Kʼeʼex u kuxtaloʼob tumen le Bibliaoʼ

¿BAʼAXTEN juntúul koʼolel yaan maas tiʼ 60 años tiʼeʼ xuʼul u adorartik ídoloʼob? ¿Baʼaxten juntúul sacerdote sintoístaeʼ tu beetuba u testigo Jéeoba? Juntúul koʼoleleʼ síiʼab desde tu chaambalil. Chéen baʼaleʼ, ¿baʼax áant utiaʼal u xuʼulul u yuʼubikuba jach tu juunal? Koʼox ilik baʼax ku yaʼalikoʼob.

«Xuʼul in adorartik ídoloʼob» (ABA DANSOU)

SÍIJ TU AÑOIL: 1938

TUʼUX SÍIJI: BENÍN

KAʼACHEʼ: KU ADORARTIK ÍDOLOʼOB

BIX KUXLIKEN KAʼACHI: Líikʼen tiʼ junpʼéel chan kajtalil ku kʼaabaʼtik So-Tchahoué. Le lugar jeʼelaʼ tiaʼan tu yiknal junpʼéel lagoeʼ, u kajnáaliloʼobeʼ ku chuk kayoʼob, ku tséentkoʼob wakax, taman, kʼéekʼen yéetel ku yalakʼtikoʼob kaax. Teʼeloʼ minaʼan carreteraiʼ, le oʼolal le máakoʼoboʼ maases tiʼ mejen barcoʼob yéetel tiʼ cayucoʼob ku viajaroʼob. Le najoʼoboʼ beetaʼan de cheʼ, de suʼuk yéetel yanoʼobeʼ de ladrillo. Kex yaʼab máakoʼob óotsiloʼob yaneʼ maʼ tu jach beetaʼal baʼaloʼob kʼaastak jeʼex teʼ nukuch kaajoʼoboʼ.

Tin chichnileʼ teen yéetel in kiikeʼ túuxtaʼaboʼon tiʼ junpʼéel convento tumen in papá, teʼeloʼ tiʼ kaʼansaʼaben in adorart ídoloʼobiʼ. Ka nojochchajeneʼ káaj in adorartik Dudua wa Oduduwa, juntúul dios suuk u adorartik le yorubaʼoboʼ. Tin beetaj junpʼéel altar utiaʼal in kʼubik baʼaloʼob jeʼex makal, u aceiteil palma, caracoloʼob, kaaxoʼob, palomaʼob yéetel uláakʼ baʼalcheʼob. Jach yaʼab taakʼin kin xupik utiaʼal in manik le ofrendaʼoboʼ.

BIX TU KʼEXIL IN KUXTAL LE BIBLIAOʼ: Le ka káaj in xokik le Bibliaoʼ tin kaneʼ chéen yaan juntúuliliʼ Dios, u kʼaabaʼeʼ Jéeoba. Tin kanaj xaneʼ letiʼeʼ maʼ uts tu tʼaan ka k-adorart ídoloʼobiʼ (Éxodo 20:4, 5; 1 Corintios 10:14). Tin tsʼáaj cuentaeʼ tu séebaʼanil unaj in pulik tuláakal le ídoloʼob yaan tin wotochoʼ. Xuʼul in bin yiknal le j-meenoʼ, xuʼul in táakpajal teʼ baʼaloʼob ku beetaʼal teʼ kaajoʼ bey xan tiʼ le baʼaloʼob suuk u beetaʼal kéen kíimik máakoʼ.

Maʼ chéen chʼaʼabiliʼ tumen tsʼoʼok maas tiʼ 60 años joʼopʼok in adorartik ídoloʼob. Tsʼoʼoleʼ in amigoʼob, in láakʼtsiloʼob yéetel in vecinoʼobeʼ jach tu pʼektenoʼob yéetel tu burlartubaʼob tiʼ teen. Tin kʼáat óoltaj tiʼ Jéeoba ka u yáanten in beet baʼax maʼalob. Jach tu yáanten baʼax ku yaʼalik Proverbios 18:10, tuʼux ku yaʼalik: «U kʼaabaʼ Jéeobaeʼ bey junpʼéel nuxiʼ torreeʼ, tiʼ ku bin áalkabil le utsul máak utiaʼal ka kanáantaʼakoʼ».

