Ja Biblia stukbʼes ja sakʼanile

¿JAS yuj yaʼakan stoyjel ja kʼulubʼal dyosik jun ixuk bʼa ayxa yiʼoj mas ja 60 jabʼili? ¿Jasa nikjiyuj jun sacerdote sintoísta bʼa yaʼakan ja lugar bʼa wa xwaj kʼuʼanel sok kʼot jun yaʼtijum Dyos? ¿Jastal lajxiyuj skʼulajel luchar jun ixuk, ja wa xyabʼ jipubʼalkan bʼa pilan maʼ aji kʼiyuj man pojki? La katikan a-xchole kabʼtik.

«Elyonta libre ja bʼa stoyjel kʼulubʼal dyosik» (ABA DANSOU)

JA JABʼIL POJKI: 1938

PAÍS BʼA POJKI: BENÍN

JA SAKʼANIL: STOYO KʼULUBʼAL DYOSIK

JA JSAKʼANIL AJYI: Ti kʼiyon b’a jun lugar sbʼi’il So-Tchahoué, mojan yi’oj jun laguna b’a jel x-ajyi paman jaʼ. Yuja mey karreteraʼik, ja kristyanoʼik wani skʼulane biajar bʼa barkoʼik sok bʼa kanogaʼik. Jani wa smakʼlay sbʼaje sok ja yajel el chay, yajel kʼi wakax, chiboʼik, chejik, chitamik, yal chanik, sok ja snaje wa stojbʼese sok teʼ, akik ma ay ekʼele sok ladriyo. Anima tʼusan mi yibʼanaluke jel pobreʼe, pe mey lek ja spekʼjel chʼik jastalni ja bʼa chonabʼiki.

Yajni junto yal akʼixon, ja jtati sjekawotikon sok ja kermana bʼa jun kʼin bʼa jejikitikon stoyjel kʼulubʼal dyosik. Ekʼ ja jtyempo, kʼot kayi stoyjel ja kʼulubʼal dyos Dudua, ja pilan bʼiʼilal wa xyaweyi ja dyos Oduduwa ja bʼa lugar yoruba. Jkʼulanyi jun yal chʼin naʼits sok tikʼanxta kʼe kayi majtanalik jastal: aseyte bʼa palma, isakʼik, xochik, gayinaʼik, palomaʼik sok tuk chanteʼik. Mas ja snalan wa xchʼaka ja jtakʼin bʼa smanjel ja jastik it.

JA BIBLIA STUKBʼES JA JSAKʼANILI: Yajni kʼe jkʼul estudiar ja Biblia, jnebʼa kechani sakʼan ay jun Dyos smeranil sok mini lek xyila ja yajelyi stoyjel kʼulubʼal dyosiki (Éxodo 20:4, 5; 1 Corintios 10:14). Anto kaʼa jbʼaj kuenta ja jasa tʼilan oj kʼuluki. Chʼak ka eluk ja kʼulubʼal dyosik sok yibʼanal ja jastik ti chʼikansoki. Cha kaʼakan slejel jkoltajel ja bʼa kʼintanumik, kaʼakan ja kostumbreʼik bʼa lugari sok ja bʼa chamwiniki.

Mini pasil waji. Mas ja 60 jabʼil ja bʼa jsakʼanil jtoyo kʼulubʼal dyosik. Chomajkil, ja kamigoʼik, jpamilyaʼik sok ja jbesinoʼik jelni tajkiye sok skʼulanone burlar. Jkʼanayi ja Jyoba ayaʼ kip skʼulajel ja bʼa leki. ¡Jelni stsatsankʼujolanon ja Proverbios 18:10! Ja tiw wa xyala: «Ja sbʼiʼil ja Jyoba jach jastal jun yijil naʼits. Ja maʼ toji ti wa xwaj ajnel tiw sok wa x-ajiyi skoltajel».

Cha jelni skoltayon wajel ja bʼa sreunione ja testigoʼik bʼa Jyoba, bʼa kila jastal wa sjeʼawe ja yajalkʼujoli. Jelni cham kila ja jastal jel skʼujolane skʼuʼajel ja jastik kujlajel ja bʼa Biblia. Kani jkʼuʼuk lek ke ja testigoʼik bʼa Jyoba jani yiʼoje ja relijyon smeranili.

