E ‵Fuli ne te Tusi Tapu a Olaga o Tino

KAIA ne fulitua atu se fafine telā ko 60 tupu ana tausaga ki te tapuaki atu ki tupua? Se a te mea ne fakamalosi atu ki se faifeau i te lotu Shinto ke tiaki tena galuega i te lotou falesa kae fai mo fai se faifeau Kelisiano? Ne mafai pefea o fa‵ki se fafine telā ne puke talu mai tena fanaumaiga i lagonaga tuku tiaki? Mafaufau la ki olotou pati.

“Ko se toe pologa nei au ki tupua (manatu vaivai).”—ABA DANSOU

TAUSAGA NE FANAU I EI: 1938

TENA FENUA: BENIN

TENA TALA FAKASOLOPITO: SE TINO TAPUAKI KI TUPUA

TOKU OLAGA MUA: Ne tupu aka au i So-Tchahoué, se fa‵kai telā ne tu i se kogā koga pelapela i tafa o se vaituloto. A tino i te fa‵kai ne tino faiika, tausi pulumakau, kouti, mamoe, puaka, mo manu eva. E seai ne auala i te koga tenā, tela la, e fakaaoga ne tino a vaka mo paopao ke oloolo atu i ei. Ne faite ne te tokoukega o tino olotou fale ki lakau mo mouku kae ko nisi tino ne faite olotou fale ki puliki. A tino i ei e ma‵tiva kae e se na lō ko lauiloa a amioga solitulafono i ei e pelā mo fa‵kai ‵lasi.

Kae koi foliki au, ne uga atu māua mo toku taina, ne toku tamana ki se akoga fakalotu, telā ne fakamasani ei māua ki te talitonuga tenā. I te taimi ko matua ei au, ne fai ne au a Dudua (Oduduwa) mai tuu a te kau Yoruba mo fai toku atua. Ne faite ne au se fale mō te atua tenei kae ne ofo sāle atu ne au a taulaga o mea‵kai pelā mo ufi, sinu mai pāma, sipō, moa, lupe, mo nisi manu kese‵kese. Ne ‵togi ‵mafa a taulaga konā kae toeitiiti ko palele katoa atu i ei aku tupe.

TE AUALA NE ‵FULI EI TOKU OLAGA NE TE TUSI TAPU: I te taimi ne kamata o sukesuke au ki te Tusi Tapu, ne iloa aka ne au me i a Ieova ko te Atua tonu fua e tokotasi. Ne iloa foki ne au me e se manako a ia ke fakaaoga a tupua i te tapuakiga. (Esoto 20:4, 5; 1 Kolinito 10:14) Ne iloa ei ne au taku mea e ‵tau o fai, tela la, ne ‵pei ne au aku fakatusa katoa kae ‵fulu faka‵ma toku fale mai i so se mea telā e isi sena sokoga ki te tapuakiga ki tupua. Ne fakagata toku fanatu sāle ki tino faivailakau kae ko se toe kau atu au ki faifaiga masani a te fa‵kai kae penā foki mo faifaiga māfai ko mate se tino.

Ne seki faigofie ki a au—se fafine telā ko 60 tupu ana tausaga—ke fai a ‵fuliga konei. Ne ‵teke mai oku taugasoa, kāiga, mo tuakoi kae ne fakatauemu mai foki ki a au. Kae ne ‵talo atu au ki a Ieova mō te malosi ke fai te mea tonu. Ne maua ne au a fakamafanafanaga i pati i te Faataoto 18:10, telā e fai mai: “A te igoa o Ieova se taoa malosi. E tele ki ei a te tino amiotonu kae maua i ei se puipuiga.”

E isi foki se mea ne fesoasoani mai ki a au, ko te kau atu ki fakatasiga a Molimau a Ieova. I konā ne lagona ei ne au a te alofa faka-Kelisiano kae ne ofo au me i tino konei e taumafai o ola e ‵tusa mo tulaga ma‵luga i mea tau amioga i te Tusi Tapu. A mea ne lavea ne au, ne fakatalitonu mai me i Molimau a Ieova e fakagalue ne latou te lotu tonu.

