La Bìblia la càmbia la vita dele persone

Parché che una dona con de pi de 60 ani la se ga fermà de doperar imàgine? Cossa che ga giutà un sasserdote che l’era dela religion del sintoìsmo a fermarse de laorar nte un santuàrio e insegnar quel che la Bìblia la dise? Come che una dona che la ze stata adotada pena nassesta la se ga fermà de sentirse abandonada? Vedi quel che queste persone le ga dito.

“No dopero pi imàgine.” — ABA DANSOU

ANO DE NASSIMENTO: 1938

PAESE: BENIN

CHI ERO: MI DOPEREA IMÀGINE

EL ME PASSÀ: Son stata slevada in So-Tchahouè, nte un pìcolo posto nte una region darente de un lago. Quei che i vive lì, i laora cola pesca, i cria vache, piégore, cavre, porchi e galine. No ghen’è strade in questo posto. Le persone le dopera barchi e canoe par ndar de un posto al altro. Quasi tute le case le ze fate de legno e capoere, e arquante con matoni. Le persone che le vive lì le ze poarete. Ancora cossita, no ghen’è crime come nele cità.

Quando mi era picinina, me pare el ga mandà mi e me sorela nte un convento de strionaria e lì ghemo imparà le dotrine de questa religion. Quando son vegnesta granda, go scoliesto Dudua (Oduduwa), dela cultura ioruba, par esser el me dio. Go fato un capitel par questo dio e mi ghe dea a lu tuti i di sacrifissi de un tipo de patata, òio de dendè, moluschi, galine, colombe e arquante altre bèstie. Questi sacrifissi i costea tanto e tante volte mi doperea quasi tuti i me soldi.

LA BÌBLIA LA GA CAMBIÀ TANTO LA ME VITA: Quando go scominsià a studiar la Bìblia, go imparà che Geovà l’è el ùnico vero Dio. Anca go imparà che Geovà no l’è de acordo che doperemo imàgine. (Ésodo 20:4, 5; 1 Corinti 10:14) Alora mi savea cossa che gavea de far. Go butà via tute le me imàgine e tute quelaltre robe che le gavea relassion con lore che mi gavea casa. Anca son fermada de ndar in serca dele risposte ale me domande par meso dela indovinassion, no son pi ndata a serimònie par i morti e altre serimònie sbaliade.

Par mi, una dona con de pi de 60 ani, no l’è mia stato fàcile de cambiar. I me amighi, parenti e visini i ze restadi contra mi e i ga scominsià a torme in giro. Ma mi go pregà a Geovà parché el me desse forsa par far quel che l’è giusto. Le parole de Proverbi 18:10 le me ga dato tanto consolo: “El nome de Geovà l’è una forte tore. El giusto el core rento de ela e el riceve protession.”

Nantra roba che me ga giutà l’è stà ndar ale riunion dele Testimònie de Geovà. Là tuti i metea in pràtica el amor dei veri seghidori de Cristo. Son restada maraveiada parché lori i proea viver de acordo con quel che la Bìblia la dise sora quel che l’è giusto o sbalià. Quel che go visto me ga assà sicura che le Testimònie de Geovà le pratica la vera religion.

COME SON STATA GIUTADA: Meter in pràtica i prinsipi dela Bìblia me ga giutà a gaver una fameia pi unida. Anca go tirà via un peso dele spale. Mi doperea tuti i me soldi con imàgine che no le gavea vita e che no le me giutea gnente. Adesso mi adoro a Geovà che el dà la vera solussion de tuti i nostri problemi. (Apocalisse 21:3, 4) Me sento tanto felice parché adesso no dopero pi imàgine, ma adoro a Geovà! In Geovà go catà la vera protession e sicuressa.

