Bibilo Gem ior
Bibilo Gem ior
KWASE ugen u hemban anyom 60 yange de akombo a civir sha ci u nyi? Lu nyi i mgbegha orgen u lu pristi u kwaghaôndo u Shinto u den tom na u eren hen wunaakombo ugen, hingir Orkristu u pasen kwagha? Kwase ugen u yange orgen vea kwase na tôô un hingir wan ve shighe u i mar un la, kôrcio u wan ishima a mnenge u a nengen ér i ta un kera la nena? Time ase sha kwagh u ior mban ve ôr ne.
“M kera civir akombo ga.”—ABA DANSOU
I MAR UN KEN INYOM I: 1938
TAR NA: BENIN
INJAOR I YANGE LU YÔ: KWASE U CIVIR AKOMBO
YIASE YAM: Yange m vese hen gar u So-Tchahoué, u lu hen ijiir i lun angbiôr angbiôr, ikyua a ber ugen yô. Mba hen ijiir ne mba kôron ishu shi mba nengen sha ibua man ivo man iyôngo man igyo man inyon. Igbenda ngi hen ijiir ne ga, nahan ior ka ve zenden sha utso. Ka ve er ayou a ve sha ikyon, ve gema ve san sha toho, mbagenev di ka ve maa sha akam. Ior mba hen ijiir ne hemba mban atsanaior. Nahan cii kpa, ifer ngee heen er sha ugeri mba vesen nahan ga.
Shighe u m lu wanye la, terem za a mo vea anngôm u kwase hen ijiir i civir akombo igen, ape i za tese se se na jighjigh a aeren a uter yô. Yange m vesen yô, m gema civir aôndo u i yer ér Dudua Oduduwa, u ityô i Yoruba i civir ken adini ve la. Yange m maa iyou sha ci u aôndo ne, shi m naan iniav hanma shighe sha iyo, man sha mkurem ma nyian man sha akôôr man sha ikyegh man sha mkungu kua sha inyam igen kposo kposo. Iniav mbin yange mbi taver ishe, nahan ashighe kpishi mbi yam inyaregh cica cii.
GBENDA U BIBILO GEMA UMA WAM LA: Yange m hiin u henen Bibilo yô, m kav er i lu Yehova tseegh a lu Aôndo u mimi yô. Shi m hen kpaa mer a lumun ér i civir un a ieev ga. (Ekesodu 20:4, 5; 1 Mbakorinte 10:14) M kav kwagh u gba u me er yô. Nahan m haa ieev yav kera cii shi m ese hanma kwagh u gba zua a akombo a civir cii ken iyou yam kera. M de ishor i kpehen, shi m kera nyôr iyol ken aeren a ityô yam eren sha kwagh u kuugh la ga.
Er m lu kwase u hemban anyom 60 yô, lum zange u den akaa ne ga. Azende a am man anmgbianev av man mba wan ndor a mo hendan a mo shi naham tar kpaa. Kpa m sôn Yehova mer a nam taver mbu eren kwagh u vough. Yange m zua a ishimasurun ken mkaanem ma i nger ken Anzaakaa 18:10 la. Ma kaa ér: ‘Iti i Yehova ka gôgôyou u taven u taver, orperapera ka nan yevese nan ta kimi, nan war.’
Kwagh ugen u wasem yô, lu u zan mbamkombo mba Mbashiada mba Yehova. Yange mea za yô, m nenge a dooshima u Mbakristu la, shi kwagh ne doom kpishi sha ci u ior mban ka ve nôngon ér vea dondo atindi a wang a ken Bibilo la. Kwagh u m nenge a mi la wasem m kav er i lu Mbashiada mba Yehova ve lu eren kwaghaôndo u mimi yô.
