Aprann avek Parol Bondye

Ki si sa Rwayonm Bondye?

Sa lartik i soulev bann kestyon ki petet ou’n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Ki si sa Rwayonm Bondye?

Rwayonm Bondye i en gouvernman ki dan lesyel. I pou ranplas tou lezot gouvernman e i pou fer ki lavolonte Bondye pou ganny fer dan lesyel ek lo later. Alor, sa bon gouvernman ki nou bezwen se Rwayonm Bondye.​—Lir Danyel 2:44; Matye 6:9, 10.

Dan en Rwayonm, i bezwen annan en lerwa. Zeova in apwent son Garson Zezi pour vin Lerwa dan Son Rwayonm.​—Lir Lik 1:30-33.

2. Akoz Zezi i sa Dirizan ideal?

Garson Bondye i sa Lerwa ideal akoz i bon, i siport sa ki drwat e i annan ase pwisans pour ed bann dimoun. (Matye 11:28-30) Apre ki i ti’n resisite, Zezi ti mont dan lesyel e i ti konmans espere dan kote drwat Zeova. (Ebre 10:12, 13) Apre, Bondye ti donn li pouvwar pour konmans dirize dan lesyel.​—Lir Danyel 7:13, 14.

3. Lekel ankor ki pou diriz avek Zezi?

Bondye in swazir en group ki Labib i refer avek konman “bann sen” pour diriz avek Zezi dan lesyel. (Danyel 7:27) Bann zapot fidel Zezi ti parmi bann premye pour ganny swazir pour vin bann sen. Ziska dan nou letan, Zeova in kontinyen swazir bann zonm ek fanm fidel pour vin bann sen. Parey Zezi, zot osi zot ganny resisite avek en lekor spirityel.​—Lir Zan 14:1-3; 1 Korentyen 15:42-45.

Konbyen dimoun ki pou al dan lesyel? Zezi ti apel zot en “pti troupo.” (Lik 12:32) I pou finalman annan 144,000 zot e zot pou diriz ansanm avek Zezi lo later.​—Lir Revelasyon 5:9, 10; 14:1.

 4. Kan ki Rwayonm Bondye ti konmans dirize?

Zezi ti vin Lerwa an 1914. * Zis apre sa, i ti pous Satan ek son bann demon lo later. (Revelasyon 12:7-10, 12) Depi sa letan, bann problenm limanite in vin pli pir. Lager, tranblemandter, lafanmin, lepidemi, krim ek lezot ankor i form parti sa siny ki montre ki nou pe viv dan bann dernyen zour sa lemonn. (2 Timote 3:1-5) Tou dimoun ki ti a kontan benefisye avek Rwayonm Bondye i devret aprann pour vin bann disip Lerwa Zezi.​—Lir Lik 21:7, 10, 11, 31, 34, 35.

5. Ki Rwayonm Bondye pe akonplir?

Atraver en kanpanny predikasyon mondyal, Rwayonm Bondye pe deza ed plizyer milyon dimoun sorti dan tou nasyon pour konn lavolonte Bondye. (Matye 24:14) Sa Rwayonm pou protez en “gran lafoul” bann disip fidel Zezi, ler sa move lemonn pou ganny detrir.​—Lir Revelasyon 7:9, 10, 13-17.

Pandan 1,000 an, Rwayonm Bondye pou gradyelman fer later vin en paradi. Apre sa, Zezi pou redonn Rwayonm son Papa. (1 Korentyen 15:24-26) Eski ou ti a kontan koz lo Rwayonm Bondye avek okenn dimoun?​—Lir Psonm 37:10, 11, 29.

Pour plis lenformasyon, vwar sapit 8 ek 9 dan liv Ki Labib i vreman dir? pibliye par Temwen Zeova.

[Not anba lo paz]