JASTIK SLEKILAL KILUNEJ: Ja rasonik bʼa Biblia jelni skoltunejon bʼa yajel tojbʼuk ja jastal wa xkila jbʼajsok ja kuntikili. Chomajkil, wa xkabʼ lajansok akʼubʼal elki jun alal ijkats. Ja ajyi wa xchʼaka yibʼanal ja jas kiʼoji yuja kʼulubʼal dyosiki, bʼa mini jas yijanki slekilal. Ja wego wanon yaʼteltajel ja Jyoba, ja maʼ yeʼn oj xchʼay spetsanil ja wokoliki (Apocalipsis 21:3, 4). Ja wego elyonta libre ja bʼa stoyjel kʼulubʼal dyosik, jaxani wa xtoyo ja Jyoba sok spetsanil jkʼujol. Ajyelsok ja yeʼn wa xkabʼ jelxani seguro ayon, talnubʼalon sok gusto ayon.

«Jleʼunej ja Dyos man jchʼinil» (SHINJI SATO)

JA JABʼIL POJKI: 1951

PAÍS BʼA POJKI: JAPÓN

JA SAKʼANIL: KʼOT JUN SACERDOTE SINTOÍSTA

JA JSAKʼANIL AJYI: Ti kʼiyon bʼa jun yal komon yamanyuj ja Fukuoka. Ja jnantati jelni relijyosoʼe sok man jchʼinil sjeʼaweki yajelyi stoyjel ja dyosik sintoísta. Ja yuj, tikʼanxta wa xpensaran ja bʼa jkoltajel oj ajuki sok ja janekʼto wa xkʼana skoltajel ja matik ay swokoleʼi. Wa xjul jkʼujol jun ekʼele ja maestro sjobʼokitikon jasa wa xkʼanatikon oj kʼuluktikon yajni la kʼitikoni. Ja jmoj jumasaʼ yalawe ay skʼelsate jastal kʼotel jun científico. Pe yajni ja keʼn kala wa xkʼana oj kaʼteltay ja Dyos, yibʼanale kʼe tsenuke.

Yajni elyonkan ja bʼa secundaria, ochyon jun eskuela bʼa kʼotel jastal jun maestro bʼa relijyon. Ja tiw jnaʼa sbʼaj jun sacerdote sintoísta, yajni libre ayi wa skʼuman jun libro yelaw kʼikʼ. Ja keʼn kilatani ja bʼa spatiki, ja yuj yajni sjobʼoki ta wa xnaʼa jas libro wan skʼumajel, kalayabʼ: «Jaʼa Biblia». Anto yalakabʼi: «Yibʼanal ja maʼ wa skʼana oj kʼotuk jun sacerdote sintoísta tʼilani oj skʼumuk ja libro it».

Ja yuj wegoxta waj man jun jBiblia sok ti kaʼa bʼa mas chikan ja bʼa wa xkaʼa ja jlibroʼiki. Pe jelni latsan la ajyiyon skʼulajel estudiar tuk jasunuk, bʼa mini xkankuj tyempo skʼumajel. Anto kʼot ja skʼakʼujil jkʼulan jbʼaj graduar, sok kʼe aʼtijukon jastal sacerdote sintoísta bʼa jun lugar wa x-ajyi kʼuʼanel. ¡Kʼotani smeranil ja jas wa xkʼana ajyi!

Pe tixta kaʼa jbʼaj kuenta ja jas mi wa xmajlay bʼa jun sacerdote. Tʼusan mi yibʼanaluk ja sacerdoteʼik mini xcham skʼujole ja kristyano. Jitsan mini ayiʼoje skʼuʼajel. June ja bʼa mas ay chaʼan xcholi yalakabʼi: «Ta waxa kʼana oj wajukawuj lek, jaʼita xa taʼa tiʼal ja jastik bʼa filosofía. Mokni awal ja skʼuʼajela wiʼoji».

Spetsanil ja it jelni ya och jtristeʼil. Anima mi kaʼakan ja lugar bʼa kʼuʼanel, kʼeni jpaklay tuk relijyonik. Pe yajni mas wanon slejel masni wa xya el jgana. Lajansok mini jun relijyon wa sjeʼawe ja smeranili.

