LiBhayibheli Liyakugucula Kuphila

KUNGANI make loseminyakeni yabo-60 ayekela kukhonta tithico? Yini leyabangela umphristi longumShinto kutsi ashiye umsebenti wakhe ethempelini futsi abe sikhonti lesingumKhristu? Umfati lowakhuliswa batali labangesibo bakhe wakhona njani kubeketelela imiva yekulahlwa? Lalela njengobe balandzisa.

“Angisasiso Sigcili Setitfombe.”—ABA DANSOU

UMNYAKA LATALWA NGAWO: 1938

LIVE LATALELWA KULO: BENIN

UMLANDVO WAKHE: ABEKHONTA TITHICO

KUPHILA KWAMI: Ngakhulela endzaweni lebitwa ngekutsi yiSo-Tchahoué, lokuyindzawo lelitete futsi lesedvute nelichibi. Bantfu bakulendzawo babadwebi, futsi bafuya tinkhomo, timbuti, timvu, tingulube, kanye netinyoni. Kute imigwaco kulendzawo, ngako-ke bantfu basebentisa tikebhe. Ngalokuvamile tindlu tabo batakha ngetingodvo netjani, nanobe bakhona labakha ngetitini. Linyenti lebantfu liyahlupheka. Nanobe kunjalo, bugebengu abusibunyenti njengasemadolobheni.

Ngesikhatsi ngisesemncane, babe wangitsatsa kanye nadzadzewetfu lomdzala wasiyisa esigodlweni setithico lapho safike safundziswa tinkholelo takhona. Ngesikhatsi sengikhulile, ngacala kukhonta Dudua (Oduduwa), nkulunkulu lokhontwa sive semaYoruba. Ngamakhela indlu, futsi bengihlale ngimentela imihlatjelo ngabhatata, emafutsa elusundvu, iminenkhe, tinkhukhu, ematuba, kanye naletinye tilwane letehlukehlukene. Bekumba ecolo kwenta lemihlatjelo, ngobe bekuvame kuyitsatsa yonkhe imali lenganginayo.

INDLELA LIBHAYIBHELI LELAKUGUCULA NGAYO KUPHILA KWAMI: Nangicala kutadisha liBhayibheli, ngafundza kutsi Jehova nguye kuphela longuNkulunkulu weliciniso. Ngaphindze ngafundza kutsi akakwemukeli kukhonta tithico. (Eksodusi 20:4, 5; 1 Khorinte 10:14) Kwavele kwangikhanyela kutsi yini lokwakufanele ngiyente. Ngako-ke ngalahla tonkhe titfombe lebenginato futsi ngakhuculula konkhe lokwakuhlobene nekukhonta tithico endlini yami. Ngayekela kubhula, futsi angimange ngisahlanganyela emasikweni endzawo nalawo lentiwa nangabe kunemingcwabo.

Njengobe besengimdzala kangaka, kwakungasimelula kwenta letingucuko. Bangani, tihlobo kanye nabomakhelwane bami bamelana nami futsi bangenta inhlekisa. Kodvwa ngathandaza kuJehova ngacela emandla ekutsi ngikhone kwenta loko lokulungile. Ngadvudvutwa ngemavi eTaga 18:10 latsi: “Libito laSimakadze liyinqaba lecinile, lapho kungabalekela khona bantfu labalungile basindze.”

Lenye intfo leyangisita kuya emihlanganweni yaboFakazi BaJehova. Kulemihlangano ngativela lutsandvo lwebuKhristu, futsi ngajabula kakhulu kubona bantfu labetama kuphila ngemitsetfo yeliBhayibheli lephakeme yekutiphatsa. Konkhe loku kwangenta ngangangabati kutsi boFakazi BaJehova bayinkholo yeliciniso.

