Man̈ova Olo Baiboly

NAN̈INO ma man̈angy araiky 60 taon̈o vôly nanompo sampy? Nan̈ino koa ma pitondra fivavahan̈a shintoisty araiky niala, ke nanjary pitory vaovao tsara? Ino raha nahavy man̈angy araiky natsangananolo rango izy vo teraka, tsy nahatsiaro very zen̈y foeky? Vakia baka iro tantara aby ty.

“Zaho izioty efa tsy manompo sampy eky.”​—ABA DANSOU

TERAKA TAMINY: 1938

TANY FAVIAN̈A: BÉNIN

FIAIN̈ANA TALOHA: PANOMPO SAMPY

FIAIN̈ANANANY TALOHA: Ta So-Tchahoué tany nahabe zaho. Izio tanàna marikitry farihy, tsy ialany mahaleny, ke misy godra. Asanolo an̈y pan̈arato, mitarimy aomby, bengy, ondrikondriky, kamankory ndreky voron̈o. Sambo ndreky lakana fo raha fiondran̈anolo mandeha an̈y fa an̈y tsy azony tomobily. Tran̈onolo an̈y presky tran̈o bozaka ndreky mololo, fa mahalan̈a ndraiky anao mahita tran̈o biriky. Ankamarozanolo an̈y olo tsy manan̈a, fa izy fo tsy maro olo ratsy karaha antanàbe.

Mbala hely zahay ndreky zokiko man̈angy efa nalefany papako nipetraka tamy foibeny fivavahan̈a tamy sampy zay. Ke zaho koa fa komansy be, zaho nandeha nivavaka tamy Dudua (Oduduwa). Izio zan̈ahariny foko yorobà. Niasa tran̈o natokan̈a ninazy zaho, avio nan̈atitry soron̈o fo isanandra, karaha ataony oviala, menaka palmie, sifotro, akoho, pizin̈y, ndreky biby isankarazany. Tsaiky fahity zaho, fotony maro lafo iro raha aby io.

BAIBOLY NAN̈OVA FIAIN̈ANANAKA: Zaho koa fa nianatra Baiboly, haiko fa Jehovah zaraiky fo ten̈a Zan̈ahary. Nianarako koa fa tsy tiany mampiasa sary izikoa fa mivavaka. (Eksodosy 20:4, 5; 1 Korintianina 10:14) Nazava taminaka raha nila nataoko ke nariako iro sampy jiaby taminaka tao. Avio nadosoko tantran̈onaka koa raha jiaby mifototro fanompoan̈a sampy. Zaho voly nandeha tamy moasy, tsy nan̈ano fomba niaraka taminolo tanàna araiky taminaka, ndreky tsy nan̈ano fomba lera misy faty.

Tsy nora taminaka nan̈ano zen̈y, fotony zaho efa nandilatra 60 taon̈o. Halandry havako ndreky ry kamaradiko avio olo tanàna araiky taminaka zaho, ke iro nanohitry zaho ndreky nan̈adroadro zaho. Fa zaho nivavaka tamy Jehovah, baka mahazo angovo han̈anaovan̈a ny tsara. Hitako nankahery zaho Ohabolana 18:10 in̈y. Ho izy ao: “An̈arany Jehovah io mira lakoro vato fatatra, ke olo marin̈y koa milomoay mandeha ao, ho voaro.”

Hitako nan̈ampy zaho koa fiarahan̈a mivory tamy Vavolombelon̈o Jehovah. Ten̈a tia olo iro. Avio hitako ten̈a nahasariky zaho koa iro mifen̈y man̈araka raha koran̈iny Baiboly momba fitondranten̈a. Io raha ten̈a nahitako fa Vavolombelon̈o Jehovah fivavahan̈a marin̈y.