Tu yáanten xan le reuniónoʼob ku beetik u testigoʼob Jéeobaoʼ, teʼeloʼ tin wileʼ jach tu jaajil ku yeʼeskoʼob yaabilaj. Tin tsʼáaj cuentaeʼ tuláakloʼobeʼ ku yilik u tsʼáaikoʼob ichil u kuxtaloʼob le baʼax ku kaʼansik le Bibliaoʼ. Tuláakal leloʼ tu yeʼesajten tiʼ u testigoʼob Jéeoba yaan u jaajil.

UTSILOʼOB TSʼOʼOK U TAASIKTEN: Le baʼax ku yaʼalik le Bibliaoʼ tsʼoʼok u yáantken utiaʼal in biskinba maas maʼalob yéetel in paalal. Beoraaʼ kin wuʼuyikeʼ bey sáalchaj in kuucheʼ tumen kaʼacheʼ kin láaj xupik in taakʼin yoʼolal le ídoloʼoboʼ, tsʼoʼoleʼ mix tu yáantenoʼobiʼ. Bejlaʼeʼ kin adorartik Jéeoba yéetel u jaajil in wóol, letiʼeʼ yaan u láaj xuʼulsik tuláakal le problemas yaantoʼonoʼ (Apocalipsis 21:3, 4). Jéeobaeʼ ku kanáantken yéetel ku beetik u yantalten kiʼimak óolal.

«Desde tin paalil káaj in kaxtik Dios» (SHINJI SATO)

SÍIJ TU AÑOIL: 1951

TUʼUX SÍIJI: JAPÓN

KAʼACHEʼ: SACERDOTE SINTOÍSTA

BIX KUXLIKEN KAʼACHI: Líikʼen tu kaajil Fukuoka. In papáʼobeʼ jach ku adorarkoʼob u diosoʼob le sintoístaʼoboʼ, le oʼolal desde tin paalileʼ tu kaʼansoʼobten in adorartoʼob. Teneʼ jach kin tsʼíiboltik kaʼach in salvarkinba bey xan in wáantik le máaxoʼob yaantiʼob problemasoʼ. Kʼajaʼanteneʼ juntéeneʼ juntúul maestroeʼ tu kʼáataj tiʼ le paalaloʼob baʼax u kʼáat u beetoʼob kéen nojochchajkoʼoboʼ. Yaʼab tiʼ letiʼobeʼ tu yaʼaloʼob u kʼáat u beetoʼob jejeláas meyajoʼob, yaneʼ hasta taak u beetik u científicoil kaʼachi. Pero le ka tin waʼalaj taak in meyajtik Dioseʼ tuláakloʼob joʼopʼ u sen cheʼejtikenoʼob.

Le ka tsʼoʼok in xook secundariaeʼ ooken tiʼ junpʼéel escuela utiaʼal in kanik in beetik in sacaerdote sintoístail. Teʼeloʼ tin kʼaj óoltaj juntúul sacerdote sintoísta, letiʼeʼ ku xokik kaʼach junpʼéel libro boox u paach. Teneʼ tsʼokaʼaniliʼ in wilik baʼax libroil kaʼachi, le oʼolal le ka tu kʼáatajten wa in wojel baʼax libro táan u xokikeʼ tin waʼalajtiʼeʼ letiʼe Bibliaoʼ. Ka túun tu yaʼalajten: «Tuláakal máax taak u beetik u sacerdote sintoístaeʼ kʼaʼabéet u xokik le libroaʼ».

