GEESHSHA MAXAAFAY ASAY LAAMETTANAADAN OOTTEES

LAYTTAY 60ppe bolla gidido issi maccaasiyaa eeqawu goynniyoogaa aggidoy aybissee? Issi SHintto haymaanootiyaa qeesee beetamaqidasiyan oottiyoogaa aggidi Kiristtaane gididi sabbakanaadan denttettiday aybee? Yelettosaara hara asi dichchanawu ekkido issi maccaasiyaa bana koyiyay baynnabadan qoppiyoogaa waatada aggadee? Ha asati yootiyoobaa ane akeekite.

“Eeqawu haarettiyoogaa aggaas.”—ABBA DANSSU

YELETTIDO LAYTTAA: 1938

YELETTIDO BIITTAA: BEENINE

KASE TAARIKIYAA: EEQAWU GOYNNIYAARO

TA KASE DEˈUWAA: Taani abbaa matan caretiya heeran deˈiya Sochchahuwe giyo sohuwan diccaas. Heeran deˈiya asay moliya oyqqees; qassi mehiya, deeshshaa, dorssaa, gudunttaanne kafota dichchees. Heeran ogee baynna gishshawu, asay issisaappe harasaa baanawu wolwoluwaa goˈettees. Issoti issoti bantta keettaa xuubiyan keexxikkokka, daroti mittaaninne maatan keexxoosona. Yan deˈiya asaappe dariya baggay hiyyeesa. Gidikkokka, katamaagaadan danobay darenna.

Taani naatettan deˈiyo wode, ta aaway tananne ta bayra michchiyo fetishe gadaamiya yeddiis; yan he wogaa ammanuwaa tamaarida. Taani gitatada, Yoruba wogaappe Duduˈa (Oduduwa) tawu xoossa oottaas. He xoossaayyo keettaa keexxada, ubba galla ayyo boyyiyaa, zambbaa zaytiyaa, xaadhdhiyaa, kuttuwaa, haraphphiyaanne hara dumma dumma mehiyaanne doˈaa yarshshays. He yarshshiyoobay keehippe alˈˈo, darotoo tawu deˈiya miishshaa ubbaa hegan wurssays.

TAANI LAAMETTANAADAN GEESHSHA MAXAAFAY MAADDIIS: Geeshsha Maxaafaa xannaˈiyoogaa doommido wode, tumu Xoossay Yihoowa xalla gidiyoogaa eraas. Qassi eeqawu goynniyoogee A ufayssennaagaa eraas. (Kessaabaa 20:4, 5; 1 Qoronttoosa 10:14) Ta ay oottana koshshiyaakko akeekaas. Yaatiyo gishshawu, tawu deˈiya eeqa misiliyaa ubbaa kessa olada, eeqa goynuwaara gayttida aybippenne ta keettaa geeshshaas. SHareechchuwaa soo biyoogaa aggaas; qassi heeran meeze gidida bala ammanuwaanne mooguwaa meeziyaa kaalliyoogaakka aggaas.

Layttay 60ppe bolla gidido taassi hegaadan laamettiyoogee metiyaaba. Ta laggeti, ta dabbotinne shooroti tana eqettidosonanne baceessidosona. SHin suurebaa oottanawu tawu wolqqaa immanaadan Yihoowa woossaas. Yihoowa “sunttai mino gimbbe mala; xillo asi yaa woxxidi saro attana” giya Leemiso 18:10 qofay tana keehippe minttettiis.

Tana maaddida harabay Yihoowa Markkatu shiiquwaa shiiqiyoogaa. Yan tumu Kiristtaanetu siiquwaa beˈaas, qassi eti Geeshsha Maxaafaa xoqqa kandduwaa maaraadan deˈanawu baaxetiyo gishshawu maalaalettaas. Taani beˈidobay Yihoowa Markkati tumu haymaanootiyaa kaalliyoogaa ammananaadan oottiis.