IWASEN I M ZOUGH A MI LA: U dondon atindiakaa a ken Bibilo la wasem u hemban lun kôôsôô a mbayev av. Shi m nenge mer i shirim ikyav mbigenev kpaa. Yange m vihi inyaregh yagh cii sha ieev mbi lun a uma ga, mbi mbi wasem sha gbenda môm kpaa ga yô. Hegen m ngu civir Yehova, u una bee a mbamzeyol asev cii kera gbem sha won la. (Mpase 21:3, 4) Doom kpishi er m kera civir akombo ga, kpa i lu Yehova m gem civir yô! M zua a mkor man mpeveryol hen Yehova.
“M hii u keren Aôndo shighe u m lu iyev la je.”—SHINJI SATO
I MAR UN KEN INYOM I: 1951
TAR NA: JAPAN
INJAOR I YANGE LU YÔ: PRISTI U KWAGHAÔNDO U SHINTO
YIASE YAM: Yange m vese hen angeri u kiriki ugen ken kpentar u Fukuoka Prefecture. Mbamaren av eren kwaghaôndo kpoghuloo, nahan ve yesem iyev je sha u m civir mbaaôndo mba Shinto yô. Shighe u m lu wanye la, ashighe kpishi m hen sha kwagh u myom wam shi i sarem tsung u wasen ior mba ve lu ken mbamzeyol la. M umbur shighe u m lu ken makeranta u kiriki ve tica wase pine se kwagh ken kelase, u se soo ser se vese se er yô. Mbayev mba se lu kelase môm la ve pase akaa a ve soo u eren la wang, er u hingir ortimenshaakaa nahan. M kaa mer awashima wam yô ka u civir Aôndo. Hanma or sem.
Yange m been kôleeji yô, m nyôr makeranta u mbatesen kwaghaôndo. Er m lu zan makeranta la, m zua a orgen u lu pristi u kwaghaôndo u Shinto, u ian a due un yô, a ôron takerada ugen u lun igbende il yô. Iyange igen yô, a pinem ér, “Sato, u fa takerada ne kpa?” Yange m kav igbenda i takerada la, nahan m kaa mer, “Ka Bibilo.” Maa a kaa a mo ér, “Hanma or u nan soo u lun pristi u kwaghaôndo u Shinto yô, gba u nana ôr takerada ne.”
M due her ave ave je m za yam Bibilo. M ver Bibilo la hen ijiir i tseer tseer ape m veren ityakerada la shi m veren ishima sha mi tsembelee kpaa. Kpa m zua a shighe u ôron i ga, sha ci u m ngee a akaa a eren ken makeranta kpishi. Yange m been makeranta yô, m hii u eren tom u pristi u kwaghaôndo u Shinto la hen wunaakombo ugen. Awashima u m lu a mi hii iyev je la kure hegen.
Nahan kpa, ica kera gba ga je tsô maa m kav er u eren tom u pristi u kwaghaôndo u Shinto ne lu awashima wam la ga yô. Upristi kpishi lu a dooshima shin ikyo i wan sha mbagenev cuku tseegh. Shi ve kpishi ve lu a jighjigh u nan ga. Orgen ken upristi mba ve lu tamen a mo ken kwaghaôndo u Shinto la je kpa kaa a mo ér: “Aluer u soo u zan ikyura heen yô, gba u u lamen sha akaa a a har sha kwaghfan u taregh tseegh. I venda u lamen sha kwagh u jighjigh u nan heen.”
Mkaanem mara na yô, kwaghaôndo u Shinto duem ishima. Shin er m za hemen u eren tom hen wunaakombo la nahan kpa, m hii u tôvon ukwaghaôndo mbagenev nengen. Nahan kpa, lum inja er ukwaghaôndo mbara cii lu a kwaghmôm u dedoo ker ga nahan. Er m lu seer u tôvon sha ukwaghaôndo mbagenev la, kwagh u kwaghaôndo lu hemban duen mo a due ishima cii. Yange lum er mimi ngu ken kwaghaôndo môm kpaa ga nahan.