HATSARAN̈A NAZOKO: Zaho koa fa nan̈araka torohevitriny Baiboly, hitako nahaitsara fifandraisako tamy zanako aby io. Ren̈iko karaha nisy raha mavesatra be zay nadoso tamy sorokonaka tio. Zaho taloha baka zatra nandany harian̈anaka tamy sampy, kanefa tsy nahatsara zaho aby izin̈y. Fa zaho izioty efa manompo Jehovah. Izy zaraiky fo mahavita mamaha problemo jiaby mahazo atsika. (Apokalypsy 21:3, 4) Mahatsiaro misy piaro ndreky milamintsain̈y zaho izioty. Ke ravoravo zaho fotony tsy manompo sampy eky fa manompo Jehovah!

“Rango zaho mbala hely efa nitady Jehovah edy.”​—SHINJI SATO

TERAKA TAMINY: 1951

TANY FAVIAN̈A: JAPON

FIAIN̈ANA TALOHA: PITONDRA FIVAVAHAN̈A SHINTO

FIAIN̈ANANANY TALOHA: Zaho tombo tambanivolony Faritaniny Fukuoka. Pivavaka be raimandreniko, ke zaho nitarimindro tamy fivavahan̈a tamy zan̈ahariny shintoisty. Tamy zaho mbala tanora, tsy niala tan̈atiny jeriko tao akory hahavoavonjy zaho. Ten̈a fan̈irian̈anaka koa han̈ampy olo sahiran̈a. Tandraraiky papianatranay taminy EPP nan̈ontany zahay, ino mba raha tianay hatao, zahay koa fa be. Olo jiaby lekoly araiky taminaka samy nivolan̈a ninany. Sasany tihanjary siantifiky zen̈y aby. Fa zaho ndraiky, zaho tihanompo Zan̈ahary. Nitokizandro zaho.

Izikoa fa vita fianarako tamy lise, zaho niofan̈a tamy lekoly mampianatra olo hanjary pitondra fivavahan̈a. Nisy pitondra fivavahan̈a shintoisty araiky zay hitako tan̈y. Isaka andra tsy fiasan̈a, izy tsiary ndraiky tsy namaky boky misy fon̈ony joby zay. Tandraraiky izy nivolan̈a taminaka: “Hainao ma ino boky ty Sato?” Zaho koa fa nahita fa joby fon̈ony boky io, ho zaho taminany: “Baiboly.” Izy baka tio nivolan̈a: “Izikoa olo araiky tihanjary pitondra fivavahan̈a shintoisty, tsy maintsy mamaky boky ty izy.”

Zaho baka tio loso malaky, nandeha nivanga Baiboly. Napetrako tamy tany mora hita tamy tany fasiako boky Baiboly io, ke nikobabiko tsara. Zaho taminio nianatra mare, ke zaho tsisy fotoan̈a namakian̈a izio. Fa izikoa fa vita fianaran̈anaka in̈y, zaho nan̈ano pitondra fivavahan̈a tamy tany masin̈iny Shintoisty. Nazoko raha tiako hatao tamy zaho mbala hely in̈y.

Fa tsy ela tafaranizin̈y, efa hitako edy fa tsy arakarakany raha tan̈atiny jerinaka foeky olo pitondra fivavahan̈a shintoisty zen̈y. Ankamarozandro baka an̈arany tia olo fo fa tsy mijery olo aby. Maro tamindro koa tsy nanan̈a finoan̈a. Nisy olo an̈abon̈abo grady taminaka aby nivolan̈a karaha ty taminaka: “Izikoa tianao hahadin̈y anao aminy asanao io, raha momba filôzôfỳ fo koràn̈a. Ato tsy mahazo ikoran̈ana raha momba finoan̈a zen̈y.”

Diso fan̈antinan̈a tamy fivavahan̈a shintoisty zaho koa fa naharen̈y izin̈y. Zaho taminio tsendriky niala, fa zaho nanjary nandiniky fivavahan̈a hafa koa. Tsisy olo nampianatra raha tsara koa nata araiky, ke nahaikivy fo zaho arakarakany nandinihako fivavahan̈a. Haiko baka fa iro io tsisy mampianatra raha marin̈y.