JA BIBLIA STUKBʼES JA JSAKʼANILI: Ja bʼa 1988 jnaʼa sbʼaj jun budista bʼa stsatsankʼujolanon skʼumajel ja Biblia. Anto juljkʼujol ja rason yaʼunejki ja sacerdote sintoísta. Ja yuj, jkʼuʼan ja rasoni sok jkʼuman. Jelni jkʼulan gusto. Ay ekʼele wa xkʼuman snajtil akwal man wa sakbʼi.

Ja jas wa xkʼumani snikawon yajelyi orasyon ja Dyos wa staʼa tiʼal ja Biblia, jastalni wa sjeʼa ja bʼa Mateo 6:9-13. Tikʼanxtani wa xkayi ja junxta orasyon it kada chabʼ ora, cha jachni yajni wa xchʼak ja kaʼtel ja bʼa lugar bʼa kʼuʼanel.

Wa xjul jkʼujol yajni wanon skʼumajel ja Biblia, masni wa x-ajyikuj sjobʼjelik. Ja bʼa tyempo jaw nupanelonxa sok wa xnaʼa ja testigoʼik bʼa Jyoba wani xyaʼawe estudioʼik bʼa Biblia, yujni wa xyulataye ajyi ja jcheʼumi. Jleʼa june ja bʼa Testigo sok kayi sjobʼjelik. Ja jas mas jel cham kila jani yuja chʼak yaweki sjakʼjel soka Biblia. Tsaʼan ja yeʼn sleʼa jun Testigo bʼa oj yaweki estudio.

Tʼusan tsaʼan kʼe ochkon ja bʼa sreunione ja bʼa Naʼits bʼa Tsomjelal. Ama mini kaʼa jbʼaj kuenta, pe jujuntik ja matik teye ayni jas bʼa mi lekuk jkʼulunej yile. Ama jachuk mini timjiye bʼa mi oj skʼulukone saludar sok bʼa mi oj yaweki jun lekil julelal.

Ja bʼa reunión it jnebʼa ke ja Dyos wa skʼana ja tatamalik oj syajtaye sok oj skis-e ja spamilyaʼe. Ja bʼa tyempo jaw, jani jel wajel jkʼujol ja kaʼtel bʼa sacerdote, bʼa kaʼatakan stalnajel ja jcheʼum sok ja chabʼ kuntikili. Kaʼa jbʼaj kuenta ama wa xmaklay lek ja kristyanoʼik wa xjakye ja bʼa lugar bʼa kʼuʼanel, ja jcheʼumi mini bʼa jun ekʼele jmaklunej.

Yajni mas wanon snebʼjeli masni mojan wa xkabʼ ayonsok ja Jyoba. Jitsan bersikulo kʼot man jkʼujol, jastalni ja bʼa Romanos 10:13, wa xyala: «Spetsanil ja maʼ wa spatayi skʼujol ja Jyoba bʼa sbʼiʼil ojni staʼ skoltajel». Jleʼunej ja Dyos man jchʼinil, sok jtaʼata ja wego.

Jelxani tuk xkabʼ aʼtel ja bʼa lugar bʼa kʼuʼanel. Ja bʼajtanto wa xcham jkʼujol ja jas oj spensaraʼuke ja tuk ta kaʼakan ja relijyon sintoísta, pe kalunej ojni kakan ta jtaʼa ja Dyos smeranil bʼa pilan parte. Ja yuj, jkʼulan ja jas wa xyala ja jconciencia, elyon ja bʼa lugar bʼa kʼuʼanel bʼa styempoʼil kuaresma bʼa 1989 sok jipa jkʼujol bʼa Jyoba.

Yajni jkʼulan ja it mini pasil waji. Ja maʼ ay chaʼan xcholi skʼulanone burlar sok stʼenawone bʼa mi oj elkon. Ama jachuk ja mas wokol kabʼi jani yaljel yabʼye ja jnantati. Yajni bʼejxa ayon ja bʼa snaje, yuja chamkʼujoli wa xwaj yajbʼuk man kaltsil sok wan kʼitkʼunel ja koki. Jitsan ekʼele kʼotyon tekʼan bʼa yajelyi orasyon ja Jyoba sok skʼanjelyi skoltajel.