“De quando ero pìcolo son sempre ndato in serca de Dio.” — SHINJI SATO

ANO DE NASSIMENTO: 1951

PAESE: GIAPON

CHI ERO: SASSERDOTE SINTOÌSTA

EL ME PASSÀ: Son stato slevà ntela colònia nte un posto ciamà Fukuoka. Par i me genitori la religion la era tanto importante. De picinin i me ga insegnà a adorar i dèi dela religion sintoìsta. Ancora quando ero tosatel, mi sempre pensea nela me salvassion e volea tanto giutar quei che i gavea bisogno de aiuto. Me ricordo che una volta nela scola el professor el ga domandà ai tosatei cossa che i volea far quando i fusse grandi. I me amighi i ga dito robe come, par esémpio, esser sientista. Ma mi go dito che volei servir a Dio. Tuti i me ga ridesto drio.

Dopo che mi go finio i me studi, son dato rento una scola par professori de religion. Lì go cognossesto un sasserdote sintoìsta che quando no’l gavea gnente de far el ledea un libro de capa negra. Un giorno, el me ga domandà: “Seto cossa che son drio leder, Sato?” Come gavea belche visto la capa go rispondesto: “La Bìblia.” Lu el ga dito: “Tuti quei che i vol esser un sasserdote sintoìsta i gavaria de leder questo libro.”

Son ndato suito comprar una Bìblia. La go metesta nel meio posto del mòbile dela me casa e la go tendesta ben. Ma no gavea mia tempo par léderla parché gavea tante robe de far nela scola. Quando go finio i me studi, go scominsià a laorar nel santuàrio come sasserdote sintoìsta. E go scominsià a far quel che gavea tanta voia de far.

Ma dopo go visto che esser un sasserdote sintoìsta no l’era ben quel che mi spetea. Quasi tuti i sasserdoti i mostrea poco interesse e amor ale persone. Tanti anca no i gavea mia fede. Un che el gavea de pi autorità che mi fin el ga dito: “Se te vol ndar ben qua, parla sol sora assunti de filosofia e no te ghè mai de parlar de fede.”

Scoltar queste robe le me ga assà disgustà cola religion sintoìsta. Anca se go seità laorar nel santuàrio, go scominsià a ndar in serca de altre religion. Ma gnanca una de lore le gavea qualcossa meio. Tanto de pi che mi ndea in serca de religion, de pi disgustà mi restea. Parea che gnanca una religion la gavesse la verità.

LA BÌBLIA LA GA CAMBIÀ TANTO LA ME VITA: Nel ano de 1988, go cognossesto un budista che el me ga dito che mi gavea de leder la Bìblia. Son ricordà de quel sasserdote sintoìsta che el me gavea parlà la medèsima roba. Alora go volesto seghir questo consìlio. Me ga piasesto suito quando go scominsià a leder la Bìblia. Dele volte, mi la ledea tuta la note fin la matina quando el sol el vegnea rento par la finestra.

Quel che go ledesto el me ga motivà a pregar al Dio dela Bìblia. Go scominsià col Pare Nostro mensionà in Mateo 6:9-13. Mi fea questa orassion a cada due ore, anca quando ero drio far i me laori nel santuàrio sintoìsta.

Mi gavea tante domande sora quel che ero drio leder. In questa època, mi ero belche maridà, e savea che le Testimònie de Geovà le insegnea la Bìblia ale persone parché lore le gavea belche visità la me sposa vanti. Son ndato in serca de una de lore e go fato tante domande. Son restà maraveià de come che lore le rispondea a tute le domande cola Bìblia. Ela la ze ndata in serca parché una persona la studiesse la Bìblia con mi.

Poco dopo, go scominsià a ndar nele riunion dele Testimònie de Geovà. Nel scomìnsio, no son nicorto che intrà de lore ghen’era persone che mi le gavea tratade mal nel passà. Ancora cossita, lore le me ga saludà de maniera rispetosa e le me ga fato sentir benvenuto.

