Maan e suan Ɲanmiɛn Ndɛ’n nun like

?Ngue yɛle Ɲanmiɛn Sielɛ’n?

Ndɛ akpasua nga tɛ kosan wie mɔ atrɛkpa’n amun fa usali amun wun’n be su. Yɛ ɔ kle e Biblu’n i bue nga e kwla kanngan nun naan y’a wun kosan sɔ’m be su tɛlɛ’n. Zoova i Lalofuɛ’m be klo kɛ bé yíyí ndɛ sɔ’m be nun klé amun.

1. ?Ngue yɛle Ɲanmiɛn Sielɛ’n?

Ɲanmiɛn Sielɛ’n ti awa kun m’ɔ o ɲanmiɛn su lɔ ɔ. Ɔ́ sín mɛn nun famiɛn diwlɛ’m be osu, yɛ ɔ́ yó maan bé yó Ɲanmiɛn i klun sa’n ɲanmiɛn su lɔ ɔ nin asiɛ’n su wa. Ɔ maan famiɛn diwlɛ kpa nga e ɲin o i sin’n, yɛle Ɲanmiɛn Sielɛ’n.—An kanngan Daniɛl 2:44 nin Matie 6:9, 10 be nun.

Famiɛn diwlɛ kwlaa le i su famiɛn. Ɔ maan, Zoova fɛli i Wa Zezi sieli i i Famiɛn Diwlɛ liɛ’n su.—An kanngan Lik 1:30-33 nun.

2. ?Ngue ti yɛ Zezi kwla si sran’m be sie kpa ɔ?

Like nga ti yɛ Ɲanmiɛn i Wa’n yɛ ɔ kwla si sran’m be sie kpa’n yɛle kɛ i klun ti ufue, yɛ ɔ faman sa kpa yolɛ’n kanman ngowa. Asa ekun’n, i yɛ ɔ le kwlalɛ naan w’a kwla uka sran’m be kpa ɔ. (Matie 11:28-30) Kɛ Zoova cɛnnin Zezi’n, Zezi ɔli ɲanmiɛn su lɔ, ɔ ko trannin Ɲanmiɛn i fama su. (Ebre Mun 10:12, 13) I sin’n, Ɲanmiɛn fali kwlalɛ’n mɛnnin i naan w’a tran ɲanmiɛn su lɔ w’a bo famiɛn dilɛ bo.—An kanngan Daniɛl 7:13, 14 nun.

3. ?Wan mun yɛ be nin Zezi dí famiɛn ɔn?

Ɲanmiɛn kpali sran akpasua kun mɔ be flɛ be ‘Nyanmiɛn i nvle’n nunfuɛ mun’n,’ naan be nin Zezi be tran ɲanmiɛn su lɔ be di famiɛn. (Daniɛl 7:27) Sran klikli nga be kpali be kɛ be yo Ɲanmiɛn i nvle nunfuɛ mun’n yɛle Zezi i akoto nga b’a kpɔcimɛn i le’n. Lele nin andɛ’n, Zoova te kpa yasua nin bla wie mɔ be su Ɲanmiɛn kpa’n naan be yo Ɲanmiɛn i nvle’n nunfuɛ. Kɛ Ɲanmiɛn cɛn be’n, be kaci aolia nun sran kɛ Zezi sa.—An kanngan Zan 14:1-3 nin 1 Korɛntfuɛ Mun 15:42-45 nun.

?Sran nɲɛ yɛ bé kɔ́ ɲanmiɛn su lɔ ɔ? Zezi flɛli sran sɔ’m be kɛ “bua akpasua kaan.” (Lik 12:32) Be ngba be ti sran 144.000, yɛ be nin Zezi bé síe asiɛ’n.—An kanngan Sa Nglo Yilɛ 5:9, 10 nin Sa Nglo Yilɛ 14:1 be nun.

  4. ?Blɛ benin nun yɛ Ɲanmiɛn i Famiɛn Diwlɛ’n boli sielɛ’n i bo ɔ?

Afuɛ nga be flɛ i 1914 nun yɛ be sieli Zezi famiɛn ɔn. * Kɛ ɔ cɛli kan’n, ɔ kannin Satan nin i mmusu’m be bo guali be asiɛ’n su wa. (Sa Nglo Yilɛ 12:7-10, 12) Kɛ ɔ fɛ i lɛ’n, lika’n wa yoli kekle kpa liɛ su mannin klɔ sran mun. Ninnge kɛ alɛ’n nin asiɛ m’ɔ keje’n nin awe’n nin tukpacɛ’n ɔ nin sa tɛtɛ’m be yolɛ sa’n, be kle kɛ mɛn nga su wa wie. (2 Timote 3:1-5) Sran ng’ɔ kunndɛ kɛ ɔ́ ɲán Ɲanmiɛn Sielɛ’n i su ye’n, ɔ fata kɛ ɔ kunndɛ wafa nga ɔ kwla kaci Zezi m’ɔ ti Famiɛn’n i sɔnnzɔnfuɛ’n.—An kanngan Lik 21:7, 10, 11, 31, 34, 35 be nun.

5. ?Junman benin yɛ Ɲanmiɛn Sielɛ’n di ɔ?

Ɲanmiɛn Sielɛ’n yo maan be bo jasin fɛ’n mɛn wunmuan’n nun. Be kle sran kpanngban kpa mɔ be fin nvlenvle kwlaa nun’n Ɲanmiɛn i klun sa’n. (Matie 24:14) Kɛ Ɲanmiɛn Sielɛ’n wá núnnún mɛn tɛ nga’n, ɔ́ sásá “sran kpanngban kpa” mɔ Zezi síe be’n.—An kanngan Sa Nglo Yilɛ 7:9, 10, 13-17 nun.

Ɲanmiɛn Sielɛ’n fá afuɛ 1.000 síesíe asiɛ’n i ye naan ɔ yo klanman. Kɛ blɛ sɔ’n ko wie’n, Zezi fá Sielɛ’n wlɛ́ i Si sa nun. (1 Korɛntfuɛ Mun 15:24-26) ?Amun si sran kun mɔ amun kunndɛ kɛ amún kán Ɲanmiɛn Sielɛ’n i ndɛ bé klé i ɔ?—An kanngan Jue Mun 37:10, 11, 29 nun.

[Ja ngua lɛ ndɛ’n]