Ua taui te Bibilia i to ˈu oraraa

NO TE aha te hoê vahine e 60 matahiti to ˈna i haapae ai i te mau haamoriraa idolo? Na te aha i turai i te hoê tahuˈa Shinto ia faarue i ta ˈna taviniraa i roto i te fare pure a riro atu ai ei tavini Kerisetiano? E mea nafea te hoê vahine o tei faaamuhia i to ˈna nainairaa i te faarururaa i te hepohepo no te mea ua faaruehia oia? E vaiiho anaˈe ia ratou ia faaite mai.

“E ere faahou vau i te tîtî a te mau idolo.”​—ABA DANSOU

MATAHITI FANAURAA: 1938

FENUA: BÉNIN

AAMU: TAATA HAAMORI IDOLO

NA MUA ˈˈE: Ua paari au i So-Tchahoué, te hoê oire rii i te hoê vahi varivari aita i atea i te roto. Te ohipa a te feia i te oire rii, te vai ra te taiˈa, faaamuraa i te mau puaatoro, puaaniho, mamoe, puaa e te moa. Aita râ e purumu no te haere i ǒ, mea na nia noa i te poti e te vaa. Te mau nohoraa, mea hamanihia i te raau e te aihere aore ra i te tahi taime, i te ofai araea. I tera vahi, mea veve roa te rahiraa o te taata. Noa ˈtu râ te reira, mea iti roa te ohipa ino i to matou vahi i te oire iho.

I to ˈu tamariiriiraa, ua afai to ˈu metua tane ia mâua to ˈu tuahine paari aˈe ia ˈu i roto i te hoê vahi e faaineinehia ˈi te mau tahuˈa vahine o ta matou haapaoraa. I muri iho, ua farii au ia Dudua (Oduduwa) no ǒ mai i te taˈere Yoruba mai to ˈu atua. Ua hamani au i te hoê afata nainai e ua pûpû vau i te mau ufi, te hinu haari, te maˈoa fenua, te moa, te uuairao e te tahi atu mau animara. Mea moni roa teie mau mea e pau roa ta ˈu moni i te hooraa i te reira.

UA TAUI TE BIBILIA I TO ˈU ORARAA: A haamata ˈi au i te haapii i te Bibilia, ua haapii au e o Iehova te Atua mau. Eita roa oia e farii i te haamoriraa idolo. (Exodo 20:4, 5; Korinetia 1, 10:14) Faarue atura ïa vau i te mau hohoˈa e te mau taihaa i faaohipahia i roto i te haamoriraa idolo. Faaea atoa vau i te imi i te mau tapao no te ite i te a muri aˈe e i te apiti i te oroa no to ˈu vahi e te mau peu e ravehia ia pohe te hoê taata.

E 60 matahiti to ˈu e e ere i te mea ohie no ˈu ia rave i teie mau tauiraa. Ua patoi mai to ˈu mau hoa, fetii e te feia tapiri ia ˈu ma te faaooo ia ˈu. Ua ani au ia Iehova te puai no te rave i te mea maitai. Ua faaitoito mai ïa te Maseli 18:10 ia ˈu: “Te iˈoa o Iehova ra, e pare etaeta ïa; te horo nei te parau-tia i reira e ua ora ihora.”

Ua ite au i te here Kerisetiano i te mau putuputuraa a te mau Ite no Iehova. E ua tauturu mai te reira ia ˈu. Ua faahiahia roa vau i te taata e haafaufaa ra i te mau ture aveia o te Bibilia. Ua papu atura ia ˈu o te mau Ite no Iehova te haapaoraa mau.

TO ˈU FAUFAARAAHIA: Maoti te mau faaueraa Bibilia mea afaro roa vau e ta ˈu mau tamarii. Aita vau i teimaha faahou. Na mua ˈtu, ua haamâuˈa vau i ta ˈu moni no te mau idolo faufaa ore. I teie nei râ, te haamori nei au ia Iehova o te horoa mai i te ravea ia fifi matou. (Apokalupo 21:3, 4) E ere faahou vau i te tîtî a te mau idolo, e tavini râ na Iehova. E ua ite au i te hau e te paruru ia ˈna ra.

