An Biblia Nakakagbag-o han Kinabuhi

KAY ano nga umundang ha pagsingba ha mga imahen an usa nga 60 anyos nga babaye? Ano an nag-aghat ha usa nga padi han Shinto nga bayaan an iya trabaho ha templo ngan magin Kristiano? Paonan-o nalamposan han usa nga gin-ampon tikang ha katawo an pag-abat nga gin-abandona hiya? Tagdon naton an ira masisiring.

“Diri Na Ako Uripon ha Pagsingba ha mga Imahen.”—ABA DANSOU

NATAWO: 1938

NATAWHAN NGA NASUD: BENIN

PAGKINABUHI HADTO: MAGSIRINGBA HA IMAHEN

NAGLABAY: Nagdaku ako ha So-Tchahoué, usa nga hanangon nga lugar hirani hin danaw. An mga tuminungnong didto mangingisda ngan nag-aataman hin baka, kanding, karnero, baboy, ngan tamsi. Waray kalsada ha amon lugar, salit baluto an ginagamit ha pagbiyahe. Kadam-an han mga balay hinimo ha kahoy ngan banwa, ngan an iba hinimo ha briks. An mga tawo ha amon lugar kasagaran nga pobre. Bisan pa hito, talagsa la an krimen diri pariho ha syudad.

Han bata pa ako, ako ngan an akon magurang ginpasulod ni Tatay ha kombento diin gin-adman gud namon an mahitungod han amon mga dios ngan mga katutdoan. Han nagdaku ako, hi Dudua (Oduduwa), an dios han mga Yoruba, an akon nagin dios. Naghimo ako hin balay para ha iya ngan pirme naghahalad hin kamote, lana tikang ha palma, susô, manok, sarapati, ngan iba nga hayop. Magasto ini, ngan agsob ini an nakakaubos han akon kita.

KON PAONAN-O NABAG-O HAN BIBLIA AN AKON KINABUHI: Han mag-aram ako han Biblia, hinbaroan ko nga hi Jehova la an tinuod nga Dios ngan diri niya inuuyonan an paggamit hin imahen ha pagsingba. (Eksodo 20:4, 5; 1 Korinto 10:14) Salit iginlabog ko an ngatanan ko nga imahen ngan ginsiguro nga waray bisan ano nga may kalabotan hito an magpabilin ha akon balay. Inundang liwat ako pamakiana ha mga parapanigo, ngan waray na makigbahin ha mga rituwal ngan mga seremonya ha paglubong.

Saisenta na ako, salit diri masayon para ha akon an pagbag-o. Ginkontra ngan ginhimo ako nga pataraw-an han akon kasangkayan, kapamilya, ngan mga amyaw. Kondi nag-ampo ako kan Jehova para hin kusog ha pagbuhat han husto. Naparig-on ako han Proberbios 18:10 nga nasiring: “An ngaran ni Jehova amo an marig-on nga balwarte; an matadong nadalagan ngadto ngan naluluwas.”

Nakabulig liwat ha akon an pagtambong ha mga katirok han mga Saksi ni Jehova. Didto naeksperyensyahan ko an tinuod nga gugma, ngan bumilib ako tungod kay nangangalimbasog an mga Saksi ha pagkinabuhi uyon ha hitaas nga suruklan han Biblia ha moral. An akon nakita nakakombinse gud ha akon nga hira an may tinuod nga relihiyon.

 MGA KAOPAYAN NGA AKON NAPAHIMULSAN: An pag-aplikar han mga prinsipyo ha Biblia nakabulig ha akon nga magkaada maopay nga relasyon ha akon mga anak. Inabat ko liwat nga sugad hin nagabotan ako hin tunok. Hadto, nauubos an akon kwarta ha waray kinabuhi nga mga imahen nga diri man ngani nakakabulig ha akon. Pero yana, nagsisingba ako kan Jehova nga nagtatagana hin nagpapadayon nga solusyon ha mga problema. (Pahayag 21:3, 4) Nalilipay gud ako nga diri na ako uripon han mga imahen, kondi, uripon na ni Jehova! Ha iya, nabilngan ko an tinuod nga kasigurohan ngan panalipod.

