Dirava Ena Hereva Amo Diba Abia

Dirava Ena Basileia be Dahaka?

Inai atikol lalonai, reana oi gwauraia vadaeni henanadai haida idia noho bona emu Baibel ai edia haere do oi davaria dalana, ia hahedinaraia. Iehova ena Witnes taudia be mai edia moale ida oi dekenai unai henanadai do idia haerelaidia.

1. Dirava ena Basileia be dahaka?

Dirava ena Basileia be guba gavamanina ta. Inai gavamani ese gavamani ibounai edia gabu do ia abia bona Dirava ena ura be guba bona tanobada ai do ia hagugurua. Unai dainai Dirava ena Basileia sibona be unai gavamani namona.​—Daniela 2:44; Mataio 6:​9, 10 duahia.

Iehova ese ena Natuna ia abia hidi, ena Basileia ena King ai ia lao totona.​—Luka 1:​30-33 duahia.

2. Dahaka dainai Iesu be Lohia Tauna namona?

Dirava ena Natuna be King namona, badina ia be hebogahisi tauna, kara maoromaoro ia ura henia, bona ia be mai ena siahu taunimanima ia durua totona. (Mataio 11:​28-30) Iesu ia toreisi lou murinai, guba dekenai ia daekau bona Iehova ena idibana kahanai ia helai bona ia naria. (Heberu 10:​12, 13) Gabeai, Dirava ese ia dekenai siahu ia henia, guba amo ia lohia matamaia totona.​—Daniela 7:​13, 14 duahia.

3. Daidia be Iesu ida do idia lohia?

Baibel ese ia gwauraia “helaga taudia” be Dirava ese ia abidia hidi Iesu ida guba dekenai idia lohia totona. (Daniela 7:27) Iesu ese ia abia hidi helaga taudia ginigunadia be, iena abidadama aposetolo taudia. Iehova ese abidadama tatau bona hahine be helaga taudia bamona ia do abia hidi noho ema bona hari. Iesu hegeregerena, idia be lauma taudia bamona idia toreisi lou.​—Ioane 14:​1-3; 1 Korinto 15:​42-45 duahia.

Taunimanima hida be guba dekenai do idia lao? Iesu ese ia gwauraidia “seri maragi.” (Luka 12:32) Edia namba be 144,000 bona Iesu ida tanobada do idia lohiaia.​—Apokalupo 5:​9, 10; 14:1 duahia.

  4. Dirava ena Basileia be edena negai ia lohia matamaia?

Iesu be lagani 1914 dekenai King ai ia lao. a Unai murinai, Satani bona ena demoni be tanobada dekenai ia negea diho. (Apokalupo 12:​7-10, 12) Unai nega amo taunimanima edia dika be ia bada momokani. Tuari, tano mareremarere, hitolo bada, gorere idauidau, bona taravatu utua karadia idia vara, unai be toa ena kahana haida, idia hahedinaraia dina gabedia be kahirakahira do ia ore. (2 Timoteo 3:​1-5) Dirava ena Basileia amo idia ura namo idia davaria taudia ibounai idia hekwarahi, King Iesu badinaia dalana idia dibaia totona.​—Luka 21:​7, 10, 11, 31, 34, 35 duahia.

5. Dirava ena Basileia ese dahaka do ia hagugurua?

Tanobada ibounai haroro gaukara amo, Dirava ena Basileia ese taunimanima milioni momo ia durua Iena dala idia dibaia totona. (Mataio 24:14) Unai Basileia ese inai nega oromana dikana ia haorea neganai, Iesu idia badinaia “hutuma bada” taudia do ia gimadia.​—Apokalupo 7:​9, 10, 13-17 duahia.

Lagani 1,000 lalonai, Basileia ese tanobada be metairametaira paradaiso ai do ia halaoa. Gabeai, Iesu ese Basileia be ena Tamana dekenai do ia henia lou. (1 Korinto 15:​24-26) Oi diba tauna ta dekenai Dirava ena Basileia oi ura herevalaia, a?​—Salamo 37:​10, 11, 29 duahia.

Hereva ma haida diba totona, inai buka ena karoa 8 bona 9 itaia. Iehova ena Witnes taudia ese idia karaia. Baibel Be Dahaka Ia Hadibaia?

[Futnout]