Tu séebaʼanil binen in man junpʼéel Bibliaeʼ ka tin tsʼáaj tiʼ junpʼéel lugar tuʼux jeʼel in wilkeʼ. Chéen baʼaleʼ como yaʼab baʼaloʼob kin xokik kaʼacheʼ maʼ tu yantalten tiempo utiaʼal in xokik. Le ka tsʼoʼok in graduarkinbaeʼ káaj in beetik in sacaerdoteil tiʼ junpʼéel templo. ¡Béeychaj le baʼax kin tsʼíiboltik kaʼachoʼ!

Maʼ xáanchaj ka tin tsʼáaj cuentaeʼ u maas yaʼabil le sacerdoteʼoboʼ maʼ tu yáantkoʼob le máakoʼoboʼ, yaʼab tiʼ letiʼobeʼ minaʼan mix u fejoʼob. Juntúul tiʼ u nuuktakil le religiónoʼ tu yaʼalajten: «Wa a kʼáat ka xiʼiktech maʼalobileʼ tʼaanen chéen tiʼ le baʼax uts tu tʼaan u yuʼubik le máakoʼoboʼ, bik táabakech tʼaan tiʼ fe».

Tuláakal leloʼ tu beetaj u jach lúubul in wóol. Kex maʼ xuʼul in bin teʼ templooʼ káaj in wilik baʼax ku beetik uláakʼ religiónoʼob. Chéen baʼaleʼ le kéen in wil baʼax ku beetkoʼobeʼ maas ku lúubul in wóol. Káaj in tuklik mix junpʼéel religión kaʼansik u jaajiliʼ.

BIX TU KʼEXIL IN KUXTAL LE BIBLIAOʼ: Tu añoil 1988, tin kʼaj óoltaj juntúul budista. Letiʼeʼ tu yaʼalajten ka in xok le Bibliaoʼ, ka túun kʼaʼajten le sacerdote sintoísta tu yaʼalajten ka in xok xanoʼ. Le oʼolal tin chʼaʼtuklaj in xokik. Jach jatsʼuts tin wilil u xookil, le oʼolal yaan kʼiineʼ bul áakʼab kin xokik.

Le baʼax tin xokaj teʼ Mateo 6:9 tak 13 tu yáanten utiaʼal in orar tiʼ le Dios ku yaʼalaʼal teʼ Bibliaoʼ, cada dos horas kin waʼalik kaʼach le oraciónaʼ. Tak le tiaʼanen teʼ templooʼ maʼ tu xuʼulul in waʼalik.

Kʼajaʼanteneʼ jeʼex u bin in maas kaanbal teʼ Bibliaoʼ bey xan ku taaktal in maas ojéeltik uláakʼ baʼaloʼob. Teʼ kʼiinoʼoboʼ tsʼokaʼaniliʼ u tsʼoʼokol in beeleʼ. Le Testigoʼoboʼ ku xíimbaltikoʼob kaʼach in watan, le oʼolal in wojel ku tsʼáaikoʼob xook yéetel le Bibliaoʼ. Le ka tsikbalnajen yéetel juntúul Testigoeʼ tin beetaj yaʼab preguntaʼob tiʼ. Chéen baʼaleʼ jach jaʼakʼ in wóol ka tin wilaj tu láaj núukajten yéetel le Bibliaoʼ. Ka tsʼoʼokeʼ letiʼeʼ tu yilaj ka xíimbaltaʼaken tumen uláakʼ testigoʼob.

Maʼ xáanchaj ka káaj in bin teʼ reuniónoʼob ku beetik le Testigoʼoboʼ. Chéen baʼaleʼ yaan tiʼ le máaxoʼob ku binoʼob teʼ reuniónoʼoboʼ jach kʼaas bix in tratarmiloʼob. Kex beyoʼ letiʼobeʼ yéetel kiʼimak óolal náatsʼ u saludartenoʼob.