Yajni kʼotyon ja bʼa snaje ja jnantati, mini xkʼana oj kale. Ekʼni jitsan ora, man yajni jelxa katayi orasyon tito kalyabʼ ja jtati. Jcholo yabʼ ke jtaʼata ja Dyos smeranil bʼa pilan relijyon, sok bʼa oj kaʼteltay ojni kakan ja relijyon sintoísmo. Ja yeʼn mini snaʼa jas oj yal sok jelni och stristeʼil. Asta jakye jujuntik jpamilya bʼa oj stukbʼese ja jpensari. Mini xkʼana ay maʼ oj yajbʼes, pe cha mini xkʼana oj kakan skʼulajel ja bʼa stojoli: ja yaʼteltajel ja Jyoba. Ekʼ ja tyempo, ja pamilya kʼotni skis-e ja jas jtsaʼa skʼulajeli.

Pe mini kechan oj kakan ja lugar bʼa kʼuʼanel; cha tʼilani oj tukbʼes ja jpensari. Ja jsakʼanil ajyi jastal jun sacerdote jelni kʼotel man jkʼujol. Sok ama wani xleʼa modo oj chʼay jkʼujol, pe jelni xya juljkʼujol ja jastik sjoybʼunejoni.

¿Jasa skoltayon bʼa oj chʼay jkʼujol ja jastik it? Chabʼ jasunuk. Bʼajtan, jtsomo sok jtsika yibʼanal ja jas ay ja bʼa jnaji bʼa ti chʼikansok ja sintoísmo. Jtsika libroʼik, imajenik sok jastik bʼa jel chaʼan stsʼakol. Xchabʼil, ja jas jel skoltayon jani yajel ekʼ tyempo soka Testigoʼiki. Ja yamigoʼajele sok ja skoltanele, takal takal yaʼ jchʼay jkʼujol ja jastik jkʼulunej ja bʼa jsakʼanili.

JASTIK SLEKILAL KILUNEJ: Ja ajyi mixani wankon stalnajel ja jcheʼum soka kuntikili, ja yuj jelni stuchʼil ay xyabʼye. Pe yajni jnocho ja rason bʼa Biblia bʼa yajel ekʼ tyempo soke, maxani kʼot ajyukotikon tsoman. Ja jcheʼumi cha stsaʼa oj yaʼteltay ja Jyoba. Ja wego yibʼanal ja bʼa jpamilya, ja jkeremtikon, ja kakʼixtikon soka statami lajani wantikon yaʼteltajel ja Dyos smeranili.

Yajni wa xpensaran ja bʼa jchʼinil, ja skʼanjel ajyikuj bʼa yaʼteltajel ja Dyos sok skoltajel ja tuk, wani xkila jtaʼunej yibʼanal ja jas wa xkʼana. Mey kiʼoj stikʼanil bʼa yajelyi tsʼakatal ja Jyoba.

«Wa xkabʼ ayto jas wa sk’anakuj» (LYNETTE HOUGHTING)

JA JABʼIL POJKI: 1958

PAÍS BʼA POJKI: SUDÁFRICA

JA SAKʼANIL: YAB’ JIPUB’ALKANI

JA JSAKʼANIL AJYI: Ti pojkiyon b’a jun yal lugar ay mina wa sbʼiʼilan Germiston, bʼa mey lek ja spekʼjel chikʼi. Yuja yabʼye mi oj bʼobʼ stalnayone lek ja jnantati, skʼebʼawone yajni kechanto 14 kʼakʼu pojkeloni. Ja nupanum maʼ stalnayoni kʼotni kil-e jastal mero jnantat. Pe yajni kʼot jnaʼ mi yeʼnuke ja jnantati, kabʼ jipubʼalonkani. Wa xkabʼ mini sbʼajine oj stalnayone sok mini xbʼobʼ yabʼyone stojolil.

Yajni ayxa kiʼoj 16 jabʼil kʼe wajkon bʼa cantinaʼik bʼa chanel soka kamigoʼik sok smaklajel kʼinik bʼa tsʼebʼanum. Yajni jtaʼa 17 jabʼil wanxani xkabʼan may. Wani xkʼana yokel oj ajyukon jastal ja kristyanoʼik wa sjeʼa ja bʼa spotoʼil ja snajik mayi. Sok yajni tsʼikwikuj ja 19, wajyon man Johannesburgo bʼa oj aʼtijukon. Ekʼ tʼusan ja tyempo, jaxani wala ajyiyon soka kristyanoʼik chʼayel aye, bʼa yaljel mal kʼumal, yabʼjel may sok yujel ja bʼa xchʼakulabʼil ja semana.