TAANI GOˈETTIDO HANOTAA: Geeshsha Maxaafaa maaraa taani oosuwan peeshshiyoogee ta naatuura kaseppe aaruwan siiqettanawu maaddiis. Qassi ta hashiyaappe deexo toohoy wodhdhidabadan qoppays. Tana aybanne maaddibeenna paxa deˈenna eeqawu yarshshiyoogan kase tawu deˈiya aquwaa wurssaas. Haˈˈi, ubba metuwaa merinawu xayssanawu hanotaa giigissida Yihoowayyo goynnays. (Ajjuutaa 21:3, 4) Taani eeqawu haarettiyoogaa aggada Yihoowayyo haarettiyo gishshawu keehippe ufayttays! I tana hirggaappe shemppissiis, qassi iitabaappe naagees.

“Taani Naatettaappe Doommada Xoossaa Koyaas.”—SHINJJE SAATO

YELETTIDO LAYTTAY: 1951

YELETTIDO BIITTAY: JAAPPAANE

KASE TAARIKEE: SHINTTO QEESIYAA

TA KASE DEˈUWAA: Taani diccidoy Jaappaanen Fukokkaa giyo issi gaxare katamaana. Tana yelidaageeti bantta haymaanootiyaa minttidi kaalloosona; qassi naatettaappe doommidi SHintto xoossata bonchchanaadan tana tamaarissiiddi dichchidosona. Yelagatettan darotoo ta atotettaabay tana qofissees, qassi metootida asaa maaddanawu keehippe koyays. Taani koyro xekka timirtte keettan deˈiyo wode nu dicciyo wode ay oottana koyiyaakko asttamaaree kifiliyan deˈiya naata oychchidoogaa hassayays. Ta kifiliyaa naati saynttistte gidiyoogaa mala, gitabaa koyiyoogaa yootidosona. Taani koyiyoy Xoossaassi oottanaassa gidiyoogaa yootaas. Ubbay taani giidoban miicciis.

Naaˈˈantto xekka timirttiyaa wurssa simmada, haymaanoote asttamaare gidanawu loohiyo timirtte keettaa gelaas. He timirtte keettan tamaariyo wode issi SHintto qeesiyaara gayttaas; I bawu deˈiya shemppo wodiyan karetta koohoy deˈiyo issi maxaafaa nabbabees. Issi galla I tana, “Saatoo, ha maxaafay aybakko eray?” yaagidi oychchiis. Maxaafaa koohuwaa akeekido gishshawu, “Geeshsha Maxaafaa” yaagaas. I, “SHintto qeese gidana koyiya ubbay ha maxaafaa nabbabana koshshees” yaagiis.

Sohuwaara baada Geeshsha Maxaafaa shammaas. Geeshsha Maxaafaa ta maxaafaa wottiyoosan loˈˈo sohuwaa doorada wottaas, qassi moorettennaadan loyttada naagaas. SHin timirtte keettan oottiyo darobay deˈiyo gishshawu, A nabbabanawu wode demmabeykke. Timirttiyaa wurssa simmada, issi beetamaqidasiyan SHintto qeese gidada oottiyoogaa doommaas. Taani naatettan amottidobay polettiis.

Gidoppe attin, SHintto Qeese gidiyoogee taani qoppidoogaadaana gidennaagaa sohuwaara akeekaas. Qeesetuppe daroti harata dosokkona woy haratussi qoppokkona. Qassi darotuyyo ammanoy baawa. Ubba taappe bolla gidida qeesetuppe issoy tawu hagaadan giis: “Hagan neeyyo injjetanaadan koyikko, asa eraabaa xallaa haasayana koshshees. Ammanobaa haasayiyoogee digettidaba.”

Hegaa malabaa siyiyoogee taani SHintto haymaanootiyaa siranaadan oottiis. SHintto beetamaqidasiyan oottiyoogaa aggabeennaba gidikkokka, hara haymaanootetubaa pilggiyoogaa doommaas. Gidoppe attin, etappe awugaaninne kehiyaabaa demmabeykke. Haymaanootetubaa gujjada pilggido wode, kaseegaappe aaruwan hidootaa qanxxaas. Ay haymaanootiyaaninne tumi baawa gaada qoppaas.

