Magtuon sa Pulong sang Dios

Ano ang Ginharian sang Dios?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ano ang Ginharian sang Dios?

Ang Ginharian sang Dios isa ka gobierno sa langit. Dulaon sini ang tanan nga gobierno kag himuon ang kabubut-on sang Dios sa langit kag sa duta. Gani ang Ginharian sang Dios amo ang maayo nga gobierno nga ginahandum naton.—Basaha ang Daniel 2:44; Mateo 6:9, 10.

Dapat may hari ang isa ka ginharian. Ginhimo ni Jehova ang iya Anak, si Jesus, nga mangin Hari sang Iya Ginharian.—Basaha ang Lucas 1:30-33.

2. Ngaa si Jesus ang nagakabagay nga maggahom?

Nagakabagay gid nga maghari ang Anak sang Dios kay maluluy-on sia, makatarunganon, kag may gahom sa pagbulig sa mga tawo. (Mateo 11:28-30) Sa tapos mabanhaw si Jesus, nagpalangit sia kag naghulat sa tuo ni Jehova. (Hebreo 10:12, 13) Sang ulihi, ginhatagan sia sang Dios sing awtoridad nga magsugod sa paggahom sa langit.—Basaha ang Daniel 7:13, 14.

3. May kaupod bala si Jesus sa paggahom?

Ginpili sang Dios nga magagahom upod kay Jesus sa langit ang isa ka grupo nga ginatawag “mga balaan.” (Daniel 7:27) Ang una nga mga balaan amo ang matutom nga mga apostoles ni Jesus. Asta subong padayon nga nagapili si Jehova sing matutom nga mga tawo nga malakip sa sining mga balaan. Pareho kay Jesus, banhawon man sila subong espiritu.—Basaha ang Juan 14:1-3; 1 Corinto 15:42-45.

Pila ang mapalangit? Gintawag sila ni Jesus nga “diutay nga panong.” (Lucas 12:32) May kadamuon sila nga 144,000, kag magagahom sila upod kay Jesus sa bilog nga duta.—Basaha ang Bugna 5:9, 10; 14:1.

  4. San-o nagsugod sa paggahom ang Ginharian sang Dios?

Nangin Hari si Jesus sang 1914. * Dayon, ginhulog niya si Satanas kag ang iya mga demonyo sa duta. (Bugna 12:7-10, 12) Sugod sadto, naglala ang mga problema sang mga tawo. Ang mga inaway, linog, gutom, balatian, kag kalainan nagapamatuod nga ari na kita sa katapusan nga mga adlaw. (2 Timoteo 3:1-5) Ang tanan nga gusto makatigayon sang mga pagpakamaayo sang Ginharian sang Dios dapat magtuon kon paano mangin sumulunod sang Hari nga si Jesus.—Basaha ang Lucas 21:7, 10, 11, 31, 34, 35.

5. Ano ang ginahimo sang Ginharian sang Dios?

Paagi sa pagwali sa bilog nga duta, ginabuligan na karon sang Ginharian sang Dios ang minilyon ka tawo sa tanan nga pungsod nga mahibaluan ang dalanon sang Dios. (Mateo 24:14) Amligan sini ang “dakung kadam-an” nga matutom nga mga sakop ni Jesus kon laglagon na sini ang malauton nga kalibutan subong.—Basaha ang Bugna 7:9, 10, 13-17.

Sa sulod sang 1,000 ka tuig, amat-amat nga himuon sang Ginharian sang Dios ang duta nga mangin paraiso. Dayon, ibalik ni Jesus ang Ginharian sa iya Amay. (1 Corinto 15:24-26) Ngaa indi mo pag-isugid sa iban ang parte sa Ginharian sang Dios?—Basaha ang Salmo 37:10, 11, 29.

Para sa dugang nga impormasyon, basaha ang kapitulo 8 kag 9 sini nga libro, Ano Gid ang Ginatudlo sang Biblia?, nga ginhimo sang mga Saksi ni Jehova.

[Nota]