Wifunde mu Kinenwa kya Leza

Le Bulopwe bwa Leza I Bika?

Kino kishinte kipangula bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisamba nobe ano malondololo.

1. Le Bulopwe bwa Leza i bika?

Bulopwe bwa Leza i umbikalo wa mūlu. Busa kupingakena pa imbikalo yonso ne kulengeja kiswa-mutyima kya Leza kilongeke mūlu ne pano pa ntanda pene. Nanshi Bulopwe bwa Leza bo bukapwija kisakibwa kyetu kya kukimba umbikalo muyampe.—Tanga Danyele 2:44; Mateo 6:9, 10.

Bulopwe bufwaninwe kwikala na mulopwe. Yehova i mutonge wandi Mwana Yesu, ekale Mulopwe wa Bulopwe bwandi.—Tanga Luka 1:30-33.

2. Mwanda waka Yesu i Mulopwe mufwaninwe?

Mwanā Leza i Mulopwe mufwaninwe mwanda i muyampe, ulamete ku byobya byoloke, ne udi na bukomo bufike’po bwa kukwasha bantu. (Mateo 11:28-30) Yesu pa kupwa kusanguka, wākandile mūlu ne kushilula kwilaija ku kuboko kwa lundyo lwa Leza. (Bahebelu 10:12, 13) Mfulo mfulō, Leza wamupa lupusa lwa kushilula kubikala mūlu.—Tanga Danyele 7:13, 14.

3. I bāni bakwabo bakabikala na Yesu?

Kibumbo kitelwa bu “bapandulwemo” kitongelwe na Leza mwanda wa kubikala na Yesu mūlu. (Danyele 7:27) Bapandulwe’mo babajinji kutongwa bādi batumibwa ba kikōkeji ba Yesu. Yehova ukyendelela na kutonga bana-balume ne bana-bakaji ba kikōkeji bu bapandulwe’mo kufika ne dyalelo. Pamo bwa Yesu, basangulwanga na ngitu ya ku mushipiditu.—Tanga Yoano 14:1-3; 1 Kodinda 15:42-45.

I bantu banga le bakenda mūlu? Yesu wēbetyile amba i “kaluombe katyetye.” (Luka 12:32) Kibalwa kyabo kya mfulo i bantu 144000, ne bakaludika ntanda pamo na Yesu.—Tanga Kusokwelwa 5:9, 10; 14:1.

  4. Le Bulopwe bwa Leza bwashilwile kuludika kitatyi’ka?

Yesu wabikele bu Mulopwe mu 1914. * Kitatyi kityetye pa kupita’po, waelele Satana ne bademona bandi pano panshi. (Kusokwelwa 12:7-10, 12) Tamba penepa, makambakano a muzo wa muntu abavudila’ko mpata. Mavita, bintenshi, bipupo bya nzala ne bya mbá ne kujilula kwa bijila bibadilwa mu kiyukeno kilombola amba ino ngikadilo ya bintu ke idi mu mafuku ayo a mfulo. (2 Temote 3:1-5) Bonso basaka kumwena mu Bulopwe bwa Leza bafwaninwe kwifunda mwa kwikadila balondi ba Yesu, Mulopwe.—Tanga Luka 21:7, 10, 11, 31, 34, 35.

5. Le i bika bikafikidija Bulopwe bwa Leza?

Kupityila ku mwingilo wa ntanda yonso wa busapudi, Bulopwe bwa Leza ke bupwe kala kukwasha midiyo ne midiyo ya bantu ba mizo yonso ifunde mashinda a Leza. (Mateo 24:14) Bukakinga “kibumbo kikatampe” kya babikalwa ba dikōkeji ba Yesu kitatyi kyobukonakanya ino ngikadilo mibi ya bintu pano pa ntanda.—Tanga Kusokwelwa 7:9, 10, 13-17.

Umbula bwa myaka 1000, Bulopwe bukālamuna bityebitye ntanda ke paladisa. Ku mfulo, Yesu ukalwija Shandi Bulopwe. (1 Kodinda 15:24-26) Le uyukile muntu kampanda okokeja kusapwila myanda itala Bulopwe bwa Leza?—Tanga Mitōto 37:10, 11, 29.

Shi usaka kuyukila’ko bintu bivule, tala shapita 8 ne 9 wa dino dibuku, Lelo I Bika Bine Bifundija Bible? dilupwilwe na Batumoni ba Yehova.

[Kunshi kwa dyani]