In quele riunion, go imparà che Dio el vol che i sposi i ame e i dae onor ala so fameia. Fin quel momento, mi pensea sol nel me laoro come sasserdote e cossita no badea tanto la me dona e i me fioi. Go visto che ghe dea tanta atension ale persone che le ndea nel santuàrio, ma mi no go mai fato cossita cola me sposa.

Intanto che mi imparea cada volta de pi col me stùdio, son rivà cada volta pi darente de Geovà. Una roba che la rivea pròpio nel me cuor i era i testi come Romani 10:13, che dise: “Tuti quei che i invoca el nome de Geovà i sarà salvi.” Mi ero ndato in serca de Dio de gióveno, e adesso lo go catà!

Go scominsià a sentirme perso nel santuàrio. Nel scomìnsio, son restà preocupà con quel che i altri i pensesse se mi assesse la religion sintoìsta. Ma mi go sempre pensà che faria questo se catesse el vero Dio in nantra religion. Par quela, nela primavera del ano de 1989, go dessidio de obedir ala me cossiensa. Go assà indrio el santuàrio e me go metesto nele man de Geovà.

No l’è mia stà fàcile assar el santuàrio. Quei che i gavea autorità sora mi i me ga dito su e i ga fato de tuto parché mi stesse lì. Ma el pi difìcile l’è stà dirghelo ai me genitori. Nela strada ndando casa soa, me fea mal el peto e le me gambe le tremea parché mi ero tanto ansioso. Son fermà tante volte nela strada par pregar a Geovà domandando forsa.

Quando son rivà nela casa dei me genitori, son restà con paura de parlar sora questo. Le ore le ndea. Dopo de pregar tanto, go spiegà tuto a me pare. Mi ghe go dito a lu che gavea catà el vero Dio e che mi ero drio assar la religion sintoìsta par servir a Lu. El me pupà l’è restà sensa saver cossa dir e tanto disgustà. Altri parenti i ze vegnesti par proar farme cambiar de idea. Mi no volea disgustar la me fameia ma, al stesso tempo, mi savea che servir a Geovà la era la roba giusta de far. Col tempo, la me fameia la ga scominsià a rispetar la me dessision.

Anca se son ndato via del santuàrio, lu el seitea nela me mente. La vita de sasserdote la era ancora rento de mi. Go proà tanto desmentegarme de questa vita, ma in tuti i posti che mi ndea no ero bon de desmentegarme.

Due robe le me ga giutà a infrontar questo. Prima, son ndato in serca par tuto nela me casa par veder se ghen’era qualche roba dela religion che gavea vanti. Dopo, go brusà fora tuto: libri, foto, e robe che le gavea costà tanto e che me piasea tanto. Seconda, mi passea tuto el tempo che podea cole Testimònie de Geovà. Gaver la so amicìssia e el so aiuto me ga giutà tanto. Poco a poco, son desmentegà dela vita che gavea vanti.

COME SON STÀ GIUTÀ: Nel passà, mi assea la me sposa e i me fioi quasi sempre sensa giutarli e par questo i se sentia tanto soli. Ma quando mi go scominsià a passar de pi tempo con lori, cossita come che la Bìblia la dise che i sposi i ga de far, semo restadi pi unidi intrà de noantri. Col tempo, anca la me sposa la ga scominsià a servir a Geovà insieme con mi. Adesso semo tuti unidi nela vera adorassion, mi, me sposa, el nostro fiol, la nostra fiola e el so sposo.

Quando mi penso che volea servir a Dio de picinin e giutar i altri, vedo che go catà de pi de quel che gavea de bisogno par giutar i altri. No go parole par ringrassiar tanto a Geovà.