GBENDA U BIBILO GEMA UMA WAM LA: Mba ker ken inyom i 1988 yô, m zua a Orbuddha ugen, u taver mo ishima ér m ôr Bibilo yô. M hen sha kwagh u orgen u lu pristi u kwaghaôndo u Shinto, u un kpa ngise taver mo ishima ér m er nahan la. Nahan m tsua u dondon kwaghwan ve ne. M hiin Bibilo i ôron yô, fese je m hingir u uven ityough ker. Ashighe agen m ôr i tugh zan zan sev mbu av, iyange i due i ta sha windou tsura i kar i wanger ken iyou.
Kwagh u m ôr la mgbegham m soo u eren msen hen Aôndo u i er kwagh na ken Bibilo la. Yange m hii sha msen u Ter wase u i nger ken Mateu 6:9-13 la. Hanma shighe u ahwa a kar ahar cii yô, m kimbir msen ne, je yô, mea eren tom hen wunaakombo u kwaghaôndo u Shinto la kpa m er nahan.
M lu a mbampin kpishi sha kwagh u m lu ôron la. Hen shighe ne, m vôso kwase, shi m fa mer Mbashiada mba Yehova mba tesen ior kwagh u Bibilo, sha ci u ngise ve tesen kwase wam. M ker Kwaseshiada ugen, m pine un mbampin kpishi. Yange doom kpishi er a nam mlumun sha hanma mpin ken Bibilo yô. Kwaseshiada ne maa sôr ian ver ér Mbashiada ve hen Bibilo a mo.
Shighe kar kpuaa yô, m hii u zan mbamkombo mba Mbashiada mba Yehova. Kpa hen shighe ne m lu a fa mer Mbashiada mbagenev mba se luun imôngo hen mkombo la, lu ior mba ngise m lamen a ve dang la ga. Nahan cii kpa, mea za yô, ve sughum kundu kundu shi ve ngohol mo dedoo kpaa.
Ken mbamkombo mbara, m hen er Aôndo a soo ér noov ve tesen mba hen icombor ve dooshima shi ve naan ve icivir yô. Cii man shighe ne yô, m hemban veren ishima sha tom wam u pristi la, nahan m ta kwase wam kua ônov av mba uhar mbara kera. M mase kaven er yange m keghen ato zulee a ior mba ve zaan hen wunaakombo u za civir aôndo, kpa shighe môm tsô kpa m kegh ato a kwase wam ga yô.
Er kwaghhenen wam lu zan hemen la, m hen akaa kpishi sha kwagh u Yehova, a a kporom a mo ikyua a na yô. Avur a Bibilo, er Mbaromanu 10:13 nahan yange hemba benden a mo cii. Ivur la kaa ér: ‘Hanma or u nan yer sha iti i Yehova yô, nana war.’ M hii u keren Aôndo shighe u m lu iyev la je, m mase va zuan a na hegen!
Yange m va hii u nengen mer wunaakombo kera ka ijiir i me lu her ga. Sha hiihii la, ishima zam iyol kpishi sha kwagh u me undu kwaghaôndo u Shinto ve ior vea hen sha a mo yô. Kpa yange m shi kaan a iyol yam mer ape m zough a Aôndo u mimi la cii, me undu u Shinto la. Nahan mba ker ken fam u 1989 la yô, m dondo kwagh u imoshima yam kaam la. M undu wunaakombo la, nahan m suur sha Yehova.
Yange lum zange u undun wunaakombo la ga. Mba ve lu tamen a mo ken kwaghaôndo u Shinto la zôhô a mo shi nôngo ér vea kighir mo m de ze mape ga. Kwagh u hemba taver mo cii yô, lu u za ôron mbamaren av kwagh u m tsua u eren la. Er m lu zan hen ya ve sha gbenda la, ishima tam kwe nôngo u paven shi angahar kpem gbeda gbeda! M tile sha gbenda acin imôngo m er msen hen Yehova mer a nam agee.