 INDLELA LENGIZUZE NGAYO: Kusebentisa timiso teliBhayibheli kwangisita kutsi ngitfutfukise buhlobo bami nebantfwana bami, futsi ngiva shengatsi kususwe umtfwalo losindzako emahlombe ami. Bengivame kusebentisa imali yami etitfombeni letingaphili futsi letingazange tingizuzise ngalutfo. Nyalo sengikhonta Jehova, losiniketa likhambi laphakadze lato tonkhe tinkinga tetfu. (Sembulo 21:3, 4) Ngijabula kakhulu ngekutsi nyalo angisasiso sigcili setitfombe, kodvwa sengisigcili saJehova! Kuye, ngitfole kulondzeka sibili kanye nekuvikelwa.

“Bengisolo Ngifuna Nkulunkulu Kusukela Ebuntfwaneni.”—SHINJI SATO

UMNYAKA LATALAWA NGAWO: 1951

LIVE LATALELWA KULO: JAPAN

UMLANDVO: ABENGUMPHRISTI LONGUMSHINTO

KUPHILA KWAMI: Ngakhulela edolobheni lelincane laseFukuoka Prefecture. Batali bami bebayikhonte kakhulu inkholo; bangifundzisa kusukela ngisesemncane kutsi ngihloniphe bonkulunkulu bemaShinto. Ngisesengumfana, ngangihlale ngicabanga ngekusindziswa kwami futsi nganginesifiso lesikhulu sekusita bantfu lebebasenkingeni. Ngikhumbula ngisesesikolweni selibanga leliphansi, thishela wasibuta eklasini kutsi sifuna kuba yini nasesikhulile. Bantfwana lebengifundza nabo bebafuna tintfo letinkhulu, njengekuba bososayensi. Mine ngatsi liphupho lami kukhonta Nkulunkulu. Bonkhe balala luhleko.

Ngemuva kwekucedza esikolweni, ngafundzela bufundisi. Ngisafundzela, ngahlangana nemphristi longumShinto, lobekacitsa sikhatsi sakhe sekuphumula afundza incwadzi lenesigogo lesimnyama. Ngalelinye lilanga wangibuta: “Sato, uyayati yini lencwadzi?” Bengike ngasibona sigogo salencwadzi, ngako ngamphendvula ngatsi liBhayibheli. Wase utsi: “Wonkhe umuntfu lofuna kuba ngumphristi longumShinto kufanele ayifundze lencwadzi.”

Angimange ngisaphotisa maseko, ngavele ngayotsenga liBhayibheli. Ngalibeka eshelufini letincwadzi lapho belitawubonakala kahle khona futsi ngaliphatsa kahle. Kodvwa angizange ngitinike sikhatsi sekulifundza ngobe bengihlale ngimatasatasa kakhulu esikolweni. Ngatsi nangicedza tifundvo tebufundisi, ngacala kusebenta ethempelini njengemphristi longumShinto. Liphupho lami lenganginalo kusukela ebuntfwaneni laselifezekile.

Kodvwa kungakabiphi, ngatfola kutsi kuba  ngumphristi longumShinto bekungasiko loko bengikulindzele. Linyenti lebaphristi lalite lutsandvo futsi belingabakhatsaleli labanye bantfu. Labanyenti futsi bebete kukholwa. Lomunye webaphristi labakhulu waze wangitjela watsi: “Nangabe ufuna kuphumelela lana, kufanele ukhulume ngefilosofi kuphela. Kukhuluma ngekukholwa akukavunyelwa.”

Emavi lafanana nalawa angenta ngayingabata inkholo yebuShinto. Nanobe ngachubeka ngisebenta ethempelini, ngacala kuhlolisisa letinye tinkholo. Kodvwa kute ngisho yinye vo leyayincono. Ngangitsi nangichubeka ngihlola letinye tinkholo, ngidvumateke kakhulu. Ngabona shengatsi kute inkholo leneliciniso.

