Bíblia troka ema nia moris

TANBASÁ feto ida neʼebé tinan 60 liu deside atu para adora estátua? Saida mak book amlulik Xinto ida atu husik ninia serbisu iha templu hodi sai Testemuña ba Jeová? Bainhira feto ida nia inan-aman husik nia, oinsá nia bele manán hasoru ninia sentimentu triste tanba ninia inan-aman halo nuneʼe? Haree toʼok esperiénsia sira tuirmai neʼe.

“Haʼu la adora tan estátua sira.”​—ABA DANSOU

TINAN MORIS: 1938

HUSI RAI: BENÍN

MORIS ULUK NIAN: ADORA ESTÁTUA

HAʼU-NIA MORIS ULUK: Haʼu sai boot iha knua ida naran So-Tchahoué besik lagoa ida. Iha área neʼebá, la iha dalan sira, entaun ema uza ró no bero atu laʼo bá-mai. Ema neʼebé hela iha neʼebá kail ikan no hakiak karau, bibi-timur, bibi-malae, fahi no manu sira. Baibain ema nia uma halo husi ai no duʼut, maibé uma balu halo husi bloku. Ema barak liu mak kiak. Maski nuneʼe, krime laʼós problema boot hanesan iha sidade sira.

Bainhira haʼu sei labarik, haʼu-nia aman haruka haʼu no haʼu-nia biin ba fatin ida neʼebé izoladu no ami simu hanorin kona-ba fiar tradisionál. Bainhira haʼu sai boot, haʼu komesa adora maromak Dudua (Oduduwa) husi kultura Yoruba. Haʼu harii altár ba maromak neʼe, no hasaʼe beibeik talas, mina, karakól, manu-inan, manu-pombu no animál seluk tan nuʼudar sakrifísiu. Sakrifísiu sira-neʼe mak karun, no dala barak haʼu gasta haʼu-nia osan hotu atu sosa sakrifísiu sira-neʼe.

OINSÁ BÍBLIA TROKA HAʼU-NIA MORIS: Bainhira haʼu komesa estuda Bíblia, haʼu aprende katak Jeová mesak deʼit mak Maromak loos. Haʼu mós aprende katak nia la gosta ema neʼebé adora estátua. (Éxodo 20:4, 5; 1 Korinto 10:14) Haʼu rekoñese buat neʼebé haʼu presiza halo. Haʼu soe haʼu-nia imajen hotu no buat neʼebé liga ho adora estátua. Haʼu la bá tan matan-dook no la hola parte tan iha serimónia relijiaun nian ka atividade neʼebé liga ho ema mate.

Iha tempu neʼebá, haʼu tinan 60 liu, tan neʼe susar atu halo mudansa sira-neʼe. Haʼu-nia belun, família no viziñu sira kontra haʼu no goza haʼu. Maibé haʼu halo orasaun no husu Jeová atu fó haʼu kbiit atu halo buat neʼebé loos. Haʼu hetan kmaan husi Provérbios 18:10 neʼebé hatete: “Jeová nia naran mak hanesan uma aas neʼebé seguru. Ema laran-loos halai bá neʼebá no hetan protesaun.”

Buat seluk neʼebé ajuda haʼu mak reuniaun sira husi Testemuña ba Jeová. Iha neʼebá haʼu sente domin Kristaun no haʼu admira sira tanba sira hakaʼas an atu moris tuir Bíblia nia matadalan neʼebé aas. Buat neʼebé haʼu haree halo haʼu fiar metin katak Testemuña ba Jeová mak relijiaun neʼebé loos.

BUAT DIʼAK NEʼEBÉ HAʼU HETAN: Bainhira haʼu aplika Bíblia nia prinsípiu sira, neʼe ajuda haʼu atu iha relasaun diʼak ho haʼu-nia oan sira. Haʼu mós sente hanesan haʼu hasai tiha naha todan husi haʼu-nia kabaas. Uluk haʼu gasta haʼu-nia osan hotu ba estátua sira neʼebé la moris no neʼe la lori buat diʼak ida mai haʼu. Agora haʼu adora Jeová neʼebé sei rezolve ita-nia problema hotu ba nafatin. (Apokalipse 21:3, 4) Haʼu kontente tebes tanba la adora tan estátua maibé haʼu sai Jeová nia atan. Haʼu sente seguru no hetan protesaun husi Jeová.

