តើរាជាណាចក្ររបស់ព្រះជាអ្វី?
សូមរៀនពីបណ្ដាំរបស់ព្រះ
តើរាជាណាចក្ររបស់ព្រះជាអ្វី?
អត្ថបទនេះលើកឡើងនូវសំណួរមួយចំនួនដែលអ្នកប្រហែលជាធ្លាប់សួរ ហើយបង្ហាញចម្លើយដែលអ្នកអាចអានពីគម្ពីររបស់អ្នក។ សាក្សីព្រះយេហូវ៉ានឹងរីករាយពិភាក្សាចម្លើយទាំងនេះជាមួយនឹងអ្នក។
១. តើរាជាណាចក្ររបស់ព្រះជាអ្វី?
រាជាណាចក្ររបស់ព្រះជារដ្ឋាភិបាលមួយដែលស្ថិតនៅស្ថានសួគ៌។ រដ្ឋាភិបាលនេះនឹងគ្រប់គ្រងជំនួសរដ្ឋាភិបាលទាំងឡាយ ហើយនឹងធ្វើឲ្យបំណងប្រាថ្នារបស់ព្រះបានសម្រេចនៅផែនដីនិងនៅស្ថានសួគ៌។ ដូច្នេះ រាជាណាចក្ររបស់ព្រះជារដ្ឋាភិបាលដែលយើងត្រូវការ។—សូមអាន ដានីយ៉ែល ២:៤៤; ម៉ាថាយ ៦:៩, ១០
រាជាណាចក្ររបស់ព្រះត្រូវតែមានស្តេច។ ព្រះយេហូវ៉ាបានរើសតាំងលោកយេស៊ូដែលជាបុត្ររបស់លោកដើម្បីធ្វើជាស្តេចក្នុងរាជាណាចក្រនេះ។—សូមអាន លូកា ១:៣០-៣៣
២. ហេតុអ្វីលោកយេស៊ូជាអ្នកគ្រប់គ្រងដែលល្អបំផុត?
បុត្ររបស់ព្រះជាស្តេចដ៏ល្អបំផុត ពីព្រោះលោកមានចិត្តសប្បុរស គាំទ្រអ្វីដែលត្រឹមត្រូវ និងមានឫទ្ធានុភាពគ្រប់គ្រាន់ដើម្បីជួយមនុស្សជាតិ។ (ម៉ាថាយ ១១:២៨-៣០) ក្រោយពេលដែលព្រះប្រោសលោកឲ្យរស់ឡើងវិញ លោកយេស៊ូបានឡើងទៅស្ថានសួគ៌ ហើយរង់ចាំនៅខាងស្ដាំដៃនៃព្រះយេហូវ៉ា។ (ហេប្រឺ ១០:១២, ១៣) នៅទីបំផុត ព្រះបានឲ្យលោកមានឫទ្ធានុភាពដើម្បីចាប់ផ្ដើមគ្រប់គ្រងនៅស្ថានសួគ៌។—សូមអាន ដានីយ៉ែល ៧:១៣, ១៤
៣. តើអ្នកណានឹងគ្រប់គ្រងជាមួយនឹងលោកយេស៊ូ?
មនុស្សមួយក្រុមដែលហៅថា«ពួកបរិសុទ្ធ»បានត្រូវព្រះជ្រើសរើសឲ្យគ្រប់គ្រងជាមួយនឹងលោកយេស៊ូនៅស្ថានសួគ៌។ (ដានីយ៉ែល ៧:២៧) មនុស្សមួយក្រុមដំបូងដែលព្រះជ្រើសរើសធ្វើជាពួកបរិសុទ្ធគឺជាពួកសាវ័កដ៏ស្មោះត្រង់របស់លោកយេស៊ូ។ ព្រះយេហូវ៉ាបានបន្តជ្រើសរើសបងប្អូនប្រុសស្រីដែលស្មោះត្រង់ឲ្យធ្វើជាពួកបរិសុទ្ធរហូតដល់សព្វថ្ងៃនេះ។ ដូចលោកយេស៊ូ ពួកគេនឹងរស់ឡើងវិញដោយមានរូបកាយជាវិញ្ញាណ។—សូមអាន យ៉ូហាន ១៤:១-៣; កូរិនថូសទី១ ១៥:៤២-៤៥
តើមានមនុស្សប៉ុន្មាននាក់នឹងឡើងទៅស្ថានសួគ៌? លោកយេស៊ូបានហៅពួកគេថា«ហ្វូងតូច»។ (លូកា ១២:៣២) ពួកគេនឹងមានចំនួន១៤៤.០០០នាក់ ហើយពួកគេនឹងគ្រប់គ្រងមកលើផែនដីជាមួយនឹងលោកយេស៊ូ។—សូមអាន ការបើកបង្ហាញ ៥:៩, ១០; ១៤:១
៤. តើរាជាណាចក្ររបស់ព្រះចាប់ផ្ដើមគ្រប់គ្រងនៅពេលណា?