INDLELA LIBHAYIBHELI LELAKUGUCULA NGAYO KUPHILA KWAMI: Nga-1988, ngahlangana nemBuddha lowangikhutsata kutsi ngifundze liBhayibheli. Ngacabanga ngalomphristi longumShinto naye labengikhutsate kutsi ngifundze liBhayibheli. Ngancuma kusitsatsa leso seluleko. Njengobe ngangicala kufundza liBhayibheli, ngehluleka kuliyekela. Ngaletinye tikhatsi bengilifundza busuku bonkhe.

Loko lengangikufundza kwangenta ngafuna kuthandaza kuNkulunkulu. Ngacala ngemthandazo lokuMatewu 6:9-13. Lomthandazo bengiwuphindza njalo ngemuva kwema-awa lamabili, ngisho nalapho ngisethempelini ngenta imisebenti yami yebuShinto.

Nganginemibuto leminyenti mayelana naloko lengangikufundza. Ngalesikhatsi, besengishadile, futsi bengati kutsi boFakazi BaJehova bafundzisa bantfu liBhayibheli ngobe bebake bafika bavakashele umkami. Ngafuna lomunye waboFakazi futsi ngamhloma imibuto leminyenti. Ngamangala lapho aphendvula yonkhe leyo mibuto asebentisa liBhayibheli. Wahlela kutsi lomunye waboFakazi afundze nami liBhayibheli.

Ngemuva kwesikhashana nje, ngacala kuya emihlanganweni yaboFakazi BaJehova. Ngaleso sikhatsi angizange ngibone kutsi kuboFakazi lebebakhona kwakunalabanye lebengibaphetse kabi phambilini. Nanobe kunjalo, bangibingelela ngemusa futsi bangenta ngativa ngisekhaya.

Kuleyo mihlangano, ngafundza kutsi Nkulunkulu ufuna kutsi emadvodza atsandze futsi ahloniphe emalunga emindeni yawo. Kute kube nguleso sikhatsi benginake kakhulu umsebenti wami webuphristi kangangekutsi besengingamnaki umkami kanye nebantfwana betfu lababili. Ngacala kubona kutsi bengikulalelisisa loko lobekushiwo bantfu lebebeta kutewukhonta ethempelini, kodvwa angizange sengikulalele loko lobekushiwo ngumkami ngisho nangalinye lilanga.

Njengobe ngichubeka nekufundza liBhayibheli, ngafundza tintfo letinyenti mayelana naJehova letangenta ngasondzela kuye. Ngatsintfwa kakhulu ngemavesi lanjengebaseRoma 10:13, lotsi: “Wonkhe umuntfu lotibika abite libito leNkhosi, uyawusindziswa.” Bengisolo ngifuna Nkulunkulu kusukela ebuntfwaneni, futsi nyalo, ekugcineni, besengimtfolile!

Ngacala kutiva shengatsi ngilahlekile nangisethempelini. Ekucaleni, bengikhatsateke kakhulu ngekutsi labanye bantfu batawutsini nangishiya inkholo yebuShinto. Kodvwa bengititjele kutsi ngitawuyishiya nangabe ngitfola Nkulunkulu weliciniso kulenye indzawo. Ngako-ke, entfwasahlobo ya-1989, ngancuma kulandzela nembeza wami. Ngashiya phansi ethempelini futsi konkhe ngakubeka etandleni taJehova.

Kushiya ethempelini kwakungasimelula. Baphristi labakhulu bangitsetsisa futsi betama kungicindzetela kutsi ngihlale. Kodvwa-ke lokwakumatima kakhulu kwakukutjela batali bami. Ngesikhatsi ngisendleleni ngiyobatjela, luvalo lwangitsi nke! Kwate kwaba buhlungu sifuba nemilente yami yacegetela. Ngangima tikhatsi letinyenti endleleni kute ngithandaze kuJehova ngicele emandla.