“Ua imi au i te Atua mai to ˈu tamariiriiraa.”​—SHINJI SATO

MATAHITI FANAURAA: 1951

FENUA: TAPONE

AAMU: TAHUˈA SHINTO

NA MUA ˈˈE: Ua paari au i te mataeinaa no Fukuoka. Ua puai roa to ˈu nau metua i te pae faaroo e mea haamori roa raua i te mau atua Shinto. Mai to ˈu nainairaa, ua manaˈo noa na vau e nafea vau e faaorahia, e nafea vau e tauturu ia vetahi i roto i te fifi. I te hoê mahana, ua ani mai ta matou orometua eaha ta matou e hinaaro e rave ia paari mai. No vetahi ia riro mai ei aivanaa, no ˈu râ, ua hinaaro vau e tavini i te Atua. E ua faaooo te taatoaraa ia ˈu.

I muri aˈe i ta ˈu haapiiraa tuarua, ua haere au i te hoê haapiiraa no te riro mai ei orometua e haapii i te pae haapaoraa. I te hoê mahana, ua ite au i te hoê tahuˈa Shinto e taio ra i te hoê buka e paa ereere to te reira. Ua parau mai teie tahuˈa ia ˈu: “Sato, ua ite oe eaha teie buka?” Na ô atura vau: “Te Bibilia.” Parau mai nei oia: “Te taata atoa o te hinaaro e riro mai ei tahuˈa Shinto, mea titauhia ia ˈna ia taio i tera buka.”

Haere atura vau e hoo mai i te hoê Bibilia. E ua haapao maitai au i tera buka ma te tuu i te hoê vahi e itehia te reira. No te rahi râ o ta ˈu ohipa i te haapiiraa, aita ˈtura to ˈu e taime no te taio. I te otiraa ta ˈu faaineineraa, ua riro mai au ei tahuˈa Shinto i roto i te hoê fare pure. Ua tupu ïa te mea ta ˈu i hinaaro.

Ua taa oioi râ ia ˈu e ere roa ˈtu te mea ta ˈu i manaˈo a riro ai ei tahuˈa Shinto. Aita te mau tahuˈa Shinto e tâuˈa ra ia vetahi e aita atoa e faaroo to ratou. Ua parau hoê o to ˈu taata rahi ia ˈu: “Ia hinaaro oe e manuïa i ǒ nei, eiaha roa ˈtu oe e paraparau no nia i te faaroo, e nehenehe râ oe e paraparau no nia i te mau mea i te pae philosopho.”

Aita ˈtura vau i anaanatae i te parau no te haapaoraa Shinto. A amo noa ˈi au i ta ˈu hopoia i roto i te fare pure, ua haamata vau i te imi i te tahi atu haapaoraa. Tera râ, ua toaruaru vau i te iteraa aita hoê aˈe haapaoraa maitai.

UA TAUI TE BIBILIA I TO ˈU ORARAA: I te matahiti 1988, ua matau mai au i te hoê taata bouddhiste o te faaitoito mai ia ˈu ia taio i te Bibilia. A haamanaˈo ai au i ta te tahuˈa Shinto i parau mai tau matahiti na mua ˈtu, haamata ˈtura vau i te taio i te Bibilia i tera po e ao noa ˈtu.

Ua turai ta ˈu taioraa Bibilia ia pure i te Atua o te Bibilia. Ua haamata vau i te haapii i te pure ta Iesu i faahiti i roto i te Mataio 6:9-13. E pure noa na vau pauroa te taime e te mahana e oia atoa ia rave au i ta ˈu ohipa i te fare pure.

Mea rahi râ ta ˈu uiraa a taio ai au i te Bibilia. Ua faaipoipo vau i ta ˈu vahine o tei matau aˈena i te mau Ite no Iehova. I to ˈu iteraa e te haapii nei ratou i te Bibilia e te taata, ua imi au i te farerei ia ratou. Farerei mai nei ia ˈu i te hoê vahine Ite no Iehova, e mea rahi ïa uiraa ta ˈu ia ˈna. Ua pahono mai oia ma te faaohipa i te Bibilia e ua faahiahia roa vau. Rave atura teie vahine i te faanahoraa ia haapii au i te Bibilia e te mau Ite no Iehova.

Ua haere au i te mau putuputuraa a te mau Ite no Iehova. Aita râ vau i haapao e te feia i apiti mai i te putuputuraa, te vai ra te mau taata ta ˈu i ore i farii maitai. Ua aroha mai ratou ia ˈu e ua farii maitai mai.