“Nagpinamiling Ako ha Dios Tikang Pa ha Pagkabata.”—SHINJI SATO

NATAWO: 1951

NATAWHAN NGA NASUD: JAPAN

PAGKINABUHI HADTO: PADI HAN SHINTO

NAGLABAY: Nagdaku ako ha usa nga bungto ha Fukuoka Prefecture. Relihiyoso an akon mga kag-anak. Tikang ha kabata, gintutdoan nira ako ha pagsingba han mga dios han Shinto. Agsob ko hunahunaon kon paonan-o maluluwas ngan kon paonan-o mabubuligan an mga may problema. Han elementarya ako, nahinumdoman ko nga ginpakianhan kami han amon magturutdo kon ano an karuyag namon magin ha amon pagdaku. Espisipiko an baton han akon mga kaklase, sugad ha pagin syentista. Nagsiring ako nga karuyag ko magserbi ha Dios, ngan gintinawaan nira ako.

Pakagradwar ko ha hayskul, nag-eskwela ako basi magin magturutdo hin religion. Hito nga panahon, may nakilala ako nga padi han Shinto nga nagbibinasa hin itom nga libro durante han iya vacant period. Makausa, hiya nagpakiana: “Sato, maaram ka ba kon ano ini?” Nakita ko an kobre han libro, salit binaton ako, “Biblia.” Hiya nagsiring, “An ngatanan nga karuyag magpadi han Shinto kinahanglan magbasa hini.”

Salit pinalit dayon ako hin Biblia. Iginbutang ko ito ha estante diin masayon ko ito makita, ngan ginhirotan. Pero waray ko la gihap mabasa ito tungod kay sagipo ako ha pag-eskwela. Han naggradwar ako, nagin padi ako han Shinto. Natuman gud an akon ambisyon.

Waray pag-iha, nakita ko kon ano an tinuod nga nahihitabo ha templo, ngan nasubo gud ako. Kadam-an han mga padi an haros waray gugma o pagtagad ha iba. Damu liwat an waray  pagtoo ha Dios. Nagsiring pa ngani an usa han akon superyor: “Kon karuyag mo maglampos, kinahanglan praktikal la nga mga butang an imo ig-iistorya. Ayaw gud pag-istorya mahitungod hin relihiyon.”

An sugad nga mga pulong nakawara han akon interes ha Shinto. Bisan kon nagpadayon ako pagtrabaho ha templo, gin-usisa ko an iba nga relihiyon. Kondi waray ako nakita nga mas maopay. Samtang nagtitikadamu an akon nauusisa, mas nanluluya ako. Inabat ko nga waray tinuod nga relihiyon.

KON PAONAN-O NABAG-O HAN BIBLIA AN AKON KINABUHI: Han 1988, may nakilala ako nga Budhista nga nag-aghat ha akon nga basahon an Biblia. Nahinumdoman ko an padi han Shinto nga nag-aghat ha akon hin pariho. Salit nagtikang ako pagbasa han Biblia, ngan nakuha dayon hito an akon interes. Usahay naaagahan pa ngani ako ha pagbinasa.

An akon nabasa nag-aghat ha akon nga mag-ampo ha Dios nga igintututdo han Biblia. Ha tinikangan, ginsubad ko an modelo nga pag-ampo ha Mateo 6:9-13. Gin-uutro ko ini nga pag-ampo kada duha ka oras, bisan samtang nangunguna ako hin seremonya ha templo.

Damu an akon pakiana mahitungod han akon nababasa. Hito nga panahon, may asawa na ako, ngan maaram ako nga an mga Saksi nagtututdo mahitungod han Biblia kay ginbisita na nira an akon asawa. Namiling ako hin usa nga Saksi ngan ginpauranan hiya hin pakiana. Ginbaton niya an ngatanan ko nga pakiana gamit an Biblia, ngan bumilib ako hito. Katapos naghangyo hiya hin Saksi ha pagdumara ha akon hin pag-aram ha Biblia.

Waray pag-iha, natambong na ako ha mga katirok han mga Saksi. Bisan kon hadto maraot an akon pagtratar ha pipira nga presente hito nga mga katirok, ginkumusta ngan gin-abiabi la gihap nira ako.

Ha mga katirok, hinbaroan ko nga karuyag han Dios nga higugmaon ngan pasidunggan han mga bana an mga membro han ira pamilya. Tubtob hito nga takna, nakapokus ako ha akon pagkapadi salit napabay-an ko an akon asawa ngan duha nga anak—lalaki ngan babaye. Nasantop ko nga namamati ako ha ginsisiring han mga napakadto ha templo kondi waray pa gud ako mamati ha akon asawa.