 Nangifika ekhaya, ngacale ngesaba kubatjela lendzaba. Kwendlula ema-awa solo ngingabatjeli. Ekugcineni, ngemuva kwekuthandaza kanyenti, ngachazela babe konkhe. Ngamtjela kutsi sengimtfolile Nkulunkulu weliciniso futsi ngiyayishiya inkholo yebuShinto kute ngimkhonte. Babe waphaphuleka futsi wadvumateka. Letinye tihlobo teta ekhaya tetama kungishintja umcondvo. Bengingafuni kuvisa umndeni wami buhlungu, kodvwa ngesikhatsi lesifananako, bengati kutsi kukhonta Jehova bekulungile. Ngekuhamba kwesikhatsi, umndeni wami wangihlonipha ngesincumo sami.

Nanobe besengiyekelile kuya ethempelini, kwakusadzingeka kutsi ngilungise ingcondvo yami. Kuba ngumphristi besekungingene engatini. Ngetama konkhe lokusemandleni ami kutsi ngikhohlwe, kodvwa yonkhe indzawo yayingikhumbuta ngekuphila kwami kwakudzala.

Timbili tintfo letangisita kutsi ngikuncobe loku. Kwekucala, ngafunisisa tintfo endlini yami letatihlobana nenkholo lengangikuyo kudzala. Ngase ngiyatishisa tonkhe—tincwadzi, titfombe, kanye netintfo tenkholo letidulile letatisikhumbuto. Kwesibili, ngasebentisa onkhe ematfuba ekutsi ngitihlanganise naboFakazi. Bungani babo kanye nekusekelwa labanginiketa kona kwangisita kakhulu. Kancane kancane, kuphila kwami kwakudzala kwacala kuphuma engcondvweni.

INDLELA LENGIZUZE NGAYO: Ngangivame kungamnaki umkami kanye nebantfwana betfu, futsi loko kwakubenta bative balahliwe. Kodvwa ngatsi nangicala kucitsa sikhatsi nabo, njengobe liBhayibheli litjela emadvodza kutsi ente, sasondzelana. Ngekuhamba kwesikhatsi, umkami wahlanganyela nami ekukhonteni Jehova. Sikanye nebantfwana betfu kanye nemkhwenyana, nyalo simunye ekukhonteni kweliciniso.

Nangibuka emuva ephusheni lenganginalo ngisesemngumntfwana lekukhonta Nkulunkulu kanye nekusita labanye bantfu, ngiyabona kutsi nyalo sengitfole konkhe lengangikufuna—ngatfola nalokwengetiwe. Ngeswele ngisho nemavi ekutibongela kuJehova.

“Bengati Kutsi Kukhona Lokushodako Ekuphileni Kwami.”—LYNETTE HOUGHTING

UMNYAKA LATALWA NGAWO: 1958

LIVE LATALELWA KULO: ININGIZIMU AFRIKA

UMLANDVO: ABETIVA ALAHLIWE

KUPHILA KWAMI: Ngatalelwa eGermiston, lidolobha lelisesigabeni lesisemkhatsini lelinetimayini futsi lelite bugebengu lobunyenti. Batali bami bancuma kutsi ngikhuliswe ngulabanye batali ngobe babona shengatsi angeke bakhone kunginakekela. Nginemalanga langu-14 ngitelwe, ngatsatfwa ngulabanye bantfu labanelutsandvo, indvodza kanye nemfati wayo lengagcina sengibatsatsa njengamake nababe. Nanobe kunjalo, ngemuva  kwekutsi bangichazele ngelimuva lami, ngacala kuhlushwa yimiva yekutiva ngilahliwe. Ngacala kubangabata batali bami bekutfolwa futsi ngacabanga kutsi abangicondzisisi kahle.

Kwatsi lapho ngineminyaka lengu-16, ngacala kuya etindzaweni tekunatsa tjwala, futsi mine nebangani bami sasidansa futsi silalele nemculo lowawudlalwa. Ngesikhatsi ngineminyaka lengu-17, ngacala kubhema ligwayi. Bengifuna kuba ncama ngifanane nabonobuhle lebengibabona etikhangisweni teligwayi. Nangihlanganisa iminyaka lengu-19, ngacala kusebenta eJozi, futsi kungakabiphi ngetayelana nebangani lababi. Ngekushesha ngacala kusebentisa tinhlamba, ngabhema kakhulu, futsi nganatsa kakhulu ngetimphelasontfo.