TE AUALA NE MAUA EI NE AU A MEA AOGA: A te fakagalue aka o akoakoga fakavae i te Tusi Tapu ne fesoasoani mai ke momea aka te ‵lei o toku fesokotakiga mo aku tama‵liki. Ne maua foki ne au se lagonaga me ko oti ne tapale keatea mai i oku tuauma se amoga ‵mafa. Ne masani o fakaoti aku tupe ki tupua sē ola kolā ne seki aoga ki a au i so se auala. Nei la, ko tapuaki au ki a Ieova, telā e tuku mai ne ia se faka‵leiga tumau ki ‵tou fakalavelave katoa. (Fakaasiga 21:3, 4) Ko fiafia au me ko se toe fai nei au mo pologa ki tupua, kae i lō te fai penā ko tavini atu au ki a Ieova! Ko ia telā e maua ei ne au a te tokagamalie mo te puipuiga tonu.

“Ne Salasala au ki te Atua Talu Mai Taku folikiga.”—SHINJI SATO

TAUSAGA NE FANAU I EI: 1951

TENA FENUA: TIAPANI

TENA TALA FAKASOLOPITO: FAIFEAU O TE LOTU SINITU

TOKU OLAGA MUA: Ne tupu aka au i se fa‵kai e tasi i Fukuoka. Oku mātua ne tino ‵lotu; kae ne puti aka ne lāua au mai taku folikiga ke āva malosi ki atua o te lotu Sinitu. I te taimi koi foliki au, ne mafaufau faeloa au ki toku fakaolataga kae ne fia fesoasoani malosi atu au ki tino kolā e fe‵paki mo fakalavelave. E masaua ne au se taimi i te akoga ne fesili mai te faiakoga ki te vasega me se a te galuega e fia ga‵lue matou i ei māfai ko ma‵tua. Ne mautinoa eiloa a fakamoemoega o tama‵liki i te vasega, e pelā mo te fai mo fai ne saienitisi. Ne fai atu au me ne manako au ke tavini atu ki te Atua. Kae ne ‵kata a tino katoa ki a au.

I taku otiga mai te akoga lasaga lua, ne akoga au i se akoga mō faifeau. I te taimi tenā, ne fetaui au mo se faifeau i te lotu Sinitu, telā ne fakaaoga ana taimi avanoa ke faitau ki se tusi telā e uli tena ‵kava. I te aso e tasi, ne fesili mai a ia, “Sato, e iloa ne koe me se a te tusi tenei?” E iloa ne au te ‵kava o te tusi, tenā ne tali atu ei au, “Ko te Tusi Tapu.” Ne fai mai a ia, “So se tino e fia fai mo fai se faifeau o te lotu Sinitu, e ‵tau o faitau ki te tusi tenei.”

Ne fanatu eiloa au o ‵togi se Tusi Tapu. Ne tuku ne au te Tusi Tapu i te ‵toe koga ‵lei i taku fatatusi kae tausi faka‵lei ki ei. Kae ne seki fakaavanoa eiloa ne au se taimi ke faitau ki ei, me ne fakalavelave malosi au i taku akoga. I taku otiga mai te akoga, ne kamata o galue au i se faletapu e pelā me se faifeau o te lotu Sinitu. Ko taunu eiloa te mea ne manako au ki ei talu mai taku folikiga.

Kae ne fatoa iloa aka ne au fakamuli, me ne ‵kese a te mea ne fakamoemoe au ki ei ke fai ne se faifeau o te lotu Sinitu. A te tokoukega o faifeau e se a‵lofa io me ‵saga tonu atu ki nisi tino. E tokouke foki e se lasi te lotou fakatuanaki. Ne fai mai se pule o matou ki a au: “Kafai koe e manako ke manuia i loto nei, e ‵tau fua o faipati koe e uiga ki mataupu silisili. E tapu te faipati e uiga ki te fakatuanaki.”

A vaegā pati penā ne fai ei ke se fiafia au ki te lotu Sinitu. E tiga eiloa ne tumau au i taku galuega i te faletapu, ne kamata o iloilo ne au a nisi lotu. Kae e seai eiloa se lotu ne tai ‵lei mai. Ko te uke o lotu ne iloilo ne au, ko te lasi o toku loto vāivāi. Ne mafaufau au me e seai se munatonu i so se lotu.