Samtang nagpapadayon ako ha pag-aram, damu an akon hinbaroan mahitungod kan Jehova nga nakadani ha akon nga magin duok ha iya. Labi nga nabantad ako han mga teksto sugad han Roma 10:13, nga nasiring: “Bisan hin-o nga magtawag ha ngaran han Ginoo maluluwas.” Nagpinamiling ako ha Dios tikang pa ha pagkabata, ngan nabilngan ko na gud hiya!

Nagtikang ako umabat nga naiiba na ako ha mga kapadian. Ha siyahan, nabaraka ako kon ano an huhunahunaon han iba kon bumaya ako ha amon relihiyon. Hadto, nagsaad ako ha akon kalugaringon nga kon mabilngan ko an tinuod nga Dios, mabaya gud ako. Salit ha katsaringsing han 1989, nagdesisyon ako nga sundon an akon konsensya. Binaya ako ha pagkapadi ngan iginhatag an akon kalugaringon kan Jehova.

Diri masayon an pagbaya. Nag-isog an akon mga superyor ngan ginpugngan gud ako nga diri umiwas. Kondi mas makuri an pagsumat ha akon mga kag-anak. Han tikadto na ako ha ira balay, ginkukulba gud ako hinduro salit sumakit an akon dughan ngan nanluya an akon mga tuhod! Damu ka beses nga inundang ako basi mag-ampo kan Jehova nga tagan ako hin kusog.

 Pag-abot ha balay, diri ko dayon maisumat an akon tuyo. Linabay an mga oras, katapos han sinsero nga pag-inampo, nag-istorya na ako kan Tatay. Ginsumatan ko hiya nga nabilngan ko na an tinuod nga Dios ngan babayaan ko na an amon relihiyon. Diri makatoo ngan nasubo hiya. Nagkaabot an amon mga kapamilya ngan ginkinombinse ako nga diri bumaya. Diri ko karuyag masubo hira, kondi maaram ako nga sadang ako mag-alagad kan Jehova. Paglabay han panahon, gintahod nira an akon desisyon.

Makuri an pagbaya ha templo, kondi mas makuri an pagpara hito ha akon hunahuna kay nakagamot na ito ha akon. Nangalimbasog ako nga mangalimot, pero diin man ako kumadto sugad hin may nagpapahinumdom hito ha akon.

Duha nga butang an nakabulig ha akon nga mangalimtan ito. Siyahan, gintirok ngan ginsunog ko an bisan ano ha balay nga may kalabotan ha naglabay ko nga relihiyon—mga libro, retrato, ngan bisan marahalon nga memorabilya. Ikaduha, nangalimbasog ako nga pirme makig-upod ha mga Saksi. An ira pakigsangkay ngan suporta nakabulig gud ha akon. Salit, hinay-hinay nga nangalimtan ko ito nga akon naglabay.

MGA KAOPAYAN NGA AKON NAPAHIMULSAN: Hadto, waray ako panahon ha akon pamilya, ngan nasubo gud hira hito. Pero han maggahin ako hin panahon ha ira, sugad han iginpapabuhat han Biblia ha mga bana, nagin duok kami. Ha urhi, nabawtismohan ako ngan sumunod an akon asawa. Yana, kaupod han akon bug-os nga pamilya ngan han akon umagad nga lalaki, nagkakaurosa kami ha tinuod nga pagsingba.

Kon ginhuhunahuna ko an akon ambisyon nga pagserbi ha Dios ngan pagbulig ha mga tawo, nahuhunahuna ko nga labaw pa hito an akon nakab-ot. Waray pulong nga makakagpahayag han akon daku nga pagpasalamat kan Jehova.

“Maaram Ako nga May-ada gud Kulang.”—LYNETTE HOUGHTING

NATAWO: 1958

NATAWHAN NGA NASUD: SOUTH AFRICA

PAGKINABUHI HADTO: PAG-ABAT HIN PAGIN INABANDONA

NAGLABAY: Natawo ako ha Germiston, usa nga ordinaryo nga syudad nga may mga minahan ngan haros waray krimen. Tungod kay naghunahuna an akon mga kag-anak nga diri nira ako maaataman, ira ako iginpaampon. Gin-ampon ako hin mapinaurahon nga mag-asawa han 14 ka adlaw pa la ako, ngan akon hira gintagad sugad nga mga kag-anak. Pero han hibaroan ko nga ampon ako, inabat ko nga inabandona ako. Nagtikang  ako umabat nga diri ko kaano-ano an mga nag-ampon ha akon ngan diri nira ako tinuod nga hinsasabtan.

