Plọnnu sọn Ohó Jiwheyẹwhe Tọn Mẹ

Etẹwẹ Ahọluduta Jiwheyẹwhe Tọn Yin?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Etẹwẹ Ahọluduta Jiwheyẹwhe Tọn Yin?

Ahọluduta Jiwheyẹwhe tọn yin gandudu olọn mẹ tọn de. E na diọtẹnna gandudu devo lẹ bo na hẹn ojlo Jiwheyẹwhe tọn yin wiwà to olọn mẹ podọ to aigba ji. Enẹwutu, Ahọluduta Jiwheyẹwhe tọn wẹ yin pọngbọ lọ na nuhudo gandudu dagbe tọn he mí tindo.—Hia Daniẹli 2:44; Matiu 6:9, 10.

Ahọluduta de dona tindo ahọlu. Jehovah ko de Visunnu etọn, Jesu, nado yin Ahọlu na Ahọluduta Etọn.—Hia Luku 1:30-33.

2. Naegbọn Jesu do yin Ahọlu dagbe hugan lọ?

Visunnu Jiwheyẹwhe tọn wẹ Ahọlu dagbe hugan lọ na e jọmẹ, nọ yiavùnlọna nuhe sọgbe, bo tindo huhlọn nado gọalọna gbẹtọvi lẹ. (Matiu 11:28-30) To fọnsọnku Jesu tọn godo, e hẹji yì olọn mẹ nado nọte to adusilọ Jehovah tọn mẹ. (Heblu lẹ 10:12, 13) To godo mẹ, Jiwheyẹwhe na ẹn huhlọn nado jẹ gandu ji sọn olọn mẹ.—Hia Daniẹli 7:13, 14.

3. Mẹnu lẹ wẹ na dugán hẹ Jesu?

Hagbẹ pipli de tọn he yin yiylọdọ ‘mẹwiwe lẹ’ yin dide gbọn Jiwheyẹwhe dali nado dugán hẹ Jesu to olọn mẹ. (Daniẹli 7:27) Omẹ tintan he yin dide nado yin mẹwiwe lẹ wẹ apọsteli nugbonọ Jesu tọn lẹ. Jehovah gbẹ́ to sunnu po yọnnu nugbonọ lẹ po de taidi mẹwiwe lẹ kakajẹ din. Taidi Jesu, yé na yin finfọnsọnku po agbasa gbigbọnọ de po.—Hia Johanu 14:1-3; 1 Kọlintinu lẹ 15:42-45.

Omẹ nẹmu wẹ na yì olọn mẹ? Jesu ylọ yé dọ “lẹngbọpa pẹvi.” (Luku 12:32) Sọha yetọn wẹ 144 000, bọ yé na dugán hẹ Jesu do aigba ji.—Hia Osọhia 5:9, 10; 14:1.

 4. Whetẹnu wẹ Ahọluduta Jiwheyẹwhe tọn na jẹ gandu ji?

Jesu ko lẹzun Ahọlu to 1914. a Ojlẹ vude to enẹgodo, e yàn Satani po aovi etọn lẹ po dlan aigba ji. (Osọhia 12:7-10, 12) Sọn whenẹnu gbọ́n, nuhahun gbẹtọvi lẹ tọn ko jideji taun. Awhàn, aigba sisọsisọ, huvẹ, azọ̀n, po sẹ́nhẹngba po yin apadewhe ohia de tọn he dohia dọ titonu ehe tin to azán godo tọn etọn lẹ mẹ. (2 Timoti 3:1-5) Mẹhe jlo na mọaleyi sọn Ahọluduta Jiwheyẹwhe tọn mẹ lẹpo dona plọn lehe yé na lẹzun hodotọ Ahọlu lọ, Jesu tọn do.—Hia Luku 21:7, 10, 11, 31, 34, 35.

5. Etẹwẹ Ahọluduta Jiwheyẹwhe tọn wadotana?

Gbọn azọ́n yẹwhehodidọ lẹdo aihọn pé tọn de gblamẹ, Ahọluduta Jiwheyẹwhe tọn ko to alọgọna gbẹtọ livi susu lẹ sọn akọta lẹ mẹ nado plọn aliho Jiwheyẹwhe tọn lẹ. (Matiu 24:14) E na basi hihọ́na “gbẹtọ susugege de” he yin mẹjidugando nugbonọ Jesu tọn lẹ to whenue e na và titonu ylankan he to aigba ji ehe sudo.—Hia Osọhia 7:9, 10, 13-17.

To ojlẹ owhe 1 000 tọn de gblamẹ, Ahọluduta lọ na diọ aigba ehe vudevude zun paladisi. To godo mẹ, Jesu na gọ̀ Ahọluduta lọ jo na Otọ́ etọn. (1 Kọlintinu lẹ 15:24-26) Be hiẹ yọ́n mẹde he a sọgan dọhona gando Ahọluduta Jiwheyẹwhe tọn go ya?—Hia Psalm 37:10, 11, 29.

Na nudọnamẹ dogọ, pọ́n weta 8 po 9 po owe Etẹwẹ Biblu Plọn Mí Taun? tọn, he Kunnudetọ Jehovah tọn lẹ zinjẹgbonu.

[Nudọnamẹ odò tọn]