TE AUALA NE ‵FULI EI TOKU OLAGA NE TE TUSI TAPU: I te 1988, ne fetaui au mo se tino lotu Puta telā ne fakamalosi mai ke faitau au ki te Tusi Tapu. Ne masaua ei ne au a pati a te faifeau i te lotu Sinitu i tausaga ko ‵teka, telā ne fakamalosi mai ke fai foki ne au te mea tenā. Ne fai ei taku fakaikuga ke fakagalue aka ne au a te manatu fakatonutonu tenā. I te taimi ne kamata o faitau au ki te Tusi Tapu, ne fiafia malosi au ki ei. I nisi taimi, ne faitau au i te po kātoa ke oko ki te taimi ko sae aka ei te la i toku famalama.

A mea ne faitau ne au, ne fakamalosi mai ki a au ke ‵talo ki te Atua o te Tusi Tapu. Ne kamata au ki te ‵talo fakaakoako telā e sae mai i te Mataio 6:9-13. Ne fakafokifoki atu faeloa ne au te ‵talo tenei mai tua o taki lua itula—i te taimi e galue ei au i te faletapu o te lotu Sinitu.

Ne uke ‵ki aku fesili ki aku mea ne faitau. I te taimi tenei, ko oti au ne avaga, kae ne iloa ne au me i Molimau a Ieova e akoako ne latou ki tino a mea e uiga ki te Tusi Tapu, me ne asi sāle mai latou ki taku avaga i aso mua. Ne ‵sala au ki se Molimau e tokotasi kae fai atu aku fesili e uke ki tou fafine. Ne ofo malosi au me ne fakaaoga ne ia te Tusi Tapu ke tali a fesili takitasi konā. Ne fakatoka ne ia ne Molimau ke fai ne lāua taku akoga faka-te-Tusi Tapu.

E seki leva, kae kamata o kau au ki fakatasiga a Molimau a Ieova. Ne seki iloa ne au i te taimi tenā, kae ne aofia i Molimau konā, ko nisi tino kolā ne seki āva malosi au ki ei i aso mua. Kae e ui i ei, ne fakatalofa mai latou mo te fia‵fia kae talimālō ‵lei ne latou au.

I fakatasiga konā, ne tauloto ne au me e manako te Atua ko tāgata a‵vaga ke fakaasi atu te alofa mo te āva ki tena kāiga. Mai mua atu i ei, ne saga malosi atu au ki taku galuega pelā me se faifeau kae ne seki fia saga atu au ki taku avaga mo mā tama‵liki tokolua. Ne iloa aka ei ne au me ne sili atu toku fakalogologo ki tino kolā ne ‵mai o tapuaki i te faletapu, kae e seai loa se taimi ne fakalogologo au ki pati ne fai mai ne taku avaga.

I te taimi ne gasolo ki mua taku akoga, ne tauloto ne au a mea e uke e uiga ki a Ieova telā ne ‵futi mai ne ia au ki a ia. Ne otia malosi au i tusi fai‵tau pelā mo te Loma 10:13, telā e fai mai: “Ko tino katoa kolā e ka‵laga ki te igoa o Ieova ka ‵sao.” Ne salasala au ki te Atua talu mai taku folikiga, kae tenei ko maua ne au a ia!

Ne kamata o fai fakaa‵tea oku lagonaga e uiga ki toku nofo atu i te faletapu. Muamua la, ne manavase au ki mafaufauga o nisi tino māfai ko tiaki ne au te lotu Sinitu. Kae ko leva ne fai sāle ifo au me ka tiaki ne au a te koga tenei māfai ko maua ne au a te Atua tonu i se isi koga. Tela la, i te taimi ne ‵somo aka ei a lau o lakau i te 1989, ne fakaiku aka ne au ke tautali atu i toku loto lagona. Ne tiaki ne au te faletapu kae tuku atu au ki lima o Ieova.

Ne seki faigofie ke tiaki ne au te faletapu. Ne kaitāua mai oku pule kae taumafai o fakamalosi au ke nofo. Kae sili atu te faigata ke fakailoa atu te mea tenei ki oku mātua. I toku auala ki te lā fale, ne manavase malosi au kae ne ‵mae ei oku fatafata kae pole‵pole oku vae! Ne tu au i taimi e uke i toku auala ki konā o ‵talo ki a Ieova ke maua te malosi.