Chomajkil, jel xkʼulan gusto ja fútbol sok tuk tikʼe tajnelik. Jelni la tajniyon. Cha jelni jkʼujolan aʼtel tsats ja bʼa jkʼelsati, bʼa tʼusan mi kol kʼotkon june maʼ jel naʼubʼal sbʼaj yuja jas wa xlajxikuj skʼulajeli. Ay kiʼoj jun lekil jsakʼanil sok mi skʼulan palta ja jastik bʼaji, ja yuj jitsan kristyano wa xyilawone jelni lek xwajkuj ja bʼa jsakʼanil. Pe ja smeranili mini gustoʼayon, wa xkabʼ chʼayel ayon sok mey kiʼoj smajlajel. Wa xkabʼ ayto jas wa sk’anakuj.

JA BIBLIA STUKBʼES JA JSAKʼANILI: Yajni kʼe jkʼul estudiar ja Biblia, jnebʼa sbʼaja Jyoba juni Dyos jel xyajtani, ja yuj yaʼunejkitik ja Yabʼali. Ja Biblia jach jastal jun karta yeʼn stsʼijbʼunejkitik bʼa oj stojotik ja bʼa jsakʼaniltiki (Isaías 48:17, 18). Kabʼ stojol ke ta wa xkʼana oj ka el slekilal ja tojelal jaw, tʼilani ay jas oj tukbʼes ja bʼa jsakʼanili.

Bʼa stukbʼesel jbʼaj, tʼilani oj kakan ja kamigoʼiki. Jastalni wa xyala ja Proverbios 13:20, «ja maʼ wan bʼejyel soka bibo cha ojni kʼot bibo, pe ja maʼ wa smojtay ja matik sonso mini lek oj elkʼota». Jkʼuʼani ja rason it, sok yajni kakan ja poko kamigoʼiki, kʼe kamigoʼuk ja matik kʼotele testigoʼik bʼa Jyoba.

Chomajkil, ja jas mas wokol kabʼ yajelkani, jani ja yabʼjel mayi. Yajni wanon skʼulajel luchar yajelkani, kʼe junuk 14 kilo ja kalali. Ja jaw jelni tsats waj bʼa keʼna, ekʼ lajune jabʼil ja tito koʼ ja jastal ayxa kiʼoj mas kilo ja kalali. Ama jachuk, wani xnaʼa tʼilan oj kakan ja vicio it. Kayi orasyon tikʼan ja Jyoba, sok ja yeʼn yaki kip bʼa oj kakani.

JASTIK SLEKILAL KILUNEJ: Ja wego ayxani kiʼoj jun lekil jsakʼanil. Chomajkil, gustoxa ayon yuja jas kiʼoji. Mixani ja wankon slejel ja gustoʼil wa xyijan jun lekil aʼtel, jun lekil cholal, sok ja rikesaʼil. Jelni gusto ayon ja wanon sjejelyi ja smeranilik bʼa Biblia ja tuk lajan soka jtatami, sok jkoltunej oxwane ja bʼa mojik aʼtel ajyi bʼa yaʼteltajel ja Dyos smeranili. Sok bʼajtanto oj chamuke ja jmajan nantati, bʼobʼni kalyabʼye sbʼaja skʼapjelik oj ajyuk jun sakʼwelal bʼa jun tsamal lugar ja bʼa Luʼumi.

Stsʼakatal yuja kʼotel kil jbʼajsok lek ja Dyos, mixani xkabʼ jipubʼalonkani. Ja wego wa xkabʼ kʼotelonxa spamilyaʼe ja testigoʼik bʼa Jyoba, bʼa ay kiʼoj jnan, jtat, kermanoʼik sok kermanaʼik (Marcos 10:29, 30).

[Poto]

Kila jastal wa sjeʼawe ja yajalkʼujol ja testigoʼik bʼa Jyoba

[Poto]

Ja lugar bʼa wa xkayi stoyjel ja dyosik sintoísta