លោកយេស៊ូបានក្លាយជាស្តេចនៅឆ្នាំ១៩១៤។ * មិនយូរក្រោយមក លោកបានបោះសាថាន និងពួកវិញ្ញាណកំណាចរបស់វាមកផែនដី។ (ការបើកបង្ហាញ ១២:៧-១០, ១២) តាំងពីពេលនោះមក មនុស្សជាតិមានបញ្ហាកាន់តែច្រើនឡើងៗ។ សង្គ្រាម ការរញ្ជួយដី ការអត់ឃ្លាន រោគរាតត្បាត និងការប្រឆាំងច្បាប់គឺជាសញ្ញាសម្គាល់ដែលបង្ហាញថារបៀបរបបនៃពិភពលោកនេះជិតដល់ទីបញ្ចប់ហើយ។ (ធីម៉ូថេទី២ ៣:១-៥) អស់អ្នកដែលចង់ទទួលប្រយោជន៍ពីរាជាណាចក្ររបស់ព្រះគួររៀនអំពីរបៀបដែលអាចក្លាយទៅជាអ្នកកាន់តាមលោកយេស៊ូ។—សូមអាន លូកា ២១:៧, ១០, ១១, ៣១, ៣៤, ៣៥
៥. តើរាជាណាចក្ររបស់ព្រះនឹងធ្វើអ្វីខ្លះ?
តាមរយៈកិច្ចការផ្សព្វផ្សាយនៅទូទាំងពិភពលោក រាជាណាចក្ររបស់ព្រះបានជួយមនុស្សរាប់លាននាក់ពីគ្រប់ជាតិសាសន៍ឲ្យរៀនអំពីព្រះ។ (ម៉ាថាយ ២៤:១៤) ពេលដែលរាជាណាចក្រនេះបំផ្លាញរបៀបរបបដ៏អាក្រក់នៃពិភពលោក នោះរាជាណាចក្រនេះនឹងការពារ«មនុស្សមួយក្រុមធំ»ដែលជាអ្នកកាន់តាមដ៏ស្មោះត្រង់របស់លោកយេស៊ូ។—សូមអាន ការបើកបង្ហាញ ៧:៩,១០, ១៣-១៧
ក្នុងអំឡុងពេល១.០០០ឆ្នាំ រាជាណាចក្រនេះនឹងធ្វើឲ្យផែនដីក្លាយទៅជាសួនឧទ្យានបន្ដិចម្ដងៗ។ នៅទីបំផុត លោកយេស៊ូនឹងប្រគល់រាជាណាចក្រនេះដល់បិតារបស់លោកវិញ។ (កូរិនថូសទី១ ១៥:២៤-២៦) បើអ្នកស្គាល់មនុស្សម្នាក់ដែលចាប់អារម្មណ៍អំពីរាជាណាចក្ររបស់ព្រះ ជាការល្អឲ្យអ្នកប្រាប់ពួកគេកុំខាន។—សូមអាន ទំនុកតម្កើង ៣៧:១០, ១១, ២៩
ដើម្បីទទួលព័ត៌មានបន្ថែម សូមមើលជំពូកទី៨និងទី៩នៃសៀវភៅនេះ តើព្រះគម្ពីរពិតជាបង្រៀនយ៉ាងណា? ដែលបានត្រូវបោះពុម្ពផ្សាយដោយសាក្សីព្រះយេហូវ៉ា។
[កំណត់សម្គាល់]
^ វគ្គ 13 ដើម្បីទទួលព័ត៌មានបន្ថែមនូវរបៀបដែលទំនាយក្នុងគម្ពីរបានបញ្ជាក់អំពីឆ្នាំ១៩១៤ សូមមើលសៀវភៅតើព្រះគម្ពីរពិតជាបង្រៀនយ៉ាងណា? ទំព័រ២៤៧-២៤៩ ដែលបោះពុម្ពផ្សាយដោយសាក្សីព្រះយេហូវ៉ា។