I te taimi ne oko atu ei au ki te lā fale, ne mataku malosi au ke fakasae aka te mataupu tenei. Ne ‵teka atu te fia o itula. Fakamuli ifo, mai tua o ‵talo e uke, ne fakamatala atu ne au a mea katoa ki toku tamana. Ne fai atu au me ko maua ne au a te Atua tonu kae ko tiakina ne au a te lotu Sinitu ke tavini atu ki a Ia. Ne poi malosi kae fanoanoa toku tamana. Ne o‵mai a nisi kāiga ki te fale o taumafai ke ‵fuli toku mafaufau. Ne seki manako au o fakalogo‵mae atu ki oku kāiga, kae ne iloa ne au i te taimi tenā me i te tavini atu ki a Ieova ko te ‵toe mea ‵lei ke fai. Fakamuli ifo, ne āva mai oku kāiga ki taku fakaikuga.

E ‵kese a te tiaki tonu o te faletapu; kae e ‵kese foki ke tiaki a mea konā i toku mafaufau. Ne ‵mautakitaki i loto i a au a te olaga o se faifeau. Ne taumafai malosi au ke fakapuli a mea konā, kae ko so se koga e kilo atu au ki ei, e isi faeloa ne mea e fakamasaua mai ki a au e uiga ki toku olaga mua.

E lua a mea ne fesoasoani mai ke fakapuli ne au a mea konei. Muamua la, ne ‵sala malosi au ki so se mea i toku fale telā e isi sena sokoga ki taku lotu mua. Kae ne ‵sunu ne au a mea katoa konā—tusi, ata, mo mea fakalotu ‵togi ‵mafa. Te lua, ne ‵sala au ki so se avanoaga ke mafai o ‵kau fakatasi mo Molimau. Ne fesoasoani mai i se auala lasi ‵ki a te lotou va fakataugasoa mo te lotou ‵lago mai. Ne kamata ei o ‵galo malielie atu a mea konā i toku mafaufau.

TE AUALA NE MAUA EI NE AU A MEA AOGA: Ne tuku tiaki sāle ne au taku avaga mo aku tama‵liki, telā ne fai ei ke maua ne latou a lagonaga fakaa‵lofa. Kae i te taimi ne kamata o fakamāumāu ne au oku taimi mo latou, e pelā mo te mea e akoako mai i te Tusi Tapu ke fai ne tāgata a‵vaga, ne gasolo aka o ‵pili matou. Fakamuli ifo, ne kau mai taku avaga ki a au i te tavini atu ki a Ieova. Ko ‵kau fakatasi nei matou i te tapuakiga tonu fakatasi mo te mā tama tagata, te mā tama fafine mo tena avaga.

Kafai e toe mafaufau au ki te mea ne manako au ki ei talu mai taku folikiga, ke tavini atu ki te Atua kae fesoasoani atu ki nisi tino, ko iloa ne au me ko maua ne au a mea ne ‵sala au ki ei—mo nisi mea e uke atu. E seai ne pati e mafai o fakamatala atu i ei toku loto fakafetai ki a Ieova.

“Ne Iloa ne au me e Isi se Mea Koi Galo.”​—LYNETTE HOUGHTING

TAUSAGA NE FANAU I EI: 1958

TENA FENUA: AFELIKA KI SAUTE

TENA TALA FAKASOLOPITO: LAGONAGA TUKU TIAKI

TOKU OLAGA MUA: Ne fanau au i Germiston, se fa‵kai foliki, telā e isi ne koga keli aulo, kae e se uke a amioga solitulafono i ei. Ona ko te mafau‵fau me ko se mafai ne lāua o tausi a au, ne fakaiku aka ne oku mātua ke tuku atu au ke puke ne se tino. Ne puke au ne se tauavaga a‵lofa kolā ne fai pelā me ko oku mātua kae ko 14 fua oku aso. Kae i te taimi ne iloa ei ne au a te tala e uiga ki a au, ne faigata ki a au ke fa‵ki i lagonaga tuku tiaki. Ne oko mai te lagonaga me i oku mātua puke e se ko oku mātua ‵tonu, kae e se iloa ‵lei ne lāua au.

I te taimi ko 16 oku tausaga, ne kamata o fanatu au ki koga inu kava, mo oku taugasoa kae saka‵saka kae fakalogo‵logo ki pese e usuusu i ei. I te taimi ko 17 oku tausaga, ne kamata o ‵pusi sikaleti au. Ne manako au ke pakā pelā mo fāfine i ata kolā e fakagaligali mai ei a te ‵pusi. I te taimi ko 19 ei oku tausaga, ne kamata o galue au i Johannesburg, kae ne aofia fakavave ei au i taugasoa ma‵sei. E seki leva, ne kamata o pati masei au, ‵pusi malosi, kae inu kava i fakaotiga o vaiaso.