GEESHSHA MAXAAFAY TAANI LAAMETTANAADAN OOTTIDO OGIYAA: Budahaa haymaanootiyaa kaalliya issoy 1988n, Geeshsha Maxaafaa nabbabanaadan tana minttettiis. Daro layttappe kase hegaadan oottanaadan tana zorida SHintto qeesiyaa hassayaas. He zoriya oosuwan peeshshanawu maayaas. Geeshsha Maxaafaa nabbabiyoogaa doommido wode, sohuwaara I yootiyoobaa dosaas. Issi issitoo guuran awaa xalqqee maskkootiyaara gelana gakkanaashin qammaa kumettaa nabbabaydda aqays.

Taani nabbabiyoobay Geeshsha Maxaafay yootiyo Xoossaa woossanaadan tana denttettiis. Yesuusi tamaarissido Maatiyoosa 6:9-13n deˈiya woosaa woossiyoogaa doommaas. Naaˈˈu saate takka takkada ha woosaa woossays; ubba SHintto beetamaqidasiyan oottiyoobaa oottayddakka woossays.

Taani nabbabiyooban tawu daro oyshay deˈees. He wode taani machchaas; Yihoowa Markkati kase wodiyan ta keettaayyiyo haasayissido gishshawu, eti asaa Geeshsha Maxaafaa tamaarissiyoogaa erays. Yihoowa Markkatuppe issinno demmada daro oyshaa O oychchaas. Ta oychchido oyshaa ubbaa zaaranawu A Geeshsha Maxaafaa goˈettidoogan keehippe maalaalettaas. Issi Yihoowa Markkay tana Geeshsha Maxaafaa xannaˈissanaadan A hanotaa giigissaasu.

Hegaappe simmin takkennan, Yihoowa Markkatu shiiquwaa shiiqiyoogaa doommaas. Hegaappe kase taani loˈˈo hanotan haasayissabeenna issi issi Yihoowa Markkati he shiiquwan deˈiyoogaa he wode akeekabeykke. Gidikkokka, eti tana pashkki giidi sarotidosona, qassi ufayssan mokki ekkidosona.

He shiiqotun, azinati bantta soo asaa siiqanaadaaninne bonchchanaadan Xoossay koyiyoogaa tamaaraas. He wodee gakkanaashin, qeese gidada oottiyo ta ooso xallaa xoqqu ootta xeellada ta keettaayyiyoonne nu naaˈˈu naata sheneho gaas. Beetamaqidasiyan goynnanawu yiya asay yootiyoobaa wozanappe ezggada siyays shin, ta keettaayyiyaa yootiyoobaa issitoonne wozanappe ezgga erikke.

Xinaatiyan minna minna biido wode, Yihoowabaa darobaa tamaaraas; hegee taani akko shiiqanaadan oottiis. Yihoowa “sunttaa xeesiya ooninne attana” giya, Roome 10:13 mala xiqiseti ta wozanaa keehippe denttettidosona. Naatettaappe doommada Xoossaa koyaydda takkaas; haˈˈi wurssettan A demmaas!

Hagaappe sinttawu taani SHintto haymaanootiyaa kallana bessennaagaa qoppiyoogaa doommaas. Koyruwan, taani SHintto beetamaqidasaa aggikko harati qoppanabay tana hirggissiis. SHin ubbatoo, tumu Xoossaa harasan demmikko SHintto haymaanootiyaa aggada baana gaydda takkaas. Yaatiyo gishshawu, 1989 ofinttan, ta kahay yootiyoobaa kaallanawu kuuyaas. SHintto beetamaqidasiyaa aggada tana Yihoowassi immaas.

SHintto beetamaqidasiyaa aggiyoogee keehippe deexxiyaaba. Taappe bolla gidida qeeseti tana toochchidosona, qassi ta oosuwaa yeddennaadan wolqqanttanawu malidosona. Gidoppe attin, hegaappe aaruwan deexxidabay hegaa tana yelidaageetussi yootiyoogaa. Tana yelidaageetussi yootanawu biyo wode, keehippe unˈˈettada yayyido gishshawu, ta wozanay piridi baana hanees, qassi ta gedee kokkorees. Yihooway tana minttanaadan ogiyan darosan eqqa eqqada woossaas.