M za nyer hen ya u mbamaren av yô, cier mo iyol kpishi u duen a kwagh ne sha hiihii la, nahan m tamber ahwa kar imôngo. M eren msen tsung m been yô, m mase pasen terem hanma kwagh cii. M kaa a na mer m zua a Aôndo u mimi la, nahan m ngu undun kwaghaôndo u Shinto me za civir Un. Yange kpiligh terem iyol shi ure kpaa. Anmgbianev av mbagenev va hen ya u mbamaren av la va nôngo ér vea gemam ishima. Yange m soo u eren kwagh u vihin tsombor wam ga, kpa shi m fa mer u civir Yehova la lu kwagh u vough u doo u me er yô. Ken masejime yô, tsombor wam gema nam mo icivir sha kwagh u m tsua u eren la.
Er m de u zan hen wunaakombo nahan kpa, lu u me gema mhen wam kpaa. Tom u pristi la yange ya tor ken a mo kpishi. M nôngo kpoghuloo mer me hungur a mi, kpa hanma ijiir i mea gema cii yô, m nôngo u umbur uma wam u tse la.
Akaa nga ahar a yange wasem u undun kwaghaôndo u Shinto vindi vindi yô. Kwagh u m hii eren yô, m num ikyav ken iyou yam m ker hanma kwagh u gba zua a kwaghaôndo wam u tse la cii. M nande hanma kwagh cii; ityakerada man ufoto kua akaa a taver ishe a m eren tom a mi ken kwaghaôndo wam u tse la je kpaa. Kwagh u sha uhar u m er yô, m nôngo sha afatyô wam cii m ker aan kpishi a me luun imôngo vea Mbashiada yô. Ijende i ve kôr vea mo shi ve lu suen mo la wasem kpen kpen. Tegh tegh tsô m de u henen sha igbenda yam i tse la.
IWASEN I M ZOUGH A MI LA: Yange m kende kwase wam man ônov av, nahan i huan ve kpishi. Kpa m va hiin u vihin shighe a ve, er Bibilo i tese noov ér ve eren la yô, se hingir u lun kôôsôô. Shighe kar yô, kwase wam dondom ken mcivir u Yehova. Mo vea kwase wam man wan wase u nomso kua wan wase u kwase la vea nom na cii, se mba civir Yehova imôngo hegen.
Ka mea hen sha awashima wam u hii iyev je m lu a mi mer me civir Aôndo shi me wase ior mbagenev la nahan, m kav mer m zua a hanma kwagh u yange m lu keren cii, kua akaa agen kpaa. M ngu a iwuese hen Yehova je gande u ôron a ôr.
“Yange m fa er kwagh lu saan mo yô.”—LYNETTE HOUGHTING
I MAR UN KEN INYOM I: 1958
TAR NA: SOUTH AFRICA
INJAOR I YANGE LU YÔ: NENGEN ÉR I TA UN KERA
YIASE YAM: Yange i marem hen geri u Germiston, ape ior ve lu a kwagh a ve kpishi ga, i dughun akaainjaa shin inya shi ifer i ngee kpishi ga yô. Mbamaren av mba fe ér vea fatyô u nengen sha a mo ga yô, ve lumun ér tsombor ugen u tôôm m hingir wan ve. Yange i marem m ivin ukasua 2 yô, nom ugen vea kwase na va tôôm m hingir wan ve, nahan m va hingir u yilan nom la mer terem, kwase la di mer ngôm. Nahan cii kpa, yange m va fe kwagh ne yô, m gema nengen mer i tam kera. M hii u nengen mer m ngu wan u mbamaren mba ve tôôm m hingir wan ve la ga, shi ve fa kwagh wam tsembelee kpaa ga.
M va kom anyom 16 yô, m hii u zan sha ayou a msôr, ape mo man azende a am se za vinen amar shi se ungwan ityogholough mbi kuhwan yô. M nyer anyom 17 yô, m hii taav u man. Yange m soo u lun zenga zenga er kasev mba i duen a ve sha televishen sha u yôôn kasua u taav a mi la nahan. M va kom anyom 19 yô, m hii u eren tom hen gar u Johannesburg, ape ica gba ga je maa m gema zenden vea anza a ior a dang yô. Ica gba ga tsô m gema lamen iliam i dang shi man taav man msôrom kpoghuloo sha mbee u kasua.