Kae e malosi ‵lei foki toku foitino. Ne fakamalosilosi sāle toku foitino kae tafao i te futipolo a fāfine, penā foki mo nisi tafaoga. Ne galue malosi au i taku galuega ‵togi kae taumafai foki ke takutakua au i mea tau komupiuta. Ona ko te mea tenā, ne uke aku tupe kae ne fai au pelā me se tino manuia i te kilokiloga a nisi tino. Kae ko au ne seki fiafia malosi—ne fanoanoa kae se iloa me ne a aku mea ka fai ki toku olaga. I toku ‵kanoloto tonu eiloa, ne iloa ne au me e isi se mea koi galo.

TE AUALA NE ‵FULI EI TOKU OLAGA NE TE TUSI TAPU: I te taimi ne kamata o sukesuke au ki te Tusi Tapu, ne iloa ne au me i a Ieova se Atua alofa. Ne iloa foki ne au me ne fakaasi mai ne ia te alofa tenā i te tukumaiga o tena Muna, ko te Tusi Tapu. E pelā loa me ne tusi mai ne ia se tusi totino ki a tatou ke takitaki ei ‵tou auala. (Isaia 48:17, 18) Ne iloa ne au me kafai e manako au ke maua a mea aoga mai te takitakiga alofa a Ieova, e ‵tau o fai ne au a ‵fuliga ‵lasi i toku olaga.

E tasi te ‵fuliga e ‵tau o fai ne au, ko oku taugasoa. Ne mafaufau ‵loto au ki pati i te Faataoto 13:20, telā e fai mai: “A te tino e sa‵sale fakatasi mo tino ‵poto ka poto, kae ko te tino telā e fai mea fakatasi mo tino va‵lea ka iku atu ki te masei.” Ne fakamalosi mai te akoakoga fakavae tenā ke tiaki ne au oku taugasoa kae fai a taugasoa ‵fou mo Molimau a Ieova.

A te ‵toe mea faigata ki a au, ko te ‵katiga o taku ‵pusi; ne umiti malosi au ki ei. I te taimi ne kamata o manumalo malielie au i te mea faigata tenā, ne sae aka te suā mea. A te ‵katiga o taku ‵pusi sikaleti, ne fanaka ei toku ‵mafa i se 30 tupu pauna (13.6 kg)! Ne fakavāivāi malosi mai ki a au te mea tenā, kae toeitiiti ko kātoa te sefulu tausaga ne taumafai ei au ke toe fanaifo toku ‵mafa. Kae ne iloa ne au me i te ‵katiga o te pusi se mea ‵lei e ‵tau o fai. Ne ‵talo faeloa au ki a Ieova kae ne tuku mai ne ia te malosi ke manumalo i ei.

TE AUALA NE MAUA EI NE AU A MEA AOGA: Ko sili atu nei toku malosi. Ko lotomalie foki au—ko se toe afuli ne au a te fiafia sē tonu telā e fai mai me e maua i se galuega ‵togi, takutakua, mo te maumea. I lō te fai penā, ko maua ne au te fiafia i te fakaasiatuga o muna‵tonu mai te Tusi Tapu ki nisi tino. Ona ko te mea tenā, ko tokotolu oku taugasoa ko tavini atu nei ki a Ieova, fakatasi mo māua mo taku avaga. A koi tuai o ‵mate atu oku mātua puke, ne mafai ne au o fakaasi atu ki a lāua a te folafolaga gali i te Tusi Tapu e uiga ki te toetuga ki te lalolagi palataiso.

A te fakapilipili atu ki a Ieova ne fesoasoani mai ke mafai ne au o fa‵ki i lagonaga tuku tiaki. Ne tuku mai ne ia ki a au se lagonaga tokagamalie mai te ‵futi atu ne ia au ki loto i se kāiga o taina tali‵tonu i te lalolagi kātoa. Ne maua ne au i ei a mātua, tamana, taina, mo tuagane e tokouke.—Maleko 10:29, 30.

[Ata]

Ne maua ne au a te alofa faka-Kelisiano i va o Molimau a Ieova

[Ata]

Ko te faletapu a te lotu Sinitu telā ne tapuaki atu i ei au muamua