BAIBOLY NAN̈OVA FIAIN̈ANANAKA: Taminy 1988, zaho fanojy lelahy araiky bodisty zay. Izy nandrisiky zaho hamaky Baiboly. Azoko onon̈o koa tamy zen̈y lelahy pitondra fivavahan̈a shintoisty, nandrisiky zaho han̈ano karaha zen̈y koa, taon̈o vitsivitsy talohanizio. Ke tapakevitry zaho fa han̈araka torohevitry io. Niaraka zaho namaky izio, efa tiako edy raha nivakiko tao. Ndraikindraiky aby zaho mamaky izio alin̈y andra firaka masoandra mipiriaka.

Raha nivakiko tamy Baiboly tao nandrisiky zaho hivavaka tamy Zan̈ahary koran̈inizio ao. Nivavaka koa zaho, ke vavaka modely amy Matio 6:9-13 ao in̈y fo nataoko. Isaka lera aroe zaho man̈ano izio fo, nata zaho efa nan̈ano asanaka tamy tany fan̈anaovan̈a fanompoan̈any shintoisty io tao.

Maro fan̈ontanian̈a nanahiran̈a sain̈inaka tamy raha nivakiko tamy Baiboly. Fa azoko onon̈o fa Vavolombelon̈o Jehovah mampianatra Baiboly olo, fotony iro fa navy nandeha nikoran̈a tamy vadiko. Zaho baka tio nitady Vavolombelon̈o Jehovah, ke nahita man̈angy araiky zay zaho. Naro raha nan̈ontaniako izy. Lany fan̈ahy zaho, fotony navoavaliny tamy Baiboly fan̈ontanian̈anaka jiaby. Nafindrany tamy lelahy Vavolombelon̈o Jehovah zaho nampianatra zaho.

Tsy ela tafaranizin̈y, zaho efa nandeha nivory niaraka tamindro edy. Tao iro Vavolombelon̈o Jehovah nisiahako taloha in̈y, fa zaho tsy nataondro ino. Nataondro mbalatsara zaho, avio zaho niraisindro tsara.

An̈isany raha haiko baka tamy fivorian̈a tan̈y, tiany Zan̈ahary izikoa lelahy manambady mba tia vady ndreky han̈aja vady. Taloha baka, asanaka fo raha nahasetry zaho, fa tsy vadiko ndreky ry zanako aroe mianadahy. Tontohitry zaho izioty fa kaiky zaho in̈y tsy nitandren̈y vadiko foeky, kanefa zaho nitandren̈y tsarabe iro olo navy nivavaka tamy tany fanompoan̈a niasako tao.

Koa fa loso lavidavitry fianarako Baiboly, efa naronaro raha haiko momba Jehovah. Raha zen̈y nandrisiky zaho han̈aton̈o izy. Maro andininy niditry mare tan̈atiny fônaka, karaha ataony Romanina 10:13. Ho izy ao: “Zay olo mikaiky an̈aran̈any Jehovah fo ho voavonjy.” Rango mbala hely zaho efa nifen̈y nitady Zan̈ahary, fa hitako eky izy tamy farany.

Nazava taminaka koa fa tsy tokony hiasa amy tany fanompoan̈a io eky zaho. Tamy voanalohany zaho nidaon̈o tsao hivolan̈inolo, izikoa zaho miala amy fivavahan̈a shintoisty io. Fa tan̈atiny fônaka tan̈y, zaho koa mahay araiky ten̈a Zan̈ahary io, zaho tsy maintsy miala fo. Ke taminy 1989, zaho tapakevitry han̈atanteraka raha tan̈atiny jerinaka io. Jehovah fo nizahako, ke nialako tamindro tao.

Tsy vontro mora fialako tao, fotony sefonaka nanihitihy zaho, avio zaho niforseny hijanon̈o fo. Fa mbala lombolombonizen̈y raha nahazo zaho, tamy zaho handeha hivolan̈a izio tamy raimandreniko tan̈y. Niasaloha mare zaho tamy lalan̈a handeha tan̈y. Ren̈iko narary tratranaka, avio ren̈iko nalemy aby lohalikinaka jiaby. Nandeha hely zaho, avio nijanon̈o hely nivavaka, nangataka angovo tamy Jehovah. Karaha zen̈y fo nataoko firaka zaho navy tan̈y.