Tana yelidaageetu soo gakkido wode, koyro he qofaa denttanawu keehippe yayyaas. Aynne geennan daro saatee wuriis. Wurssettan, darotoo woossa simmada ta aawaassi ubbabaa yootaas. Taani tumu Xoossaa demmidoogaa, qassi Ayyo oottanawu koyiyo gishshawu SHintto haymaanootiyaa aggiyoogaa awu yootaas. Ta aaway keehippe dagammiisinne azzaniis. Hara ta dabboti soo yiidi ta qofaa laamissanawu malidosona. Ta dabbota azzanttanawu koyabeykke, shin Yihoowayyo oottiyoogeekka suureba gidiyoogaa erays. Guyyeppe, ta dabboti ta kuuyidobaa gishshawu tana bonchchiyoogaa doommidosona.

SHintto beetamaqidasiyaappe kiyidaba gidikkonne, ta oottidobay bessiyaaba gidiyoogaa akeekana gakkanawu hegaabaa qoppiyoogaa aggabeykke. Qeesetettaa oosoy ta wozanan xaphuwaa yeddiis. A ta wozanaappe kessanawu keehi baaxetaas, shin taani biidosan ubban ta kase deˈuwaa hassayissiyaabay gayttees.

He qofaa agganaadan tana naaˈˈubay maaddiis. koyruwan, ta kase haymaanootiyaara gayttidabi aybinne deˈennaadan ta keetta gidduwaa loyttada qoraas. Yaatada demmidobaa ubbaa, hegeekka maxaafaa, pootuwaa woy misiliyaa, ubba alˈˈobaakka xuuggaas. Naaˈˈanttuwan, taani danddayido keenan ubban Yihoowa markkatuura wodiyaa aattaas. Eta laggetettaynne maadoy tana keehippe minttiis. Loddan loddan, ta kase qofay ta wozanaappe kiyi kiyi biis.

TAANI GOˈETTIDO OGIYAA: Kase ta keettaayyiyoonne ta naata shenehoo gays, hegee eti kayyottanaadan oottiis. SHin azinati oottanaadan Geeshsha Maxaafay yootiyoogaadan, ta etaara wodiyaa aattiyoogaa doommin kaseegaappe aaruwan matattida. Guyyeppe, ta keettaayyiyaa tanaara Yihoowayyo oottiyoogaa doommaasu. Haˈˈi ta naˈaara, ta naˈeeranne I keettaawaara tumu goynuwaa issippetettan goynnoos.

Taani naatettan Xoossaayyo oottanawunne haraata maaddanawu amottidoogaa zaaretta qoppiyo wode, taani koyidobaa ubbaa hegaappekka aaruwan demmidoogaa erays. Taani Yihoowa galatiyoogaa yootiyo qaali baawa.

“Issibi paccidoogaa eraas.”​—LINET HAWUTIN

YELETTIDO LAYTTAY: 1958

YELETTIDO BIITTAY: TOHOSSA AFIRKKAA

KASE TAARIKEE: KOYIYAY BAYNNABADAN QOPPIYAARO

TA KASE DEˈUWAA: Tani yelettidoy, maydiniyaa bookkiyo, asay durekka hiyyeesakka gidenna, qassi danobi darenna Jermisttone giyo katamaana. Tana yelidaageeti tawu koshshiyaabaa kunttanawu danddayennabadan qoppidi, tana asi dichchanaadan immanawu kuuyidosona. Yelettoosappe biron 14 gallassan, guyyeppe taani aawadaaninne aayedan xeellido, issi siiqiya azinaynne machchiyaa tana dichchanawu ekkidosona. SHin, ta taarikiyaa era simmada, tana koyiyay baynnabadan qoppiyoogan unˈˈettaas. Tana dichchiyaageetu naˈa gidennaagaa, qassi eti ta hanotaa akeekennaagaa qoppiyoogaa doommaas.

Taayyo layttay 16 heera gidiyo wode, ushsha keettaa biyoogaa doommaas, yan taanne ta laggeti yettaa yexxiyaageeta siyiddi duroos. Tawu layttay 17 gidido wode sijaaraa uyiyoogaa doommaas. Sijaaraa uyanaadan harata minttettiya asatuugaadan leeˈe gidanawu koyaas. Tawu layttay 19 kumi simmin, Johansberg giyo kataman oottiyoogaa doommaasinne yan sohuwaara iita asaara laggetaas. Takkennan pokkobaa haasayiyoogaa, sijaaraa keehippe uyiyoogaa, qassi Qeeraanne Woggaa daro ushshaa uyiyoogaa doommaas.

