Ania ti Pagarian ti Dios?
Agsursuroka iti Sao ti Dios
Ania ti Pagarian ti Dios?
Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kenka kadagiti sungbat.
1. Ania ti Pagarian ti Dios?
Maysa daytoy a nailangitan a gobierno. Sukatannanto ti amin a gobierno ken ibanagna ti pagayatan ti Dios idiay langit ken ditoy daga. Ti ngarud Pagarian ti Dios ti birbirokentayo a naimbag a gobierno.—Basaem ti Daniel 2:44; Mateo 6:9, 10.
Masapul nga adda ari ti maysa a pagarian. Dinutokan ni Jehova ti Anakna a ni Jesus tapno agbalin nga Ari iti Pagarianna.—Basaem ti Lucas 1:30-33.
2. Apay a ni Jesus ti maikari nga Agturay?
Ti Anak ti Dios ti maikari nga Ari agsipud ta naasi, salimetmetanna ti kinalinteg, ken kabaelanna a tulongan dagiti tattao. (Mateo 11:28-30) Kalpasan a napagungar, immuli ni Jesus idiay langit ket nagur-uray iti makannawan ni Jehova. (Hebreo 10:12, 13) Idi agangay, inikkan ti Dios iti pannakabalin a mangrugi nga agturay idiay langit.—Basaem ti Daniel 7:13, 14.
3. Siasino dagiti kadua ni Jesus nga agturay?
Adda grupo a maawagan “sasanto” a pinili ti Dios a makipagturay ken Jesus idiay langit. (Daniel 7:27) Dagiti matalek nga apostol ni Jesus ti immuna a napili kas sasanto. Agingga ita, agpilpili pay laeng ni Jehova iti matalek a lallaki ken babbai nga agbalin a sasanto. Kas ken Jesus, mapagungar dagitoy kas espiritu.—Basaem ti Juan 14:1-3; 1 Corinto 15:42-45.
Mano ti mapan idiay langit? Inawagan ida ni Jesus iti “bassit nga ipastoran.” (Lucas 12:32) Agdagupdanto iti 144,000, ket kaduada ni Jesus a mangituray iti daga.—Basaem ti Apocalipsis 5:9, 10; 14:1.
4. Kaano a nangrugi nga agturay ti Pagarian ti Dios?
Nagbalin nga Ari ni Jesus idi 1914. a Di nagbayag kalpasanna, intapuakna ni Satanas ken dagiti demoniona ditoy daga. (Apocalipsis 12:7-10, 12) Sipud idin, nakaad-adun ti problema ti sangatauan. Dagiti gubat, ginggined, nakaro a bisin, nasaknap a sakit, ken kinadakes ti nagbalin a paset ti pagilasinan iti maudi nga al-aldaw ti agdama a sistema ti bambanag. (2 Timoteo 3:1-5) Amin a mayat a mabenepisiaran iti Pagarian ti Dios masapul a sursuruenna ti agbalin a pasurot ti Ari a ni Jesus.—Basaem ti Lucas 21:7, 10, 11, 31, 34, 35.
5. Ania ti ibanag ti Pagarian ti Dios?
Babaen ti sangalubongan a panangasaba, tultulongan itan ti Pagarian ti Dios ti minilion a tattao manipud iti amin a nasion tapno masursuroda ti daldalan ti Dios. (Mateo 24:14) Daytanto ti mangsalaknib iti “dakkel a bunggoy” dagiti nasungdo a pasurot ni Jesus inton dadaelenna ti agdama a dakes a sistema ti bambanag ditoy daga.—Basaem ti Apocalipsis 7:9, 10, 13-17.
Bayat ti 1,000 a tawen, ti Pagarian in-inutto a pagbalinenna a paraiso ti daga. Kamaudiananna, isublinto ni Jesus ti Pagarian ken Amana. (1 Corinto 15:24-26) Adda kadi am-ammom a kayatmo a pangibagaan maipapan iti Pagarian ti Dios?—Basaem ti Salmo 37:10, 11, 29.
Para iti kanayonan nga impormasion, kitaem ti kapitulo 8 ken 9 daytoy a libro, Ania a Talaga ti Isursuro ti Biblia?, nga impablaak dagiti Saksi ni Jehova.
[Footnote]
a Tapno maammuam no kasano a ti tawen 1914 ti ipatuldo ti padto ti Biblia, kitaem ti panid 215-218 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.