sma ben o denki fu mi efu mi ben o gowe libi a Syinto bribi. Ma ala ten mi ben taki na misrefi taki mi ben o gowe libi a Syinto bribi efu mi ben feni a tru Gado na ini wan tra bribi. Sobun, na a bigin fu 1989, mi bosroiti fu du san mi konsensi ben taki. Mi gowe libi a tempel èn mi go dini Yehovah.

A no ben makriki fu gowe libi a tempel. Den sma di ben hei moro mi leki priester, ben atibron èn den ben pruberi fu dwengi mi fu tan. Ma a ben moro muilek fu go fruteri mi papa nanga mama fu a bosroiti di mi teki. Di mi ben de na pasi fu go na den oso, mi ben frede so te taki mi borsu bigin hati mi èn mi futu ben kon swaki! Furu leisi mi stop na pasi fu begi Yehovah fu a gi mi krakti.

 Di mi doro na a oso fu mi papa nanga mama, dan na a bigin, mi ben frede fu fruteri den a tori. Wan tu yuru pasa èn te fu kaba di mi begi furu leisi, mi fruteri mi papa ala sani. Mi taigi en taki mi ben feni a tru Gado èn taki mi ben o gowe libi a Syinto bribi fu dini En. Mi papa skreki srefisrefi èn a ben sari. Tra famiriman kon na a oso èn den pruberi fu kenki mi prakseri. Mi no ben wani hati den firi fu mi famiri, ma na a srefi ten mi ben sabi taki a yoisti sani di mi ben musu du na fu dini Yehovah. Baka di mi teki a bosroiti disi, mi famiri ben abi lespeki gi mi te fu kaba.

Aladi mi no ben go moro na a tempel, toku mi ben musu kenki a fasi fa mi ben e denki fu sani. A libi di mi ben abi leki priester ben rutu dipi na ini mi. Mi ben du tranga muiti fu frigiti den sani dati, ma a ben gersi leki na ala sei pe mi ben luku, sani ben de di ben memre mi na a libi fu mi fosi.

Tu sani de di yepi mi. A fosi sani di mi du, na taki mi suku iniwan sani na ini a heri oso di ben abi fu du nanga a bribi fu mi fosi. Dan mi bron ala den sani dati, soleki buku, fowtow èn srefi diridiri sani. A di fu tu sani di mi du, na taki mi suku iniwan okasi di mi ben kan feni fu abi demakandra nanga den Kotoigi. A matifasi di mi ben abi nanga den èn a fasi fa den ben horibaka gi mi ben yepi mi trutru. Safrisafri mi kon frigiti a libi fu mi fosi.

DEN WINI DI MI KISI: Mi no ben e poti prakseri na mi wefi nanga den pikin fu mi èn a sani disi ben meki den firi sari. Ma di mi bigin du sani makandra nanga den, soleki fa Bijbel e leri masra, dan wi kon de moro bun nanga makandra. Bakaten, mi wefi bigin dini Yehovah makandra nanga mi. Now mi manpikin, èn mi umapikin nanga en masra de na ini a tru anbegi tu.

Te mi e denki mi yongu yari di mi ben wani dini Gado èn yepi sma, dan now mi e kon si taki mi abi ala sani san mi ben wani èn moro leki dati srefi. Mi no man taki Yehovah tangi nofo gi ala den sani disi.

„Mi ben sabi taki wan sani ben misi.”​—LYNETTE HOUGHTING

A GEBORE NA INI 1958

KONDRE: ZUID-AFRIKA

A BEN E FIRI LEKI EN PAPA NANGA MAMA NO BEN WANI EN

A LIBI FU MI FOSI: Mi gebore na ini Germiston, wan foto di no ben pôti, pe furu sma ben e wroko na ini mijn èn pe furu ogridu no ben de. Fu di mi mama nanga mi papa ben feni taki den no ben o man sorgu mi, meki den bosroiti fu meki tra sma teki mi leki den pikin. Di mi ben de wan beibi fu tu wiki nomo, wan lobi-ati trowpaar teki mi leki den pikin èn mi ben si den leki mi papa nanga  mama. Ma di mi kon sabi san ben pasa di mi ben de wan beibi, dan mi ben kisi a firi taki mi trutru papa nanga mama no ben wani mi. Mi bigin feni taki mi no ben de wan trutru pikin fu a trowpaar di teki mi leki den pikin èn mi ben feni taki den no ben frustan mi trutru.

