Wuhrẹ No Ẹme Ọghẹnẹ Ze

Eme Họ Uvie Ọghẹnẹ?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Eme họ Uvie Ọghẹnẹ?

Uvie Ọghẹnẹ yọ egọmeti nọ a ro mu evaọ obọ odhiwu. O te rehọ ẹta egọmeti nọ i kiọkọ kpobi je ru nọ a ti ro ru oreva Ọghẹnẹ evaọ odhiwu gbe otọakpọ. Fikiere, Uvie Ọghẹnẹ o te jọ ifue orọ emamọ egọmeti nọ ma gwọlọ.—Se Daniẹl 2:44; Matiu 6:9, 10.

Uvie u re wo ovie nọ o re su ei. Jihova ọ rehọ Ọmọ riẹ Jesu mu re ọ jọ Ovie ọrọ Uvie Riẹ.—Se Luk 1:30-33.

2. Fikieme Jesu ọ rọ rrọ Osu nọ o fo?

Ọmọ Ọghẹnẹ yọ Ovie nọ o fo keme ọ rrọ wowou, o dikihẹ ga kẹ oware nọ u kiehọ, o te je wo ogaga nọ o re ro fi obọ họ kẹ ahwo. (Matiu 11:28-30) Nọ a kpare Jesu no uwhu ze, o tovrẹ kpobọ odhiwu je muhọ ẹhẹrẹ evaọ obọze Jihova. (Ahwo Hibru 10:12, 13) Ukuhọ riẹ, Ọghẹnẹ ọ tẹ kẹe udu inọ o muhọ esu evaọ obọ odhiwu.—Se Daniẹl 7:13, 14.

3. Amono a ti lele Jesu su?

Ọghẹnẹ ọ salọ utu ahwo jọ nọ a se “otu erezi” na re a lele Jesu su evaọ obọ odhiwu. (Daniẹl 7:27) Ahwo ọsosuọ nọ a salọ evaọ otu erezi nana họ ikọ Jesu nọ i wo ẹrọwọ. Rite oke mai na, Jihova ọ gbẹ be salọ ezae gbe eyae nọ i wo ẹrọwọ nọ e te jọ usu erezi na. Wọhọ Jesu, a te kpare ahwo nana no uwhu ze evaọ ugboma ẹzi.—Se Jọn 14:1-3; 1 Ahwo Kọrint 15:42-45.

Bro ahwo a bi kpohọ odhiwu? Jesu o se rai “uthuru okakao.” (Luk 12:32) Unu rai kpobi o te jọ idu udhuhrẹ gbe ene (144,000), yọ a ti lele Jesu su otọakpọ na.—Se Eviavia 5:9, 10; 14:1.

  4. Oke vẹ Uvie Ọghẹnẹ u ro muhọ esuo?

Jesu o zihe ruọ Ovie evaọ ukpe 1914. * Nọ a nwane rehọ iẹe mu no, o te le Setan avọ ikọ-imuomu riẹ ziọ otọakpọ. (Eviavia 12:7-10, 12) Anwọ oke yena ze, ebẹbẹ ohwo-akpọ i bi dhe ebuebu. Ẹmo, etọ-nuhu, ohọo, ẹyao, gbe seuziba-ekoko yọ abọjọ oka nọ u dhesẹ nọ edẹ urere eyero akpọ nana ma rrọ na. (2 Timoti 3:1-5) U fo nọ ahwo kpobi nọ a gwọlọ wo erere no esuo Uvie Ọghẹnẹ ze a re wuhrẹ epanọ a rẹ rọ jọ ilele Ovie na, Jesu.—Se Luk 21:7, 10, 11, 31, 34, 35.

5. Eme Uvie Ọghẹnẹ u bi rugba?

Enẹna, Uvie Ọghẹnẹ o bẹ rọ ẹkwoma usiuwoma ota akpọ-soso fi obọ họ kẹ ima ahwo buobu evaọ erẹwho kpobi wuhrẹ kpahe idhere Ọghẹnẹ. (Matiu 24:14) Uvie na o te thọ “otu obuobu” ọrọ ahwo nọ a roma kpotọ kẹ Jesu evaọ oke nọ o te raha eyero omuomu nana.—Se Eviavia 7:9, 10, 13-17.

Evaọ etoke ikpe odu ọvo (1,000), Uvie na o te rọ ẹmẹrera ru otọakpọ na zihe ruọ aparadase. Ukuhọ riẹ Jesu o ve ti zihe Uvie na kẹ Ọsẹ riẹ. (1 Ahwo Kọrint 15:24-26) Kọ whọ riẹ ohwo jọ nọ whọ gwọlọ vuẹ kpahe Uvie Ọghẹnẹ?—Se Olezi 37:10, 11, 29.

Rọkẹ evuẹ efa, rri uzou avọ 8 gbe orọ avọ 9 orọ obe nana, Eme Ebaibol na O Gine Wuhrẹ? onọ Isẹri Jihova a kere.

[Oruvẹ-obotọ]