Wẽnnaam Gomdã sẽn yete

Wẽnnaam Rĩungã yaa bõe?

Sõs-kãngã pʋgẽ, b leokda sogsg nebã sẽn mi n sokd b mense, la b wilgd Biiblã zĩis nins d sẽn tõe n yã b leoorã. Y sã n dat t’a Zeova Kaset soab wa tɩ y sõs rẽ zugu, a na n saka ne yamleoogo.

1. Wẽnnaam Rĩungã yaa bõe?

Wẽnnaam Rĩungã yaa goosneema sẽn be saasẽ. A na n wa menesa ãdem-biisã goosneema rãmbã fãa, la a kɩt tɩ Wẽnnaam daabã maan saasẽ la tẽngã zug me. Dẽnd yaa Wẽnnaam Rĩungã la goosneema ning sẽn na n wa welg ninsaalbã zu-loeesã.—Karm-y Daniɛll 2:44; Matɩe 6:9, 10.

Rĩung fãa tara a rĩma. A Zeova yãka a Bi-ribl a Zezi t’a yaa a Rĩungã rĩma.—Karm-y Luk 1:30-33.

2. Bõe n kɩt t’a Zezi yaa rĩm-sõngo?

Wẽnnaam Bi-riblã yaa rĩm-sõngo, bala, a yaa nin-nana, n nong tɩrlem, la a tar pãng tɩ sek n tõe n sõng ãdem-biisã. (Matɩe 11:28-30) A Zezi vʋʋgrã poore, a leba saasẽ n tɩ zĩnd a Zeova rɩtgo, n da gũud wakat ning a sẽn na n kõ-a naamã. (Hebre dãmba 10:12, 13) Wakat kãng sẽn wa n ta, Wẽnnaam kɩtame t’a lebg rĩma, n sɩng naam dɩɩb saasẽ.—Karm-y Daniɛll 7:13, 14.

3. Neb n na n naag a Zezi n dɩ naamã bɩ?

Wẽnnaam yãka neb tɩ b na n kẽng saasẽ n tɩ rɩ naamã ne a Zezi. B boonda nin-kãens tɩ “Sẽn-ka-to neba.” (Daniɛll 7:27) Yɩɩ a Zezi tʋm-tʋmdbã la b yãk pipi tɩ b ra tõe n wa naag nin-kãensã. La hal n tãag rũndã, a Zeova ket n yãkda pagb la rap sẽn maand a raabã tɩ b tõe n zĩnd-b sʋka. B kũum poore, Wẽnnaam vʋʋgd-b lame tɩ b kẽng saasẽ wa a Zezi.—Karm-y Zã 14:1-3; 1 Korẽnt dãmb 15:42-45.

Yaa neb a wãn la sẽn na n kẽng saasẽ wã? A Zezi bool-b lame tɩ “wubr pa zemb bũmbu,” rat n yeel tɩ bãg-bila. (Luk 12:32, Sebr Sõngo) B sõorã zãng na n yɩɩ neb 144000, n na n tɩ naaga a Zezi n yɩ rĩm dãmb n dɩ naam dũniyã zugu.—Karm-y Wilgr 5:9, 10; 14:1.

  4. Wakat bʋg la Wẽnnaam Rĩungã sɩng a naamã rɩɩbo?

A Zezi lebga Rĩm yʋʋmd 1914 soabã pʋgẽ. * Rẽ poor bilfu, a riga a Sʋɩtãan ne a zĩn dãmbã saasẽ n sik tẽngã zugu. (Wilgri 12:7-10, 12) Rẽ tɛka, ninsaalbã zu-loees maneg n paasa wʋsgo. Wala makre, zabã, tẽn-digimdsã, komã, bãasã, n paas wẽn-kɩɩsgã sẽn be wã fãa wilgdame tɩ d vɩɩ dũni-kãngã yaoolem dayã sasa. (2 Tɩmote 3:1-5) Ned ning fãa sẽn dat n wa paam Wẽnnaam Rĩungã sẽn na n wa ne bark ninsã segd n bao n bãnga a sẽn tõe n maan to-to n paam n lebg a Zezi sẽn yaa Rĩmã karen-biiga.—Karm-y Luk 21:7, 10, 11, 31, 34, 35.

5. Bõe la Wẽnnaam Rĩungã maanda?

Ne koɛɛg b sẽn moond dũniyã gill zug maasem, Wẽnnaam Rĩungã zoe n sõngda neb milyõ rãmb sẽn yaa buud toɛy-toɛy neb tɩ b bãngd Wẽnnaam daabã. (Matɩe 24:14) Rĩungã sã n wa na n sãam a Sʋɩtãan dũniyã, a na n kogla neb ‘kʋʋng b sẽn pa tõe n sõd n sa’ sẽn yaa neb sẽn sakd a Zezi.—Karm-y Wilgr 7:9, 10, 13-17.

Rĩungã na n dɩka yʋʋm 1000 n tʋm n maneg tẽngã t’a fãa wa lebg arzãna. Rẽ poore, a Zezi na n lebsa Rĩungã a Ba wã. (1 Korẽnt dãmba 15:24-26) Yãmb me tõe n sõnga neb tɩ b bãng Wẽnnaam Rĩungã sẽn yaa a soabã masã.—Karm-y Yɩɩl Sõamyã 37:10, 11, 29.

Y sã n dat vẽnegr n paase, bɩ y karem Biiblã sɩd yetame tɩ bõe? sebrã sak a 8 ne a 9 soabã. A Zeova Kaset rãmbã n yiis-a.

[Tẽngr note]