Nanobe kunjalo, bengiwuvivinya umtimba. Bengitivocavoca njalo, futsi ngidlala ibhola yetinyawo yalabasikati kanye naleminye imidlalo. Ngangitikhandla emsebentini, futsi ngadvuma ngelikhono lami kutabongcondvomshini. Ngaleso sizatfu bengikwati kutsenga nobe yini lengiyifunako, futsi bantfu labanyenti bangitsatsa njengemuntfu lonako konkhe. Kodvwa-ke bengingakajabuli, ngobe ngangitiva ngilahlekile futsi kuphila kungidvumata. Bengati kutsi kukhona lokushodako ekuphileni kwami.

INDLELA LIBHAYIBHELI LELAKUGUCULA NGAYO KUPHILA KWAMI: Ngesikhatsi ngicala kutadisha liBhayibheli, ngafundza kutsi Jehova unguNkulunkulu welutsandvo. Ngaphindze ngafundza kutsi lolotsandvo ulukhombise ngekusiniketa liVi lakhe liBhayibheli. Kunjengekutsi usibhalele incwadzi letawucondzisa tinyatselo tetfu. (Isaya 48:17, 18) Ngabona kutsi nangifuna kuzuza esicondzisweni saJehova selutsandvo, kufanele ngente tingucuko letinkhulu ekuphileni kwami.

Ingucuko lenkhulu lokwakufanele ngiyente beyikubangani bami. Ngacabanga ngemavi eTaga 13:20, latsi: “Lohambisana nebantfu labahlakaniphile naye ugcina asahlakaniphile; kodvwa umngani wetilima uyawuhlupheka.” Lamavi angenta ngashiya bangani bami labadzala ngatakhela bangani labasha lababoFakazi BaJehova.

Inkinga lenkhulu lebenginayo bekukuyekela ligwayi, ngobe besengingakhoni kuphila ngaphandle kwalo. Kancane kancane ngakwati kuyincoba lenkinga, kodvwa ngahlangabetana nalenye futsi. Kuyekela kubhema kwabangela kutsi ngikhuluphale! Loko kwangenta ngatibukela phansi, futsi kwangitsatsa iminyaka lecishe ibe lishumi kutsi ngehle emtimbeni. Nobe kunjalo, bengati kutsi kuyekela kubhema kwakuyintfo lenhle. Ngathandaza njalo kuJehova, futsi wanginiketa emandla ekuphumelela.

INDLELA LENGIZUZE NGAYO: Nyalo nginemphilo lenhle, futsi ngenetisekile. Angisagijimisani nenjabulo lebengicabanga kutsi ngitawuyitfola ngekuba nemsebenti, sikhundla kanye nemali. Kunaloko, ngitfola injabulo ngekuhlanganyela emaciniso eliBhayibheli nalabanye bantfu. Ngesizatfu saloko, labanye labatsatfu lebengisebenta nabo sebakhonta Jehova kanye nami nemyeni wami. Ngembikwekutsi labatali bami labangitfola bashone, ngakhona kubatjela ngesetsembiso seliBhayibheli sekuvuselwa emhlabeni lolipharadisi.

Kusondzelana naJehova kungisitile kutsi ngikhone kuncoba imiva yekulahlwa. Ungente ngativa ngisekhaya ngekungifaka emndenini wemhlaba wonkhe wetikhonti takhe. Kubo sengitfole bomake, bobabe, bomnaketfu, kanye nabodzadzewetfu labanyenti.—Makho 10:29, 30.

[Sitfombe ekhasini 28]

Ngitivele lutsandvo lwebuKhristu kuboFakazi BaJehova

[Sitfombe ekhasini 29]

Lithempeli lebuShinto lengake ngakhontela kulo