Lilongesa Ondaka Ya Huku

Ouhamba wa Huku Oityi?

Onthele ei ipopia omapulo hamwe uhole okulinga, naapa movasi omakumbululo mo Mbimbiliya yove. Onombangi mba Jeova vena ehambu liokupopia nove konthele yao.

1. Ouhamba wa Huku Oityi?

Ouhamba wa Huku outumini ukahi keulu. Mauya okupingako omautumini aeho, nokufuisapo ehando lia Huku opo lilingwe pano pohi ngo keulu. Ngotyo, Ouhamba wa Huku mauya okufuisapo omasuka-suka etu outumini omuwa.—Tanga Daniel 2:44; Mateus 6:9, 10.

Ouhamba una okukala nohamba. Jeova waholovona Omona wae Jesus, opo akale Ohamba Youhamba Wae.—Tanga Lucas 1:30-33.

2. Jesus Omutumini waviuka mokonda yatyi?

Omona wa Huku Ohamba yaviuka, mokonda una oluembia, upamena muetyi tyaviuka, nokuna epondolo enene liokukuatesako ovanthu. (Mateus 11:28-30) Etyi Jesus atutila, walonda keulu ahimbika okukevelela kokulio kwa Jeova. (Hebreus 10:12, 13) Konyima, Huku emupe ounene opo ahimbike okutumina keulu.—Tanga Daniel 7:13, 14.

3. Olie vali makatumina na Jesus?

Jesus matumina keulu notyikundyi tyovanthu vaholovonwa na Huku vaihanwa okuti “onosandu.” (Daniel 7:27) Vaholovonwa tete opo vakale onosandu, ono apostolu mba Jesus mbekolelo. Jeova utualako okuholovona alo hono ovalume novakai vekolelo vakale onosandu. Nga Jesus, vekahi nokututiliswa nolutu luopamphepo.—Tanga João 14:1-3; 1 Coríntios 15:42-45.

Ovanthu veñgapi mavaende keulu? Jesus weveihana okuti o “kahambo okatutu.” (Lucas 12:32) Okuhulililako mavakatuuka 144.000, iya avakatumina na Jesus ovanthu kombanda yoohi.—Tanga Revelação [Apocalipse] 5:9, 10; 14:1.

  4. Onalupi Ouhamba wa Huku wahimbika okutumina?

Jesus walinga Ohamba mo 1914. a etyi palamba katutu, atahela pohi Satanasi novilulu viae. (Revelação 12:7-10, 12) Tunde opo, ononkhumbi mbovanthu mbukahi nokuliyawisa unene. Ovita, ovinimawe, nondyala, nomauvela, nonondyaya, vilinga onthele yenyingilikilo lilekesa okuti ouye uno ukahi kononthiki mbahulililako. (2 Timóteo 3:1-5) Aveho vahanda okukamona ouwa mauetwa Nouhamba wa Huku, vesukisa okulilongesa oñgeni mavakala ovalongwa vo Hamba Jesus.—Tanga Lucas 21:7, 10, 11, 31, 34, 35.

5. Oityi Ouhamba wa Huku ukahi nokulinga?

Novilinga viokuivisa ouye auho, Ouhamba wa Huku ukahiale nokukuatesako ovanthu ovanyingi vovilongo aviho okunoñgonoka onondyila mba Huku. (Mateus 24:14) Maukaamena “otyikumba otyinyingi” tyovalongwa va Jesus ovakuatyili, tyina mauhanyeko ouye uno wovivi.—Tanga Revelação 7:9, 10, 13-17.

Mokueenda kuomanima 1.000, Ouhamba wa Huku maukapilulula katutu-katutu oohi aikala omphangu yombembwa. Okunyima, Jesus makakondola Ouhamba pomaoko a He. (1 Coríntios 15:24-26) Okuti ove wii omunthu umwe uhanda okupopila konthele Yohamba wa Huku?—Tanga Salmo 37:10, 11, 29.

Opo unoñgonoke vali konthele yotyo, tala okapitulu 8 no 9 komukanda ou, walingua no Nombangi mba Jeova. Oityi Ombimbiliya Tyili Ilongesa?

[Onondaka Poutoi]