Nahan cii kpa, m lu a gbong gbong iyol her. Hanma shighe cii m gbidyen bor u ukase shi m eren anumbe agen. Shi m lu eren tom wam u kômputa la kpoghuloo, nahan i fam kpishi ken tom ne. Sha nahan yô, m lu a inyaregh kpishi shi ior kpishi nengen mo ér m za ikyura. Kpa sha kpôô yô, yange saan mo iyol ga, lum dang shi m vôr a uma kpaa. Ken ato u ishima yam yô, yange m fa er kwagh lu saan mo yô.
GBENDA U BIBILO GEMA UMA WAM LA: M hiin Bibilo i henen yô, m kav mer Yehova ka Aôndo u dooshima. Shi m hen mer a tese se dooshima la sha u nan se Bibilo i i lu Mkaanem nam la. Ka inja er a nger se washika u tesen se kwagh u se eren ken uma nahan. (Yesaia 48:17, 18) M kav mer aluer m soo u zuan a iwasen sha gbendatesen u Yehova, ú a tesen se sha dooshima la yô, a gba u me de akaa agen kpishi a m eren la.
Kwaghmôm u yange gba u me gema inja sha mi yô lu sha vegher u azende a am la. M hen sha mkaanem ma i nger ken Anzaakaa 13:20 la tsung. Ma kaa ér: “Zende a mbafankwagh imôngo, nahan we kpaa ú hingir orfankwagh, kpa ijende i abumeaior yô, ia zua a ican.” Kwaghwan ne wasem u undun azende am a tse la, nahan geman kôron azende a he a Mbashiada mba Yehova.
Kwagh u hemba taver mo u den cii yô, lu taav u man, sha ci u yange ya tor ken a mo. M nenge tegh tegh m hembe mtaver ne yô, m gema m tagher di a ugen. Yange m de taav u man yô, m hingir u kehen kpishi! Kwagh ne na yô, kunya gema kôron mo a iyol yam, shi yange nôngo u kuman anyom pue cii ve m fatyô u panden mkehem ye. Nahan cii kpa, m fa mer u den taav u man la lu kwagh u vough u me er yô. M za hemen u eren msen hen Yehova, nahan a nam tahav mbu mbu wasem m de taav u man yô.
IWASEN I M ZOUGH A MI LA: Hemba kpen mo iyol hegen. Shi kwagh u m lu a mi la kumam, nahan m de u keren msaanyol u mimi ga, u ior ve henen ér or a lu a tom u uke shi nana lu tagher tagher shi nana lu a inyaregh kpishi ve nana zua a mi la. Kpa ka m gema m zua a msaanyol sha u pasen mbagenev akaa a mimi a ken Bibilo la. Kwagh ne na yô, kasev utar ken mba ngise m kôr ijende a ve la mba civir Yehova hegen vea mo man nomom. Cii man mbamaren mba ve tôôm a tôô mbara kpe kera yô, m kôrcio u pasen ve kwagh u Bibilo i tende zwa ér a va nder mbakpenev shin ku vea lu ken paradiso shin tar la.
U kporom ikyua a Yehova la wasem u wan ishima a mnenge u m nengen mer i tam kera la. Yehova nam m hingir u nengen mer i wam ikyô, sha u van a mo ken tsombor u mbananjighjigh mba sha tar cii. Mbagenev ken ve hingir ungôôv man uter av man anmgbianev mba nomso man mba kasev.—Marku 10:29, 30.
[Ngeren u pasen foto u sha peeji 12]
M nenge a dooshima u Mbakristu hen atô u Mbashiada mba Yehova
[Ngeren u pasen foto u sha peeji 13]
Wunaakombo u kwaghaôndo u Shinto, ape ngise m civir aôndo la