“Haʼu buka Maromak husi kiʼik kedas.”​—SHINJI SATO

TINAN MORIS: 1951

HUSI RAI: JAPAUN

MORIS ULUK NIAN: AMLULIK XINTO NIAN

HAʼU-NIA MORIS ULUK: Haʼu sai boot iha sidade kiʼik iha munisipál naran Fukuoka. Haʼu-nia inan-aman mak ema relijiozu. Sira haboot haʼu atu adora maromak Xinto nian. Bainhira haʼu kiʼik, haʼu hanoin beibeik kona-ba oinsá atu hetan salvasaun no haʼu hakarak tebes atu ajuda ema seluk neʼebé hasoru problema. Haʼu hanoin-hetan bainhira haʼu-nia mestre iha eskola primária husu labarik hotu saida mak sira hakarak halo kuandu boot. Labarik barak deside metin ona kona-ba saida mak sira hakarak halo, no sira balu hakarak sai sientista. Haʼu hatete katak haʼu hakarak serbí Maromak. Labarik hotu hamnasa haʼu.

Bainhira haʼu remata eskola sekundária, haʼu tama eskola ida ba ema neʼebé hakarak sai mestre relijiaun. Iha eskola neʼe, haʼu hasoru amlulik Xinto nian ida neʼebé uza beibeik ninia tempu deskansa atu lee livru ida neʼebé kór-metan. Loron ida nia husu haʼu: “Sato, ó hatene saida mak livru neʼe?” Haʼu haree livru neʼe, no haʼu hatán: “Bíblia.” Nia hatete: “Ema hotu neʼebé hakarak sai amlulik Xinto tenke lee livru neʼe.”

Haʼu bá kedas atu sosa Bíblia. Haʼu tau Bíblia hamutuk ho livru importante sira iha haʼu-nia armáriu ba livru nian no haʼu tau matan didiʼak ba ida-neʼe. Maibé haʼu la lee tanba haʼu okupadu loos ho haʼu-nia eskola. Bainhira haʼu remata eskola, haʼu komesa halo serbisu iha templu nuʼudar amlulik Xinto nian. Haʼu-nia mehi sai loos.

Maibé lakleur deʼit haʼu rekoñese katak sai amlulik Xinto la tuir buat neʼebé haʼu mehi. Amlulik barak la hatudu domin ka la hanoin ema. Amlulik barak mós ladún iha fiar. Haʼu-nia xefe mós hatete ba haʼu: “Se ó hakarak hetan susesu iha neʼe, ó presiza koʼalia kona-ba filozofia laʼós kona-ba fiar.”

Liafuan sira-neʼe halo haʼu la kontente ho relijiaun Xinto. Maski haʼu kontinua halo serbisu iha templu Xinto, maibé haʼu komesa estuda kona-ba relijiaun seluk. Maski nuneʼe, haʼu labele hetan lia-loos iha relijiaun ida. Bainhira haʼu hakaʼas an liután atu aprende kona-ba relijiaun, haʼu sente la kontente liután. Haʼu sente katak relijiaun hotu la hanorin lia-loos.

OINSÁ BÍBLIA TROKA HAʼU-NIA MORIS: Iha tinan 1988, haʼu hasoru ema Budista ida neʼebé anima haʼu atu lee Bíblia. Haʼu hanoin fali amlulik Xinto neʼebé uluk mós anima haʼu atu lee Bíblia. Haʼu deside atu halo tuir konsellu neʼe. Haʼu komesa lee Bíblia no haʼu gosta tebes ida-neʼe. Dala ruma haʼu lee kalan tomak toʼo loro-matan saʼe.

Buat neʼebé haʼu lee book haʼu atu halo orasaun ba Maromak neʼebé temi iha Bíblia laran. Haʼu komesa halo orasaun hodi temi liafuan sira iha Mateus 6:9-13. Haʼu repete orasaun neʼe kada oras rua, inklui mós bainhira haʼu halaʼo serbisu iha templu Xinto.

Haʼu iha pergunta barak kona-ba buat neʼebé haʼu lee. Iha tempu neʼebá haʼu kaben ona, no uluk Testemuña sira vizita haʼu-nia feen, tan neʼe haʼu hatene katak sira hanorin ema kona-ba Bíblia. Haʼu buka Testemuña ida neʼebé uluk vizita haʼu-nia feen no haʼu husu pergunta barak ba nia. Haʼu hakfodak bainhira feto neʼe uza Bíblia atu hatán haʼu-nia pergunta ida-idak. Nia halo arranju atu Testemuña ida estuda Bíblia ho haʼu.

Lakleur haʼu komesa tuir reuniaun husi Testemuña ba Jeová sira. Liutiha tempu balu, haʼu rekoñese katak uluk haʼu trata aat Testemuña balu neʼebé mós tuir reuniaun sira-neʼe. Maski nuneʼe, sira hasé haʼu no simu haʼu ho laran-diʼak.

Iha reuniaun sira, haʼu aprende katak Maromak hakarak laʼen sira atu hatudu domin no respeitu ba sira-nia família. Iha tempu neʼebá, haʼu sempre tau fokus ba haʼu-nia serbisu nuʼudar amlulik toʼo la fó atensaun ba haʼu-nia feen no oan naʼin-rua. Haʼu komesa rekoñese katak baibain haʼu rona didiʼak ba ema neʼebé mai halo adorasaun iha templu maibé haʼu nunka rona ba haʼu-nia feen.