Teʼ reuniónoʼoboʼ tin kaneʼ le íichamtsiloʼ unaj u yaabiltik yéetel u respetartik u familia. Tin tsʼáaj cuentaeʼ kex kin jóoʼsik u súutukil utiaʼal in wuʼuyik baʼax ku yaʼalik le máakoʼob ku binoʼob teʼ templooʼ maʼatech in jóoʼsik u súutukil utiaʼal in tsikbal yéetel in watan.

Jeʼex u bin in maas kaanbaleʼ kin wuʼuyik maas naatsʼ yanilen tiʼ Jéeoba. Yaʼab tekstoʼob jach kʼuchoʼob tin puksiʼikʼal. Junpʼéeleʼ Romanos 10:13, tuʼux ku yaʼalik: «Tuláakal máax kun chʼaʼchiʼitik u kʼaabaʼ Jéeobaeʼ yaan u salvartaʼal». ¡Tin wuʼuyaj tsʼoʼok in kaxtik le Dios úuch joʼopʼok in kaxtikoʼ!

Pʼáat maʼ kiʼimak in wóol le táan in meyaj teʼ templooʼ. Saajken kaʼach tiʼ baʼax ken u yaʼal u maasil wa kin pʼatik le sintoísmooʼ. Pero tsʼokaʼaniliʼ in waʼalik kaʼacheʼ yaan in pʼatik le sintoísmo wa kin kaxtik le jaajil Diosoʼ. Le oʼolal tu añoil 1989, tin kʼubaj in kuxtal tiʼ Jéeoba.

Le baʼax tin beetoʼ maʼ chéen chʼaʼabil tin wiliʼ tumen u nuuktakil in religióneʼ tu sen aʼaloʼobten baʼal yéetel tu yaʼaloʼobten ka pʼáatkeniʼ. Chéen baʼaleʼ le baʼax maas istikyaj tin wiloʼ letiʼe in waʼalik tiʼ in papáʼoboʼ, le táan kaʼach in bin in waʼaltiʼoboʼ tin wuʼuyaj tu kuʼupul in wiikʼ yéetel tu kikilankil in wookoʼob. Yaʼab u téenel anchaj in kʼáatik u yáantaj Jéeoba.

Le ka kʼuchen tu yotochoʼobeʼ sajakchajen in waʼaltiʼob le baʼax tsʼoʼok in chʼaʼtuklikoʼ. Máan yaʼab horas táan in orar hasta ka tin waʼalaj tiʼ in papá le baʼax ken in beetoʼ. Tin waʼalajtiʼeʼ tin kaxtaj le jaajil Diosoʼ yéetel yaan in pʼatik le sintoísmooʼ. Letiʼeʼ jach lúub u yóol yéetel maʼ páajchaj u yaʼalikten mix baʼaliʼ. Jujuntúul tiʼ in láakʼtsiloʼobeʼ tu yaʼaloʼobten maʼ in pʼatik le sintoísmooʼ. U jaajileʼ teneʼ maʼ in kʼáat in beet u kʼuuxil kaʼach mix máakiʼ, pero tsʼokaʼaniliʼ in chʼaʼtuklik in meyajtik Jéeobaeʼ. Ka máan kʼiineʼ in láakʼtsiloʼobeʼ xuʼul u yaʼalikoʼobten baʼal.

U jaajileʼ maʼ chéen unaj kaʼach in pʼatik le templooʼ kʼaʼabéet xan in kʼexik bix in tuukul. Pero maʼ chéen chʼaʼabil tin wiliʼ tumen jeʼel tuʼuxak ka xiʼikeneʼ ku kʼaʼajalten le kʼiinoʼob táan kaʼach in beetik in sacerdoteiloʼ.