Han mga 16 anyos ako, nagtikang ako kumadto ha mga bar, diin kami nga magbararkada nagsasaragyaw ngan namamati hin banda. Han 17 anyos ako, nasigarilyo na ako, ngan karuyag ko magin seksi pariho han mga modelo hin sigarilyo. Han 19 anyos ako, nagtrabaho ako ha Johannesburg ngan nagkaada diri maopay nga barkada. Waray pag-iha namumuyayaw na ako, makusog nga nasigarilyo, ngan sobra nga nainom kon Sabado ngan Domingo.

Pero, energetic la gihap ako. Regular ako nga nag-a-aerobics, nag-uuyag hin soccer ngan hin iba nga isport. Maopay liwat an akon performance ha trabaho, ngan kilala nga eksperto ha kompyuter. Tungod hito, daku an akon kita, ngan ginhuhunahuna han damu nga malampuson. Pero ha pagkatinuod, masurub-on ako—waray direksyon ngan diri tagbaw ha kinabuhi. Ha akon kasingkasing, maaram ako nga may-ada gud kulang.

KON PAONAN-O NABAG-O HAN BIBLIA AN AKON KINABUHI: Han nag-aram ako han Biblia, hinbaroan ko nga hi Jehova, Dios han gugma. Hinbaroan ko liwat nga iya iginpakita ito nga gugma pinaagi ha paghatag han iya Pulong, an Biblia. Sugad ito hin personal nga ginsuratan kita niya ha paggiya ha aton. (Isaias 48:17, 18) Nasantop ko nga kinahanglan ko magbag-o basi makarawat an bendisyon han iya mahigugmaon nga giya.

Usa nga pagbag-o nga sadang ko himoon amo an may kalabotan ha akon kasangkayan. Nabantad ako han Proberbios 13:20, nga nasiring: ‘Lakat kaupod han makinaadmananon, ngan ikaw magigin makinaadmananon; kondi an kaupod-upod han mga lurong mag-aantos tungod hini.’ Ito nga prinsipyo nag-aghat ha akon nga bayaan an akon daan nga mga sangkay ngan magkaada bag-o nga mga sangkay ha katawohan ni Jehova.

An pinakamakuri nga pagbag-o nga akon ginhimo amo an pag-undang ha pagsigarilyo tungod kay naadik na ako hito. Samtang hinay-hinay nga nalamposan ko ito, inatubang ako hin usa pa nga ayat kay an pag-undang ha pagsigarilyo nagresulta ha pagdugang han akon timbang hin 30 ka libras! Tungod hito, naghamubo an akon pagkita ha akon kalugaringon, ngan haros napulo ka tuig antes makuha an akon sobra nga timbang. Kondi maaram ako nga husto an pag-undang hito. Salit, padayon ako nga nag-ampo kan Jehova, ngan gintagan niya ako hin kusog nga maglampos.

MGA KAOPAYAN NGA AKON NAPAHIMULSAN: Yana, mas mahimsog na ako. Kontento liwat ako—diri na ako naghahandom han temporaryo nga kalipay nga iginsasaad han karera, kahimtang ha kinabuhi, ngan kwarta. Lugod, nakabiling ako hin kalipay ha pagsumat ha iba mahitungod han kamatuoran ha Biblia. Sugad nga resulta, tulo han akon kasangkayan hadto an kaupod ko ngan han akon bana ha pag-alagad kan Jehova. Antes mamatay an mga nag-ampon ha akon, nasumatan ko hira mahitungod han saad han Biblia nga pagkabanhaw ha paraiso nga tuna.

An pagin duok kan Jehova nakabulig ha akon nga malamposan an pag-abat nga gin-abandona ako. Ginbuligan niya ako nga umabat nga diri ako nag-uusahan pinaagi han bug-os-kalibotan nga pamilya han mga nagsisingba ha iya. Ha ira, may-ada ako damu nga tatay, nanay, kabugtoan nga kalalakin-an, ngan kabugtoan nga kababayin-an.—Markos 10:29, 30.

[Retrato ha pahina 12]

Ha mga Saksi ni Jehova, naeksperyensyahan ko an tinuod nga gugma

[Retrato ha pahina 13]

An templo diin ako nagin padi