Bainhira haʼu kontinua estuda Bíblia, haʼu aprende buat barak neʼebé ajuda haʼu hakbesik ba Jeová. Eskritura sira hanesan Roma 10:13 book tebes haʼu-nia laran. Eskritura neʼe dehan: “Ema hotu neʼebé bolu Jeová nia naran sei hetan salvasaun.” Husi kiʼik kedas haʼu buka Maromak neʼebé loos no ikusmai haʼu hetan nia.

Haʼu komesa sente la kontente atu halo serbisu iha templu. Foufoun, haʼu laran-taridu kona-ba oinsá ema seluk sente se haʼu sai husi relijiaun Xinto. Maibé uluk haʼu sempre fó-hanoin haʼu-nia an katak haʼu sei sai husi relijiaun Xinto se haʼu hetan Maromak loos iha fatin seluk. Entaun iha tinan 1989, haʼu deside atu halo tuir haʼu-nia konxiénsia. Haʼu husik haʼu-nia serbisu iha templu no tau fiar ba Jeová katak nia sei tau matan ba haʼu.

Susar tebes atu husik haʼu-nia serbisu iha templu. Haʼu-nia xefe sira hatún haʼu no koko atu obriga haʼu atu la husik haʼu-nia serbisu. Maibé buat neʼebé susar liu mak atu fó sai haʼu-nia desizaun ba haʼu-nia inan-aman. Bainhira haʼu iha dalan atu bá sira-nia uma, haʼu sente laran-taridu loos toʼo haʼu-nia fuan sente moras no haʼu-nia ain nakdedar. Haʼu para dala barak iha dalan atu halo orasaun ba Jeová hodi husu kbiit.

Bainhira haʼu toʼo haʼu-nia inan-aman nia uma, foufoun haʼu taʼuk atu fó sai haʼu-nia desizaun. Liutiha oras barak no halo orasaun dala barak, ikusmai haʼu esplika buat hotu ba haʼu-nia apá. Haʼu fó-hatene nia katak haʼu hetan ona Maromak loos no katak haʼu atu sai husi relijiaun Xinto hodi bele serbí Maromak loos. Haʼu-nia apá hakfodak no triste. Família seluk mai ami-nia uma no koko atu troka haʼu-nia hanoin. Haʼu lakohi hakanek haʼu-nia família nia laran, maibé iha tempu hanesan, haʼu hatene katak serbí Jeová mak desizaun neʼebé diʼak liu. Ikusmai, haʼu-nia família komesa respeitu haʼu-nia desizaun.

Maski haʼu la bá tan templu, maibé haʼu kontinua hanoin kona-ba serbisu iha templu tanba ba tempu kleur serbisu neʼe mak parte importante iha haʼu-nia moris. Haʼu hakaʼas an atu haluha, maibé sempre iha buat ruma neʼebé fó-hanoin fali haʼu kona-ba haʼu-nia moris uluk nian.

Iha buat rua neʼebé ajuda haʼu. Primeiru, haʼu buka buat hotu iha haʼu-nia uma, hanesan livru, dezeñu, no mós sasán oioin neʼebé karun neʼebé iha ligasaun ho haʼu-nia relijiaun uluk nian. Tuirmai haʼu sunu hotu. Segundu, haʼu hakaʼas an atu halibur hamutuk beibeik ho Testemuña sira. Sai belun ho sira ajuda tebes haʼu. Neineik-neineik haʼu haluha buat uluk nian.

BUAT DIʼAK NEʼEBÉ HAʼU HETAN: Uluk haʼu la fó atensaun ba haʼu-nia feen no oan sira, no neʼe halo sira sente mesamesak. Maibé bainhira haʼu komesa gasta tempu ho sira hodi halo tuir Bíblia nia matadalan ba laʼen sira, ami sente besik liután ba malu. Ikusmai, haʼu-nia feen mós serbí Jeová. Agora haʼu-nia oan-mane, oan-feto no ninia laʼen, mós serbí Jeová.

Bainhira haʼu hanoin fali haʼu-nia mehi husi kiʼik atu serbí Maromak no ajuda ema seluk, haʼu rekoñese katak haʼu hetan ona buat sira-neʼe hotu no hetan buat barak liután. Liafuan la toʼo atu esplika kona-ba haʼu-nia agradese ba Jeová.