“Mi savea che me manchea qualcossa.” — LYNETTE HOUGHTING

ANO DE NASSIMENTO: 1958

PAESE: ÀFRICA DEL SUD

CHI ERO: ME SENTIA ABANDONADA

EL ME PASSÀ: Son nassesta in Germiston. Questa cità no la ga tanta criminalità e lì se laora con minèrio. I me genitori i pensea che no i era boni de slevarme, alora i me ga dato via par esser adotada. Quando mi gavea sol 14 giorni de vita, un casal amoroso el me ga adotà. Par mi, lori i era i me genitori. Ma dopo de cognosser la me stòria, me go sentio abandonada. Mi no me considerea pi la fiola de quei che i me ga adotà e pensea che lori no i era boni de capir i me sentimenti.

Quando gavea intorno de 16 ani, go scominsià a ndar nele bodeghe, ndove mi e i me amighi baleino e scolteino mùsica. Con 17 ani go scominsià a fumar. Mi volea esser magra come le done che mi vedea nele propagande dei sigri. Quando gavea 19 ani, son ndata laorar in Gioanesburgo e lì go scominsià a ndar insieme de brute compagnie. In poco tempo, go scominsià a parlar robe sporche e nei finai de stimana go scominsià a fumar tanto e bever massa.

Ancora cossita, mi gavea una bona salute. Fea sempre esersissi e pratichea squash e futebol feminino. Mi anca laorea tanto, e son restada ben cognossesta in quel che mi fea coi computadori. Par quela, mi guadagnea soldi, e tante persone le catea che mi ndea ben nela vita. Ma ancora cossita, mi no era felice. Me sentia persa e disgustada cola me vita. Mi sentia che me manchea qualcossa.

LA BÌBLIA LA GA CAMBIÀ TANTO LA ME VITA: Quando go scominsià a studiar la Bìblia, go imparà che Geovà l’è un Dio de amor. Anca go visto che el ne ga dimostrà el so amor parché el ne ga dato la so Parola, la Bìblia. L’è come se lu el gavesse scrito una carta par cada persona col ogetivo de orientar la nostra vita. (Isaia 48:17, 18) Go visto che se mi volea esser benefissiada cola so orientassion amorosa, gavaria de far grandi cambiamenti nela me vita.

Un cambiamento che gavea bisogno de far l’era cole me amicìssie. Go visto che l’era tanto importante el testo de Proverbi 13:20, che dise: “La persona che la va con quei che i ga el saver la deventarà sàbia. Ma quela che la va insieme coi stùpidi no la finirà ben.” Questo consìlio el me ga giutà a assar indrio i me amighi e catar altri amighi intrà le Testimònie de Geovà.

La me pi granda dificoltà l’è stà fermarme de fumar parché mi era tanto vissiada. Pian pianeto go superà questa dificoltà, ma ghen’ò bio nantra. Quando me go fermà de fumar go ingordà 13 chili! Questo l’è stato tanto difìcile par la me stima, e ghe go metesto quasi diese ani par perder questo peso. Ancora cossita, go visto che la roba giusta da far l’era fermarme de fumar. Mi seitea pregar a Geovà, e lu el me ga dato forsa par far questo.

COME SON STATA GIUTADA: Ancoi son una persona che go de pi salute. Anca son felice parché no son pi drio ala felicità che i dise che catemo nel laoro, nei soldi o de esser cognossesta come una persona importante. Invesse, sento alegria de parlar dela verità dela Bìblia ai altri. Par causa de questo, adesso tre dele me coleghe che mi gavea le serve a Geovà insieme de mi e del me sposo. Vanti che i morisse i me genitori che i me gavea adotà, go bio la oportunità de parlarghe a lori sora la ressuression che ghen sarà nte un paradiso qua nela Tera.

Rivarme darente de Geovà me ga giutà a no sentirme pi abandonada. Lu el me ga fato veder che fao parte de una fameia de fradei che ghen’è in tuta la Tera. In questa fraternità go catà tante mare, pare, fradei e sorele. — Marco 10:29, 30.

[Stampa]

Intrà le Testimònie de Geovà go sentio el amor dei veri seghidori de Cristo

[Stampa]

El santuàrio sintoìsta ndove mi fea la me adorassion