Tamy somilany zaho navy tan̈y, tsy sakiko antsendriky hikoran̈a izio tamindro. Niteky fo lera. Zaho in̈y nivavaka fo, ke farany, nazavaiko tamy papako fo raha jiaby. Nambarako izy fa zaho efa niala tamy fivavahan̈a shintoisty, fotony efa nahay araiky ten̈a Zan̈ahary, ke hanompo izy. Papako in̈y neloko sady nahinakinaka. Fa nisy havanay koa tao taminio, ke nifen̈y iro nan̈ano raha hampiova hevitry zaho. Tsy tan̈atiny jeriko foeky hampalahelo iro, fa haiko koa fa zaho tokony hanompo Jehovah. Tafaranizin̈y, zaho najaindro fo, ke nikendro fanapahankevitrinaka in̈y.

Efa raharaha araiky tamy vatan̈anaka manokan̈a fialan̈a tamy tany fanompoan̈a in̈y tao, fa raha mbala hitako sarotro nandilatra izin̈y fan̈ovoan̈a jery. Zaho baka efa zatra loatra fiain̈ana tan̈y. Mifen̈y zaho man̈ano raha tsy hahatsiarovako izio, fa tsy maintsy nisy raha nahatsiarovako izio fo tamy zay tany nimboako.

Fa nisy raha aroe nan̈ampy zaho han̈adin̈a izin̈y. Nitsakarehako raha jiaby tantran̈o tao ke nisy ifandraisany tamy fivavahan̈anaka taloha. Niroako iro jiaby, na boky na sary firaka amindro raha valera nividiko misy ifandraisany tamy fivavahan̈anaka taloha. Ny raha faharoe nataoko, nifen̈y mare zaho hifandray matetiky tamindro Vavolombelon̈o Jehovah aby io erakany azoko natao. Nan̈ampy zaho mare fitiavan̈a ndreky fanohanan̈a nataondro taminaka. Loso nadin̈ako tsihelihely raha nandalo tamy fiain̈ananaka taloha.

HATSARAN̈A NAZOKO: Zaho taloha tsy nijery vadiko ndraiky zanako foeky, ke nahatsiaro latsatokana oe iro. Baiboly mivolan̈a fa lelahy manambady tokony hikarakara fianakavian̈anany. Zen̈y ankitin̈y raha nataoko tafara tatỳ, ke loso nifankatia mare zahay. Tafara tatỳ loso nanompo Jehovah fo vadiko ndreky zanako lelahy baka io koa zanakanay man̈angy ndreky vadiny.

Rango zaho mbala hely, efa hanompo Zan̈ahary ndreky han̈ampy olo edy raha mba nofinofinaka. Zaho koa fa mieritreritry zen̈y, ten̈a tsapako fa raha jiaby nitadiaviko in̈y hitako aby, mbala mandilatra zen̈y foeky. Tsy haiko foeky karakory hataoko han̈ano mersy Jehovah.

“Haiko fa nisy raha manky tamy fiain̈ananaka.”​—LYNETTE HOUGHTING

TERAKA TAMINY: 1958

TANY FAVIAN̈A: AFRIKY ATSIMO

FIAIN̈ANA TALOHA: NAHATSAPA TSY NIJIRENOLO

FIAIN̈ANANANY TALOHA: Zaho teraka ta Germiston. Tsy dia nijaly loatra olo tao fa leralerany fo fiain̈ananolo, baka io koa tsy maro olo kafiry. Raimandreniko nieritreritry fa tsy ho vitandro hikarakara zaho, ke namiandro natsangananolo ho zanakandro zaho. Mbala vo 14 andra nitirahako fo efa natsangananolo ho zanakandro zaho. Ten̈a be fitiavan̈a iro ke natao mira babako ndreky mamako. Fa zaho koa fa nahay ny ten̈a marin̈y momba tantaranaka, zaho ten̈a nahatsiaro tsy nijiren̈a foeky. Zaho nanjary nieritreritry fa zaho tsy zanakandro, ke tsy ho takatrandro foeky fihetsehamponaka.