I tera putuputuraa, ua haapii au e te ani mai ra te Atua ia here e ia haapao i to ˈu utuafare. No te rahi râ o ta ˈu ohipa ei tahuˈa Shinto, aita ˈtura vau i tâuˈa faahou i ta ˈu vahine e ta ˈu na tamarii. Ua taa râ ia ˈu ua faaroo aˈe vau i te feia i te fare pure, i te faaroo i ta ˈu vahine.

Mea rahi roa te ohipa apî ta ˈu i ite no nia ia Iehova i roto i ta ˈu taioraa Bibilia. Mea au roa na ˈu te Roma 10:13 o te parau ra: “Te taata atoa o te tiaoro i te iˈoa o Iehova, e faaorahia ïa.” Ua imi au i te Atua mai to ˈu tamariiriiraa e ua itehia mai ia ˈu!

Aita vau i anaanatae faahou i te ohipa i te fare pure. I te haamataraa, te feaa nei au eaha ra to vetahi manaˈo ia faaroo ratou e te faarue ra vau i te haapaoraa Shinto. Ua manaˈo noa na vau e te mahana e ite ai au o vai te Atua mau, e faarue vau i tera vahi. Tera ïa ta ˈu i rave i te matahiti 1989. Ua faarue vau i ta ˈu ohipa i te fare pure e ua tuu vau i te reira i roto i to Iehova rima.

E ere i te mea ohie ia faarue i ta ˈu ohipa i te fare pure. Ua tamaˈi mai e ua faahepo mai to ˈu taata rahi ia ˈu eiaha vau e faarue i ta ˈu ohipa. Te mea peapea roa ˈtu â no ˈu o te faaiteraa ïa i to ˈu na metua. A haere ai au i te fare o to ˈu na metua, ua mauiui roa to ˈu ouma a rûrû noa ˈi to ˈu avae e e rave rahi taime to ˈu aniraa ia Iehova i te itoito.

I to ˈu taeraa ˈtu i te fare o to ˈu na metua aita vau i parau oioi ia raua. I muri roa mai, ma te faarahi i te pure i to ˈu faataaraa i to ˈu papa e ua itehia mai ia ˈu te Atua mau e ua faarue vau i te haapaoraa Shinto no te tavini i te Atua. Ua oti roa to ˈu papa. Ua tamata vetahi o to ˈu fetii i te faataui i to ˈu manaˈo, ua faaoti râ vau i te tavini ia Iehova. I muri iho râ, ua faatura ratou i ta ˈu faaotiraa.

Noa ˈtu ua faaea vau i te haere i te fare pure, mea titauhia ia ˈu ia faatano i to ˈu feruriraa. Ua aˈa roa tera oraraa ei tahuˈa i roto ia ˈu. Ua tamata râ vau eiaha e manaˈo faahou i te reira, aita iho â.

Eaha ta ˈu i rave? A tahi, ua imi au i te mau mea o te faaohipahia i roto i ta ˈu haapaoraa, ua tutui ïa vau i te mau buka e te mau hohoˈa. Te piti, ua apiti tamau vau e te mau Ite no Iehova, e maoti ta ratou tauturu i nehenehe ai au e faaruru i te reira. E faaea noa ˈtu ra tera mau manaˈo i te haafifi i to ˈu feruriraa.

TO ˈU FAUFAARAAHIA: Na mua ˈˈe, aita roa ˈtu vau e haapao roa ra i ta ˈu vahine e ta ˈu na tamarii. I to ˈu râ faataaraa i te taime no ratou mai ta te Bibilia e parau ra i te mau tane, ua piri atu â matou. I muri iho, ua tavini atoa ta ˈu vahine ia Iehova, ua hoê ïa matou, ta mâua tamaiti e ta mâua tamahine e ta ˈna tane no te haamori ia Iehova.

Ia feruri au i ta ˈu i manaˈo i to ˈu tamariiriiraa, e tavini te Atua e e tauturu ia vetahi, ua itehia ia ˈu i te reira e hau atu â. Ua hope ïa to ˈu mauruuru ia Iehova no te reira.