“Haʼu sente haʼu-nia moris falta buat ruma.”​—LYNETTE HOUGHTING

TINAN MORIS: 1958

HUSI RAI: ÁFRIKA SÚL

MORIS ULUK NIAN: SENTE TRISTE TANBA INAN-AMAN HUSIK HAʼU

HAʼU-NIA MORIS ULUK: Haʼu moris iha Germiston, sidade neʼebé ladún iha krime. Haʼu-nia inan-aman sente katak sira la iha kbiit atu tau matan mai haʼu, tan neʼe sira deside atu ema seluk mak hakiak haʼu. Bainhira haʼu foin moris ba loron 14, feen-laʼen laran-diʼak ida mak hakiak haʼu, no haʼu haree sira hanesan inan-aman. Maski nuneʼe, bainhira haʼu hatene haʼu-nia pasadu, haʼu sente mesamesak. Haʼu komesa sente katak haʼu-nia inan-aman hakiak ladún komprende haʼu no haʼu mós ladún sente domin ba sira.

Bainhira haʼu tinan 16, haʼu komesa bá bar hodi dansa no rona múzika hamutuk ho belun sira. Bainhira haʼu tinan 17, haʼu komesa fuma sigarru. Haʼu hakarak isin lotuk hanesan artista neʼebé ninia foto iha sigarru nia iklan. Bainhira haʼu tinan 19, haʼu komesa serbisu iha sidade Johannesburg, no komesa ransu ho ema aat. Lakleur deʼit haʼu komesa uza liafuan foʼer, fuma barak no hemu demais iha findesemana.

Maski nuneʼe, haʼu gosta ezersísiu. Haʼu tuir beibeik joga bola no mós desportu sira seluk. Haʼu mós serbisu makaʼas no haʼu sai koñesidu iha área komputadór. Tan neʼe, haʼu iha osan barak, no ema barak dehan katak haʼu hetan susesu. Maski nuneʼe, haʼu la haksolok, sente lakon dalan no la kontente ho haʼu-nia moris. Iha haʼu-nia laran, haʼu sente haʼu-nia moris falta buat ruma.

OINSÁ BÍBLIA TROKA HAʼU-NIA MORIS: Bainhira haʼu komesa estuda Bíblia, haʼu aprende katak Jeová mak Maromak neʼebé domin. Haʼu mós aprende katak nia hatudu ninia domin liuhusi fó ninia Liafuan Bíblia ba ita. Neʼe hanesan nia hakerek karta ba ita ida-idak atu fó matadalan ba ita. (Isaias 48:17, 18) Haʼu rekoñese katak se haʼu hakarak hetan benefísiu husi Jeová nia matadalan, haʼu presiza halo mudansa boot iha haʼu-nia moris.

Buat ida neʼebé haʼu presiza troka mak haʼu-nia ransu. Provérbios 13:20 book tebes haʼu-nia laran. Eskritura neʼe hatete: “Ema neʼebé laʼo hamutuk ho ema matenek sei sai matenek, maibé ema neʼebé ransu ho ema beik sei hetan problema boot.” Prinsípiu neʼe book haʼu atu hakotu haʼu-nia relasaun ho haʼu-nia belun sira no halo belun foun ho Testemuña sira.

Susar tebes mai haʼu atu para fuma. Neineik-neineik haʼu bele manán toman neʼe. Maski nuneʼe, haʼu hasoru susar seluk tan. Tanba para fuma, neʼe halo haʼu-nia isin aumenta kilograma 13 tan. Neʼe halo haʼu sai la fiar an, no presiza maizumenus tinan sanulu atu hatún isin. Maibé haʼu hatene katak para fuma mak desizaun neʼebé diʼak. Haʼu halo orasaun beibeik ba Jeová, no nia fó kbiit mai haʼu atu husik toman neʼe.

BUAT DIʼAK NEʼEBÉ HAʼU HETAN: Agora haʼu iha saúde neʼebé diʼak liu. Haʼu mós kontente ho buat neʼebé haʼu iha ona. Haʼu la buka tan ksolok husi serbisu, naran-boot no riku. Agora haʼu kontente atu fahe lia-loos husi Bíblia ba ema seluk. Rezultadu mak agora haʼu-nia kolega feto naʼin-tolu serbí Jeová ho haʼu no haʼu-nia laʼen. Antes haʼu-nia apá no amá hakiak mate, haʼu konsege haklaken ba sira kona-ba Bíblia nia promesa kona-ba moris-hiʼas iha mundu paraízu.

Bainhira haʼu hakbesik ba Jeová, neʼe ajuda haʼu atu la sente mesamesak tan. Nia ajuda haʼu atu sente katak haʼu mak parte ba família fiar-naʼin iha mundu tomak. Sira mak haʼu-nia inan, aman, maun-alin no mós biin sira.​—Marcos 10:29, 30.

[Dezeñu]

Iha Testemuña ba Jeová nia leet, haʼu sente duni domin Kristaun

[Dezeñu]

Relijiaun Xinto nia templu neʼebé uluk haʼu serbí bá