Mbaʼépa omboʼe la Biblia

Mbaʼépa hína Ñandejára rréino?

Ko artíkulo nepytyvõta rembohovái hag̃ua la Biblia rupive umi mbaʼe reikuaaséva. Peteĩ testígo de Jehová ikatu ohesaʼỹijo nendive koʼã porandu.

1. Mbaʼépa hína Ñandejára rréino?

Peteĩ goviérno oĩva yvágape, oisãmbyhýtava umi yvypóra goviérno rekovia ha oipytyvõtava ojejapo hag̃ua Ñandejára rembipota ko yvy ape ári yvágape ojejapoháicha. Ñandejára rréino hína pe goviérno opavave ñaikotevẽva. (Elee Daniel 2:44; Mateo 6:9, 10.)

Peteĩ goviérno ningo katuete orekovaʼerã peteĩ omoakãva. Mávapepa Ñandejára Jehová oiporavo upearã? Haʼe omoĩ Itaʼýra Jesucrístope oisãmbyhy hag̃ua Irréino. (Elee Lucas 1:30-33.)

2. Mbaʼérepa jaʼekuaa Jesús ikatupyryveha oisãmbyhy hag̃ua?

Ñandejára Raʼy imbaʼeporã, hekojoja ha ipokatu oipytyvõ hag̃ua yvyporakuérape. Upévare ndaipóri ótro ombojojáva chupe (Mateo 11:28-30). Oñemoingove jey rire oho yvágape, péro ndahaʼéi upepete oñepyrũmava oisãmbyhy (Hebreos 10:12, 13). Haʼe ohaʼarõ Ñandejára akatúape oñemeʼẽ peve chupe autorida oisãmbyhy hag̃ua. (Elee Daniel 7:13, 14.)

3. Máva mávapa oisãmbyhýta Jesús ndive?

La Biblia heʼi oĩha Ñandejára rembiguaikuéra oisãmbyhýtava Jesús ndive. Daniel 7:27-pe ojeʼe hesekuéra imarangatuha. Máva mávapa umíva? Ñepyrũrã ojeporavovaʼekue umi apóstolpe, ha ñane tiémpo peve Jehová oiporavo kuimbaʼe ha kuña ijerovia mbaretéva omoirũ hag̃ua Itaʼýrape. Koʼã tapicha omano rire, Jesucrístoicha avei oñemoingove jey espírituicha oho hag̃ua yvágape. (Elee Juan 14:1-3; 1 Corintios 15:42-45.)

Mboy tapichápa ohóta yvágape? Jesús heʼi ‘mbovymínteha’ (Lucas 12:32). Ojeporavo 144.000 ogoverna hag̃ua hendive ko yvy yvága guive. (Elee Revelación [Apocalipsis] 5:9, 10; 14:1.)

  4. Arakaʼépa oñepyrũ oisãmbyhy Ñandejára rréino?

Jesús oñepyrũ oisãmbyhy áño 1914-pe. * Upe riremínte omosẽ Satanás ha umi demóniope yvágagui ha ou hikuái ko yvýpe (Revelación 12:7-10, 12). Upe guive ko múndope heta hetave umi provléma. Oiko ñorairõ, yvyryrýi, oĩ mbaʼasy opaichagua, ñembyahýi ha hetave mbaʼe vai. Péicha oñekumpli peteĩ profesía heʼíva mbykypaitemaha pe tiémpo oñehundi hag̃ua ko múndo aña (2 Timoteo 3:1-5). Péro opavave ohupytyséva umi mbaʼe porã oguerútava Ñandejára rréino omoirũvaʼerã Jesúspe. (Elee Lucas 21:7, 10, 11, 31, 34, 35.)

5. Mbaʼépa ojehupytýta Ñandejára rréino rupive?

Pe marandu porã oñemombeʼúgui opárupi, oñepytyvõ hetaiterei tapicha opa tetãyguápe oikuaa hag̃ua Ñandejára rape (Mateo 24:14). Péro ndopái upépe. Upéi Ñandejára goviérno ohundíta ko múndo aña ha osalváta peteĩ ‘aty guasúpe’, oñemoĩ haguére Jesús goviérno poguýpe. (Elee Revelación 7:9, 10, BNP, 13-17.)

Mil áño ogoverna aja, Jesús ojapóta ko yvýgui peteĩ lugár neporãmba jepéva. Ha ohasa rire upe tiémpo, omeʼẽ jeýta Itúvape upe Rréino (1 Corintios 15:24-26). Neremombeʼuséipa nde rapichakuérape mbaʼépa ojapóta ko Goviérno? (Elee Salmo 37:10, 11, 29.)

Reikuaasevéramo koʼã mbaʼe ikatu rehecha ko lívro, Mbaʼépa añetehápe omboʼe la Biblia? ojapóva Testigos de Jehová, kapítulo 8 ha 9.

[Nóta]