Kaʼapʼéel baʼal áanten, yáaxeʼ tin láaj tóokaj tuláakal le baʼax yaanten yaan yil yéetel sintoísmooʼ, tin tóokaj libroʼob, cuadroʼob yéetel uláakʼ baʼaloʼob jach koʼojtak. Uláakʼ baʼax áanteneʼ letiʼe in máansik tiempo yéetel le Testigoʼoboʼ. Letiʼobeʼ jach tu yáantenoʼob utiaʼal ka in tuʼubs le baʼax kin beetik kaʼachoʼ.

UTSILOʼOB TSʼOʼOK U TAASIKTEN: Kaʼacheʼ jach maʼ tin máansik tiempo yéetel in watan mix yéetel in paalaloʼob. Chéen baʼaleʼ ka káaj in beetik baʼax ku yaʼalik le Bibliaoʼ joʼopʼ k-maas bisikba. Ka máan kʼiineʼ in wataneʼ káaj xan u meyajtik Jéeoba. Bejlaʼeʼ táan k-múul meyajtik Jéeoba yéetel k-paalal.

Desde tin paalil kin tsʼíiboltik in meyajtik Dios yéetel in wáantik uláakʼ máakoʼob. Pero beoraaʼ yéetel u yáantaj Jéeobaeʼ maas yaʼab baʼaxoʼob tsʼoʼok in beetik. Jach kin tsʼáaik u graciasil tiʼ yoʼolal tuláakal le baʼaxoʼob tsʼoʼok u beetik tin woʼolaloʼ.

«Kin wuʼuyik yaan baʼax ku bineltikten kaʼachi» (LYNETTE HOUGHTING)

SÍIJ TU AÑOIL: 1958

TUʼUX SÍIJI: SUDÁFRICA

KAʼACHEʼ: JACH TU JUUNAL U YUʼUBIKUBA

BIX KUXLIKEN KAʼACHI: Síijen tiʼ junpʼéel chan kaaj tuʼux maʼ jach óotsil le máakoʼoboʼ, le kaajaʼ ku kʼaabaʼtik Germiston. Teʼeloʼ yaan minaʼobiʼ yéetel maʼ jach kʼasaʼan le máakoʼob yanoʼ. In papáʼobeʼ tu tukloʼob maʼ kun páajtal u kanáantkenoʼob, le beetkeʼ chéen 14 días yaanten ka tu síijenoʼob. Tin tukleʼ le máaxoʼob máatenoʼ jach tu jaajil in papáʼob. Le ka tin wojéeltaj u jaajileʼ tin wuʼuyaj jach tin juunal yanen, tin wuʼuyaj maʼ tu páajtal u naʼatkenoʼob tumen mix máakoʼobten.

Le ka tu tsʼáajten 16 añoseʼ káaj in jóokʼol yéetel in amigoʼob utiaʼal in wóokʼot, in káaltal yéetel utiaʼal in wuʼuyik paax yéeteloʼob. Le ka tu tsʼáajten 17 añoseʼ tsʼokaʼaniliʼ u káajal in tsʼuʼutsʼik chamaleʼ. In kʼáat pʼáatal kaʼach jeʼex le modeloʼob jach tsʼoyaʼanoʼob ku anunciarkoʼob chamaloʼ. Le ka tu tsʼáajten 19 añoseʼ tu yoʼolal in meyajeʼ anchaj in bin kajtal Johannesburgo. Chéen ka tin tsʼáaj cuentaeʼ cada fin de semanaeʼ tiaʼanen yéetel máakoʼob ku poochʼiloʼob, ku tsʼuʼutsʼkoʼob chamal yéetel ku káaltaloʼob.

Chéen baʼaleʼ jach kin beetik ejercicio kaʼachi. Kin beetik deporteʼob jeʼex gimnasia aeróbica, squash yéetel fútbol. Jach yaʼab máaxoʼob kʼaj óoltenoʼob tumen jach maʼalob in meyaj kaʼach yéetel le computadoraʼoboʼ. Jach yaan u modoil in kuxtal kaʼachi, le oʼolal yaʼab máax aʼalikteneʼ jach maʼalob u binten. Pero u jaajileʼ minaʼanten kiʼimak óolal yéetel jach tin juunal in wuʼuyikinba kaʼachi.