Di mi ben de sowan 16 yari, mi bigin go na bar pe mi nanga den mati fu mi ben e dansi èn arki poku. Di mi ben abi 17 yari, mi bigin smoko sikaret. Mi ben wani mangri leki den uma di ben meki reklame gi sikaret. Di mi tapu 19 yari, mi bigin wroko na ini Johannesburg èn esi-esi mi bigin abi demakandra nanga sma di no ben bun. A no teki langa fosi mi bigin taki dotitaki, smoko bun furu èn dringi bun furu sopi tapu satra nanga sonde.

Ma toku mi ben gwenti du sport. Mi ben du gymnastiek èn mi ben prei bal nanga tra sport. Mi ben wroko tranga tu fu meki en na ini a computer bisnis. Na so mi ben kon abi moni èn sma ben feni taki mi meki en na ini a libi. Ma fu taki en leti mi no ben de koloku, mi no ben de tevrede nanga mi libi èn mi no ben sabi san fu du. Na ini mi ati mi ben sabi taki mi ben misi wan sani na ini mi libi.

A FASI FA BIJBEL KENKI MI LIBI: Di mi bigin studeri Bijbel, mi leri taki Yehovah na wan Gado fu lobi. Mi leri tu taki a sori a lobi dati fu di a gi wi en Wortu, Bijbel. A de neleki a skrifi wan brifi gi wi fu tiri wi na ini wi libi (Yesaya 48:17, 18). Mi kon frustan taki efu mi ben wani kisi wini fu a lobi-ati tiri fu Yehovah, dan mi ben musu tyari bigi kenki kon na ini mi libi.

Wan sani di mi ben musu kenki ben de den mati fu mi. Mi ben denki dipi fu den wortu di skrifi na ini Odo 13:20. A tekst dati e taki: „Te wan sma e waka nanga koni sma, dan ensrefi o kon koni, ma te wan sma e waka nanga don sma, dan sani no o waka bun gi en.” A gronprakseri dati yepi mi fu libi den owru mati fu mi èn fu meki nyun mati nanga sma di de Yehovah Kotoigi.

A moro bigi tesi ben de fu tapu nanga smoko fu di mi ben gwenti smoko bun furu. Safrisafri mi ben man tapu nanga smoko, ma mi kisi fu du nanga wan tra problema. Fu di mi no ben smoko sikaret moro, meki mi kon fatu. Mi kon 13,6 kilo moro hebi! A sani dati ben meki mi no firi warti moro èn a ben teki so wan tin yari fu lasi den kilo dati. Ma mi ben sabi taki mi du a yoisti sani di mi tapu nanga smoko. Mi begi Yehovah doronomo èn a gi mi krakti fu tapu nanga a gwenti disi.

DEN WINI DI MI KISI: Mi de moro gosontu now. Mi de tevrede fu di mi no e feti fu kisi bigi nen noso gudu, bika den sani disi no e meki wan sma de koloku trutru. Na presi fu dati, a e gi mi prisiri fu fruteri sma den tru tori fu Bijbel. Leki bakapisi fu dati, dri fu den sma nanga suma mi ben e wroko, e dini Yehovah makandra nanga mi nanga mi masra. Fosi den sma di ben teki mi leki den pikin kon dede, mi ben man fruteri den fu a pramisi fu Bijbel taki wan opobaka o de na ini wan paradijs na grontapu.

Fu di mi kon krosibei na Yehovah, meki a yepi mi fu no firi moro leki sma no lobi mi. A tyari mi kon na ini wan famiri fu Kresten brada nanga sisa na heri grontapu di lobi mi. Na ini a famiri dati mi abi furu mama, papa, brada nanga sisa.​—Markus 10:29, 30.

[Prenki na tapu bladzijde 12]

Mi ondrofeni Kresten lobi na mindri den Kotoigi fu Yehovah

[Prenki na tapu bladzijde 13]

A Syinto tempel pe mi ben e dini fosi