“Ua ite au e te erehia ra vau i te tahi mea.”​—LYNETTE HOUGHTING

MATAHITI FANAURAA: 1958

FENUA: AFIRIKA APATOA

AAMU: MAI TE MEA RA UA FAARUEHIA VAU

NA MUA ˈˈE: Ua paari au i Germiston i te hoê oire heruraa ofai moni rahi. E ere te feia taoˈa rahi e faaea ra i reira. I te mea hoi e eita to ˈu na metua e nehenehe e haapao ia ˈu ua faaoti raua e horoa faaamu ia ˈu. E 14 mahana noa to ˈu a horoahia ˈi au i te hoê utuafare maitai, o ta ˈu i faariro e metua no ˈu. I te taime râ a ite ai au mea faaamuhia vau, mai te mea ra ua faaruehia vau. Haamata ˈtura vau i te manaˈo e ere au i ta raua tamahine e aita raua e taa ra ia ˈu.

I te 16raa o to ˈu matahiti, i haere na vau e to ˈu mau hoa i te vahi oriraa aore ra e hauti i te upaupa. I te 17raa o to ˈu matahiti, haamata ˈtura vau e puhipuhi i te avaava e ua faahinaaro atoa vau i te nehenehe o tera mau vahine i nia i te afata avaava. I te 19raa o to ˈu matahiti, ua noaa mai i ta ˈu ohipa i Johannesburg, e ua haamatau vau i te mau taata e ere to ratou haerea i te mea maitai. Haamata ˈtura vau i te parau ino, i te puhipuhi tamau i te avaava e i te inu i te mau hopea hebedoma atoa.

Ua rau te tuaro ta ˈu e rave nei, te vai ra te tueraa popo no te mau vahine e te tahi atu mau tuaro. Ua matauhia vau no to ˈu aravihi i te pae matini roro uira, ua manaˈo ïa vetahi e i te mea mea aufau-maitai-hia vau, te oaoa ra ïa vau, aita roa ˈtu. Aita vau i au i to ˈu oraraa, no ˈu, mai te mea ra ua erehia vau i te hoê mea.

UA TAUI TE BIBILIA I TO ˈU ORARAA: I to ˈu haapiiraa i te Bibilia, ua ite au e e Atua here Iehova. Nafea? Maoti ïa ta ˈna parau te Bibilia no te aratai ia tatou i nia i te eˈa e haere ai tatou. (Isaia 48:17, 18) Ua taa ïa ia ˈu e ia hinaaro vau e fanaˈo i te reira, mea titauhia ia ˈu ia rave i te mau tauiraa.

Mea titau-atoa-hia ia ˈu ia hiˈo faahou i ta ˈu mau amuimuiraa. Ua feruri maite au i nia i te Maseli 13:20 o te parau ra: “O tei amui atoa to ˈna haerea i to te feia paari ra, e paari atoa ïa; o tei amui râ i te feia maamaa ra, e pohe ïa.” Ua tapu ïa vau i tera mau amuimuiraa e ua faahoa ˈtu vau e te mau hoa apî Ite no Iehova.

Te mea fifi roa no ˈu, o te faaea ïa i te puhipuhi i te avaava. A faaea ˈi au i te puhipuhi i te avaava ua poriahia vau, 13 kilo hau, ua oti roa vau! Ua titauhia ia ˈu ahuru matahiti no te haapararai faahou. Ua ite râ vau i te maitai ia faaea i te puhipuhi i te avaava. E ua ani tamau vau ia Iehova i ta ˈna tauturu no te haapae i te reira.

TO ˈU FAUFAARAAHIA: Ua maitai mai to ˈu ea, te oaoa nei au no te mea aita vau e imi faahou ra i te hoê ohipa tiaraa e taoˈa no te ite mai i te oaoa. Ta ˈu oaoaraa o te faaiteraa ïa i te parau mau o te Bibilia. I teie mahana, e toru hoa ohipa e ta ˈu atoa tane tei riro mai ei Ite no Iehova. Hou to ˈu na metua faaamu a pohe ai ua faaite atoa vau ia raua te tiaturiraa ta te Bibilia e horoa mai no nia i te tia-faahou-raa i te fenua nei te faarirohia ei paradaiso.

Ua tauturu mai te auhoaraa e o Iehova ia ˈu ia ore e manaˈo faahou e ua faaruehia vau. Ua horoa mai râ Iehova i te hoê utuafare pae varua na te ao nei. Ua itehia mai ia ˈu te mau metua vahine, metua tane, taeae e tuahine.—Mareko 10:29, 30.

 [Hohoˈa i te api 12]

Ua ite au i te here i rotopu i te mau Ite no Iehova

 [Hohoˈa i te api 13]

Te fare pure Shinto i reira vau i te ohiparaa ei tahuˈa