BIX TU KʼEXIL IN KUXTAL LE BIBLIAOʼ: Ka káaj u tsʼaʼabalten xook yéetel le Bibliaoʼ tin kaneʼ Jéeobaeʼ jach u yaabiltmoʼon, le oʼolal tu tsʼáajtoʼon le Bibliaoʼ. Le Bibliaoʼ bey junpʼéel carta u tsʼíibtmajtoʼon Jéeoba utiaʼal k-nuʼuktik k-kuxtal (Isaías 48:17, 18). Tin tsʼáaj cuentaeʼ wa in kʼáat ka nuʼuktaʼaken tumen Dioseʼ kʼaʼabéet in kʼexik yaʼab baʼaloʼob ichil in kuxtal.

Junpʼéel tiʼ le baʼaloʼob tin yáax beetoʼ letiʼe u xuʼulul in biskinba yéetel in amigoʼob kaʼachoʼ. Proverbios 13:20, ku yaʼalik: «Le máax ku máan yéetel máaxoʼob yaan u naʼatoʼobeʼ yaan u yantal u naʼat, pero le máax ku biskuba yéetel le j-maʼ naʼatoʼoboʼ yaan u bin kʼaasil tiʼ». Yoʼolal leloʼ xuʼul in biskinba yéetel in amigoʼob kaʼachi ka túun káaj in kaxtik amigoʼob ichil u testigoʼob Jéeoba.

Le baʼax maas istikyaj tin wilil in pʼatkoʼ letiʼe in tsʼuʼutsʼik chamaloʼ. Tu yoʼolal leloʼ jach polokchajen, tin naʼaksaj kex 14 kilos. Leloʼ tu beetaj u jach lúubul in wóol, kex 10 años tu bisajten in kaʼa éemsik. Kex maʼ chéen chʼaʼabileʼ in wojel kʼaʼabéet in pʼatik le viciooʼ. Mantatsʼ kin orar tiʼ Jéeoba, letiʼ áanten utiaʼal in pʼatik.

UTSILOʼOB TSʼOʼOK U TAASIKTEN: Bejlaʼeʼ kiʼimak in wóol yéetel le baʼax yaantenoʼ yéetel maas toj in wóol. Tsʼoʼok maʼ tin sen chʼíikil meyaj utiaʼal u yantalten kiʼimak óolal bey xan ayikʼaliloʼob. Bejlaʼeʼ teen yéetel in wíichameʼ jach kiʼimak k-óol ikil k-kaʼansik baʼax ku yaʼalik le Biblia tiʼ u maasil máakoʼoboʼ. Tsʼoʼok in wáantik óoxtúul koʼoleloʼob in wéet meyajoʼob kaʼach utiaʼal u meyajtikoʼob Jéeoba. Tsʼoʼoleʼ antes tiʼ u kíimil le máaxoʼob líiʼsenoʼ tin tsikbaltajtiʼobeʼ yaan u kʼuchul u kʼiinil u kaʼa kuxtal le máaxoʼob tsʼoʼok u kíimloʼob tiʼ junpʼéel paraíso way Luʼumeʼ.

Bejlaʼeʼ maʼ tin juunal in wuʼuyikinbaiʼ tumen maʼalob in biskinba yéetel Jéeoba. Ichil u kaajal Jéeobaeʼ yaʼab in láakʼtsiloʼob yaniʼ, tiaʼan in maamaʼobiʼ, in papáʼobiʼ, in sukuʼunoʼob yéetel in kiikoʼobiʼ (Marcos 10:29, 30).

[Oochel]

U testigoʼob Jéeobaeʼ jach tu yeʼesoʼobten yaabilaj

[Oochel]

Templo tuʼux ku kaʼansaʼalten sintoísmo kaʼachi