Gidikkokka, taani asatettan mino. Darotoo macca naatu gediyaa kuwaasiyaa kaaˈaysinne hara ispporttiyaakka oottays. Qassi ta oosuwaa minna oottiyoogan komppiyuteriyaara gayttidaban erettida oosanchcha gidaas. Hegaappe denddidaagan, miishshaara gayttidaagan metootikke, qassi daro asay tana deˈoy injjetido asadan xeellees. Gidoppe attin, tumuppe taani ufayssi baynna asa; qassi ta deˈuwan kirqqi giidonne hidootaa qanxxida asa. Taassi issibi paccidoogaa ta wozanan erays.

GEESHSHA MAXAAFAY TAANI LAAMETTANAADAN OOTTIDO OGIYAA: Geeshsha Maxaafaa xannaˈiyoogaa doommido wode, Yihooway siiqiya Xoossaa gidiyoogaa eraas. Ba Qaalaa Geeshsha Maxaafaa immidi I he siiquwaa qonccissidoogaakka tamaaraas. Hegee I nuna kaalettanawu nuussi huuphiyan huuphiyan dabddaabbiyaa xaafidobaa mala. (Isiyaasa 48:17, 18) Yihoowa siiqo kaaletuwan goˈettanawu koyikko, ta deˈuwan issi issiban keehippe laamettana koshshiyoogaa akeekaas.

Taani laammana koshshiyoobaappe issoy ta laggeta. Leemiso 13:20n, “aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees” yaagiyaagaa minttada qoppaas. Ha Geeshsha Maxaafaa maaray ta kase laggeta aggada Yihoowa Markkatuppe ooratta laggeta dooranaadan oottiis.

Tawu sijaaraa amalee keehippe wolqqaama gidiyo gishshawu sijaaraa uyiyoogaa agganawu keehippe metootaas. He xubiyaa loddan loddan xooniyo wode, hara metoy merettiis. Sijaaraa uyiyoogaa aggidoogee taani orddanaadan oottin 13.6 kiluwaappe dariyaagaa gujjaas! Hegee taani tabaa loˈˈobaa qoppennaadan oottiis, qassi simmada leeˈanawu tamma gidiya layttaa wurssiis. Gidikkokka, sijaaraa uyiyoogaa aggiyoogee oottana bessiya suurebaa gidiyoogaa erays. Ubbatoo Yihoowa woossaas, qassi I taani koyidobaa polanaadan wolqqaa immiis.

TAANI GOˈETTIDO OGIYAA: Haˈˈi tawu kaseegaappe aaruwan loˈˈo payyatettay deˈees. Tawu deˈiyaabay gidana gaada deˈays. Yaatiyo gishshawu, hagaappe guyyiyan oosuwan, hayttatiyoogaaninne duretettan worddo ufayssaa demmanawu bichchaarikke. Hegaappe dumma ogiyan, Geeshsha Maxaafaa tumaa haratussi yootiyoogan ufayttays. Hegaappe denddidaagan, kase tanaara oottiyaageetuppe heezzati tanaaranne ta keettaawaara issippe Yihoowayyo goynniiddi deˈoosona. Tana dichchida aawaynne aayyiyaa hayqqanaappe kase, hayquwaappe denddidi gannate saˈan deˈiyo hidootaabaa Geeshsha Maxaafaappe etawu yootaas.

Yihoowakko shiiqiyoogee tana koyiyay baynnabadan qoppiyoogaa agganaadan maaddiis. Alame yuushuwan issi keettaa asa mala gididi ayyo goynniyaageetukko yaanaadan oottidi Yihooway taani tana koyiyay deˈiyoogaa qoppanaadan oottiis. Eta giddon taani daro aayota, aawata, ishatanne michchota demmaas.—Marqqoosa 10:29, 30.

[Misiliyaa]

Yihoowa Markkatu giddon, tumu Kiristtaanetu siiquwaa beˈaas

[Misiliyaa]

Issi wode taani goynniyo SHintto beetamaqidasiyaa