Mbala vo 16 taon̈o fo zaho, efa nandeha tamy bara niaraka tamindro kamaradiko aby io baka io nandeha baly. Zaho koa fa 17 taon̈o, nanomboko nifima sigarety. Zaho koa fa feno 19 taon̈o, zaho niasa ta Johannesburg fa tsy niarakaraka tamy naman̈a ratsy. Fa koa fa farany herin̈iandra, zaho nifima sigarety, nigiaka toaka be ke loso nan̈ano volandratsy.

Ndray izy man̈ano zen̈y, zaho mba nan̈ano spaoro hely fo, karaha ataony misaoma laboly. Nifen̈y mare zaho taminy asanaka io, ke zaho loso nalaza nahay raha momba ordinatera. Ke nanambola mare zaho, ke maro olo nieritreritry fa tafita zaho. Ny marin̈y aminany, zaho tsy ten̈a sambatra fotony tsy afapo tamy fiain̈ana, baka io mbala nahatsiaro latsatokana. Tsapako fa misy raha manky tamy fiain̈ananaka.

BAIBOLY NAN̈OVA FIAIN̈ANANAKA: Zaho koa fa nianatra Baiboly, loso haiko fa Jehovah io Zan̈ahary fitiavan̈a, ke namiany atsika Volan̈anany nan̈aboahany zen̈y. Tsy ino zen̈y fa Baiboly. Baiboly io mira taratasy araiky nisoratin̈y hitariky lalan̈antsika. (Isaia 48:17, 18) Haiko tsarabe fa zaho koa tihahazo hatsaran̈a baka amy taridalan̈any Jehovah feno fitiavan̈a io, zaho tsy maintsy man̈ano fan̈ovoan̈a mare.

Tsy maintsy nivoako iro namako aby io. Nidinihiko mare raha koran̈iny Ohabolana 13:20. Karaha ty ho izy ao: “Lan̈iany olo miaraka aminolo misy jery hanjary ho hisy jery, fa hidirany antambo ndraiky lan̈iany olo minaman̈a aminolo tsisy sain̈y.” Toro lalan̈any Baiboly io nandrisiky zaho tsy hiaraka tamindro namako taloha aby in̈y eky, fa nifen̈y zaho hahazo naman̈a vaovao, Vavolombelon̈o Jehovah.

Fa ny raha ten̈a nafy taminaka niala sigarety, fotony zaho baka efa nandivozinizio foeky. Nisy problemo hafa koa niboaka tamy zaho an̈atiny miala tsihelihely amy sigarety in̈y. Nanjary nitombo 13 kilô zaho. Loso nisy vokany tamy fahitako ain̈inaka raha zen̈y. Efa kadiriny folo taon̈o tafara tatỳ vo nimpody tamy taloha zaho. Haiko tsarabe fa zaho efa tsy tokony hifima eky. Nivavaka tamy Jehovah fo zaho, ke namiany angovo hahavitan̈a zen̈y.

HATSARAN̈A NAZOKO: Zaho izioty salama tsara salakady afapo amy fiain̈ana fa tsy varian̈a loatra aminy asa na fitadiavan̈a laza ndreky fanan̈ana eky. Tsy mahasambatra foeky iro raha aby io. Ten̈a mahatsiaro sambatra zaho mikoran̈a fahamarin̈ana aminolo hafa. Telo amindro piaramiasa aminaka izioty loso panompony Jehovah miaraka aminay fivadiany. Iro raimandreniko nanangana zaho in̈y efa maty. Fa talohany iro naty, zaho efa nikoran̈a tamindro fa mbala hatsangany Zan̈ahary olo araiky maty, koa fa loso paradisa tany ty.

Zaho izioty efa tsy mahatsapa tsy nijirenolo eky, fotony efa mifandray tsara amy Jehovah. Namiany fianakavian̈a maro zaho, tsy azovy zen̈y fa iro piaramanompo erantany. Iro in̈y loso reniko, babako, rahalahiko, baka io anabaviko.​—Marka 10:29, 30.

[Sary]

Tsapako fa ten̈a be fitiavan̈a iro Vavolombelon̈o Jehovah aby io

[Sary]

Ty toeran̈a masin̈iny Shintoisty nivavahako taloha