Longuka na Ndinga ya Nzambi

Kimfumu ya Nzambi Kele Inki?

Disolo yai kebasisaka bangyufula yina ziku nge mekudiyulaka mpi yo kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

1. Kimfumu ya Nzambi kele inki?

Kimfumu ya Nzambi kele luyalu ya zulu. Yo tayinga baluyalu yonso yankaka mpi tasala nde lukanu ya Nzambi kusalama na zulu mpi na ntoto. Yo yina, Kimfumu ya Nzambi talungisa mpusa yina beto kevandaka ti yo ya luyalu mosi ya mbote.​—Tanga Daniele 2:44; Matayo 6:9, 10.

Kimfumu fwete vanda ti ntotila. Yehowa meponaka Mwana na yandi, Yezu, na kuvanda Ntotila ya Kimfumu na yandi.​—Tanga Luka 1:30-33.

2. Sambu na inki Yezu kele Mfumu yina mefwana?

Mwana ya Nzambi kele Ntotila ya mefwana sambu yandi kele muntu ya bumbote, yandi kekangamaka na mambu ya mbote, mpi yandi kele ti ngolo ya kusadisa bantu. (Matayo 11:28-30) Na nima ya lufutumuku na yandi, Yezu kumataka na zulu mpi yantikaka na kuvingila na diboko ya kitata ya Yehowa. (Baebreo 10:12, 13) Nsukansuka, Nzambi kupesaka yandi kiyeka ya kuyantika kuyala tuka na zulu.​—Tanga Daniele 7:13, 14.

3. Banani tayala ti Yezu?

Kibuka mosi yina Biblia kebingaka basantu, yina Nzambi meponaka, tayala ti Yezu na zulu. (Daniele 7:27) Bantu ya ntete yina kuponamaka sambu na kuvanda basantu kuvandaka bantumwa ya kwikama ya Yezu. Yehowa kelanda na kupona tii bubu yai babakala mpi bankento ya kwikama sambu na kuvanda basantu. Bonso Yezu, bo kefutumukaka ti nitu ya kimpeve.​—Tanga Yoane 14:1-3; 1 Korinto 15:42-45.

Bantu ikwa takwenda na zulu? Yezu kubingaka bo “kibuka ya fioti.” (Luka 12:32, NW) Na nsuka, bo yonso tavanda bantu 144 000, mpi bo tayala nsi-ntoto kumosi ti Yezu.​—Tanga Kusonga 5:9, 10; 14:1.

  4. Inki ntangu Kimfumu ya Nzambi kuyantikaka kuyala?

Yezu kukumaka Ntotila na mvu 1914. * Mwa ntangu fyoti na nima, yandi losaka Satana mpi bampeve na yandi ya mbi na ntoto. (Kusonga 12:7-10, 12) Yantika ntangu yina, bampasi ya bantu mekumaka mingi mpenza. Bitumba, kunikana ya ntoto, nzala, mpi kukonda kulemfukila bansiku mekumaka kidimbu ya kemonisaka nde ngidika ya bima ya ntangu yai kekwendaka na nsuka. (2 Timoteo 3:1-5) Bantu yonso yina kezola kubaka balusakumunu ya Kimfumu ya Nzambi, fwete longuka mutindu ya kukuma balongoki ya Ntotila Yezu.​—Tanga Luka 21:7, 10, 11, 31, 34, 35.

5. Kimfumu ya Nzambi kesala nki mambu?

Na nsadisa ya kisalu ya kusamuna yina kesalama na nsi-ntoto ya mvimba, Kimfumu ya Nzambi mesadisaka bamilio ya bantu ya makanda yonso na kulonguka banzila ya Nzambi. (Matayo 24:14) Kimfumu ya Nzambi tatanina ‘kibuka ya nene’ ya bantu yina kele ya kwikama na Kimfumu yango, ntangu yo tafwa ngidika ya bima yai ya mbi ya nsi-ntoto.​—Tanga Kusonga 7:9, 10, 13-17.

Na nsungi ya bamvula 1 000, Kimfumu ya Nzambi takumisa nsi-ntoto ya mvimba paladisu malembe-malembe. Na nsuka, Yezu tavutula Kimfumu na Tata na yandi. (1 Korinto 15:24-26) Keti nge mezaba muntu mosi yina nge tazola kuzabisa mambu ya metala Kimfumu ya Nzambi?​—Tanga Nkunga 37:10, 11, 29.

Sambu na kuzaba mambu mingi, tala kapu 8 mpi 9 ya mukanda yai, Inki Biblia Kelongaka Mpenza?, yina Bambangi ya Yehowa mebasisaka.

[Noti na nsi ya lutiti]